سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم فجر کی دو رکعت سنت ادا کرتے ہوئے اتنا مختصر ادا کرتے تھے کہ میں یہ سوچتی تھی کہ کیا آپ صلی اللہ علیہ وسلم نے ان میں سورہ فاتحہ کی تلاوت کی ہے؟ [صحیح ابن حبان/كتاب الصلاة/حدیث: 2466]

سیدہ عائشہ صدیقہ رضی اللہ عنہا بیان کرتی ہیں: مؤذن جب فجر کی نماز کی پہلی اذان دے کر خاموش ہوتا تھا نبی اکرم صلی اللہ علیہ وسلم اٹھ کر دو مختصر رکعات فجر کی نماز سے پہلے ادا کر لیتے تھے، یہ صبح صادق ہو جانے کے بعد ادا کرتے تھے، پھر آپ صلی اللہ علیہ وسلم اپنے دائیں پہلو کے بل لیٹ جاتے تھے یہاں تک کہ مؤذن آپ صلی اللہ علیہ وسلم کو نماز قائم ہونے کی اطلاع دینے کے لیے آ جاتا تھا۔ [صحیح ابن حبان/كتاب الصلاة/حدیث: 2467]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جب کوئی شخص فجر کی دو رکعات سنت ادا کر لے، تو اسے دائیں پہلو کے بل لیٹ جانا چاہیے۔“ اس پر مروان نے ان سے کہا: کیا کسی شخص کے لیے یہ بات جائز ہے کہ وہ لیٹنے سے پہلے مسجد کی طرف چل پڑے؟ تو سیدنا ابوہریرہ رضی اللہ عنہ نے فرمایا: جی نہیں۔ راوی کہتے ہیں: اس بات کی اطلاع سیدنا ابن عمر رضی اللہ عنہما کو ملی تو وہ بولے: سیدنا ابوہریرہ رضی اللہ عنہ نے زیادہ سختی کر دی ہے۔ راوی کہتے ہیں: سیدنا عبداللہ بن عمر رضی اللہ عنہما سے دریافت کیا گیا: کیا سیدنا ابوہریرہ رضی اللہ عنہ جو کہہ رہے ہیں، کیا آپ اس میں سے کسی چیز کا انکار کرتے ہیں؟ انہوں نے جواب دیا: جی نہیں، لیکن انہوں نے ہم پر لازم ہونے والی چیزوں میں اضافہ کر دیا ہے، جب اس بات کی اطلاع سیدنا ابوہریرہ رضی اللہ عنہ کو ہوئی تو انہوں نے فرمایا: میرا گناہ صرف یہ ہے کہ میں نے کچھ چیزیں یاد رکھی ہیں جنہیں وہ بھول گئے ہیں۔ [صحیح ابن حبان/كتاب الصلاة/حدیث: 2468]

سیدنا عبداللہ بن عباس رضی اللہ عنہما بیان کرتے ہیں کہ صبح کی نماز کے لیے اقامت کہہ دی گئی، میں اس وقت دو رکعت (سنت) نماز ادا کرنے لگا تھا، نبی اکرم صلی اللہ علیہ وسلم نے میرا ہاتھ پکڑا اور فرمایا: ”کیا تم صبح کی نماز میں چار رکعات ادا کرو گے؟“ [صحیح ابن حبان/كتاب الصلاة/حدیث: 2469]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب نماز کے لیے اقامت کہہ دی جائے، تو صرف فرض نماز ادا کی جا سکتی ہے۔“ [صحیح ابن حبان/كتاب الصلاة/حدیث: 2470]

سیدنا قیس بن قہد رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کی اقتدا میں صبح کی نماز ادا کی، انہوں نے فجر کی دو رکعت سنتیں ادا نہیں کی تھیں جب نبی اکرم صلی اللہ علیہ وسلم نے سلام پھیرا، انہوں نے بھی نبی اکرم صلی اللہ علیہ وسلم کے ہمراہ سلام پھیرا، پھر وہ کھڑے ہوئے اور انہوں نے دو رکعت سنتیں ادا کر لیں، تو نبی اکرم صلی اللہ علیہ وسلم ان کی طرف دیکھتے رہے، لیکن آپ صلی اللہ علیہ وسلم نے اس حوالے سے ان پر انکار نہیں کیا۔ [صحیح ابن حبان/كتاب الصلاة/حدیث: 2471]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص نے فجر کی دو رکعت سنت ادا نہ کی ہوں وہ انہیں اس وقت ادا کر لے جس وقت سورج نکل آئے۔“ [صحیح ابن حبان/كتاب الصلاة/حدیث: 2472]

