سیدنا انس رضی اللہ عنہ بیان کرتے ہیں: ایک شخص نے عرض کی: یا رسول اللہ ( صلی اللہ علیہ وسلم )! اللہ تعالیٰ نے اپنے بندوں پر کتنی نمازیں فرض کی ہیں؟ نبی اکرم صلی اللہ علیہ وسلم نے فرمایا: ”پانچ نمازیں“ اس نے عرض کی: کیا ان سے پہلے یا ان کے بعد بھی کوئی چیز ہے؟ نبی اکرم صلی اللہ علیہ وسلم نے ارشاد فرمایا: ”اللہ تعالیٰ نے اپنے بندوں پر پانچ نمازیں فرض کی ہیں“ راوی کہتا ہے: اس شخص نے اللہ کے نام کی قسم اٹھائی، وہ ان میں کوئی اضافہ یا کوئی کمی نہیں کرے گا۔ نبی اکرم صلی اللہ علیہ وسلم نے ارشاد فرمایا: ”اگر اس نے سچ کہا ہے، تو یہ جنت میں داخل ہو جائے گا۔“ [صحیح ابن حبان/كتاب الصلاة/حدیث: 2416]

مخدجی بیان کرتے ہیں: ایک شخص نے سیدنا ابومحمد رضی اللہ عنہ سے، جو انصار سے تعلق رکھنے والے ایک صحابی ہیں، وتر کے بارے میں دریافت کیا، تو انہوں نے فرمایا: نماز کے فرض ہونے کی طرح وتر بھی فرض ہیں۔ وہ شخص سیدنا عبادہ بن صامت رضی اللہ عنہ کی خدمت میں حاضر ہوا، ان کے سامنے اس بات کا تذکرہ کیا گیا تو وہ بولے: سیدنا ابومحمد رضی اللہ عنہ نے غلط کہا ہے، میں نے یہ بات نبی اکرم صلی اللہ علیہ وسلم کو ارشاد فرماتے ہوئے سنا ہے: ”پانچ نمازیں ہیں جو اللہ تعالیٰ نے اپنے بندوں پر فرض کی ہیں، جو شخص ان کے حق کو کم سمجھتے ہوئے ان میں کوئی کمی نہیں کرے گا، تو اللہ تعالیٰ قیامت کے دن اس شخص کے لیے یہ عہد مقرر کرے گا کہ اسے جنت میں داخل کرے گا اور جو شخص انہیں ادا کرے گا اور ان کے حق کو کم سمجھتے ہوئے ان میں کمی کر دے، تو ایسے شخص کا اللہ تعالیٰ کی بارگاہ میں کوئی عہد نہیں ہے، اگر وہ چاہے گا تو اسے عذاب دے گا، اگر چاہے گا تو اس کی مغفرت کر دے گا۔“ [صحیح ابن حبان/كتاب الصلاة/حدیث: 2417]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”پانچ نمازیں، ایک جمعہ دوسرے جمعہ تک، ان کے درمیان میں ہونے والے گناہوں کا کفارہ بن جاتے ہیں جب تک کبیرہ گناہوں کا ارتکاب نہ کیا جائے۔“ [صحیح ابن حبان/كتاب الصلاة/حدیث: 2418]

