سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں عصر کی نماز پڑھائی، جب آپ صلی اللہ علیہ وسلم نماز پڑھ کر فارغ ہوئے تو بنو سلمہ سے تعلق رکھنے والا ایک شخص آپ صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ! ہم اپنے اونٹ کو قربان کرنا چاہتے ہیں، ہم یہ چاہتے ہیں کہ آپ صلی اللہ علیہ وسلم بھی وہاں تشریف لائیں، تو نبی اکرم صلی اللہ علیہ وسلم نے فرمایا: ”جی ہاں۔“ پھر نبی اکرم صلی اللہ علیہ وسلم روانہ ہوئے اور آپ صلی اللہ علیہ وسلم کے ساتھ ہم بھی روانہ ہو گئے، تو ہم نے وہاں یہ صورت حال پائی کہ اونٹ ابھی قربان نہیں ہوا تھا، پھر اسے قربان کیا گیا، پھر اس کا گوشت کاٹا گیا، پھر اسے پکایا گیا اور سورج غروب ہونے سے پہلے ہم نے اسے کھا بھی لیا۔ [صحیح ابن حبان/كتاب الصلاة/حدیث: 1516]

سیدنا ابوامامہ بن سہل بن حنیف رضی اللہ عنہ بیان کرتے ہیں: ہم نے عمر بن عبدالعزیز رحمہ اللہ کی اقتدا میں ظہر کی نماز ادا کی، پھر ہم وہاں سے نکلے اور سیدنا انس بن مالک رضی اللہ عنہ کی خدمت میں حاضر ہوئے، تو ہم نے انہیں عصر کی نماز ادا کرتے ہوئے پایا، میں نے کہا: اے چچا! یہ کون سی نماز ہے، جو آپ نے ادا کی ہے؟ انہوں نے جواب دیا: ”یہ نبی اکرم صلی اللہ علیہ وسلم کی نماز ہے، وہ نماز جو ہم آپ صلی اللہ علیہ وسلم کی اقتدا میں ادا کیا کرتے تھے۔“ (امام ابن حبان رحمہ اللہ فرماتے ہیں:) عمرو بن یحییٰ مازنی نے خالد بن خلاد کے حوالے سے یہ روایت نقل کی ہے جس کا تعلق بنو نجار سے ہے۔ وہ بیان کرتے ہیں کہ میں نے عمر بن عبدالعزیز رحمہ اللہ کی اقتدا میں ظہر کی نماز ادا کی، پھر میں سیدنا انس بن مالک رضی اللہ عنہ کی خدمت میں حاضر ہوا تو میں نے انہیں عصر کی نماز ادا کرتے ہوئے پایا۔ انہوں نے نماز مکمل کی تو میں نے کہا: کہ آپ نے کون سی نماز ادا کی ہے؟ تو انہوں نے کہا: کہ عصر کی۔ میں نے کہا: ہم تو ابھی عمر بن عبدالعزیز رحمہ اللہ کی اقتدا میں ظہر کی نماز ادا کر کے آ رہے ہیں، تو انہوں نے کہا: ”میں نے نبی اکرم صلی اللہ علیہ وسلم کو اسی طرح یہ نماز ادا کرتے ہوئے دیکھا ہے، تو میں اسے کبھی ترک نہیں کروں گا۔“ [صحیح ابن حبان/كتاب الصلاة/حدیث: 1517]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم عصر کی نماز ادا کر لیتے تھے جبکہ سورج ابھی روشن اور چمکدار ہوتا تھا، پھر اس کے بعد کوئی شخص نواحی علاقے میں چلا جاتا اور وہاں پہنچ جاتا تو سورج ابھی بلند ہوتا تھا۔ [صحیح ابن حبان/كتاب الصلاة/حدیث: 1518]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم عصر کی نماز ادا کر لیتے تھے جبکہ سورج ابھی بلند اور چمک دار ہوتا تھا، پھر کوئی شخص ”عوالی“ کی طرف جاتا، وہ ”عوالی“ پہنچ جاتا اور سورج ابھی بھی بلند ہوتا تھا۔ [صحیح ابن حبان/كتاب الصلاة/حدیث: 1519]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم عصر کی نماز ادا کر لیتے تھے جبکہ سورج ابھی بلند اور چمکدار ہوتا تھا، پھر کوئی شخص ”عوالی“ کی طرف جاتا تو وہ ”عوالی“ پہنچ جاتا تھا اور سورج ابھی بلند ہوتا تھا۔ [صحیح ابن حبان/كتاب الصلاة/حدیث: 1520]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم عصر کی نماز ادا کر لیتے تھے جبکہ سورج (یعنی دھوپ) سیدہ عائشہ رضی اللہ عنہا کے حجرے میں ہوتی تھی، اور ان کے حجرے میں سے سایہ بلند نہیں ہوا ہوتا تھا۔ [صحیح ابن حبان/كتاب الصلاة/حدیث: 1521]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم عصر کی نماز ادا کر لیتے تھے جبکہ سورج ابھی بلند اور چمک دار ہوتا تھا، پھر کوئی شخص عوالی جاتا اور وہ عوالی پہنچ جاتا تھا جبکہ سورج ابھی بلند ہی ہوتا تھا۔ [صحیح ابن حبان/كتاب الصلاة/حدیث: 1522]

