عبداللہ بن شقیق بیان کرتے ہیں: میں نے سیدہ عائشہ رضی اللہ عنہا سے دریافت کیا: کیا نبی اکرم صلی اللہ علیہ وسلم چاشت کے وقت نماز ادا کیا کرتے تھے؟ تو انہوں نے جواب دیا: جی نہیں، البتہ اگر آپ صلی اللہ علیہ وسلم سفر سے آتے تھے (تو اس موقع پر اس وقت میں نماز ادا کر لیتے تھے)۔ [صحیح ابن حبان/كتاب الصلاة/حدیث: 2526]

عبداللہ بن شقیق رضی اللہ عنہ بیان کرتے ہیں: میں نے سیدہ عائشہ رضی اللہ عنہا سے دریافت کیا: کیا نبی اکرم صلی اللہ علیہ وسلم چاشت کے وقت نماز ادا کیا کرتے تھے؟ تو انہوں نے جواب دیا: جی نہیں، البتہ اگر آپ صلی اللہ علیہ وسلم سفر سے آتے تھے (تو اس موقع پر اس وقت نماز ادا کر لیتے تھے)۔ میں نے دریافت کیا: کیا نبی اکرم صلی اللہ علیہ وسلم بیٹھ کر نماز ادا کرتے تھے؟ انہوں نے فرمایا: جی ہاں! جب آپ صلی اللہ علیہ وسلم کی عمر زیادہ ہو گئی (تو آپ صلی اللہ علیہ وسلم بیٹھ کر نماز ادا کر لیتے تھے)۔ میں نے دریافت کیا: کیا نبی اکرم صلی اللہ علیہ وسلم سورتیں ملا کر پڑھتے تھے؟ انہوں نے جواب دیا: جی ہاں! آپ صلی اللہ علیہ وسلم مفصل سورتیں (ملا کر) پڑھتے تھے۔ میں نے دریافت کیا: کیا نبی اکرم صلی اللہ علیہ وسلم رمضان کے مہینے کے علاوہ کسی اور متعین مہینے میں روزے رکھتے تھے؟ انہوں نے جواب دیا: اللہ کی قسم! نبی اکرم صلی اللہ علیہ وسلم نے رمضان کے علاوہ کسی بھی متعین مہینے میں روزے نہیں رکھے، یہاں تک کہ آپ صلی اللہ علیہ وسلم اس دنیا سے رخصت ہو گئے اور نہ ہی آپ صلی اللہ علیہ وسلم نے کبھی کسی مہینے کے روزے چھوڑے ہیں یہاں تک کہ آپ صلی اللہ علیہ وسلم اس دنیا سے رخصت ہو گئے۔ [صحیح ابن حبان/كتاب الصلاة/حدیث: 2527]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم چاشت کی نماز صرف اس وقت ادا کرتے تھے جب آپ سفر سے تشریف لاتے تھے۔ (امام ابن حبان رحمہ اللہ فرماتے ہیں:) سیدنا عبداللہ بن عمر رضی اللہ عنہما اور سیدہ عائشہ صدیقہ رضی اللہ عنہا نے نبی اکرم صلی اللہ علیہ وسلم کے چاشت کی نماز ادا کرنے کی نفی کی ہے۔ البتہ جب آپ سفر سے واپس تشریف لاتے تھے یا (شہر سے) غیر حاضری کے بعد واپس تشریف لاتے تھے (تو اس کا حکم مختلف ہے) آپ کا مقصد یہ ہوتا تھا کہ آپ لوگوں کو مسجد میں مل لیں نہ کہ گھر پر ملیں۔ اس کی وجہ یہ ہے کہ نبی اکرم صلی اللہ علیہ وسلم کے اخلاق میں یہ بات شامل تھی کہ جب آپ سفر سے واپس تشریف لاتے تھے، تو سب سے پہلے مسجد میں تشریف لاتے تھے اور وہاں دو رکعات ادا کرتے تھے۔ نبی اکرم صلی اللہ علیہ وسلم اکثر کسی سفر سے یا غزوہ سے چاشت کے وقت تشریف لاتے تھے جو دن کا ابتدائی حصہ ہوتا تھا اور نبی اکرم صلی اللہ علیہ وسلم نے اس بات سے منع کیا ہے کہ ”کوئی شخص رات کے وقت اپنی بیوی کے پاس (طویل غیر حاضری کے بعد) چلا جائے۔“ [صحیح ابن حبان/كتاب الصلاة/حدیث: 2528]

