سیدنا ابن ابی اوفی رضی اللہ عنہما بیان کرتے ہیں کہ نبی اکرم صلی اللہ علیہ وسلم کی خدمت میں جب بھی کسی گھرانے کے لوگ اپنا صدقہ لے کر آتے تھے، تو آپ صلی اللہ علیہ وسلم ان کے لیے دعائے رحمت فرمایا کرتے تھے، میرے والد نے اپنا صدقہ آپ صلی اللہ علیہ وسلم کی خدمت میں پیش کیا، تو آپ صلی اللہ علیہ وسلم نے فرمایا: «اللَّهُمَّ صَلِّ عَلَىٰ آلِ أَبِي أَوْفَىٰ» ”اے اللہ! ابواوفی کی آل پر رحمت نازل فرما۔“ [صحیح ابن حبان/كتاب الرقائق/حدیث: 917]

سیدنا جابر بن عبداللہ رضی اللہ عنہما بیان کرتے ہیں: خاتون نے عرض کی: یا رسول اللہ! آپ میرے اور میرے شوہر کے لیے دعائے رحمت کیجیے، تو نبی اکرم صلی اللہ علیہ وسلم نے فرمایا: «صَلَّى اللّٰهُ عَلَيْكِ وَعَلٰى زَوْجِكِ» ”اللہ تعالیٰ تم پر اور تمہارے شوہر پر رحمت نازل کرے۔“ [صحیح ابن حبان/كتاب الرقائق/حدیث: 918]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب نصف رات (راوی کو شک ہے شاید یہ الفاظ ہیں:) دو تہائی رات گزر جاتی ہے، تو اللہ تعالیٰ آسمانِ دنیا کی طرف نزول فرماتا ہے اور پکارتا ہے: کون شخص مجھ سے مانگتا ہے میں اسے عطا کروں؟ کون ہے جو مجھ سے دعا مانگتا ہے میں اس کی دعا کو قبول کروں؟ کون ہے جو رزق مانگتا ہے میں اس کو رزق دوں؟ کون شخص ہے جو مغفرت مانگتا ہے میں اس کی مغفرت کروں؟ (نبی اکرم صلی اللہ علیہ وسلم فرماتے ہیں) یہ صبح صادق تک ہوتا رہتا ہے۔“ [صحیح ابن حبان/كتاب الرقائق/حدیث: 919]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ہمارا پروردگار ہر رات آسمانِ دنیا کی طرف اس وقت نزول کرتا ہے، جب ایک تہائی آخری رات باقی رہ جاتی ہے، وہ فرماتا ہے: کون مجھ سے دعا مانگتا ہے کہ میں اس کی دعا قبول کروں؟ کون مجھ سے مانگتا ہے کہ میں اس کو عطا کروں؟ کون مجھ سے مغفرت طلب کرتا ہے کہ میں اس کی مغفرت کروں؟“ (امام ابن حبان رحمہ اللہ فرماتے ہیں:) اللہ تعالیٰ کی صفات کی کیفیت بیان نہیں کی جا سکتی اور اسے مخلوق کی صفات پر قیاس نہیں کیا جا سکتا، تو اس طرح اللہ تعالیٰ مخلوق کی طرح دانتوں، زبان، ہونٹوں کے کسی آلے کے بغیر کلام کرنے والا ہے۔ ویسے ہمارا پروردگار ان جیسی چیزوں سے بلند و بالاتر ہے، تو یہ بات بھی جائز نہیں ہے کہ اس کے کلام کو ہمارے کلام پر قیاس کیا جائے، کیونکہ مخلوق کا کلام صرف آلات کی مدد سے پایا جاتا ہے اور اللہ تعالیٰ کسی آلے کے بغیر جیسے چاہے کلام کرتا ہے۔ اسی طرح وہ کسی آلے کے بغیر نزول کرتا ہے، وہ حرکت نہیں کرتا، ایک جگہ سے دوسری جگہ منتقل نہیں ہوتا ہے۔ اس کی سماعت اور بصارت کی بھی یہی کیفیت ہے، تو اس طرح یہ کہنا جائز نہیں ہے کہ اللہ تعالیٰ اسی طرح دیکھتا ہے، جس طرح ہم آنکھ کی پتلی، اس کی سیاہی اور سفیدی کی مدد سے دیکھتے ہیں، بلکہ اللہ تعالیٰ کسی آلے کے بغیر جیسے چاہتا ہے ویسے دیکھتا ہے اور وہ کانوں، سوراخوں اور پردوں کے بغیر سنتا ہے، بلکہ وہ کسی آلے کے بغیر جیسے چاہے سنتا ہے اور اسی طرح وہ کسی آلے کے بغیر جیسے چاہے نزول کرتا ہے۔ اس کے نزول کو مخلوق کے نیچے آنے پر قیاس نہیں کیا جا سکتا، جس طرح لوگوں کے نیچے کی طرف آنے کی کیفیت بیان کی جا سکتی ہے۔ ہمارا پروردگار اس چیز سے پاک اور بلند و برتر ہے کہ اس کی صفات کو مخلوق کی صفات میں سے کسی چیز کے مشابہ قرار دیا جائے۔ [صحیح ابن حبان/كتاب الرقائق/حدیث: 920]

