سیدنا عبداللہ بن عباس رضی اللہ عنہما بیان کرتے ہیں کہ میں نے اپنی خالہ سیدہ میمونہ رضی اللہ عنہا کے ہاں رات بسر کی۔ رات کے وقت نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم نے قضائے حاجت کی پھر آپ صلی اللہ علیہ وسلم نے اپنے چہرے اور دونوں ہاتھوں کو دھویا، پھر آپ صلی اللہ علیہ وسلم سو گئے، پھر آپ صلی اللہ علیہ وسلم بیدار ہوئے، آپ صلی اللہ علیہ وسلم مشکیزے کے پاس آئے، آپ صلی اللہ علیہ وسلم نے اس کا منہ کھولا پھر آپ صلی اللہ علیہ وسلم نے وضو کیا جو درمیانے درجے کا تھا، آپ صلی اللہ علیہ وسلم نے اس میں زیادہ مرتبہ اعضاء کو نہیں دھویا، آپ صلی اللہ علیہ وسلم نے پورا وضو کیا، پھر آپ صلی اللہ علیہ وسلم کھڑے ہو گئے اور نماز ادا کرنے لگے، میں بھی اٹھا، میں نے یوں ظاہر کیا جیسے ابھی بیدار ہوا ہوں، اس چیز کو ناپسند کرتے ہوئے (کہ) آپ صلی اللہ علیہ وسلم یہ نہ سمجھیں کہ میں آپ صلی اللہ علیہ وسلم کا جائزہ لے رہا تھا، میں اٹھا میں نے وضو کیا، نبی اکرم صلی اللہ علیہ وسلم نماز ادا کر رہے تھے میں آپ صلی اللہ علیہ وسلم کی بائیں طرف آ کر کھڑا ہو گیا، آپ صلی اللہ علیہ وسلم نے میرے کان پکڑے اور مجھے گھما کر اپنی دائیں طرف کر دیا۔ نبی اکرم صلی اللہ علیہ وسلم کی نماز تیرہ رکعات میں پوری ہوئی، آپ صلی اللہ علیہ وسلم لیٹ گئے اور سو گئے یہاں تک کہ آپ صلی اللہ علیہ وسلم خراٹے لینے لگے، آپ صلی اللہ علیہ وسلم سوتے تھے تو خراٹے لیا کرتے تھے، پھر سیدنا بلال رضی اللہ عنہ آپ صلی اللہ علیہ وسلم کو نماز کے لیے بلانے کے لیے آئے، نبی اکرم صلی اللہ علیہ وسلم اٹھے، آپ صلی اللہ علیہ وسلم نے نماز ادا کی اور از سر نو وضو نہیں کیا، اور اس (نماز) میں یہ دعا پڑھی: «اللَّهُمَّ اجْعَلْ فِي قَلْبِي نُورًا، وَفِي بَصَرِي نُورًا، وَفِي سَمْعِي نُورًا، وَعَنْ يَمِينِي نُورًا، وَعَنْ يَسَارِي نُورًا، وَفَوْقِي نُورًا، وَتَحْتِي نُورًا، وَأَمَامِي نُورًا، وَخَلْفِي نُورًا، وَأَعْظِمْ لِي نُورًا» ”اے اللہ! تو میرے دل میں نور کر دے، میری بصارت میں نور کر دے، میری سماعت میں نور کر دے، میرے دائیں طرف نور کر دے، میرے بائیں طرف نور کر دے، میرے اوپر نور کر دے، میرے نیچے نور کر دے، میرے آگے نور کر دے، میرے پیچھے نور کر دے اور میرے لیے نور کو زیادہ کر دے۔“ کریب نامی راوی بیان کرتے ہیں کہ میری ملاقات سیدنا عباس رضی اللہ عنہ کی اولاد میں سے کسی سے ہوئی انہوں نے مجھے یہ حدیث بیان کی جس میں یہ الفاظ بھی بیان کیے: ”میرے پٹھوں، میرے گوشت، میرے خون، میرے بالوں اور میری کھال میں (نور) کر دے۔“ انہوں نے دو خصلتوں کا ذکر بھی کیا۔ [صحیح ابن حبان/كتاب الصلاة/حدیث: 2636]

سیدہ عائشہ صدیقہ رضی اللہ عنہا بیان کرتی ہیں: میں نے آپ کو سحری کے وقت اپنے ہاں ہمیشہ سوئے ہوئے پایا ہے، ان کی مراد نبی اکرم صلی اللہ علیہ وسلم تھے۔ [صحیح ابن حبان/كتاب الصلاة/حدیث: 2637]

