سیدنا ابوعیاش زرقی رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ہمراہ عسفان کے مقام پر موجود تھے، مشرکین کے سالار خالد بن ولید تھے۔ راوی کہتے ہیں: ہم نے ظہر کی نماز ادا کی، مشرکین نے یہ کہا کہ یہ لوگ ایسی حالت میں تھے اگر ہم چاہتے تو ان پر حملہ کر سکتے تھے (راوی کو شک ہے شاید یہ الفاظ ہیں:) ان کی غفلت میں ان پر حملہ کر سکتے تھے۔ راوی کہتے ہیں: ظہر اور عصر کے درمیان قصر نماز کے حکم سے متعلق آیت نازل ہو گئی، لوگوں نے اپنے ہتھیار پکڑ لیے اور نبی اکرم صلی اللہ علیہ وسلم کے پیچھے صف بنا لی، انہوں نے دو صفیں بنائیں، ان کا رُخ دشمن کی طرف تھا اور مشرکین کا رخ ان کی طرف تھا۔ نبی اکرم صلی اللہ علیہ وسلم نے تکبیر کہی، ان سب لوگوں نے تکبیر کہی، نبی اکرم صلی اللہ علیہ وسلم نے رکوع کیا، ان سب لوگوں نے رکوع کیا، پھر نبی اکرم صلی اللہ علیہ وسلم نے اپنا سر اٹھایا، تو ان سب نے سر اٹھایا، پھر نبی اکرم صلی اللہ علیہ وسلم نے سجدہ کیا، تو اس صف نے سجدہ کیا جو آپ صلی اللہ علیہ وسلم کے قریب موجود تھی اور دوسرے لوگ ان کی حفاظت کرتے رہے، جب یہ لوگ سجدہ کر کے فارغ ہوئے، تو ان لوگوں نے سجدہ کیا، پھر وہ والی صف پیچھے ہٹ گئی جو نبی اکرم صلی اللہ علیہ وسلم کے قریب موجود تھی، دوسرے لوگ آگے آ گئے اور ان لوگوں کی جگہ پر کھڑے ہو گئے، نبی اکرم صلی اللہ علیہ وسلم نے رکوع کیا، تو ان سب لوگوں نے رکوع کیا، نبی اکرم صلی اللہ علیہ وسلم نے سر اٹھایا، تو ان سب نے سر اٹھایا، پھر نبی اکرم صلی اللہ علیہ وسلم نے سجدہ کیا، تو اس صف نے سجدہ کیا جو آپ صلی اللہ علیہ وسلم کے قریب موجود تھی اور دوسرے لوگ کھڑے ان کی حفاظت کرتے رہے، جب یہ لوگ سجدہ کر کے فارغ ہوئے، تو دوسرے لوگوں نے سجدہ کیا، پھر یہ لوگ نبی اکرم صلی اللہ علیہ وسلم کے ہمراہ سیدھے ہوئے اور یہ سب لوگ بیٹھ گئے، پھر نبی اکرم صلی اللہ علیہ وسلم نے ان سب سمیت سلام پھیرا۔ نبی اکرم صلی اللہ علیہ وسلم نے عسفان کے مقام پر یہ نماز پڑھائی تھی، آپ صلی اللہ علیہ وسلم نے بنو سلیم کے ساتھ مقابلے کے دن یہ نماز پڑھائی تھی۔ [صحیح ابن حبان/كتاب الصلاة/حدیث: 2876]

