مغیث بن سمی بیان کرتے ہیں: سیدنا عبداللہ بن زبیر رضی اللہ عنہ نے ہمیں فجر کی نماز اندھیرے میں پڑھائی، میں سیدنا عبداللہ بن عمر رضی اللہ عنہما کی طرف متوجہ ہوا اور میں نے دریافت کیا: یہ کون سی نماز ہے؟ انہوں نے فرمایا: یہ نبی اکرم صلی اللہ علیہ وسلم اور سیدنا ابوبکر رضی اللہ عنہ اور سیدنا عمر رضی اللہ عنہ کی اقتدا میں ادا کی جانے والی ہماری نماز ہے، جب سیدنا عمر رضی اللہ عنہ شہید ہو گئے، تو سیدنا عثمان غنی رضی اللہ عنہ اسے روشنی میں ادا کرنے لگے۔ [صحیح ابن حبان/كتاب الصلاة/حدیث: 1496]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم اور سیدنا زید بن ثابت رضی اللہ عنہ کی خدمت میں سحری کا کھانا پیش کیا گیا، جب نبی اکرم صلی اللہ علیہ وسلم سحری کر کے فارغ ہوئے تو آپ صبح کی نماز کے لیے اٹھ گئے۔ راوی بیان کرتے ہیں: ہم نے سیدنا انس بن مالک رضی اللہ عنہ سے دریافت کیا کہ ان حضرات کے سحری سے فارغ ہونے اور فجر کی نماز کا آغاز کرنے کے درمیان کتنا فرق تھا؟ تو سیدنا انس رضی اللہ عنہ نے جواب دیا: جتنی دیر میں کوئی شخص پچاس آیات کی تلاوت کرتا ہے۔ [صحیح ابن حبان/كتاب الصلاة/حدیث: 1497]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب صبح کی نماز ادا کر لیتے تھے تو خواتین اپنی چادریں لپیٹ کر واپس آ جاتی تھیں اور اندھیرے کی وجہ سے انہیں پہچانا نہیں جا سکتا تھا۔ [صحیح ابن حبان/كتاب الصلاة/حدیث: 1498]

سیدہ عائشہ صدیقہ رضی اللہ عنہا بیان کرتی ہیں کہ مومن خواتین نبی اکرم صلی اللہ علیہ وسلم کی اقتدا میں اپنی چادریں لپیٹ کر فجر کی نماز ادا کرتی تھیں، پھر وہ اپنے گھروں کی طرف واپس آ جاتی تھیں۔ اندھیرے کی وجہ سے انہیں پہچانا نہیں جا سکتا تھا۔ [صحیح ابن حبان/كتاب الصلاة/حدیث: 1499]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم صبح کی نماز پڑھا دیتے تھے، پھر مومن خواتین اپنی چادروں میں (مسجد سے) باہر آ جاتی تھیں اور اندھیرے کی وجہ سے انہیں شناخت نہیں کیا جا سکتا تھا۔ [صحیح ابن حبان/كتاب الصلاة/حدیث: 1500]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم صبح کی نماز پڑھا لیتے تھے، تو خواتین اپنی چادریں لپیٹ کر واپس آ جاتی تھیں، اندھیرے کی وجہ سے انہیں پہچانا نہیں جا سکتا تھا۔ [صحیح ابن حبان/كتاب الصلاة/حدیث: 1501]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم تشریف لے گئے، آپ نے سورج ڈھل جانے کے بعد ظہر کی نماز پڑھائی۔ [صحیح ابن حبان/كتاب الصلاة/حدیث: 1502]

ابومنہال بیان کرتے ہیں کہ میرے والد گئے اور ان کے ہمراہ میں بھی گیا، ہم لوگ سیدنا ابوبرزہ اسلمی رضی اللہ عنہ کی خدمت میں حاضر ہوئے، میرے والد نے ان سے کہا: ”آپ ہمیں بتائیے کہ نبی اکرم صلی اللہ علیہ وسلم فرض نمازیں کس طرح ادا کرتے تھے؟“ تو انہوں نے بتایا: ”نبی اکرم صلی اللہ علیہ وسلم دوپہر کی نماز جسے تم ”پہلی“ کہتے ہو، اس وقت ادا کرتے تھے جب سورج ڈھل جاتا تھا اور آپ صلی اللہ علیہ وسلم عصر کی نماز اس وقت ادا کرتے تھے کہ اس کے بعد کوئی شخص مدینہ منورہ کے دور دراز کے کونے تک واپس جا سکتا تھا۔“ راوی بیان کرتے ہیں کہ مغرب کی نماز کے بارے میں انہوں نے جو بتایا تھا وہ میں بھول گیا ہوں، انہوں نے یہ بتایا کہ ”نبی اکرم صلی اللہ علیہ وسلم یہ بات پسند کرتے تھے کہ آپ صلی اللہ علیہ وسلم عشاء کی نماز کو تاخیر سے ادا کریں، یہ وہ نماز ہے جسے تم لوگ ”عتمہ“ کہتے ہو، نبی اکرم صلی اللہ علیہ وسلم اس سے پہلے سونے اور اس کے بعد بات چیت کرنے کو ناپسند کرتے تھے۔ صبح کی نماز پڑھ کر جب نبی اکرم صلی اللہ علیہ وسلم فارغ ہوتے تھے، تو کوئی شخص اپنے پاس بیٹھے شخص کو پہچان سکتا تھا حالانکہ نبی اکرم صلی اللہ علیہ وسلم ساٹھ سے لے کر ایک سو تک آیات کی تلاوت کرتے تھے۔“ [صحیح ابن حبان/كتاب الصلاة/حدیث: 1503]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک گرمی جہنم کی تپش کا حصہ ہے، تو تم نماز کو ٹھنڈے وقت میں ادا کرو۔“ [صحیح ابن حبان/كتاب الصلاة/حدیث: 1504]

سیدنا مغیرہ بن شعبہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کی اقتدا میں گرمی کے موسم میں ظہر کی نماز ادا کرتے تھے، آپ ہم سے یہ فرماتے تھے: ”نماز کو ٹھنڈے وقت میں ادا کرو، کیونکہ گرمی کی شدت جہنم کی تپش کا حصہ ہے۔“ [صحیح ابن حبان/كتاب الصلاة/حدیث: 1505]