اسود بیان کرتے ہیں کہ میں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی رات کی (نفل) نماز کے بارے میں پوچھا تو انہوں نے بتایا کہ نبی اکرم صلی اللہ علیہ وسلم رات کے ابتدائی حصے میں سو جاتے تھے، پھر آپ صلی اللہ علیہ وسلم نوافل ادا کرتے رہتے تھے یہاں تک کہ جب سحری کا وقت قریب آتا تو آپ صلی اللہ علیہ وسلم وتر ادا کر لیتے تھے، پھر آپ صلی اللہ علیہ وسلم اپنے بستر پر آتے، اگر آپ صلی اللہ علیہ وسلم کو وہ خواہش ہوتی جو کسی مرد کو اپنی بیوی کے ساتھ ہوتی ہے تو آپ صلی اللہ علیہ وسلم اسے پوری کر لیتے تھے، پھر جب آپ صلی اللہ علیہ وسلم اذان کی آواز سنتے تو جلدی سے اٹھ جاتے، اگر جنابت کی حالت میں ہوتے تو غسل کر لیتے ورنہ وضو کر کے نماز کے لیے تشریف لے جاتے۔ (امام ابن حبان رحمہ اللہ فرماتے ہیں:) ان روایات میں کوئی تضاد نہیں ہے، اگرچہ بظاہر اور معانی میں اختلاف محسوس ہوتا ہے، اس کی وجہ یہ ہے کہ نبی اکرم صلی اللہ علیہ وسلم رات کے وقت مختلف (تعداد میں) نوافل ادا کرتے تھے، ایک رات میں ایک طریقے کے مطابق اور دوسری رات میں دوسرے طریقے کے مطابق ادا کرتے تھے، تو صحابہ کرام رضی اللہ عنہم میں سے جس نے نبی اکرم صلی اللہ علیہ وسلم کو جس طریقے کے مطابق نماز ادا کرتے ہوئے دیکھا اسے آگے بیان کر دیا اور جو مشاہدہ کیا، اس کے بارے میں خبر دے دی۔ اللہ تعالیٰ نے اپنے محبوب کو ان کی اُمت کے لیے زبانی اور عملی طور پر معلم بنا کر بھیجا تھا، تو رات کے نوافل کے بارے میں نبی اکرم صلی اللہ علیہ وسلم کے افعال کا اختلاف اس بات کی طرف ہماری رہنمائی کرتا ہے کہ آدمی کو اس بارے میں اختیار ہے کہ نبی اکرم صلی اللہ علیہ وسلم نے اپنے رات کے نوافل کے بارے میں جو طریقہ بھی اختیار کیا، آدمی ان میں سے کسی ایک طریقے کے مطابق نوافل ادا کر لے، ایسا نہیں ہے کہ اس کے لیے یہ حکم ہو کہ وہ ان میں سے کسی ایک طریقے کی ہی پیروی کر سکتا ہے اور تمام طریقوں کی پیروی نہیں کر سکتا۔ [صحیح ابن حبان/كتاب الصلاة/حدیث: 2638]

یعلیٰ مملک بیان کرتے ہیں کہ انہوں نے نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا سے نبی اکرم صلی اللہ علیہ وسلم کی رات کی (نفل) نماز کے بارے میں دریافت کیا، تو سیدہ ام سلمہ رضی اللہ عنہا نے بتایا کہ نبی اکرم صلی اللہ علیہ وسلم عشاء کی نماز ادا کرتے تھے، پھر آپ تسبیح پڑھتے رہتے تھے، پھر اس کے بعد رات کے وقت جب اللہ کو منظور ہوتا تھا نماز ادا کرتے رہتے تھے، پھر آپ نماز ختم کر کے اتنی ہی دیر کے لیے سو جاتے تھے جتنی دیر آپ نماز ادا کرتے رہے تھے، پھر آپ اپنی اس نیند سے بیدار ہو کر اتنی دیر نماز ادا کرتے رہتے تھے جتنی دیر سوئے رہتے تھے، یہاں تک کہ آپ کی آخری نماز صبح صادق تک جاری رہتی تھی۔ [صحیح ابن حبان/كتاب الصلاة/حدیث: 2639]