معاذہ بیان کرتی ہیں: میں نے سیدہ عائشہ رضی اللہ عنہا سے دریافت کیا: کیا نبی اکرم صلی اللہ علیہ وسلم چاشت کی نماز ادا کرتے تھے؟ انہوں نے فرمایا: جی ہاں! آپ چار رکعات ادا کرتے تھے اور جو اللہ کو منظور ہوتا تھا مزید ادا کرتے تھے۔ (امام ابن حبان رحمہ اللہ فرماتے ہیں:) سیدہ عائشہ رضی اللہ عنہا نے نبی اکرم صلی اللہ علیہ وسلم کے چاشت کی نماز ادا کرنے کے اثبات کا تذکرہ کیا ہے۔ اس سے ان کی مراد گھر ہے۔ باجماعت نماز والی مسجد مراد نہیں ہے۔ اس سے مراد یہ ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”تمہاری نمازوں میں سب سے افضل نماز وہ ہے جو تم اپنے گھر میں ادا کرو۔ البتہ فرض نماز کا حکم مختلف ہے۔“ [صحیح ابن حبان/كتاب الصلاة/حدیث: 2529]

نبی اکرم صلی اللہ علیہ وسلم کی زوجہ محترمہ سیدہ حفصہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو کبھی بھی بیٹھ کر نوافل ادا کرتے ہوئے نہیں دیکھا، یہاں تک کہ آپ کے وصال سے ایک سال پہلے میں نے آپ کو دیکھا، آپ بیٹھ کر نوافل ادا کر رہے تھے، آپ سورت کو ٹھہر ٹھہر کر پڑھتے تھے یہاں تک کہ وہ اپنے سے لمبی سورت سے بھی زیادہ طویل محسوس ہوتی تھی۔ [صحیح ابن حبان/كتاب الصلاة/حدیث: 2530]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے ہاں تشریف لائے، آپ صلی اللہ علیہ وسلم نے چاشت کے وقت آٹھ رکعات ادا کیں۔ [صحیح ابن حبان/كتاب الصلاة/حدیث: 2531]

سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم چاشت کی نماز ادا نہیں کرتے تھے۔ سیدہ عائشہ رضی اللہ عنہا یہ نماز ادا کیا کرتی تھیں، وہ یہ بیان کرتی تھیں کہ نبی اکرم صلی اللہ علیہ وسلم نے بہت سے عمل اس لیے چھوڑ دیے تھے، آپ کو یہ اندیشہ تھا کہ کہیں لوگ ان کو سنت کے طور پر اختیار نہ کر لیں اور پھر وہ ان پر فرض نہ ہو جائیں۔ [صحیح ابن حبان/كتاب الصلاة/حدیث: 2532]

سیدنا نعیم بن ہمار غطفانی رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کا یہ فرمان نقل کرتے ہیں: ”اے آدم کے بیٹے! تم دن کے ابتدائی حصے میں میرے لیے چار رکعات ادا کرو، میں اس کے آخری حصے میں تمہاری کفایت کروں گا۔“ [صحیح ابن حبان/كتاب الصلاة/حدیث: 2533]

سیدنا نعیم بن ہمار غطفانی رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کا یہ فرمان نقل کرتے ہیں: ”اے آدم کے بیٹے! تم دن کے ابتدائی حصے میں میرے لیے چار رکعات ادا کرو، میں اس کے آخری حصے میں تمہاری کفایت کروں گا۔“ [صحیح ابن حبان/كتاب الصلاة/حدیث: 2534]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک مہم روانہ کی، انہیں بہت سا مالِ غنیمت ملا اور وہ لوگ جلدی بھی واپس آگئے، ایک شخص نے عرض کی: یا رسول اللہ! میں نے کبھی بھی کوئی ایسی مہم نہیں دیکھی جو اتنی جلدی واپس آگئی ہو، جسے اتنا زیادہ مالِ غنیمت ملا ہو جتنا اس مہم کو ملا ہے، تو نبی اکرم صلی اللہ علیہ وسلم نے ارشاد فرمایا: ”کیا میں تمہیں اس مہم سے زیادہ تیزی سے واپس آنے اور زیادہ مالِ غنیمت حاصل کرنے کے بارے میں بتاؤں؟ ایک شخص اپنے گھر میں اچھی طرح وضو کرے پھر وہ مسجد جائے وہاں صبح کی نماز ادا کرے پھر اس کے بعد (وہ وہیں بیٹھا رہے اور پھر) چاشت کی نماز ادا کرے تو وہ شخص جلدی بھی واپس آ جاتا ہے اور اسے زیادہ مالِ غنیمت بھی حاصل ہوتا ہے۔“ [صحیح ابن حبان/كتاب الصلاة/حدیث: 2535]