سیدنا عبداللہ بن عباس رضی اللہ عنہما بیان کرتے ہیں کہ جب نبی اکرم صلی اللہ علیہ وسلم نے سیدنا معاذ رضی اللہ عنہ کو یمن بھیجا تو آپ نے ارشاد فرمایا: ”تم اہل کتاب سے تعلق رکھنے والے لوگوں کے پاس جا رہے ہو، تم نے سب سے پہلے انہیں اس بات کی دعوت دینی ہے، وہ اللہ تعالیٰ کی عبادت کریں، جب وہ اللہ تعالیٰ کی معرفت حاصل کر لیں، تو تم نے انہیں بتانا ہے، اللہ تعالیٰ نے ان پر دن اور رات میں پانچ نمازیں فرض کی ہیں، جب وہ ایسا کریں، تو تم نے انہیں بتانا ہے، اللہ تعالیٰ نے ان پر زکوۃ فرض کی ہے، جو ان کے اموال میں سے وصول کی جائے گی اور ان کے غریب لوگوں کی طرف لوٹا دی جائے گی، اگر وہ اس بارے میں تمہاری اطاعت کریں، تو تم ان سے زکوۃ کی وصولی کر لینا اور لوگوں کے عمدہ حاصل کرنے سے بچنے کی کوشش کرنا۔“ (امام ابن حبان رحمہ اللہ فرماتے ہیں:) اس نوعیت کی روایات سے اس بات پر استدلال کیا جا سکتا ہے کہ وتر فرض نہیں ہیں اور ہم نے جو چیز پہلے ذکر کی ہے اس میں بکثرت اس بات کا بیان موجود ہے جو اس شخص کو بے نیاز کر دے گا جسے اللہ تعالیٰ سیدھے راستے کی توفیق عطا کرے اور ہدایت کے راستے کی طرف اس کی راہنمائی کرے کہ وتر فرض نہیں ہے، کیونکہ نبی اکرم صلی اللہ علیہ وسلم نے سیدنا معاذ رضی اللہ عنہ کو یمن بھیجا تھا اور آپ نے دنیا سے تشریف لے جانے سے کچھ دن پہلے بھیجا تھا۔ نبی اکرم صلی اللہ علیہ وسلم نے انہیں یہ ہدایت کی تھی کہ ان لوگوں کو بتا دیں کہ ”اللہ تعالیٰ نے ان پر دن اور رات میں پانچ نمازیں فرض کی ہیں۔“ اگر وتر بھی فرض ہوتے یا اللہ تعالیٰ نے لوگوں کی نماز میں مزید کسی بات کا اضافہ کیا ہوتا جیسا کہ وہ شخص اس بات کا قائل ہے جو علم حدیث سے ناواقف ہے اور صحیح اور غیر مستند روایات کے درمیان تمیز نہیں کر سکتا، تو نبی اکرم صلی اللہ علیہ وسلم سیدنا معاذ بن جبل رضی اللہ عنہ کو یہ ہدایت کرتے کہ ”اللہ تعالیٰ نے ان پر چھ نمازیں فرض کی ہیں، پانچ نمازیں فرض نہیں کی ہیں“ تو ہم نے جو چیز ذکر کی ہے اس میں اس بات کا واضح بیان موجود ہے کہ وتر فرض نہیں ہیں۔ باقی توفیق اللہ تعالیٰ کی مدد سے حاصل ہو سکتی ہے۔ [صحیح ابن حبان/كتاب الصلاة/حدیث: 2419]

سیدہ عائشہ صدیقہ رضی اللہ عنہا بیان کرتی ہیں کہ جب نبی اکرم صلی اللہ علیہ وسلم بیمار ہوئے، تو آپ نے رات کے نوافل ادا نہیں کیے تھے، آپ نے اگلے دن، دن کے وقت بارہ رکعات ادا کی تھیں۔ [صحیح ابن حبان/كتاب الصلاة/حدیث: 2420]

سالم بن عبداللہ اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ نبی اکرم صلی اللہ علیہ وسلم اپنی سواری پر ہی نفل نماز ادا کر لیتے تھے، خواہ اس کا رخ کسی بھی سمت میں ہو آپ صلی اللہ علیہ وسلم وتر بھی اس پر ادا کر لیتے تھے، البتہ فرض نماز اس پر ادا نہیں کرتے تھے۔ سالم نامی راوی بیان کرتے ہیں کہ سیدنا عبداللہ بن عمر رضی اللہ عنہما بھی اپنی سواری پر رہتے ہوئے رات کے وقت نوافل ادا کر لیتے تھے حالانکہ وہ سواری چل رہی ہوتی تھی اور سیدنا عبداللہ بن عمر رضی اللہ عنہما اس بات کی پروا نہیں کرتے تھے کہ ان کا رخ کس طرف ہے۔ [صحیح ابن حبان/كتاب الصلاة/حدیث: 2421]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ایک رکعت وتر ادا کرتے تھے۔ [صحیح ابن حبان/كتاب الصلاة/حدیث: 2422]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ایک رکعت وتر ادا کرتے تھے۔ [صحیح ابن حبان/كتاب الصلاة/حدیث: 2423]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم ایک رکعت وتر ادا کرتے تھے۔ [صحیح ابن حبان/كتاب الصلاة/حدیث: 2424]

ثعلبہ زہدم بیان کرتے ہیں: ہم سعید بن عاص رضی اللہ عنہ کے ساتھ طبرستان میں موجود تھے، انہوں نے دریافت کیا: کیا آپ میں سے کسی نے نبی اکرم صلی اللہ علیہ وسلم کی اقتدا میں نمازِ خوف ادا کی ہے؟ سیدنا حذیفہ رضی اللہ عنہ نے جواب دیا، راوی بیان کرتے ہیں: پھر سیدنا حذیفہ رضی اللہ عنہ کھڑے ہوئے، انہوں نے اپنے پیچھے لوگوں کی دو صفیں بنائیں، ایک صف ان کے پیچھے کھڑی ہو گئی اور دوسری صف دشمن کے مقابلے میں کھڑی ہو گئی، انہوں نے اپنے پیچھے موجود لوگوں کو ایک رکعت پڑھائی، پھر یہ لوگ پلٹ کر ان لوگوں کی جگہ چلے گئے اور وہ لوگ ان کی جگہ آ گئے، تو انہوں نے انہیں بھی ایک رکعت پڑھائی اور ان حضرات نے اپنی نماز کو مکمل نہیں کیا (یعنی صرف ایک ہی رکعت ادا کی دوسری رکعت ادا نہیں کی)۔ [صحیح ابن حبان/كتاب الصلاة/حدیث: 2425]