سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے ساتھ گھل مل جایا کرتے تھے یہاں تک کہ میرے چھوٹے بھائی سے فرماتے تھے: ”اے ابوعمیر! تمہاری چڑیا کا کیا حال ہے؟“ جب نماز کا وقت ہوا تو ہم نے نبی اکرم صلی اللہ علیہ وسلم کے لیے اپنی چٹائی بچھا دی، پھر نبی اکرم صلی اللہ علیہ وسلم نے اس پر نماز ادا کی اور ہم نے آپ کے پیچھے نماز ادا کی۔ (امام ابن حبان رحمہ اللہ فرماتے ہیں:) سیدنا انس رضی اللہ عنہ کا یہ کہنا کہ ”نماز کا وقت ہو گیا تھا“ اس سے مراد یہ ہے کہ نفل نماز کا وقت ہوا تھا، نبی اکرم صلی اللہ علیہ وسلم فرض نماز جماعت کے ساتھ کسی انصاری کے گھر ادا نہیں کرتے تھے جو باجماعت نماز والی مسجد کے علاوہ ہو۔ [صحیح ابن حبان/كتاب الصلاة/حدیث: 2506]

سیدہ ام سلمہ رضی اللہ عنہا بیان کرتی ہیں کہ وصال کے قریب نبی اکرم صلی اللہ علیہ وسلم زیادہ نمازیں بیٹھ کر ادا کیا کرتے تھے اور آپ صلی اللہ علیہ وسلم کے نزدیک پسندیدہ عمل وہ تھا جسے بندہ باقاعدگی کے ساتھ کرے اگرچہ وہ تھوڑا ہو۔ [صحیح ابن حبان/كتاب الصلاة/حدیث: 2507]

سیدہ حفصہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو کبھی بھی نفل نماز بیٹھ کر ادا کرتے ہوئے نہیں دیکھا، یہاں تک کہ آپ کے وصال سے ایک سال پہلے نبی اکرم صلی اللہ علیہ وسلم نفل نمازیں بیٹھ کر ادا کیا کرتے تھے، اگر کسی سورہ کی تلاوت کرتے تھے تو اسے ٹھہر ٹھہر کر پڑھتے تھے، یہاں تک کہ وہ اپنی سے بڑی سورہ سے زیادہ طویل محسوس ہوتی تھی۔ [صحیح ابن حبان/كتاب الصلاة/حدیث: 2508]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم عمر رسیدہ ہو جانے کے بعد بیٹھ کر نفل نماز ادا کیا کرتے تھے، جب کسی سورت کی تیس آیات باقی رہ جاتی تھیں، تو پھر آپ صلی اللہ علیہ وسلم کھڑے ہو کر ان کی تلاوت کرتے تھے، پھر رکوع میں جاتے تھے۔ [صحیح ابن حبان/كتاب الصلاة/حدیث: 2509]

عبداللہ بن شقیق رحمہ اللہ، سیدہ عائشہ رضی اللہ عنہا سے بیان کرتے ہیں کہ میں نے ان سے نبی اکرم صلی اللہ علیہ وسلم کی نماز کے بارے میں دریافت کیا تو انہوں نے فرمایا: نبی اکرم صلی اللہ علیہ وسلم رات کے وقت بیٹھ کر طویل نماز ادا کرتے تھے اور کھڑے ہو کر طویل نماز ادا کرتے تھے؛ جب آپ صلی اللہ علیہ وسلم بیٹھ کر نماز ادا کرتے تھے تو بیٹھے ہوئے ہی رکوع میں چلے جاتے تھے اور جب آپ صلی اللہ علیہ وسلم کھڑے ہو کر نماز ادا کرتے تھے تو قیام کی حالت میں رکوع میں جاتے تھے۔ [صحیح ابن حبان/كتاب الصلاة/حدیث: 2510]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کھڑے ہو کر بھی اور بیٹھ کر بھی نماز ادا کر لیتے تھے؛ جب آپ صلی اللہ علیہ وسلم کھڑے ہو کر نماز کا آغاز کرتے تھے، تو آپ صلی اللہ علیہ وسلم قیام کی حالت میں ہی رکوع میں جاتے تھے اور جب آپ صلی اللہ علیہ وسلم بیٹھ کر نماز ادا کرتے تھے، تو بیٹھے ہوئے ہی رکوع میں چلے جاتے تھے۔ [صحیح ابن حبان/كتاب الصلاة/حدیث: 2511]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم چار زانوں بیٹھ کر نماز ادا کرتے تھے۔ [صحیح ابن حبان/كتاب الصلاة/حدیث: 2512]

