عباد بن تمیم رحمہ اللہ بیان کرتے ہیں کہ انہوں نے اپنے چچا رضی اللہ عنہ سے سنا جو نبی اکرم صلی اللہ علیہ وسلم کے صحابی ہیں، وہ بیان کرتے ہیں کہ ایک دن نبی اکرم صلی اللہ علیہ وسلم نمازِ استسقاء ادا کرنے کے لیے تشریف لے گئے، آپ صلی اللہ علیہ وسلم نے لوگوں کی طرف پشت کر لی اور قبلہ کی طرف رخ کیا، اور پھر چادر کو الٹایا اور دو رکعات ادا کیں۔ [صحیح ابن حبان/كتاب الصلاة/حدیث: 2866]

عباد بن تمیم رحمہ اللہ اپنے چچا رضی اللہ عنہ کا یہ بیان نقل کرتے ہیں، نبی اکرم صلی اللہ علیہ وسلم نے بارش کی دعا مانگتے ہوئے سیاہ چادر اوڑھی ہوئی تھی، نبی اکرم صلی اللہ علیہ وسلم نے اس کے نیچے والے حصے کو اوپر کرنا چاہا جب ایسا کرنا آپ صلی اللہ علیہ وسلم کے لیے دشوار ہوا، تو آپ صلی اللہ علیہ وسلم نے اپنے کندھے پر ہی اسے الٹ دیا۔ [صحیح ابن حبان/كتاب الصلاة/حدیث: 2867]

سیدنا عبداللہ بن عباس رضی اللہ عنہما بیان کرتے ہیں: ”اللہ تعالیٰ نے تمہارے نبی صلی اللہ علیہ وسلم کی زبانی نماز کا حکم فرض قرار دیا ہے، جو حضر میں چار رکعات ہوں گی، سفر میں دو رکعات ہوں گی اور خوف کے عالم میں ایک رکعت ہو گی۔“ [صحیح ابن حبان/كتاب الصلاة/حدیث: 2868]

سیدنا جابر بن عبد اللہ رضی اللہ عنہما بیان کرتے ہیں: نبی اکرم صلی اللہ علیہ وسلم نے لوگوں کو نمازِ خوف پڑھائی، ایک صف آپ صلی اللہ علیہ وسلم کے آگے کھڑی ہو گئی اور ایک صف آپ صلی اللہ علیہ وسلم کے پیچھے کھڑی ہو گئی، آپ صلی اللہ علیہ وسلم نے لوگوں کو ایک رکعت اور دو سجدے پڑھائے، پھر وہ لوگ آئے اور آ کر کھڑے ہو گئے اور یہ لوگ کھڑے رہے، نبی اکرم صلی اللہ علیہ وسلم نے انہیں بھی ایک رکوع اور دو سجدے یعنی ایک رکعت پڑھائی، تو نبی اکرم صلی اللہ علیہ وسلم کی دو رکعات ہوئیں اور ان میں سے ہر ایک کی ایک رکعت ہوئی۔ [صحیح ابن حبان/كتاب الصلاة/حدیث: 2869]

