سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جب کوئی رات کے وقت بیدار ہو، تو اسے آغاز میں دو مختصر رکعات ادا کرنی چاہییں۔“ [صحیح ابن حبان/كتاب الصلاة/حدیث: 2606]

ابووائل بیان کرتے ہیں: ایک مرتبہ ہم صبح کی نماز ادا کرنے کے بعد سیدنا عبداللہ بن مسعود رضی اللہ عنہ کی خدمت میں حاضر ہوئے، ہم نے انہیں دروازے پر سلام کہا اور انہوں نے ہمیں اندر آنے کی اجازت دی، ہم تھوڑی دیر ٹھہرے رہے۔ خادمہ باہر آئی، اس نے دریافت کیا: آپ لوگ اندر کیوں نہیں آتے؟ راوی کہتے ہیں: ہم لوگ اندر گئے، تو سیدنا عبداللہ بن مسعود رضی اللہ عنہ بیٹھے ہوئے تھے اور تسبیح پڑھ رہے تھے۔ انہوں نے فرمایا: جب تم لوگوں کو اجازت مل گئی تھی، تو تم لوگ اندر کیوں نہیں آئے۔ ان لوگوں نے کہا: جی نہیں، ہم یہ گمان کر رہے تھے کہ اہل خانہ میں سے کچھ لوگ سوئے ہوئے ہوں گے۔ سیدنا عبداللہ رضی اللہ عنہ نے فرمایا: کیا تم نے ام عبد کے گھرانے کے بارے میں غفلت کا گمان کیا تھا؟ پھر وہ تسبیح پڑھنے کی طرف متوجہ ہو گئے، یہاں تک کہ جب انہوں نے یہ گمان کیا کہ سورج نکل آیا ہو گا، تو انہوں نے فرمایا: اے لڑکی! تم جا کر دیکھو، کیا سورج نکل آیا ہے؟ راوی کہتے ہیں: اس لڑکی نے دیکھا تو وہ نکل چکا تھا، تو سیدنا عبداللہ رضی اللہ عنہ نے فرمایا: «الْحَمْدُ لِلّٰهِ الَّذِي أَقَالَنَا يَوْمَنَا هَذَا» ”ہر طرح کی حمد اللہ کے لیے مخصوص ہے، جس نے ہمیں یہ دن بھی عطا کیا ہے“۔ مہدی نامی راوی نے یہ بات بیان کی ہے، میرا خیال ہے روایت میں یہ الفاظ بھی ہیں: «وَلَمْ يُهْلِكْنَا بِذُنُوبِنَا» ”ہمارے گناہوں کی وجہ سے ہمیں ہلاک نہیں کیا ہے“۔ حاضرین میں سے ایک صاحب نے گزارش کی: گزشتہ رات میں نے تمام مفصل سورتوں کی تلاوت کی، تو سیدنا عبداللہ رضی اللہ عنہ نے فرمایا: یہ تو شعر پڑھنے کی طرح تیزی سے پڑھنا ہوا، مجھے ایک دوسرے کے قریب قریب کی وہ سورتیں یاد ہیں، جنہیں نبی اکرم صلی اللہ علیہ وسلم تلاوت کیا کرتے تھے، وہ مفصل سورتوں سے تعلق رکھنے والی اٹھارہ سورتیں ہیں اور آل حم سے تعلق رکھنے والی دو سورتیں ہیں۔ [صحیح ابن حبان/كتاب الصلاة/حدیث: 2607]

سیدنا زید بن خالد جہنی رضی اللہ عنہ بیان کرتے ہیں کہ انہوں نے یہ سوچا: آج رات میں نبی اکرم صلی اللہ علیہ وسلم کی نماز کا جائزہ لوں گا۔ وہ کہتے ہیں: میں آپ صلی اللہ علیہ وسلم کی چوکھٹ پر (شاید یہ الفاظ ہیں) آپ کے خیمہ کے باہر ٹیک لگا کر بیٹھ گیا۔ نبی اکرم صلی اللہ علیہ وسلم کھڑے ہوئے اور آپ صلی اللہ علیہ وسلم نے دو مختصر رکعات ادا کیں، پھر آپ صلی اللہ علیہ وسلم نے دو رکعات ادا کیں جو لمبی تھیں، پھر آپ صلی اللہ علیہ وسلم نے دو رکعات ادا کیں جو ان سے پہلے کی دو رکعات سے کچھ کم تھیں، پھر آپ صلی اللہ علیہ وسلم نے دو رکعات ادا کیں جو ان سے پہلے کی دو رکعات سے کچھ کم تھیں، پھر آپ صلی اللہ علیہ وسلم نے دو رکعات ادا کیں جو ان کی دو رکعات سے کچھ کم تھیں، پھر آپ صلی اللہ علیہ وسلم نے وتر ادا کیے، تو یہ تیرہ رکعات ہو گئیں۔ [صحیح ابن حبان/كتاب الصلاة/حدیث: 2608]