سیدنا عمران بن حصین رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم سے بیٹھ کر نماز ادا کرنے کے بارے میں دریافت کیا، تو آپ صلی اللہ علیہ وسلم نے ارشاد فرمایا: ”کھڑے ہو کر نماز ادا کرو، یہ زیادہ فضیلت رکھتا ہے؛ جو شخص بیٹھ کر نماز ادا کرتا ہے اس کو کھڑے ہو کر نماز ادا کرنے والے کے مقابلے میں نصف اجر ملتا ہے اور جو شخص لیٹ کر نماز ادا کرتا ہے، تو اسے بیٹھ کر نماز ادا کرنے والے سے نصف اجر ملتا ہے۔“ (امام ابن حبان رحمہ اللہ فرماتے ہیں:) اس کی سند میں اس شخص کو وہم ہوا جو علم حدیث میں مہارت نہیں رکھتا؛ جو مستند روایات کی سمجھ بوجھ نہیں رکھتا وہ اس بات کا قائل ہے کہ اس کی روایت میں انفصال پایا جاتا ہے اور اس کی سند متصل نہیں ہے۔ حالانکہ ایسا نہیں ہے کیونکہ عبداللہ بن بریدہ کی پیدائش سیدنا عمر بن خطاب رضی اللہ عنہ کے عہد خلافت کے تیسرے سال میں ہوئی تھی، یہ سن پندرہ ہجری کی بات ہے، یہ اور ان کے بھائی سلیمان بن بریدہ آگے پیچھے پیدا ہوئے تھے۔ جب مدینہ منورہ میں سیدنا عثمان غنی رضی اللہ عنہ کی شہادت سے پہلے کا فتنہ رونما ہوا تو سیدنا بریدہ رضی اللہ عنہ اپنے بچوں کو لے کر مدینہ منورہ سے چلے گئے تھے، انہوں نے بصرہ میں رہائش اختیار کی تھی؛ وہاں اس وقت سیدنا عمران بن حصین اور سیدنا سمرہ بن جندب رضی اللہ عنہما موجود تھے، تو بریدہ نے ان دونوں سے احادیث کا سماع کر لیا۔ سیدنا عمران رضی اللہ عنہ کا انتقال سیدنا معاویہ رضی اللہ عنہ کے عہد حکومت میں باون ہجری میں ہوا، پھر بریدہ وہاں سے اپنے بیٹوں کو لے کر سجستان چلے گئے اور ایک طویل مدت تک ایک غازی کے طور پر وہاں مقیم رہے، پھر وہ وہاں سے نکلے اور مرو چلے گئے جو عراق کے راستے میں آتا ہے، وہ وہاں گئے تو اسے وطن بنا لیا۔ سلیمان بن بریدہ کا انتقال مرو میں ہوا، وہ اس وقت وہاں کے قاضی بھی تھے اور یہ ایک سو پانچ ہجری کی بات ہے؛ یہ بات تمہاری رہنمائی اس طرف کرے گی کہ عبداللہ بن بریدہ نے سیدنا عمران بن حصین رضی اللہ عنہ سے احادیث کا سماع کیا ہے۔ [صحیح ابن حبان/كتاب الصلاة/حدیث: 2513]

مقدام بن شریح اپنے والد کے حوالے سے سیدہ عائشہ صدیقہ رضی اللہ عنہا کے بارے میں یہ بات نقل کرتے ہیں، (ان کے والد کہتے ہیں) میں نے سیدہ عائشہ رضی اللہ عنہا سے دریافت کیا: جب نبی اکرم صلی اللہ علیہ وسلم آپ کے ہاں تشریف لاتے تھے، تو سب سے پہلے کیا کرتے تھے اور جب آپ صلی اللہ علیہ وسلم کے ہاں سے تشریف لے جاتے تھے، تو کیا کرتے تھے؟ تو سیدہ عائشہ صدیقہ رضی اللہ عنہا نے بتایا: نبی اکرم صلی اللہ علیہ وسلم جب گھر میں تشریف لاتے تھے، تو سب سے پہلے مسواک کرتے تھے اور جب آپ صلی اللہ علیہ وسلم تشریف لے جاتے تھے، تو دو نفل ادا کرتے تھے۔ [صحیح ابن حبان/كتاب الصلاة/حدیث: 2514]

سیدنا عبداللہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو گدھے پر (سوار) ہو کر نماز ادا کرتے ہوئے دیکھا تھا اور اس وقت آپ کا رخ خیبر کی طرف تھا۔ [صحیح ابن حبان/كتاب الصلاة/حدیث: 2515]