سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم منبر پر چڑھے تو آپ صلی اللہ علیہ وسلم نے فرمایا: ”آمین، آمین، آمین۔“ عرض کی گئی: یا رسول اللہ! جب آپ منبر پر چڑھے، تو آپ نے آمین، آمین، آمین کہا، اس کی وجہ کیا ہے؟ نبی اکرم صلی اللہ علیہ وسلم نے ارشاد فرمایا: ”جبرائیل میرے پاس آئے اور بولے: جو شخص رمضان کا مہینہ پائے اور اس کی مغفرت نہ ہو، وہ جہنم میں چلا جائے، تو اللہ تعالیٰ (اسے اپنی رحمت سے) دور کرے، آپ آمین کہیے تو میں نے آمین کہا۔ جب کوئی اپنے ماں باپ کو پائے یا ان دونوں میں سے کسی ایک کو پائے اور اس کے ساتھ اچھا سلوک نہ کرے اور مرنے کے بعد جہنم میں جائے تو اللہ تعالیٰ (اسے اپنی رحمت سے دور کرے) آپ آمین کہیے تو میں نے آمین کہا۔ (پھر جبرائیل نے کہا:) جس شخص کے سامنے آپ کا تذکرہ ہو اور وہ آپ پر درود نہ بھیجے، مرنے کے بعد جہنم میں چلا جائے تو اللہ تعالیٰ (اسے اپنی رحمت سے دور کرے) آپ آمین کہیے تو میں نے آمین کہا۔“ [صحیح ابن حبان/كتاب الرقائق/حدیث: 907]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”اس شخص کی ناک خاک آلود ہو جس کے سامنے میرا ذکر کیا جائے اور وہ مجھ پر درود نہ بھیجے۔ اس شخص کی ناک خاک آلود ہو، جو اپنے ماں باپ کو بڑھاپے میں پائے اور وہ دونوں اسے جنت میں داخل نہ کریں۔ اس شخص کی ناک خاک آلود ہو، جس کے سامنے رمضان کا مہینہ آ جائے اور پھر اس شخص کی مغفرت ہونے سے پہلے وہ مہینہ گزر جائے۔“ [صحیح ابن حبان/كتاب الرقائق/حدیث: 908]

سیدنا امام زین العابدین رضی اللہ عنہ اپنے والد (سیدنا امام حسین رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”بے شک بخیل وہ ہے جس کے سامنے کہ میرا ذکر کیا جائے اور وہ مجھ پر درود نہ بھیجے۔“ (امام ابن حبان رحمہ اللہ فرماتے ہیں:) یہ وہ سب سے مستند روایت ہے جو سیدنا امام حسین رضی اللہ عنہ سے منقول ہے، کیونکہ جس وقت نبی کریم صلی اللہ علیہ وسلم کا وصال ہوا اس وقت سیدنا امام حسین رضی اللہ عنہ کی عمر سات سال سے ایک ماہ کم تھی، وہ یوں کہ وہ سن 4 ہجری میں شعبان کے مہینے میں پیدا ہوئے تھے اور جب ان کی عمر چھ سال اور چند ماہ تھی اس وقت وہ عربی کی بہت ساری چیزیں یکے بعد دیگرے یاد کر رہے تھے۔ [صحیح ابن حبان/كتاب الرقائق/حدیث: 909]

سیدنا اوس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تمہارے دنوں میں سب سے زیادہ فضیلت والا، جمعے کا دن ہے، اس دن اللہ تعالیٰ نے سیدنا آدم علیہ السلام کو پیدا کیا، اسی دن ان کا انتقال ہوا، اسی دن پہلی مرتبہ پھونک ماری جائے گی، جب اسی دن قیامت آئے گی، تو تم اس دن میں مجھ پر بکثرت درود بھیجا کرو تمہارا درود میرے سامنے پیش کیا جائے گا۔“ انہوں نے عرض کی: ہمارا درود آپ کے سامنے کیسے پیش کیا جائے گا، جبکہ آپ بوسیدہ ہو چکے ہوں گے؟ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے زمین کے لیے یہ بات حرام قرار دی ہے کہ وہ ہمارے (یعنی انبیاء) کے جسم کو کھائے۔“ [صحیح ابن حبان/كتاب الرقائق/حدیث: 910]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قیامت کے دن میرے سب سے زیادہ قریب وہ شخص ہو گا، جو (دنیا میں) مجھ پر زیادہ درود بھیجتا تھا۔“ (امام ابن حبان رحمہ اللہ فرماتے ہیں: اس روایت میں اس بات کی دلیل موجود ہے کہ قیامت کے دن نبی اکرم صلی اللہ علیہ وسلم کے سب سے قریب علم حدیث کے ماہرین ہوں گے کیونکہ اس امت میں سے کوئی اور گروہ ان حضرات کے مقابلے میں نبی کریم صلی اللہ علیہ وسلم پر زیادہ درود نہیں بھیجتا ہو گا۔) [صحیح ابن حبان/كتاب الرقائق/حدیث: 911]

