سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں یہ حکم دیا تھا: ”ہم جمعہ کے بعد چار رکعات ادا کریں۔“ سہیل نامی راوی کہتے ہیں: میرے والد نے مجھے یہ فرمایا تھا: اگر تم مسجد حرام میں چار رکعات ادا نہیں کرتے تو دو رکعات مسجد میں ادا کرو اور دو رکعات اپنے گھر میں ادا کرو۔ [صحیح ابن حبان/كتاب الصلاة/حدیث: 2486]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم مغرب کے بعد والی دو رکعات اور جمعے کے بعد والی دو رکعات صرف اپنے گھر میں ادا کرتے تھے۔ [صحیح ابن حبان/كتاب الصلاة/حدیث: 2487]

سیدنا عبداللہ بن زبیر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ہر فرض نماز سے پہلے دو رکعات ادا کی جانی چاہئیں۔“ [صحیح ابن حبان/كتاب الصلاة/حدیث: 2488]

سیدنا انس بن مالک رضی اللہ عنہ بیان کرتے ہیں کہ جب مؤذن اذان دے دیتا تو نبی اکرم صلی اللہ علیہ وسلم کے اصحاب نماز ادا کرنے کے لیے تیزی سے ستونوں کی طرف لپکتے تھے، یہاں تک کہ جب نبی اکرم صلی اللہ علیہ وسلم ان کے پاس تشریف لاتے تو وہ لوگ اسی حالت میں ہوتے تھے، وہ حضرات مغرب سے پہلے بھی دو رکعات ادا کیا کرتے تھے حالانکہ اذان اور اقامت کے درمیان زیادہ وقفہ نہیں ہوتا تھا۔ [صحیح ابن حبان/كتاب الصلاة/حدیث: 2489]

سیدنا جابر رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جب کوئی شخص مسجد میں اپنی نماز مکمل کر لے، تو اسے اپنے گھر میں بھی (نماز میں سے) کچھ حصہ رکھنا چاہیے، اس کے نماز ادا کرنے کی وجہ سے اللہ تعالیٰ اس کے گھر میں بھلائی رکھ دے گا۔“ [صحیح ابن حبان/كتاب الصلاة/حدیث: 2490]

سیدنا زید بن ثابت رضی اللہ عنہ بیان کرتے ہیں: نبی اکرم صلی اللہ علیہ وسلم نے رمضان کے مہینے میں چٹائی سے بنا ہوا حجرہ بنوا لیا، آپ صلی اللہ علیہ وسلم اس میں رات کے وقت نوافل ادا کیا کرتے تھے، آپ صلی اللہ علیہ وسلم کے اصحاب میں سے کچھ لوگوں نے آپ کی نماز کی پیروی میں نماز ادا کی، جب آپ صلی اللہ علیہ وسلم کو لوگوں کے بارے میں علم ہوا، تو آپ بیٹھنے لگے (یعنی ان کے پاس نماز کے لیے تشریف نہیں لے جاتے تھے)۔ راوی کہتے ہیں: پھر نبی اکرم صلی اللہ علیہ وسلم ان کے پاس تشریف لے گئے، آپ صلی اللہ علیہ وسلم نے فرمایا: ”مجھے اندازہ ہو گیا تھا جب میں نے تمہارا طرز عمل دیکھا تھا، اے لوگو! تم اپنے گھروں میں نماز ادا کیا کرو کیونکہ آدمی کی سب سے افضل نماز وہ ہے جو وہ اپنے گھر میں ادا کرے، البتہ فرض نماز کا حکم مختلف ہے۔“ [صحیح ابن حبان/كتاب الصلاة/حدیث: 2491]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم مسجد میں داخل ہوئے تو وہاں دو ستونوں کے درمیان رسی لٹکی ہوئی تھی، نبی اکرم صلی اللہ علیہ وسلم نے دریافت فرمایا: ”یہ کس کی ہے؟“ لوگوں نے بتایا کہ یہ سیدہ زینب رضی اللہ عنہا کی ہے، وہ نماز ادا کرتی ہیں، جب وہ تھک جاتی ہیں تو اسے پکڑ لیتی ہیں۔ نبی اکرم صلی اللہ علیہ وسلم نے فرمایا: ”اسے کھول دو۔“ پھر آپ صلی اللہ علیہ وسلم نے ارشاد فرمایا: ”آدمی کو چاق و چوبند ہونے کی حالت میں نماز ادا کرنی چاہیے؛ اسے تھکاوٹ محسوس ہو یا طبیعت مائل نہ ہو تو پھر بیٹھ جانا چاہیے۔“ [صحیح ابن حبان/كتاب الصلاة/حدیث: 2492]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم مسجد میں داخل ہوئے، آپ صلی اللہ علیہ وسلم نے دو ستونوں کے درمیان ایک رسی بندھی ہوئی دیکھی تو دریافت فرمایا: ”یہ کیوں ہے؟“ لوگوں نے عرض کی: یہ فلاں خاتون کے لیے ہے، جو نماز ادا کرتی ہے، جب تھک جاتی ہے تو اس کے ساتھ لٹک جاتی ہے، نبی اکرم صلی اللہ علیہ وسلم نے ارشاد فرمایا: ”اسے اس وقت تک نماز ادا کرنی چاہیے جب تک وہ چاق و چوبند ہو، جب اسے نیند آنے لگے تو پھر اسے سو جانا چاہیے۔“ [صحیح ابن حبان/كتاب الصلاة/حدیث: 2493]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”رات اور دن کی (نفل نماز) دو دو کر کے ادا کی جائے گی۔“ [صحیح ابن حبان/كتاب الصلاة/حدیث: 2494]

سیدنا ابوقتادہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص مسجد میں داخل ہو تو وہ اس وقت تک نہ بیٹھے جب تک دو رکعت ادا نہ کر لے۔“ [صحیح ابن حبان/كتاب الصلاة/حدیث: 2495]