سیدنا عبداللہ بن عمر رضی اللہ عنہما بیان کرتے ہیں: ایک دن ہم عشا کی نماز کے لیے نبی اکرم صلی اللہ علیہ وسلم کا انتظار کرتے رہے۔ آپ صلی اللہ علیہ وسلم اس وقت ہمارے پاس تشریف لائے جب ایک تہائی رات گزر چکی تھی یا شاید اس کے کچھ بعد کی بات ہے، جب آپ صلی اللہ علیہ وسلم تشریف لائے، تو آپ صلی اللہ علیہ وسلم نے ارشاد فرمایا: ”تم لوگ نماز کا انتظار کر رہے ہو، تمہارے علاوہ کسی بھی دین کے ماننے والے اس کا انتظار نہیں کر رہے، اگر اس بات کا اندیشہ نہ ہوتا کہ یہ بات میری امت کے لیے مشکل ہوگی تو میں انہیں یہ نماز اس گھڑی میں پڑھاتا۔“ راوی بیان کرتے ہیں: پھر آپ صلی اللہ علیہ وسلم نے مؤذن کو حکم دیا، انہوں نے اقامت کہی تو نبی اکرم صلی اللہ علیہ وسلم نے نماز پڑھائی۔ [صحیح ابن حبان/كتاب الصلاة/حدیث: 1536]

ثابت بیان کرتے ہیں: لوگوں نے سیدنا انس بن مالک رضی اللہ عنہ سے دریافت کیا: کیا نبی اکرم صلی اللہ علیہ وسلم کی انگوٹھی تھی؟ تو انہوں نے بتایا کہ ایک مرتبہ نبی اکرم صلی اللہ علیہ وسلم نے رات کے وقت عشاء کی نماز ادا کرنے میں تاخیر کر دی، یہاں تک کہ نصف رات گزر گئی تو پھر آپ صلی اللہ علیہ وسلم تشریف لائے اور آپ صلی اللہ علیہ وسلم نے ارشاد فرمایا: ”لوگ نماز ادا کر چکے ہیں اور تم لوگ جب سے نماز کا انتظار کر رہے ہو، اس وقت سے نماز ہی کی حالت میں شمار ہو گے۔“ سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم کی چاندی کی انگوٹھی کی چمک کا منظر گویا کہ آج بھی میری نگاہ میں ہے۔ راوی بیان کرتے ہیں: سیدنا انس رضی اللہ عنہ نے اپنا بایاں ہاتھ اٹھا کر یہ بات کہی۔ [صحیح ابن حبان/كتاب الصلاة/حدیث: 1537]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اگر مجھے اپنی امت کے مشقت میں مبتلا ہونے کا اندیشہ نہ ہوتا، تو میں عشاء کی نماز کو ایک تہائی رات تک مؤخر کرتا۔“ [صحیح ابن حبان/كتاب الصلاة/حدیث: 1538]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اگر مجھے اپنی امت کے مشقت میں مبتلا ہونے کا اندیشہ نہ ہوتا، تو میں عشاء کو ایک تہائی رات تک (راوی کو شک ہے شاید یہ الفاظ ہیں) نصف رات تک مؤخر کرتا۔“ [صحیح ابن حبان/كتاب الصلاة/حدیث: 1539]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اگر مجھے اپنی امت کے مشقت میں مبتلا ہونے کا اندیشہ نہ ہوتا، تو میں انہیں وضو کے ہمراہ مسواک کرنے کا حکم دیتا اور عشاء کی نماز کو ایک تہائی رات تک (راوی کو شک ہے، شاید یہ الفاظ ہیں) نصف رات تک مؤخر کرتا۔“ [صحیح ابن حبان/كتاب الصلاة/حدیث: 1540]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”دیہاتی لوگ تمہاری نمازِ عشاء کے نام کے حوالے سے تم پر غالب نہ آ جائیں، وہ لوگ اسے «الْعَتَمَةُ» ”عتمہ“ کہتے ہیں، کیونکہ وہ اونٹوں (کی دیکھ بھال کے حوالے سے) تاخیر کرتے ہیں۔“ [صحیح ابن حبان/كتاب الصلاة/حدیث: 1541]

سیدنا ابوہریرہ رضی اللہ عنہ بیان کرتے ہیں کہ سیدنا صفوان بن معطل رضی اللہ عنہ نے نبی اکرم صلی اللہ علیہ وسلم سے سوال کیا، انہوں نے عرض کی: اے اللہ کے نبی! میں آپ سے ایک ایسی چیز کے بارے میں سوال کرنا چاہتا ہوں جس کے بارے میں آپ جانتے ہیں اور میں اس سے ناواقف ہوں، نبی اکرم صلی اللہ علیہ وسلم نے دریافت کیا: ”وہ کیا چیز ہے؟“ انہوں نے عرض کی: کیا رات اور دن کے اوقات میں کوئی گھڑی ایسی ہے، جس میں نماز ادا کرنا مکروہ ہو؟ نبی اکرم صلی اللہ علیہ وسلم نے جواب دیا: ”جی ہاں، جب تم صبح کی نماز ادا کر لو تو نماز کو ترک کر دو یہاں تک کہ سورج شیطان کے سینگ سے طلوع ہو جائے، پھر تم نماز ادا کر سکتے ہو اور نماز قبول کی جائے گی یہاں تک کہ سورج تمہارے سر کے اوپر نیزے کی طرح بالکل برابر ہو جائے، جب وہ تمہارے سر پر نیزے کی طرح ہو جائے، تو تم نماز کو ترک کر دو، کیونکہ یہ ایک ایسی گھڑی ہے، جس میں جہنم کو بھڑکایا جاتا ہے، اور اس کے گوشوں کو ملایا جاتا ہے، یہاں تک کہ سورج ڈھل جائے، جب وہ ڈھل جائے، تو نماز میں (فرشتوں کی) حاضری بھی ہوتی ہے، اور وہ قبول بھی ہوتی ہے، یہاں تک کہ جب تم عصر کی نماز ادا کر لو تو پھر نماز ادا کرنے سے رک جاؤ یہاں تک کہ سورج غروب ہو جائے۔“ [صحیح ابن حبان/كتاب الصلاة/حدیث: 1542]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”عصر کی نماز کے بعد سورج غروب ہونے تک اور صبح کی نماز کے بعد سورج نکلنے تک نماز ادا کرنے سے منع کیا ہے“۔ [صحیح ابن حبان/كتاب الصلاة/حدیث: 1543]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”عصر کی نماز کے بعد سورج غروب ہونے تک اور صبح کی نماز کے بعد سورج نکلنے تک نماز ادا کرنے سے“ منع کیا ہے۔ [صحیح ابن حبان/كتاب الصلاة/حدیث: 1544]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جب سورج کا کنارہ نکل آئے، تو تم نماز ادا نہ کرو یہاں تک کہ وہ ظاہر ہو جائے، پھر تم نماز ادا کرو۔ پھر جب سورج کا کنارہ ڈوب جائے، تم نماز ادا نہ کرو یہاں تک کہ وہ مکمل غروب ہو جائے، تو پھر تم نماز ادا کرو اور تم اپنی نماز کے لیے سورج کے طلوع ہونے یا سورج کے غروب ہونے کے وقت کو متعین نہ کرو (یعنی اس وقت میں نماز ادا نہ کرو) کیونکہ یہ شیطان کے دو سینگوں کے درمیان طلوع ہوتا ہے۔“ [صحیح ابن حبان/كتاب الصلاة/حدیث: 1545]