عبدالرحمن بن ابی لیلیٰ بیان کرتے ہیں کہ سیدنا کعب بن عجرہ رضی اللہ عنہ نے مجھ سے فرمایا: ”کیا میں تمہیں ایک تحفہ نہ دوں؟ نبی اکرم صلی اللہ علیہ وسلم ہمارے پاس تشریف لائے تو ہم نے عرض کی: یا رسول اللہ! ہمیں یہ تو پتہ چل گیا ہے کہ ہم آپ پر سلام کیسے بھیجیں، تو ہم آپ پر درود کیسے بھیجیں؟ نبی اکرم صلی اللہ علیہ وسلم نے فرمایا: ”تم یہ کہو: «اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى آلِ إِبْرَاهِيمَ إِنَّكَ حَمِيدٌ مَجِيدٌ، اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى آلِ إِبْرَاهِيمَ إِنَّكَ حَمِيدٌ مَجِيدٌ» ”اے اللہ! تو سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل پر درود نازل کر جس طرح تو نے سیدنا ابراہیم علیہ السلام کی آل پر درود نازل کیا۔ بے شک تو لائقِ حمد اور بزرگی کا مالک ہے، اے اللہ! تو سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل پر برکت نازل کر جس طرح تو نے سیدنا ابراہیم علیہ السلام کی آل پر برکت نازل کی تھی۔ بے شک تو لائقِ حمد اور بزرگی کا مالک ہے۔“““ [صحیح ابن حبان/كتاب الرقائق/حدیث: 912]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص مجھ پر ایک مرتبہ درود بھیجتا ہے، اللہ تعالیٰ اس کے بدلے میں اس کے لیے دس نیکیاں لکھ دیتا ہے۔“ [صحیح ابن حبان/كتاب الرقائق/حدیث: 913]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ کے کچھ مخصوص فرشتے گھومتے پھرتے رہتے ہیں، وہ میری امت کی طرف سے مجھے سلام پہنچاتے ہیں۔“ [صحیح ابن حبان/كتاب الرقائق/حدیث: 914]

عبداللہ بن ابوطلحہ اپنے والد (سیدنا ابوطلحہ رضی اللہ عنہ) کا یہ بیان نقل کرتے ہیں: ایک دن نبی اکرم صلی اللہ علیہ وسلم تشریف لائے تو آپ خوش تھے، آپ نے ارشاد فرمایا: ”ایک فرشتہ میرے پاس آیا اور بولا: اے محمد صلی اللہ علیہ وسلم ! اللہ تعالیٰ یہ فرما رہا ہے: کیا آپ اس بات سے راضی نہیں ہیں کہ میرے بندوں میں سے جو بھی ایک مرتبہ آپ پر درود بھیجے گا، تو میں اس کے بدلے میں اس پر دس مرتبہ رحمت نازل کروں گا اور جو بندہ ایک مرتبہ آپ پر سلام بھیجے گا، تو میں اس کے بدلے میں اس پر دس مرتبہ سلام نازل کروں گا؟ تو میں نے جواب دیا: جی ہاں! اے میرے پروردگار۔“ [صحیح ابن حبان/كتاب الرقائق/حدیث: 915]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے پاس تشریف لائے، تو میری بیوی نے بلند آواز میں آپ کی خدمت میں عرض کی: یا رسول اللہ! آپ میرے اور میرے شوہر کے لیے دعائے رحمت کیجیے، تو نبی اکرم صلی اللہ علیہ وسلم نے فرمایا: «صَلَّى اللّٰهُ عَلَيْكِ وَعَلَىٰ زَوْجِكِ» ”اللہ تم پر اور تمہارے شوہر پر رحمت نازل کرے۔“ [صحیح ابن حبان/كتاب الرقائق/حدیث: 916]