سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب گرمی شدید ہو، تو نماز کو ٹھنڈے وقت میں ادا کرو، کیونکہ گرمی کی شدت جہنم کی تپش کا حصہ ہے۔“ [صحیح ابن حبان/كتاب الصلاة/حدیث: 1506]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب گرمی شدید ہو، تو نماز کو ٹھنڈے وقت میں ادا کرو، کیونکہ گرمی کی شدت جہنم کی تپش کا حصہ ہے۔“ [صحیح ابن حبان/كتاب الصلاة/حدیث: 1507]

سیدنا مغیرہ بن شعبہ رضی اللہ عنہ بیان کرتے ہیں: ہم لوگ دوپہر کے وقت نبی اکرم صلی اللہ علیہ وسلم کے ساتھ تھے۔ آپ نے ارشاد فرمایا: ”نماز کو ٹھنڈے وقت میں ادا کرو، کیونکہ گرمی کی شدت جہنم کی تپش کا حصہ ہے“۔ (امام ابن حبان رحمہ اللہ فرماتے ہیں:) اس روایت کو نقل کرنے میں اسحاق ازرق نامی راوی منفرد ہے۔ [صحیح ابن حبان/كتاب الصلاة/حدیث: 1508]

زید بن وہب بیان کرتے ہیں کہ انہوں نے سیدنا ابوذر غفاری رضی اللہ عنہ کو یہ بیان کرتے ہوئے سنا ہے: ہم لوگ نبی اکرم صلی اللہ علیہ وسلم کے ہمراہ سفر کر رہے تھے۔ مؤذن نے ظہر کی نماز کے لیے اذان دینے کا ارادہ کیا، تو نبی اکرم صلی اللہ علیہ وسلم نے اس سے فرمایا: ”ٹھنڈک ہو لینے دو۔“ پھر اس نے اذان دینے کا ارادہ کیا، تو نبی اکرم صلی اللہ علیہ وسلم نے اس سے فرمایا: ”ٹھنڈک ہو لینے دو۔“ ایسا دو مرتبہ یا شاید تین مرتبہ ہوا یہاں تک کہ جب ہم نے ٹیلوں کے سائے دیکھ لیے، تو نبی اکرم صلی اللہ علیہ وسلم نے فرمایا: ”گرمی کی شدت جہنم کی تپش کا حصہ ہے، تو جب گرمی شدید ہو، تو تم (ظہر کی) نماز ٹھنڈے وقت میں ادا کرو۔“ (امام ابن حبان رحمہ اللہ فرماتے ہیں:) ابوالحسن عبید بن حسن مہاجر کوفی ہے۔ [صحیح ابن حبان/كتاب الصلاة/حدیث: 1509]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب گرمی ہو، تو تم (ظہر کی) نماز کو ٹھنڈے وقت میں ادا کرو، کیونکہ گرمی کی شدت جہنم کی تپش کا حصہ ہے۔“ نبی اکرم صلی اللہ علیہ وسلم نے یہ بات ذکر کی کہ جہنم نے اپنے پروردگار کی بارگاہ میں شکایت کی، تو اس کے پروردگار نے اسے دو مرتبہ سانس لینے کی اجازت دی: ”ایک سانس گرمی کے موسم میں ہوتی ہے، اور ایک سانس سردی کے موسم میں ہوتی ہے۔“ [صحیح ابن حبان/كتاب الصلاة/حدیث: 1510]

سیدنا سلمہ بن اکوع رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کی اقتدا میں جمعہ کی نماز ادا کرتے تھے جبکہ دیواروں کا سایہ نہیں ہوتا تھا کہ اس کے سائے میں آیا جا سکے۔ [صحیح ابن حبان/كتاب الصلاة/حدیث: 1511]

ایاس بن سلمہ بن اکوع اپنے والد (سیدنا سلمہ بن اکوع رضی اللہ عنہ) کا یہ بیان نقل کرتے ہیں کہ ہم لوگ نبی اکرم صلی اللہ علیہ وسلم کی اقتدا میں سورج ڈھل جانے کے بعد جمعہ کی نماز ادا کرتے تھے اور پھر واپس آتے ہوئے سایہ ڈھونڈا کرتے تھے۔ [صحیح ابن حبان/كتاب الصلاة/حدیث: 1512]

امام جعفر صادق رحمہ اللہ اپنے والد (امام محمد باقر رحمہ اللہ) کے حوالے سے سیدنا جابر بن عبداللہ رضی اللہ عنہما کا یہ بیان نقل کرتے ہیں: ہم لوگ نبی اکرم صلی اللہ علیہ وسلم کی اقتدا میں جمعہ کی نماز ادا کرتے تھے، پھر ہم واپس آ کر اپنے پانی لانے والے اونٹوں کو آرام کرواتے تھے۔ (امام باقر رحمہ اللہ بیان کرتے ہیں) میں نے دریافت کیا: یہ کون سی گھڑی ہوتی تھی؟ تو انہوں نے بتایا: سورج ڈھلنے کی۔ [صحیح ابن حبان/كتاب الصلاة/حدیث: 1513]

خلاد بن خلاد انصاری بیان کرتے ہیں کہ ہم نے عمر بن عبدالعزیز رحمہ اللہ کی اقتدا میں ایک دن نماز ادا کی، پھر ہم سیدنا انس بن مالک رضی اللہ عنہ کی خدمت میں حاضر ہوئے تو ہم نے انہیں کھڑے ہو کر نماز ادا کرتے ہوئے پایا، جب انہوں نے نماز مکمل کر لی تو ہم نے دریافت کیا: اے ابوحمزہ! یہ آپ نے کون سی نماز ادا کی ہے؟ انہوں نے جواب دیا: ”عصر کی۔“ ہم نے کہا: ہم تو ابھی ظہر کی نماز پڑھ کر آ رہے ہیں جو ہم نے عمر بن عبدالعزیز کی اقتدا میں ادا کی ہے، تو سیدنا انس رضی اللہ عنہ نے بتایا: ”میں نے نبی اکرم صلی اللہ علیہ وسلم کو دیکھا ہے، وہ اس نماز کو اسی (وقت میں) طرح ادا کرتے تھے، میں تو اسے کبھی ترک نہیں کروں گا۔“ [صحیح ابن حبان/كتاب الصلاة/حدیث: 1514]

سیدنا رافع بن خدیج رضی اللہ عنہ بیان کرتے ہیں کہ ہم لوگ نبی اکرم صلی اللہ علیہ وسلم کی اقتدا میں عصر کی نماز ادا کر لیتے تھے، پھر اس کے بعد اونٹ کو قربان کیا جاتا اور اسے دس حصوں میں تقسیم کیا جاتا اور پھر پکا دیا جاتا تھا، تو ہم سورج غروب ہونے سے پہلے وہ پکا ہوا گوشت کھا لیتے تھے اور ہم نبی اکرم صلی اللہ علیہ وسلم کے زمانہ اقدس میں مغرب کی نماز ادا کرتے تھے اور نماز سے فارغ ہونے کے بعد کوئی شخص اپنے تیر کے گرنے کی جگہ کو دیکھ سکتا تھا (یعنی اس وقت اتنی روشنی ہوتی تھی)۔ [صحیح ابن حبان/كتاب الصلاة/حدیث: 1515]