قاسم بن حسان بیان کرتے ہیں کہ میں سیدنا زید بن ثابت رضی اللہ عنہ کی خدمت میں حاضر ہوا اور میں نے ان سے نمازِ خوف کے بارے میں دریافت کیا، انہوں نے بتایا کہ نبی اکرم صلی اللہ علیہ وسلم نے نماز پڑھائی، ایک صف آپ صلی اللہ علیہ وسلم کے پیچھے کھڑی ہو گئی اور ایک صف دشمن کے مقابلے میں کھڑی ہو گئی، آپ صلی اللہ علیہ وسلم نے ان لوگوں کو ایک رکعت پڑھائی، پھر یہ لوگ اپنے بھائیوں کی جگہ پر جا کر کھڑے ہو گئے اور دوسرے لوگ آ گئے، آپ صلی اللہ علیہ وسلم نے انہیں بھی ایک رکعت پڑھائی، پھر آپ صلی اللہ علیہ وسلم نے سلام پھیر دیا، تو نبی اکرم صلی اللہ علیہ وسلم کی دو رکعتیں ہوئیں اور ہر ایک گروہ کی ایک رکعت ہوئی۔ [صحیح ابن حبان/كتاب الصلاة/حدیث: 2870]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے «ذِی قَرَد» کے مقام پر نماز پڑھائی، لوگوں نے آپ صلی اللہ علیہ وسلم کے پیچھے دو صفیں بنا لیں، ایک صف آپ صلی اللہ علیہ وسلم کے پیچھے رہی اور دوسری صف دشمن کے مدمقابل رہی، جو صف آپ صلی اللہ علیہ وسلم کے قریب تھی آپ صلی اللہ علیہ وسلم نے اسے ایک رکعت پڑھائی، پھر یہ لوگ اپنے ساتھیوں کی جگہ پر چلے گئے، وہ لوگ ان لوگوں کی جگہ پر آ گئے، نبی اکرم صلی اللہ علیہ وسلم نے انہیں بھی ایک رکعت پڑھائی اور ان لوگوں نے نماز کی قضا نہیں کی (یعنی دوسری رکعت ادا نہیں کی)۔ [صحیح ابن حبان/كتاب الصلاة/حدیث: 2871]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ضجنان اور عسفان کے درمیان پڑاؤ کیا، آپ صلی اللہ علیہ وسلم نے مشرکین کا محاصرہ کیا ہوا تھا، راوی کہتے ہیں: ان مشرکین نے یہ کہا: ”ان لوگوں کے نزدیک یہ نماز ان کے بیٹوں اور کنواریوں سے زیادہ محبوب ہے“ ان کی مراد عصر کی نماز تھی، ”تو تم لوگ تیاری رکھو اور ان پر ایک ہی مرتبہ حملہ کر دینا۔“ راوی کہتے ہیں: سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کو یہ کہا: ”آپ صلی اللہ علیہ وسلم اپنے ساتھیوں کو دو حصوں میں تقسیم کر دیں، آپ صلی اللہ علیہ وسلم پہلے گروہ کو ایک رکعت پڑھائیں اور دوسرا گروہ اپنے ہتھیار تیار رکھے، جب آپ صلی اللہ علیہ وسلم انہیں ایک رکعت پڑھا دیں، تو وہ لوگ پیچھے ہٹ جائیں اور دوسرا گروہ آگے آ جائے، تو انہیں بھی ایک رکعت پڑھائیں، یہ لوگ اپنے ہتھیار اور ساز و سامان تیار رکھیں“ تو اس طرح ہر ایک گروہ نے نبی اکرم صلی اللہ علیہ وسلم کی اقتداء میں ایک ایک رکعت ادا کی۔ [صحیح ابن حبان/كتاب الصلاة/حدیث: 2872]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ذاتِ رقاع کے مقام پر نمازِ خوف ادا کی تھی، سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے لوگوں کو دو گروہوں میں تقسیم کر دیا، ایک گروہ آپ صلی اللہ علیہ وسلم کے پیچھے کھڑا ہو گیا اور دوسرا گروہ دشمن کے مقابلے میں کھڑا ہو گیا؛ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے تکبیر کہی تو جس گروہ نے آپ صلی اللہ علیہ وسلم کے پیچھے صف بنائی ہوئی تھی ان لوگوں نے بھی تکبیر کہی، آپ صلی اللہ علیہ وسلم رکوع میں گئے تو وہ لوگ بھی رکوع میں گئے، پھر آپ صلی اللہ علیہ وسلم سجدے میں گئے تو وہ لوگ بھی سجدے میں گئے، پھر آپ صلی اللہ علیہ وسلم نے سر اٹھایا تو وہ لوگ بھی اٹھ گئے، نبی اکرم صلی اللہ علیہ وسلم اپنی جگہ بیٹھے رہے اور ان لوگوں نے خود ہی دوسری مرتبہ سجدہ کیا اور پھر وہ لوگ کھڑے ہو گئے، اپنی ایڑیوں کے بل چلتے ہوئے پیچھے چلے گئے یہاں تک کہ وہ پیچھے جا کر کھڑے ہو گئے اور دوسرا گروہ آگے آ گیا، انہوں نے نبی اکرم صلی اللہ علیہ وسلم کے پیچھے صف بنا لی، ان لوگوں نے تکبیر کہی پھر ان لوگوں نے بذاتِ خود ایک رکعت ادا کی، پھر نبی اکرم صلی اللہ علیہ وسلم نے دوسرا سجدہ کیا تو انہوں نے نبی اکرم صلی اللہ علیہ وسلم کے ہمراہ سجدہ کیا، پھر نبی اکرم صلی اللہ علیہ وسلم اس رکعت سے کھڑے ہو گئے، ان لوگوں نے دوسرا سجدہ بذاتِ خود کیا، پھر دونوں گروہ کھڑے ہو گئے، ان لوگوں نے نبی اکرم صلی اللہ علیہ وسلم کے پیچھے صف بنا لی، پھر نبی اکرم صلی اللہ علیہ وسلم رکوع میں گئے تو وہ سب بھی رکوع میں چلے گئے، پھر آپ صلی اللہ علیہ وسلم سجدے میں گئے تو وہ سب بھی سجدے میں چلے گئے، پھر آپ صلی اللہ علیہ وسلم نے سر اٹھایا تو ان لوگوں نے بھی سر اٹھا لیا، ان میں سے ہر ایک عمل کو نبی اکرم صلی اللہ علیہ وسلم نے انتہائی تیزی سے کیا، آپ صلی اللہ علیہ وسلم نے اس حوالے سے کوئی کوتاہی نہیں کی، جہاں تک ہو سکے مختصر طور پر (رکوع اور سجدہ کیا)، پھر نبی اکرم صلی اللہ علیہ وسلم نے سلام پھیرا تو ان لوگوں نے بھی سلام پھیر دیا، پھر نبی اکرم صلی اللہ علیہ وسلم کھڑے ہوئے تو تمام لوگوں نے آپ صلی اللہ علیہ وسلم کے ساتھ نماز میں شرکت کی تھی۔ [صحیح ابن حبان/كتاب الصلاة/حدیث: 2873]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے اصحاب کو نمازِ خوف پڑھائی، آپ صلی اللہ علیہ وسلم نے ان سب کے ساتھ رکوع کیا، پھر جب نبی اکرم صلی اللہ علیہ وسلم سجدے میں گئے تو وہ سب بھی سجدے میں گئے جو آپ صلی اللہ علیہ وسلم کے قریب موجود تھے جبکہ دوسرے لوگ کھڑے رہے، پھر جب نبی اکرم صلی اللہ علیہ وسلم کھڑے ہوئے تو ان لوگوں نے بذاتِ خود دو مرتبہ سجدہ کیا، پھر آگے والی صف پیچھے ہٹ گئی، پھر نبی اکرم صلی اللہ علیہ وسلم رکوع میں گئے تو وہ صف بھی رکوع میں گئی جو آپ صلی اللہ علیہ وسلم کے قریب کھڑی ہوئی تھی، ان لوگوں نے اپنا سر اٹھایا اور ان لوگوں نے دو سجدے کیے، تو ان سب نے نبی اکرم صلی اللہ علیہ وسلم کے ہمراہ رکوع کیا، ان سب لوگوں نے بذاتِ خود دو سجدے کیے، اس وقت دشمن قبلہ کی سمت میں موجود تھا۔ [صحیح ابن حبان/كتاب الصلاة/حدیث: 2874]