سالم اپنے والد سیدنا عبداللہ بن عمر رضی اللہ عنہما کا یہ بیان نقل کرتے ہیں: مجھے نبی اکرم صلی اللہ علیہ وسلم کے بارے میں یہ بات یاد ہے، آپ صلی اللہ علیہ وسلم ظہر سے پہلے دو رکعت، اس کے بعد دو رکعت، مغرب کے بعد دو رکعت اور عشاء کے بعد دو رکعت ادا کرتے تھے۔ سیدنا عبداللہ بن عمر رضی اللہ عنہما بیان کرتے ہیں: سیدہ حفصہ رضی اللہ عنہا نے مجھے یہ بات بتائی ہے کہ نبی اکرم صلی اللہ علیہ وسلم فجر سے پہلے بھی دو رکعت (سنت) ادا کرتے تھے، آپ صلی اللہ علیہ وسلم صبح صادق ہو جانے کے بعد انہیں ادا کرتے تھے۔ [صحیح ابن حبان/كتاب الصلاة/حدیث: 2473]

عبداللہ بن شقیق بیان کرتے ہیں: میں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی نماز کے بارے میں دریافت کیا، تو انہوں نے بتایا: نبی اکرم صلی اللہ علیہ وسلم ظہر سے پہلے چار رکعات، مغرب کے بعد دو رکعات اور عشاء کے بعد دو رکعات ادا کرتے تھے، اور رات کے وقت آپ صلی اللہ علیہ وسلم دو رکعات ادا کیا کرتے تھے۔ میں نے دریافت کیا: آپ صلی اللہ علیہ وسلم کھڑے ہو کر ادا کرتے تھے یا بیٹھ کر ادا کرتے تھے؟ تو انہوں نے بتایا: آپ صلی اللہ علیہ وسلم رات کے وقت بیٹھ کر طویل نماز ادا کرتے تھے اور کھڑے ہو کر بھی طویل نماز ادا کرتے تھے۔ میں نے دریافت کیا: جب آپ صلی اللہ علیہ وسلم کھڑے ہو کر نماز ادا کرتے تھے، تو آپ کیا کرتے تھے اور جب آپ صلی اللہ علیہ وسلم بیٹھ کر نماز ادا کرتے تھے، پھر آپ کیا کرتے تھے؟ تو انہوں نے بتایا: جب نبی اکرم صلی اللہ علیہ وسلم کھڑے ہو کر قرأت کرتے تھے، تو آپ صلی اللہ علیہ وسلم رکوع میں بھی کھڑے ہو کر جاتے تھے اور جب آپ صلی اللہ علیہ وسلم بیٹھ کر قرأت کرتے تھے، تو آپ صلی اللہ علیہ وسلم رکوع بھی بیٹھے ہوئے ہی کر لیتے تھے۔ [صحیح ابن حبان/كتاب الصلاة/حدیث: 2474]

عبداللہ بن شقیق بیان کرتے ہیں: میں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی نماز کے بارے میں دریافت کیا، تو انہوں نے فرمایا: نبی اکرم صلی اللہ علیہ وسلم ظہر سے پہلے چار رکعات ادا کرتے تھے، پھر آپ تشریف لے جاتے تھے اور نماز ادا کرتے تھے۔ پھر آپ واپس آ کر دو رکعات ادا کرتے تھے، پھر آپ مغرب کی نماز کے لیے تشریف لے جاتے تھے، پھر آپ واپس آ کر دو رکعات ادا کرتے تھے۔ پھر آپ عشاء کی نماز کے لیے تشریف لے جاتے تھے، پھر آپ واپس آ کر دو رکعات ادا کرتے تھے۔ پھر آپ رات کے وقت نو رکعات ادا کیا کرتے تھے۔ میں نے دریافت کیا: آپ یہ بیٹھ کر ادا کرتے تھے یا کھڑے ہو کر ادا کرتے تھے؟ سیدہ عائشہ رضی اللہ عنہا نے فرمایا: آپ رات کے وقت کھڑے ہو کر طویل نماز ادا کیا کرتے تھے۔ میں نے دریافت کیا: جب آپ کھڑے ہو کر قرأت کرتے تھے (تو رکوع کیسے کرتے تھے)؟ سیدہ عائشہ رضی اللہ عنہا نے جواب دیا: جب آپ کھڑے ہو کر تلاوت کرتے تھے، تو رکوع میں بھی کھڑے ہو کر جاتے تھے اور جب آپ بیٹھ کر تلاوت کرتے تھے، تو رکوع بھی بیٹھے ہوئے کر لیتے تھے، اس کے بعد آپ فجر سے پہلے دو رکعات (سنت) ادا کرتے تھے۔ [صحیح ابن حبان/كتاب الصلاة/حدیث: 2475]