سیدنا سلمہ بن اکوع رضی اللہ عنہ بیان کرتے ہیں کہ نبی اکرم صلی اللہ علیہ وسلم مغرب کی نماز اس وقت ادا کرتے تھے جب سورج غروب ہو جاتا اور پردے کے پیچھے چھپ جاتا تھا۔ [صحیح ابن حبان/كتاب الصلاة/حدیث: 1523]

سیدنا جابر بن عبداللہ رضی اللہ عنہما بیان کرتے ہیں کہ سیدنا معاذ بن جبل رضی اللہ عنہ نبی اکرم صلی اللہ علیہ وسلم کی اقتداء میں مغرب کی نماز ادا کرتے تھے، پھر وہ اپنی قوم کی طرف واپس جا کر ان لوگوں کی امامت کرتے تھے۔ [صحیح ابن حبان/كتاب الصلاة/حدیث: 1524]

سلیمان بن بریدہ اپنے والد (سیدنا بریدہ رضی اللہ عنہ) کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے آپ صلی اللہ علیہ وسلم سے نماز کے وقت کے بارے میں دریافت کیا تو نبی اکرم صلی اللہ علیہ وسلم نے ارشاد فرمایا: ”تم ہمارے ساتھ ان دو اوقات میں نماز ادا کرو۔“ پس جب سورج ڈھل گیا، تو نبی اکرم صلی اللہ علیہ وسلم نے ظہر کی نماز ادا کی۔ راوی بیان کرتے ہیں: نبی اکرم صلی اللہ علیہ وسلم نے عصر کی نماز اس وقت ادا کی جبکہ سورج ابھی بلند، چمک دار اور روشن تھا، پھر آپ صلی اللہ علیہ وسلم نے سورج غروب ہو جانے کے بعد مغرب کی نماز ادا کی، شفق غروب ہو جانے کے بعد عشاء کی نماز ادا کی اور فجر کی نماز آپ صلی اللہ علیہ وسلم نے اندھیرے میں ادا کی۔ راوی بیان کرتے ہیں: اگلے دن آپ صلی اللہ علیہ وسلم نے سیدنا بلال رضی اللہ عنہ کو حکم دیا، انہوں نے ظہر کی نماز کی اقامت کہی اور (اسے) ٹھنڈے وقت میں ادا کیا، پھر آپ صلی اللہ علیہ وسلم کے حکم کے تحت عصر کے لیے اقامت اس وقت کہی جب سورج چمک دار تھا، نبی اکرم صلی اللہ علیہ وسلم نے اس نماز کو اس سے ذرا تاخیر سے ادا کیا تھا جس وقت میں آپ صلی اللہ علیہ وسلم نے اسے گزشتہ روز ادا کیا تھا، پھر آپ صلی اللہ علیہ وسلم کے حکم کے تحت مغرب کی نماز کے لیے اس وقت اقامت کہی جب شفق غروب ہونے والی تھی، آپ صلی اللہ علیہ وسلم کے حکم کے تحت انہوں نے عشاء کی نماز کے لیے اقامت ایک تہائی رات گزر جانے کے بعد کہی اور آپ صلی اللہ علیہ وسلم کے حکم کے تحت انہوں نے فجر کے لیے اقامت روشنی ہو جانے پر کہی، پھر نبی اکرم صلی اللہ علیہ وسلم نے دریافت فرمایا: ”نماز کے وقت کے بارے میں دریافت کرنے والا شخص کہاں ہے؟“ اس نے عرض کی: ”میں ہوں، یا رسول اللہ صلی اللہ علیہ وسلم !“ نبی اکرم صلی اللہ علیہ وسلم نے فرمایا: ”تمہاری نمازوں کا وقت ان کے درمیان ہے، جو تم نے دیکھا ہے۔“ [صحیح ابن حبان/كتاب الصلاة/حدیث: 1525]