سیدنا ابوسعید خدری اور سیدنا ابوہریرہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے فرمایا: ”اللہ تعالیٰ انتظار کرتا ہے، یہاں تک کہ جب ایک تہائی رات گزر جاتی ہے، تو ہمارا پروردگار آسمانِ دنیا کی طرف نزول فرماتا ہے، ہمارا پروردگار فرماتا ہے: کیا کوئی مغفرت طلب کرنے والا ہے؟ کیا کوئی توبہ کرنے والا ہے؟ کیا کوئی مانگنے والا ہے؟ کیا کوئی دعا کرنے والا ہے؟“ (نبی اکرم صلی اللہ علیہ وسلم نے فرمایا:) ”ایسا صبحِ صادق تک ہوتا رہتا ہے۔“ (امام ابن حبان رحمہ اللہ فرماتے ہیں:) امام مالک نے زہری کے حوالے سے جو روایت نقل کی ہے، جیسے ہم نے ذکر کیا ہے، جب ایک تہائی رات باقی رہ جاتی ہے، تو اللہ تعالیٰ نزول فرماتا ہے، اور ابواسحاق کی الاغر کے حوالے سے منقول روایت میں یہ بات مذکور ہے کہ وہ نزول فرماتا ہے، یہاں تک کہ رات کا ایک تہائی حصہ گزر جاتا ہے، تو اس میں اس بات کا احتمال موجود ہے کہ کچھ راتوں میں وہ اس وقت نزول فرماتا ہو جب رات کا ایک تہائی حصہ باقی رہ جاتا ہو اور بعض راتوں میں اس وقت نزول فرماتا ہو جب رات کا ایک تہائی ابتدائی حصہ رخصت ہو جاتا ہو۔ اس طرح دونوں روایات میں اختلاف اور تضاد نہیں رہے گا۔ [صحیح ابن حبان/كتاب الرقائق/حدیث: 921]

سیدہ عائشہ صدیقہ رضی اللہ عنہا بیان کرتی ہیں کہ سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: بے شک اللہ تعالیٰ آپ کو یہ حکم دیتا ہے کہ آپ ان کلمات کے ذریعے دعا مانگیں، میں آپ کو ان میں سے کوئی ایک چیز عطا کروں گا۔ «اللّٰهُمَّ إِنِّيْ أَسْأَلُكَ تَعْجِيْلَ عَافِيَتِكَ، أَوْ صَبْرًا عَلٰی بَلِيَّتِكَ، أَوْ خُرُوجًا مِنَ الدُّنْيَا إِلٰی رَحْمَتِكَ» ”اے اللہ! میں تجھ سے تیری جلدی عافیت یا تیری آزمائش پر صبر کرنے یا دنیا سے نکل کر تیری رحمت کی طرف جانے کا سوال کرتا ہوں۔“ [صحیح ابن حبان/كتاب الرقائق/حدیث: 922]

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم کو تین مرتبہ دعا مانگنا اور تین مرتبہ مغفرت طلب کرنا پسند تھا۔ [صحیح ابن حبان/كتاب الرقائق/حدیث: 923]

سیدنا انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”میں ایک دن میں ستر مرتبہ توبہ کرتا ہوں۔“ [صحیح ابن حبان/كتاب الرقائق/حدیث: 924]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”میں اللہ تعالیٰ سے مغفرت طلب کرتا ہوں اور میں ایک دن میں ستر سے زیادہ مرتبہ اس کی بارگاہ میں توبہ کرتا ہوں۔“ [صحیح ابن حبان/كتاب الرقائق/حدیث: 925]

سیدنا حذیفہ رضی اللہ عنہ بیان کرتے ہیں: میں ایک ایسا شخص تھا کہ میں اپنی بیوی کے ساتھ بد زبانی کیا کرتا تھا۔ میں نے عرض کی: یا رسول اللہ! مجھے یہ اندیشہ ہے کہ میری زبان مجھے جہنم میں داخل کر دے گی۔ نبی اکرم صلی اللہ علیہ وسلم نے فرمایا: ”پھر تم استغفار سے کیوں غافل ہو؟ میں روزانہ ایک سو مرتبہ اللہ تعالیٰ سے مغفرت طلب کرتا ہوں۔“ ابواسحاق کہتے ہیں: میں نے ابوبردہ کے سامنے یہ حدیث بیان کی تو انہوں نے کہا: (روایت میں یہ الفاظ بھی ہیں) ”میں توبہ کرتا ہوں“ (یعنی روزانہ سو مرتبہ توبہ اور استغفار کرتا ہوں)۔ [صحیح ابن حبان/كتاب الرقائق/حدیث: 926]