سیدنا حذیفہ رضی اللہ عنہ بیان کرتے ہیں کہ ایک رات میں نے نبی اکرم صلی اللہ علیہ وسلم کی اقتداء میں نماز ادا کی، نبی اکرم صلی اللہ علیہ وسلم نے سورہ بقرہ کی تلاوت شروع کی، میں نے سوچا آپ صلی اللہ علیہ وسلم ایک سو آیات کی تلاوت کر کے رکوع میں چلے جائیں گے لیکن آپ صلی اللہ علیہ وسلم مسلسل تلاوت کرتے رہے، میں نے سوچا دو رکعات میں یہ سورہ پوری پڑھ لیں گے لیکن آپ صلی اللہ علیہ وسلم مسلسل تلاوت کرتے رہے، میں نے سوچا آپ صلی اللہ علیہ وسلم یہ سورہ مکمل کر کے پھر رکوع میں جائیں گے لیکن آپ صلی اللہ علیہ وسلم مسلسل تلاوت کرتے رہے یہاں تک کہ آپ صلی اللہ علیہ وسلم نے سورہ نساء کی تلاوت شروع کی، پھر آپ صلی اللہ علیہ وسلم نے سورہ آل عمران بھی پڑھ لی۔ پھر آپ صلی اللہ علیہ وسلم رکوع میں گئے اور تقریباً اتنی دیر رکوع میں رہے جتنا آپ صلی اللہ علیہ وسلم نے قیام کیا تھا، آپ صلی اللہ علیہ وسلم اس میں «سُبْحَانَ رَبِّيَ الْعَظِيمِ» ”پاک ہے میرا رب جو بہت عظمت والا ہے“ پڑھتے رہے، پھر آپ صلی اللہ علیہ وسلم نے اپنا سر اٹھایا، «سَمِعَ اللّٰهُ لِمَنْ حَمِدَهُ» ”اللہ نے اس کی بات سن لی جس نے اس کی تعریف کی“، «رَبَّنَا وَلَكَ الْحَمْدُ» ”اے ہمارے رب! اور تیرے ہی لیے تمام تعریفیں ہیں“ پڑھا، پھر آپ صلی اللہ علیہ وسلم نے اتنا طویل قیام کیا، پھر آپ صلی اللہ علیہ وسلم سجدے میں گئے تو آپ صلی اللہ علیہ وسلم نے سجدے کو طول دیا، سجدے میں «سُبْحَانَ رَبِّيَ الْأَعْلَىٰ» ”پاک ہے میرا رب جو سب سے بلند ہے“ پڑھتے رہے۔ (اس تلاوت کے دوران) آپ صلی اللہ علیہ وسلم جب بھی خوف دلانے یا عظمت کے اظہار والی کسی آیت کی تلاوت کرتے تھے، تو آپ صلی اللہ علیہ وسلم اس کا ذکر کیا کرتے تھے۔ [صحیح ابن حبان/كتاب الصلاة/حدیث: 2609]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم اتنی دیر سجدے میں ٹھہرے رہتے تھے جتنی دیر میں کوئی شخص پچاس آیات کی تلاوت کر لیتا ہے۔ راوی بیان کرتے ہیں کہ سیدہ عائشہ رضی اللہ عنہا کی مراد یہ تھی کہ آپ صلی اللہ علیہ وسلم رات کی نفل نماز میں ایسا کیا کرتے تھے۔ [صحیح ابن حبان/كتاب الصلاة/حدیث: 2610]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم رات کے وقت تیرہ رکعات ادا کیا کرتے تھے۔ [صحیح ابن حبان/كتاب الصلاة/حدیث: 2611]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم عشاء کی نماز، جسے لوگ عتمہ کہتے ہیں، سے فارغ ہونے سے لے کر فجر تک گیارہ رکعات ادا کیا کرتے تھے۔ آپ ہر دو رکعات ادا کرنے کے بعد سلام پھیر دیا کرتے تھے۔ آپ ایک رکعت کے ذریعے وتر ادا کر لیا کرتے تھے جب مؤذن فجر کی اذان دے کر خاموش ہوتا اور صبح صادق ہو جاتی اور مؤذن آ جاتا تو آپ اٹھ کر دو مختصر رکعات ادا کر لیتے پھر آپ اپنے دائیں پہلو کے بل لیٹ جاتے یہاں تک کہ مؤذن آپ کو بلانے آ جاتا۔ [صحیح ابن حبان/كتاب الصلاة/حدیث: 2612]

سیدنا ابوسلمہ بن عبدالرحمن رحمہ اللہ بیان کرتے ہیں کہ انہوں نے سیدہ عائشہ رضی اللہ عنہا سے سوال کیا: رمضان میں نبی اکرم صلی اللہ علیہ وسلم کی نفل نماز کیسے ہوتی تھی؟ سیدہ عائشہ رضی اللہ عنہا نے بتایا کہ نبی اکرم صلی اللہ علیہ وسلم رمضان میں، یا رمضان کے علاوہ گیارہ رکعات سے زیادہ ادا نہیں کرتے تھے۔ [صحیح ابن حبان/كتاب الصلاة/حدیث: 2613]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کے وقت گیارہ رکعات ادا کیا کرتے تھے، آپ صلی اللہ علیہ وسلم کی نماز یہی ہوتی تھی۔ آپ صلی اللہ علیہ وسلم اس میں اتنا (طویل) سجدہ کرتے تھے جتنی دیر تم میں سے کوئی شخص پچاس آیات کی تلاوت کرتا ہے اور آپ صلی اللہ علیہ وسلم فجر سے پہلے دو رکعات ادا کیا کرتے تھے، پھر آپ صلی اللہ علیہ وسلم اپنے دائیں پہلو کے بل لیٹ جاتے تھے یہاں تک کہ مؤذن آپ صلی اللہ علیہ وسلم کو نماز کے لیے بلانے کے لیے آ جاتا تھا۔ [صحیح ابن حبان/كتاب الصلاة/حدیث: 2614]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم رات کے وقت نو رکعات (نفل) ادا کیا کرتے تھے۔ [صحیح ابن حبان/كتاب الصلاة/حدیث: 2615]