سیدنا عبداللہ بن عباس رضی اللہ عنہما بیان کرتے ہیں: میں نے اپنی خالہ سیدہ میمونہ رضی اللہ عنہا کے ہاں رات بسر کی، اس رات نبی اکرم صلی اللہ علیہ وسلم بھی ان کے ہاں موجود تھے۔ نبی اکرم صلی اللہ علیہ وسلم نے وضو کیا، پھر آپ کھڑے ہو کر نماز ادا کرنے لگے، میں آپ کے بائیں طرف آ کر کھڑا ہوا، تو آپ نے مجھے پکڑا اور دائیں طرف کر دیا، اس رات آپ نے چار رکعات ادا کیں، پھر نبی اکرم صلی اللہ علیہ وسلم سو گئے یہاں تک کہ آپ خراٹے لینے لگے، جب آپ سوتے تھے، تو آپ خراٹے لیا کرتے تھے، پھر مؤذن آپ کی خدمت میں حاضر ہوا، تو آپ تشریف لے گئے، آپ نے نماز پڑھائی اور از سر نو وضو نہیں کیا۔ یہی روایت ایک اور سند کے ہمراہ بھی منقول ہے۔ [صحیح ابن حبان/كتاب الصلاة/حدیث: 2626]

سیدنا عبداللہ بن عباس رضی اللہ عنہما بیان کرتے ہیں کہ انہوں نے اپنی خالہ سیدہ میمونہ رضی اللہ عنہا کے ہاں رات بسر کی، نبی اکرم صلی اللہ علیہ وسلم رات کے وقت نماز ادا کرنے کے لیے کھڑے ہوئے، سیدنا ابن عباس رضی اللہ عنہما بیان کرتے ہیں: میں اٹھا، میں نے وضو کیا اور آ کر آپ کے بائیں طرف کھڑا ہو گیا، تو نبی اکرم صلی اللہ علیہ وسلم نے مجھے کھینچا اور مجھے اپنی دائیں طرف کھڑا کر لیا۔ نبی اکرم صلی اللہ علیہ وسلم نے تیرہ رکعات ادا کیں، ان میں آپ کا قیام برابر تھا۔ [صحیح ابن حبان/كتاب الصلاة/حدیث: 2627]

سیدنا جابر بن عبداللہ رضی اللہ عنہما بیان کرتے ہیں کہ حدیبیہ کے زمانہ میں ہم نبی اکرم صلی اللہ علیہ وسلم کے ساتھ آ رہے تھے، ہم نے ”سقیا“ کے مقام پر پڑاؤ کیا، تو سیدنا معاذ بن جبل رضی اللہ عنہ نے دریافت کیا: کون ہمیں پانی پلائے گا؟ تو انہوں نے (شاید نبی اکرم صلی اللہ علیہ وسلم نے) فرمایا: ”جابر!“ میں انصار کے کچھ نوجوانوں کے ساتھ روانہ ہوا، ”اثایہ“ کے مقام پر ہم پانی کے پاس آئے، ان دونوں جگہوں کے درمیان تقریباً 23 میل کا فاصلہ تھا، وہاں سے ہم نے خود بھی پانی پیا اور اپنے جانوروں کو بھی پلایا، یہاں تک کہ شام ہو جانے کے بعد ایک شخص اپنے اونٹ پر آیا، اس کا اونٹ حوض کی طرف جانے کے لیے اس سے مقابلہ کر رہا تھا اور وہ اس سے کہہ رہا تھا: آگے آؤ، پھر وہ آگے آیا، میں نے اس کی سواری کی لگام پکڑی اور اس کے اونٹ کو بٹھا دیا، نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم نے عشاء کی نماز ادا کی، سیدنا جابر رضی اللہ عنہ آپ صلی اللہ علیہ وسلم کے پہلو میں تھے، نبی اکرم صلی اللہ علیہ وسلم نے تیرہ رکعات ادا کیں۔ [صحیح ابن حبان/كتاب الصلاة/حدیث: 2628]

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو دیکھا، آپ نے اپنی سواری کو بٹھایا، پھر آپ نیچے اترے اور آپ نے دس رکعتیں دو، دو کر کے ادا کیں، پھر آپ نے ایک رکعت وتر ادا کی، پھر آپ نے فجر کی دو رکعت (سنت) ادا کیں، پھر آپ نے صبح کی نماز ادا کی۔ [صحیح ابن حبان/كتاب الصلاة/حدیث: 2629]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کے نوافل بیٹھ کر ادا نہیں کرتے تھے، یہاں تک کہ جب آپ صلی اللہ علیہ وسلم کی عمر زیادہ ہو گئی تو پھر آپ صلی اللہ علیہ وسلم (بیٹھ کر) تلاوت کرتے رہتے تھے، یہاں تک کہ جب تلاوت میں تیس یا چالیس آیات باقی رہ جاتی تھیں، تو آپ صلی اللہ علیہ وسلم کھڑے ہو کر ان کی تلاوت کرتے تھے، پھر سجدے میں جاتے تھے۔ [صحیح ابن حبان/كتاب الصلاة/حدیث: 2630]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کے وقت طویل نماز کھڑے ہو کر بھی ادا کرتے تھے اور طویل نماز بیٹھ کر بھی ادا کرتے تھے، جب آپ صلی اللہ علیہ وسلم کھڑے ہو کر نماز ادا کرتے تھے تو کھڑے ہوئے ہی رکوع میں چلے جاتے تھے اور جب بیٹھ کر نماز ادا کرتے تھے تو بیٹھے ہوئے ہی رکوع میں چلے جاتے تھے۔ [صحیح ابن حبان/كتاب الصلاة/حدیث: 2631]

