سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا ابوبکر رضی اللہ عنہ سے دریافت کیا: ”تم وتر کب ادا کرتے ہو؟“ انہوں نے عرض کی: میں وتر ادا کرتا ہوں اور پھر سو جاتا ہوں (یعنی سونے سے پہلے ادا کرتا ہوں) تو نبی اکرم صلی اللہ علیہ وسلم نے فرمایا: ”تم نے احتیاطی طریقے کو اپنایا ہے“، پھر آپ صلی اللہ علیہ وسلم نے سیدنا عمر رضی اللہ عنہ سے دریافت کیا: ”تم وتر کب ادا کرتے ہو؟“ انہوں نے عرض کی: میں سو جاتا ہوں پھر بیدار ہو کر وتر ادا کر لیتا ہوں، نبی اکرم صلی اللہ علیہ وسلم نے فرمایا: ”تم نے قوی شخص کے طریقے کو اختیار کیا ہے“۔ [صحیح ابن حبان/كتاب الصلاة/حدیث: 2446]

غضیف بن حارث بیان کرتے ہیں: میں نے سیدہ عائشہ رضی اللہ عنہا سے کہا: اے ام المؤمنین! آپ کیا کہتی ہیں؟ نبی اکرم صلی اللہ علیہ وسلم وتر کی نماز رات کے ابتدائی حصے میں ادا کرتے تھے یا آخری حصے میں ادا کرتے تھے؟ سیدہ عائشہ رضی اللہ عنہا نے فرمایا: ”بعض اوقات آپ وتر رات کے ابتدائی حصے میں ادا کر لیتے تھے اور بعض اوقات آخری حصے میں ادا کرتے تھے۔“ میں نے کہا: «اللّٰهُ أَكْبَرُ» ”اللہ اکبر،“ «الْحَمْدُ لِلّٰهِ» ”ہر طرح کی حمد اللہ تعالیٰ کے لیے مخصوص ہے،“ جس نے اس معاملے میں گنجائش رکھی ہے۔ میں نے دریافت کیا: اے ام المؤمنین! آپ کیا کہتی ہیں؟ نبی اکرم صلی اللہ علیہ وسلم غسل جنابت رات کے ابتدائی حصے میں کرتے تھے یا آخری حصے میں کرتے تھے؟ سیدہ عائشہ رضی اللہ عنہا نے فرمایا: ”بعض اوقات آپ رات کے ابتدائی حصے میں غسل کر لیتے تھے اور بعض اوقات رات کے آخری حصے میں غسل کرتے تھے۔“ تو میں نے کہا: «اللّٰهُ أَكْبَرُ» ”اللہ اکبر،“ «الْحَمْدُ لِلّٰهِ» ”ہر طرح کی حمد اللہ تعالیٰ کے لیے مخصوص ہے،“ جس نے اس معاملے میں گنجائش رکھی ہے۔ میں نے دریافت کیا: اے ام المؤمنین! آپ کیا کہتی ہیں؟ کیا نبی اکرم صلی اللہ علیہ وسلم نماز ادا کرتے ہوئے بلند آواز سے قرأت کرتے تھے یا پست آواز میں قرأت کرتے تھے؟ تو سیدہ عائشہ رضی اللہ عنہا نے فرمایا: ”بعض اوقات آپ بلند آواز میں قرأت کرتے تھے اور بعض اوقات پست آواز میں کر لیتے تھے۔“ میں نے کہا: «اللّٰهُ أَكْبَرُ» ”اللہ اکبر! ہر طرح کی حمد اللہ تعالیٰ کے لیے مخصوص ہے،“ جس نے اس معاملے میں گنجائش رکھی ہے۔ [صحیح ابن حبان/كتاب الصلاة/حدیث: 2447]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم وتر کی پہلی رکعت میں سورۃ الاعلیٰ، دوسری رکعت میں سورۃ الکافرون اور تیسری رکعت میں سورۃ اخلاص، سورۃ الفلق اور سورۃ الناس کی تلاوت کرتے تھے۔ [صحیح ابن حبان/كتاب الصلاة/حدیث: 2448]

