سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے مجھے کسی کام کے سلسلے میں بھیجا، جب میں آپ کی خدمت میں حاضر ہوا تو میں نے آپ کو سلام کیا، آپ اس وقت نماز ادا کر رہے تھے۔ نبی اکرم صلی اللہ علیہ وسلم نے اشارے کے ذریعے جواب دیا، جب آپ نماز پڑھ کر فارغ ہوئے، تو آپ نے مجھے بلایا اور ارشاد فرمایا: ”تم نے مجھے جس وقت سلام کیا تھا میں اس وقت نماز پڑھ رہا تھا۔“ (راوی کہتے ہیں) اس وقت نبی اکرم صلی اللہ علیہ وسلم کا رخ مشرق کی طرف تھا۔ [صحیح ابن حبان/كتاب الصلاة/حدیث: 2516]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم سفر کے دوران اپنی سواری پر ہی نماز ادا کر لیتے تھے خواہ اس کا رخ کسی بھی سمت ہو۔ [صحیح ابن حبان/كتاب الصلاة/حدیث: 2517]

سیدنا جابر بن عبداللہ رضی اللہ عنہما بیان کرتے ہیں کہ ہم لوگ نبی اکرم صلی اللہ علیہ وسلم کے ہمراہ سفر کر رہے تھے۔ آپ نے مجھے کسی کام سے بھیجا، جب میں آپ کی خدمت میں حاضر ہوا، تو آپ اس وقت (سواری پر) سوار ہو کر چل رہے تھے، میں نے آپ کو سلام کیا، تو آپ نے اپنے دست اقدس کے ذریعے اشارہ کیا، پھر میں نے آپ کو سلام کیا، تو آپ نے اشارہ کیا، آپ نے میرے ساتھ کوئی بات چیت نہیں کی، اس کے بعد آپ نے مجھے بلایا اور ارشاد فرمایا: ”میں اس وقت نفل نماز ادا کر رہا تھا۔“ [صحیح ابن حبان/كتاب الصلاة/حدیث: 2518]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھے کسی کام سے بھیجا، جب میں آپ کی خدمت میں حاضر ہوا تو آپ اس وقت مشرق کی طرف رخ کر کے یا مغرب کی طرف رخ کر کے چل رہے تھے (یعنی آپ سواری پر سوار تھے)؛ میں نے آپ کو سلام کیا، تو آپ نے اپنے دستِ مبارک کے ذریعے اشارہ کیا، پھر میں نے آپ کو سلام کیا، تو آپ نے اپنے دستِ اقدس کے ذریعے اشارہ کیا۔ میں واپس آیا (تھوڑی دیر بعد) تو آپ نے مجھے بلایا: ”اے جابر!“ لوگوں نے بھی مجھے بلایا: اے جابر! میں آپ کی خدمت میں حاضر ہوا اور میں نے عرض کی: یا رسول اللہ صلی اللہ علیہ وسلم ! میں نے آپ کو سلام کیا تھا لیکن آپ نے مجھے جواب نہیں دیا۔ نبی اکرم صلی اللہ علیہ وسلم نے ارشاد فرمایا: ”اس وقت میں نماز ادا کر رہا تھا۔“ [صحیح ابن حبان/كتاب الصلاة/حدیث: 2519]

سیدنا جابر بن عبداللہ رضی اللہ عنہما بیان کرتے ہیں: میں نے غزوۂ انمار کے موقع پر نبی اکرم صلی اللہ علیہ وسلم کو مشرق کی طرف رخ کر کے اپنی سواری پر نماز ادا کرتے ہوئے دیکھا ہے۔ [صحیح ابن حبان/كتاب الصلاة/حدیث: 2520]

سیدنا جابر بن عبداللہ رضی اللہ عنہما بیان کرتے ہیں کہ ہم لوگ نبی اکرم صلی اللہ علیہ وسلم کے ہمراہ ایک غزوے میں شریک ہوئے، تو نبی اکرم صلی اللہ علیہ وسلم اپنی سواری پر ہی نفل نماز ادا کر لیتے تھے جس کا رخ مشرق کی سمت ہوتا تھا اور جب آپ نے فرض نماز ادا کرنی ہوتی تھی تو آپ سواری سے نیچے اترتے تھے اور قبلہ کی طرف رخ کر کے ادا کرتے تھے۔ [صحیح ابن حبان/كتاب الصلاة/حدیث: 2521]

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں: میں نے نبی اکرم صلی اللہ علیہ وسلم کو سفر کے دوران اپنی سواری پر نفل نماز ادا کرتے ہوئے دیکھا ہے، آپ صلی اللہ علیہ وسلم سر کے اشارے سے (رکوع اور سجدے کر رہے تھے)۔ [صحیح ابن حبان/كتاب الصلاة/حدیث: 2522]

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، آپ اپنی سواری پر نماز ادا کر رہے تھے، آپ نوافل ادا کر رہے تھے خواہ آپ کا رخ کسی بھی طرف ہو، تاہم آپ رکوع کے مقابلے میں سجدہ کرتے ہوئے زیادہ جھک جاتے تھے، آپ اشارے کے ساتھ (رکوع اور سجدہ کر رہے تھے)۔ [صحیح ابن حبان/كتاب الصلاة/حدیث: 2523]

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، آپ اپنی سواری پر نفل ادا کر رہے تھے خواہ اس کا رخ کسی بھی سمت میں ہو، اور آپ اشارے کے ساتھ رکوع اور سجدہ کر رہے تھے، آپ رکوع کے مقابلے میں سجدے میں زیادہ جھک رہے تھے۔ [صحیح ابن حبان/كتاب الصلاة/حدیث: 2524]

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو اپنی سواری پر نوافل ادا کرتے ہوئے دیکھا، آپ سجدے میں رکوع سے زیادہ جھک رہے تھے۔ [صحیح ابن حبان/كتاب الصلاة/حدیث: 2525]