ابوالعالیہ براء بیان کرتے ہیں: ایک مرتبہ ابن زیاد نے ایک نماز تاخیر سے ادا کی تو عبداللہ بن صامت میرے پاس تشریف لائے، میں نے ان کے لیے کرسی رکھی وہ اس پر تشریف فرما ہوئے۔ میں نے ان کے سامنے ابن زیاد کے اس عمل کا تذکرہ کیا، تو وہ اپنے ہونٹ چبانے لگے، پھر انہوں نے اپنا ہاتھ میرے زانو پر مارا اور بولے: میں نے سیدنا ابوذر غفاری رضی اللہ عنہ سے ایک سوال کیا، تو انہوں نے میرے زانو پر اسی طرح ہاتھ مارا جس طرح میں نے تمہارے زانو پر ہاتھ مارا ہے، پھر انہوں نے بتایا میں نے نبی اکرم صلی اللہ علیہ وسلم سے سوال کیا تھا جس طرح تم نے مجھ سے سوال کیا ہے، تو نبی اکرم صلی اللہ علیہ وسلم نے میرے زانو پر اسی طرح ہاتھ مارا تھا جس طرح میں نے تمہارے زانو پر ہاتھ مارا ہے، پھر نبی اکرم صلی اللہ علیہ وسلم نے ارشاد فرمایا: ”(اس طرح کی صورت حال میں) تم نماز کو اس کے وقت پر ادا کر لو، اگر تمہیں لوگوں کے ساتھ نماز ملے، تو تم اسے بھی ادا کر لو، تم یہ نہ کہو: میں نماز ادا کر چکا ہوں اس لیے اب نہیں پڑھوں گا۔“ [صحیح ابن حبان/كتاب الصلاة/حدیث: 2406]

سیدنا ابو ایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”وتر حق ہیں، جو شخص پانچ وتر ادا کرنا چاہے وہ ادا کر لے، جو شخص تین وتر ادا کرنا چاہے وہ انہیں ادا کر لے، جو شخص ایک وتر ادا کرنا چاہے وہ اسے ادا کر لے اور جس شخص کے لیے اسے ادا کرنا دشواری کا باعث ہو وہ اشارے کے ساتھ اسے پڑھ لے۔“ [صحیح ابن حبان/كتاب الصلاة/حدیث: 2407]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص صبح صادق کو پا لے اور اس نے وتر ادا نہ کیے ہوں، تو اس کے وتر نہیں ہوتے۔“ [صحیح ابن حبان/كتاب الصلاة/حدیث: 2408]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے رمضان کے مہینے میں ہمیں آٹھ رکعات پڑھائیں، پھر آپ صلی اللہ علیہ وسلم نے وتر ادا کیے، پھر جب اگلی رات آئی تو ہم لوگ مسجد میں اکٹھے ہو گئے، ہمیں یہ امید تھی کہ آپ صلی اللہ علیہ وسلم ہمارے پاس تشریف لائیں گے۔ ہم اسی حالت میں رہے یہاں تک کہ صبح ہو گئی، پھر ہم آپ صلی اللہ علیہ وسلم کی خدمت میں حاضر ہوئے، ہم نے عرض کی: یا رسول اللہ صلی اللہ علیہ وسلم ! ہم مسجد میں اکٹھے ہوئے تھے، ہمیں یہ امید تھی کہ آپ صلی اللہ علیہ وسلم ہمیں نماز پڑھائیں گے۔ نبی اکرم صلی اللہ علیہ وسلم نے ارشاد فرمایا: ”مجھے یہ اندیشہ ہوا (راوی کو شک ہے شاید یہ الفاظ ہیں:) میں نے اس بات کو ناپسند کیا، تم پر وتر کو لازم کر دیا جائے۔“ (امام ابن حبان رحمہ اللہ فرماتے ہیں:) ان دونوں روایات کے الفاظ ایک دوسرے سے مختلف ہیں اور ان دونوں کا مفہوم بھی ایک دوسرے سے مختلف ہے کہ یہ دو مختلف رمضانوں میں دو مختلف حالتوں میں پیش آئی تھیں، ایسا نہیں ہے کہ ایک ہی مہینے میں ایک ہی حالت میں واقعہ پیش آیا تھا۔ [صحیح ابن حبان/كتاب الصلاة/حدیث: 2409]