سیدہ عائشہ صدیقہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو رات کے نفل کبھی بیٹھ کر ادا کرتے ہوئے نہیں دیکھا یہاں تک کہ جب آپ کی عمر زیادہ ہو گئی تو آپ (بیٹھ کر) تلاوت کرتے تھے یہاں تک کہ جب کسی سورۃ کی تیس یا چالیس آیات باقی رہ جاتی تھیں، تو آپ کھڑے ہو کر ان کی تلاوت کرتے تھے، پھر رکوع میں جاتے تھے۔ [صحیح ابن حبان/كتاب الصلاة/حدیث: 2632]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کی نفل نماز میں بیٹھ کر تلاوت نہیں کرتے تھے، یہاں تک کہ جب آپ کی عمر زیادہ ہو گئی تو آپ بیٹھ کر تلاوت کیا کرتے تھے اور جب کسی سورت کی تیس یا چالیس آیات باقی رہ جاتی تھیں، تو آپ کھڑے ہو کر ان کی تلاوت کرتے تھے، پھر رکوع میں جاتے تھے۔ [صحیح ابن حبان/كتاب الصلاة/حدیث: 2633]

ابوسلمہ رحمہ اللہ بیان کرتے ہیں، انہوں نے سیدہ عائشہ صدیقہ رضی اللہ عنہا سے نبی اکرم صلی اللہ علیہ وسلم کی رات کی نفل نماز کے بارے میں دریافت کیا، تو سیدہ عائشہ رضی اللہ عنہا نے بتایا: نبی اکرم صلی اللہ علیہ وسلم آٹھ رکعات ادا کیا کرتے تھے، پھر آپ صلی اللہ علیہ وسلم وتر ادا کرتے تھے، پھر بیٹھ کر دو رکعات ادا کرتے تھے، پھر آپ صلی اللہ علیہ وسلم کھڑے ہو کر تلاوت کرتے تھے، پھر رکوع میں جاتے تھے، پھر آپ صلی اللہ علیہ وسلم صبح کی نماز کی اذان اور اقامت کے درمیان دو رکعات (سنت) ادا کرتے تھے۔ [صحیح ابن حبان/كتاب الصلاة/حدیث: 2634]

سعد بن ہشام رحمہ اللہ بیان کرتے ہیں کہ انہوں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی رات کی نفل نماز کے بارے میں دریافت کیا، تو سیدہ عائشہ رضی اللہ عنہا نے بتایا: نبی اکرم صلی اللہ علیہ وسلم جب عشاء کی نماز ادا کر لیتے تھے، تو دو مختصر رکعتیں ادا کرتے تھے، پھر آپ صلی اللہ علیہ وسلم سو جاتے تھے، آپ صلی اللہ علیہ وسلم کے وضو کا پانی اور آپ صلی اللہ علیہ وسلم کی مسواک آپ صلی اللہ علیہ وسلم کے سرہانے موجود ہوتی تھی، پھر آپ صلی اللہ علیہ وسلم بیدار ہو کر مسواک کرتے اور وضو کرتے تھے، نماز ادا کرتے تھے، دو مختصر رکعتیں ادا کرتے تھے، پھر آپ صلی اللہ علیہ وسلم کھڑے ہو کر آٹھ رکعات ادا کرتے جن میں ایک جتنی قرأت کرتے تھے، پھر آپ صلی اللہ علیہ وسلم نویں رکعت کے ذریعے انہیں وتر کر لیتے تھے، پھر آپ صلی اللہ علیہ وسلم بیٹھ کر دو رکعات ادا کرتے تھے، جب نبی اکرم صلی اللہ علیہ وسلم کی عمر زیادہ ہو گئی اور آپ صلی اللہ علیہ وسلم کا جسم بھاری ہو گیا تو آپ صلی اللہ علیہ وسلم نے آٹھ رکعات کو چھ کر دیا اور ساتویں رکعت کے ذریعے وتر ادا کر لیتے تھے، پھر آپ صلی اللہ علیہ وسلم بیٹھ کر دو رکعات ادا کرتے تھے جن میں آپ صلی اللہ علیہ وسلم سورۃ الکافرون اور سورۃ الزلزال کی تلاوت کرتے تھے۔ [صحیح ابن حبان/كتاب الصلاة/حدیث: 2635]