سعد بن ہشام انصاری بیان کرتے ہیں، انہوں نے سیدہ عائشہ رضی اللہ عنہا سے نبی اکرم صلی اللہ علیہ وسلم کی رات کی (نفل) نماز کے بارے میں دریافت کیا، تو انہوں نے بتایا: نبی اکرم صلی اللہ علیہ وسلم جب عشاء کی نماز ادا کر لیتے تھے، تو دو مختصر رکعات ادا کرتے تھے، پھر آپ صلی اللہ علیہ وسلم سو جاتے تھے، آپ صلی اللہ علیہ وسلم کے وضو کا پانی اور آپ صلی اللہ علیہ وسلم کی مسواک آپ صلی اللہ علیہ وسلم کے سرہانے موجود ہوتے تھے، پھر آپ صلی اللہ علیہ وسلم بیدار ہو کر مسواک کرتے تھے، پھر وضو کرتے تھے اور نماز ادا کرتے تھے، آپ صلی اللہ علیہ وسلم پہلے دو مختصر رکعات ادا کرتے تھے، پھر آپ صلی اللہ علیہ وسلم آٹھ رکعات ادا کرتے تھے جن میں تقریباً ایک جتنی تلاوت کرتے تھے، آپ صلی اللہ علیہ وسلم نویں رکعت کے ذریعے انہیں طاق کر لیتے تھے، پھر آپ صلی اللہ علیہ وسلم بیٹھ کر دو رکعات ادا کرتے تھے، جب نبی اکرم صلی اللہ علیہ وسلم کی عمر زیادہ ہو گئی اور آپ صلی اللہ علیہ وسلم کا جسم بھاری ہو گیا، تو آپ صلی اللہ علیہ وسلم نے آٹھ رکعات کی جگہ چھ ادا کرنا شروع کر دیں اور ساتویں رکعت کے ذریعے انہیں طاق کر لیتے تھے، پھر آپ صلی اللہ علیہ وسلم بیٹھ کر دو رکعات ادا کرتے تھے جن میں آپ صلی اللہ علیہ وسلم سورۃ الکافرون اور سورۃ الزلزال کی تلاوت کرتے تھے۔ [صحیح ابن حبان/كتاب الصلاة/حدیث: 2640]

سیدنا عبداللہ بن عمرو رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”اے عبداللہ بن عمرو! تم فلاں شخص کی مانند نہ ہو جانا جو پہلے رات کے وقت نوافل ادا کیا کرتا تھا اور پھر اس نے رات کے قیام کو ترک کر دیا۔“ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ آدمی کے لیے کسی دوسرے شخص کی غیر موجودگی میں اس کے بارے میں کوئی ایسی بات کہنا جائز ہے کہ اگر وہ شخص خود اس بات کو سن لے تو غمگین ہو جائے، جبکہ کہنے والے شخص کا مقصد اس کی برائی بیان کرنا نہ ہو بلکہ کسی اور شخص کو کسی حوالے سے تنبیہ کرنا مقصود ہو۔ [صحیح ابن حبان/كتاب الصلاة/حدیث: 2641]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم جب کوئی عمل کرتے تھے تو باقاعدگی سے کیا کرتے تھے، اگر آپ صلی اللہ علیہ وسلم رات کے وقت سو جاتے یا بیماری کی وجہ سے (رات کے نوافل ادا نہیں کر پاتے) تو آپ صلی اللہ علیہ وسلم دن کے وقت بارہ رکعات ادا کیا کرتے تھے۔ سیدہ عائشہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو کبھی بھی ساری رات صبح صادق تک نوافل ادا کرتے ہوئے نہیں دیکھا اور نہ ہی رمضان کے مہینے کے علاوہ کبھی آپ صلی اللہ علیہ وسلم کو مسلسل (پورا مہینہ) روزے رکھتے ہوئے دیکھا ہے۔ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ وتر فرض نہیں ہیں، کیونکہ اگر یہ فرض ہوتے تو آپ صلی اللہ علیہ وسلم دن کے وقت اپنی رات کے وقت رہ جانے والی 13 رکعات ادا کرتے۔ [صحیح ابن حبان/كتاب الصلاة/حدیث: 2642]

سیدنا عمر بن خطاب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اپنے معمول کے وظیفے کو سرانجام دینے سے پہلے سو جائے یا اس میں سے کوئی چیز رہ جائے، تو وہ اگر اسے (اگلے دن) فجر کی نماز سے لے کر ظہر کی نماز تک کے درمیانی حصے میں پڑھ لے، تو اس کے نامہ اعمال میں یہ اسی طرح نوٹ کیا جائے گا، جس طرح اس کے رات کے وقت پڑھنے کو نوٹ کیا جاتا ہے۔“ [صحیح ابن حبان/كتاب الصلاة/حدیث: 2643]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب کوئی عمل کرتے تھے تو اس کو باقاعدگی سے کیا کرتے تھے، سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب رات کے (نوافل) ادا کیے بغیر سو جاتے یا بیماری کی وجہ سے (انہیں ادا نہ کر پاتے) تو آپ صلی اللہ علیہ وسلم دن کے وقت بارہ رکعات ادا کیا کرتے تھے، میں نے کبھی نبی اکرم صلی اللہ علیہ وسلم کو ساری رات صبح صادق تک نوافل ادا کرتے ہوئے نہیں دیکھا اور نہ ہی آپ صلی اللہ علیہ وسلم کو رمضان کے مہینے کے علاوہ کسی اور پورے مہینے میں روزے رکھتے ہوئے دیکھا۔ [صحیح ابن حبان/كتاب الصلاة/حدیث: 2644]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب نیند کی وجہ سے رات کے وقت نوافل ادا نہیں کر پاتے تھے یا آپ صلی اللہ علیہ وسلم کی آنکھ لگ جاتی تھی، تو آپ صلی اللہ علیہ وسلم دن کے وقت بارہ رکعات ادا کیا کرتے تھے۔ [صحیح ابن حبان/كتاب الصلاة/حدیث: 2645]