قیس بن طلق بیان کرتے ہیں: ایک دن میرے والد (طلق بن علی رضی اللہ عنہ) رمضان کے مہینے میں مجھ سے ملنے کے لیے آئے، وہ شام تک ہمارے ہاں رہے۔ انہوں نے افطاری کی، پھر اس رات انہوں نے ہمیں نماز پڑھائی تو وتر بھی ادا کر لیے، پھر وہ مسجد تشریف لے گئے، وہاں انہوں نے اپنے ساتھیوں کو بھی نماز پڑھائی۔ پھر انہوں نے ایک شخص کو آگے کیا اور بولے: تم اپنے ساتھیوں کو وتر پڑھا دو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: «لَا وِتْرَانِ فِي لَيْلَةٍ» ”ایک ہی رات میں دو مرتبہ وتر ادا نہیں کیے جاتے۔“ [صحیح ابن حبان/كتاب الصلاة/حدیث: 2449]

سیدنا ابی بن کعب رضی اللہ عنہ بیان کرتے ہیں کہ نبی اکرم صلی اللہ علیہ وسلم وتر کی نماز میں سورۃ الاعلیٰ، سورۃ الکافرون اور سورۃ الاخلاص کی تلاوت کیا کرتے تھے، جب آپ صلی اللہ علیہ وسلم سلام پھیرتے تھے، تو «سُبْحَانَ الْمَلِكِ الْقُدُّوسِ» ”پاک ہے وہ ذات بادشاہ ہے اور ہر عیب سے پاک ہے“ یہ تین مرتبہ پڑھتے تھے۔ [صحیح ابن حبان/كتاب الصلاة/حدیث: 2450]

سیدہ ام حبیبہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص فرض نماز کے علاوہ (روزانہ) بارہ رکعات ادا کرے، اللہ تعالیٰ اس کے لیے جنت میں گھر بنا دے گا۔“ [صحیح ابن حبان/كتاب الصلاة/حدیث: 2451]

عنبسہ بن ابوسفیان اپنی بہن سیدہ ام حبیبہ رضی اللہ عنہا کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص روزانہ بارہ رکعات (نفل) ادا کرے گا، اللہ تعالیٰ اس کے لیے جنت میں گھر بنا دے گا۔ چار رکعات ظہر سے پہلے، دو رکعات ظہر کے بعد، دو رکعات عصر سے پہلے، دو رکعات مغرب کے بعد اور دو رکعات فجر سے پہلے۔“ [صحیح ابن حبان/كتاب الصلاة/حدیث: 2452]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ اس شخص پر رحم کرے جو عصر سے پہلے چار رکعات ادا کرے۔“ (امام ابن حبان رحمہ اللہ فرماتے ہیں:) ابومثنیٰ نامی راوی کا نام مسلم بن مثنیٰ ہے، یہ اہل کوفہ سے تعلق رکھنے والے ثقہ راویوں میں سے ہیں۔ نبی اکرم صلی اللہ علیہ وسلم کا یہ فرمان: ”چار“ اس سے آپ کی مراد یہ ہے کہ دو سلاموں کے ساتھ ایسا کیا جائے کہ یعلیٰ بن عطا نے اپنی سند کے ساتھ سیدنا عبداللہ بن عمر رضی اللہ عنہما کے حوالے سے یہ روایت نقل کی ہے۔ نبی اکرم صلی اللہ علیہ وسلم نے یہ بات ارشاد فرمائی ہے: ”رات اور دن کی نمازیں دو، دو کر کے ادا کی جائیں گی۔“ [صحیح ابن حبان/كتاب الصلاة/حدیث: 2453]

سیدنا عبداللہ بن عمر رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کی اقتداء میں نماز ادا کی ہے، آپ صلی اللہ علیہ وسلم ظہر سے پہلے دو رکعات ادا کرتے تھے، اس کے بعد دو رکعات ادا کرتے تھے، مغرب کے بعد دو رکعات ادا کرتے تھے اور عشاء کے بعد دو رکعات ادا کرتے تھے۔ سیدنا عبداللہ بن عمر رضی اللہ عنہما بیان کرتے ہیں کہ سیدہ حفصہ رضی اللہ عنہا نے مجھے یہ بتایا ہے کہ نبی اکرم صلی اللہ علیہ وسلم صبح کی اذان ہو جانے کے بعد فجر کی نماز سے پہلے دو مختصر رکعات ادا کرتے تھے (سیدنا عبداللہ بن عمر رضی اللہ عنہما بیان کرتے ہیں: یہ ایسا وقت تھا، جس میں کوئی نبی اکرم صلی اللہ علیہ وسلم کی خدمت میں حاضر نہیں ہو سکتا تھا)۔ [صحیح ابن حبان/كتاب الصلاة/حدیث: 2454]

سیدنا عبداللہ بن زبیر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ہر فرض نماز سے پہلے دو رکعات ادا کی جانی چاہییں۔“ [صحیح ابن حبان/كتاب الصلاة/حدیث: 2455]