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”وتر حق ہے، جو شخص چاہے وہ پانچ وتر ادا کرے اور جو چاہے تین ادا کرے اور جو چاہے وہ ایک وتر ادا کرے۔“ [صحیح ابن حبان/كتاب الصلاة/حدیث: 2410]

سیدنا ابوایوب انصاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”وتر حق ہیں، جو شخص پانچ وتر ادا کرنا چاہے وہ انہیں ادا کر لے، اور جو شخص تین وتر ادا کرنا چاہے وہ انہیں ادا کر لے، اور جو شخص ایک وتر ادا کرنا چاہے وہ اسے ادا کر لے، اور جو شخص انہیں ادا نہ کر سکتا ہو وہ انہیں اشارے کے ساتھ پڑھ لے۔“ [صحیح ابن حبان/كتاب الصلاة/حدیث: 2411]

سیدنا عبداللہ بن عمر رضی اللہ عنہما کے بارے میں یہ بات منقول ہے کہ وہ اونٹ پر ہی وتر ادا کر لیتے تھے اور یہ بات ذکر کرتے تھے کہ ”نبی اکرم صلی اللہ علیہ وسلم بھی ایسا کر لیا کرتے تھے۔“ [صحیح ابن حبان/كتاب الصلاة/حدیث: 2412]

سعید بن یسار بیان کرتے ہیں: میں سیدنا عبداللہ بن عمر رضی اللہ عنہما کے ساتھ مکہ کے راستے میں سفر کر رہا تھا، جب مجھے صبح صادق قریب ہونے کا اندیشہ ہوا تو میں سواری سے اترا اور میں نے وتر ادا کر لیے، پھر میں سیدنا عبداللہ بن عمر رضی اللہ عنہما کے پاس پہنچا تو انہوں نے مجھ سے دریافت کیا: ”تم کہاں رہ گئے تھے؟“ میں نے جواب دیا: مجھے یہ اندیشہ ہوا کہ صبح صادق ہونے والی ہے، اس لیے میں سواری سے اترا اور میں نے وتر ادا کر لیے، سیدنا عبداللہ بن عمر رضی اللہ عنہما نے دریافت کیا: ”کیا تمہارے لیے اللہ کے رسول صلی اللہ علیہ وسلم کے طریقے میں نمونہ نہیں ہے؟“ میں نے جواب دیا: جی ہاں ہے، انہوں نے فرمایا: ”نبی اکرم صلی اللہ علیہ وسلم اونٹ پر ہی وتر ادا کر لیتے تھے۔“ [صحیح ابن حبان/كتاب الصلاة/حدیث: 2413]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص کو صبح صادق ہو جائے اور اس نے وتر ادا نہیں کیے ہوں، تو اس کے وتر نہیں ہوتے۔“ [صحیح ابن حبان/كتاب الصلاة/حدیث: 2414]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ہمیں رمضان کے مہینے میں آٹھ رکعات پڑھائیں اور وتر ادا کیے اور جب اگلی رات آئی تو ہم لوگ مسجد میں اکٹھے ہو گئے۔ ہمیں یہ امید تھی کہ آپ صلی اللہ علیہ وسلم تشریف لا کر ہمیں نماز پڑھائیں گے، ہم وہاں ٹھہرے رہے یہاں تک کہ صبح ہو گئی، (اگلے دن) ہم نے عرض کی: یا رسول اللہ صلی اللہ علیہ وسلم ! ہمیں یہ امید تھی کہ آپ تشریف لا کر ہمیں نماز پڑھائیں گے۔ نبی اکرم صلی اللہ علیہ وسلم نے ارشاد فرمایا: ”میں نے اس بات کو ناپسند کیا (راوی کو شک ہے شاید یہ الفاظ ہیں:) مجھے اس بات کا اندیشہ ہوا کہ وتر تم پر لازم ہو جائیں گے۔“ [صحیح ابن حبان/كتاب الصلاة/حدیث: 2415]