سیدنا ابوعیاش زرقی رضی اللہ عنہ بیان کرتے ہیں: نبی اکرم صلی اللہ علیہ وسلم عسفان کے مقام پر موجود تھے، جبکہ مشرکین ضجنان کے مقام پر موجود تھے۔ جب نبی اکرم صلی اللہ علیہ وسلم نے ظہر کی نماز ادا کی تو مشرکین نے آپ صلی اللہ علیہ وسلم کو رکوع اور سجدہ کرتے دیکھا تو انہوں نے آپس میں یہ مشورہ کیا کہ وہ آپ صلی اللہ علیہ وسلم پر حملہ کر دیں گے۔ جب عصر کی نماز کا وقت ہوا، تو لوگوں نے آپ صلی اللہ علیہ وسلم کے پیچھے دو صفیں بنا لیں۔ نبی اکرم صلی اللہ علیہ وسلم نے تکبیر کہی تو سب لوگوں نے بھی تکبیر کہی۔ نبی اکرم صلی اللہ علیہ وسلم نے رکوع کیا، تو سب لوگوں نے رکوع کیا۔ پھر نبی اکرم صلی اللہ علیہ وسلم سجدے میں گئے، تو وہ صف سجدے میں گئی جو آپ صلی اللہ علیہ وسلم کے قریب کھڑی ہوئی تھی اور دوسری صف اپنے ہتھیار لے کر دشمن کی طرف رخ کر کے کھڑی رہی۔ جب نبی اکرم صلی اللہ علیہ وسلم نے اپنا سر اٹھایا، تو دوسری صف نے بھی سجدہ کر لیا۔ جب ان لوگوں نے اپنا سر اٹھا لیا تو نبی اکرم صلی اللہ علیہ وسلم نے رکوع کیا، تو ان سب لوگوں نے رکوع کیا۔ نبی اکرم صلی اللہ علیہ وسلم نے سجدہ کیا، تو اس صف نے سجدہ کیا جو آپ صلی اللہ علیہ وسلم کے قریب کھڑی ہوئی تھی اور دوسری صف اپنے ہتھیار لے کر دشمن کی طرف رخ کر کے کھڑی رہی۔ جب نبی اکرم صلی اللہ علیہ وسلم نے اپنا سر اٹھایا، تو دوسری صف نے بھی سجدہ کیا۔ (امام ابن حبان رحمہ اللہ فرماتے ہیں:) ابوعیاش زرقی نامی راوی کے نام کے بارے میں اختلاف پایا جاتا ہے۔ بعض حضرات نے یہ کہا ہے کہ ان کا نام زید بن نعمان ہے اور بعض حضرات نے یہ کہا ہے کہ زید بن صامت ہے۔ بعض نے یہ کہا ہے کہ عبید بن معاویہ بن صامت ہے جبکہ بعض نے یہ کہا ہے کہ عبید بن معاذ بن صامت ہے۔ [صحیح ابن حبان/كتاب الصلاة/حدیث: 2875]