سیدنا جابر بن عبداللہ رضی اللہ عنہما بیان کرتے ہیں: ہم نے نبی اکرم صلی اللہ علیہ وسلم کے ہمراہ جہینہ قبیلے کے گروہ کے خلاف جنگ میں حصہ لیا، انہوں نے انتہائی شدید لڑائی کی۔ جب ہم ظہر کی نماز ادا کرنے لگے، تو انہوں نے کہا: اگر ہم ایک ہی مرتبہ ان پر حملہ کر دیں، تو ہم انہیں ختم کر دیں گے۔ سیدنا جبرائیل علیہ السلام نے نبی اکرم صلی اللہ علیہ وسلم کو اس بارے میں بتا دیا، نبی اکرم صلی اللہ علیہ وسلم نے ہمارے سامنے اس بات کا تذکرہ کیا، آپ صلی اللہ علیہ وسلم نے بتایا: ”وہ لوگ کہہ رہے ہیں، ہمارے اور ان کے درمیان یہ نماز ہے، جو ان کے نزدیک ہر چیز سے زیادہ محبوب ہے۔“ جب نماز کا وقت ہوا، تو ہم نے دو صفیں بنا لیں، مشرکین ہمارے اور قبلہ کے درمیان تھے۔ نبی اکرم صلی اللہ علیہ وسلم نے تکبیر کہی، ہم نے بھی آپ صلی اللہ علیہ وسلم کی اقتدا میں تکبیر کہی، آپ صلی اللہ علیہ وسلم رکوع میں گئے، آپ صلی اللہ علیہ وسلم کے ہمراہ ہم بھی رکوع میں گئے، آپ صلی اللہ علیہ وسلم نے سجدہ کیا، تو پہلی صف نے آپ صلی اللہ علیہ وسلم کے ہمراہ سجدہ کیا، جب آپ صلی اللہ علیہ وسلم کھڑے ہو گئے، تو دوسری صف نے سجدہ کیا، پھر وہ لوگ آگے بڑھ گئے اور پہلی صف والوں کی جگہ آ کر کھڑے ہو گئے، پہلی صف والے پیچھے ہٹ گئے، پھر نبی اکرم صلی اللہ علیہ وسلم نے تکبیر کہی، آپ صلی اللہ علیہ وسلم کے ہمراہ ہم نے بھی تکبیر کہی، پھر نبی اکرم صلی اللہ علیہ وسلم نے رکوع کیا، آپ صلی اللہ علیہ وسلم کے ہمراہ ہم نے بھی رکوع کیا، نبی اکرم صلی اللہ علیہ وسلم نے سجدہ کیا، تو آپ صلی اللہ علیہ وسلم کے ہمراہ پہلی صف والوں نے سجدہ کیا، پھر آپ صلی اللہ علیہ وسلم بیٹھ گئے، پھر دوسری صف والوں نے سجدہ کیا، پھر یہ سب لوگ بیٹھ گئے اور پھر نبی اکرم صلی اللہ علیہ وسلم نے ان سب سمیت سلام پھیرا۔ (امام ابن حبان رحمہ اللہ فرماتے ہیں:) ابوزبیر نامی راوی نے یہ الفاظ نقل کیے ہیں۔ سیدنا جابر رضی اللہ عنہما فرماتے ہیں جس طرح تمہارے یہ امراء نماز ادا کرتے ہیں۔ [صحیح ابن حبان/كتاب الصلاة/حدیث: 2877]

عروہ بن زبیر رحمہ اللہ بیان کرتے ہیں کہ میں نے سیدنا ابوہریرہ رضی اللہ عنہ کو سنا، مروان بن حکم نے ان سے نمازِ خوف کے بارے میں دریافت کیا تو سیدنا ابوہریرہ رضی اللہ عنہ نے بتایا: میں اس جنگ میں نبی اکرم صلی اللہ علیہ وسلم کے ساتھ موجود تھا، نبی اکرم صلی اللہ علیہ وسلم نے لوگوں کو دو حصوں میں تقسیم کر دیا، ایک گروہ آپ صلی اللہ علیہ وسلم کے پیچھے کھڑا ہو گیا اور دوسرا گروہ دشمن کے مدمقابل کھڑا ہو گیا، ان لوگوں کی پشت قبلہ کی طرف تھی۔ نبی اکرم صلی اللہ علیہ وسلم نے تکبیر کہی تو ان سب لوگوں نے تکبیر کہی، وہ بھی جو آپ صلی اللہ علیہ وسلم کے ساتھ کھڑے ہوئے تھے اور وہ بھی جو دشمن کے مدمقابل کھڑے ہوئے تھے۔ نبی اکرم صلی اللہ علیہ وسلم نے رکوع کیا تو جو گروہ آپ صلی اللہ علیہ وسلم کے ساتھ تھا انہوں نے آپ صلی اللہ علیہ وسلم کے ہمراہ رکوع کیا، نبی اکرم صلی اللہ علیہ وسلم سجدے میں گئے تو آپ صلی اللہ علیہ وسلم کے پاس والا گروہ بھی سجدے میں چلا گیا، جبکہ دوسرا گروہ دشمن کے مدمقابل کھڑا رہا، پھر نبی اکرم صلی اللہ علیہ وسلم کھڑے ہوئے تو جس گروہ نے آپ صلی اللہ علیہ وسلم کے ہمراہ ایک رکعت ادا کی تھی انہوں نے اپنا اسلحہ لیا اور الٹے قدموں چلتے ہوئے دشمن کے مدمقابل آ کر کھڑے ہو گئے اور وہ گروہ جو دشمن کے مدمقابل کھڑا ہوا تھا وہ آگے آ گیا، ان لوگوں نے رکوع کیا اور سجدہ کیا، نبی اکرم صلی اللہ علیہ وسلم پہلی حالت میں ہی کھڑے رہے، پھر وہ لوگ کھڑے ہو گئے تو نبی اکرم صلی اللہ علیہ وسلم نے ایک مرتبہ رکوع کیا، ان لوگوں نے بھی آپ صلی اللہ علیہ وسلم کے ہمراہ رکوع کیا، آپ صلی اللہ علیہ وسلم نے سجدہ کیا تو انہوں نے بھی آپ صلی اللہ علیہ وسلم کے ہمراہ سجدہ کیا، پھر وہ گروہ آ گیا جو دشمن کے مدمقابل تھا، پھر انہوں نے رکوع اور سجدہ کیا، نبی اکرم صلی اللہ علیہ وسلم اور آپ صلی اللہ علیہ وسلم کے ساتھ والے افراد بیٹھے رہے، پھر سلام کا وقت آیا تو نبی اکرم صلی اللہ علیہ وسلم نے سلام پھیرا اور ان سب لوگوں نے بھی سلام پھیر دیا، تو ان سب نے نبی اکرم صلی اللہ علیہ وسلم کے ہمراہ نماز ادا کی تھی۔ [صحیح ابن حبان/كتاب الصلاة/حدیث: 2878]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ہمیں نمازِ خوف پڑھائی، آپ صلی اللہ علیہ وسلم نے ایک گروہ کو ایک رکعت پڑھائی اور دوسرا گروہ دشمن کے مدمقابل موجود رہا، پھر وہ لوگ واپس آ گئے اور آ کر دشمن کی طرف رُخ کر کے کھڑے ہو گئے، وہ لوگ آئے تو نبی اکرم صلی اللہ علیہ وسلم نے ان لوگوں کو بھی ایک رکعت پڑھائی، نبی اکرم صلی اللہ علیہ وسلم نے ان سب سمیت سلام پھیر دیا، پھر یہ لوگ چلے گئے اور اپنے ساتھیوں کی جگہ دشمن کی طرف رُخ کر کے کھڑے ہو گئے، پھر وہ آئے تو نبی اکرم صلی اللہ علیہ وسلم نے ان لوگوں کو بھی ایک رکعت پڑھائی، نبی اکرم صلی اللہ علیہ وسلم نے ان سب سمیت سلام پھیر دیا، تو ان لوگوں نے بھی اور ان لوگوں نے بھی ایک، ایک رکعت ادا کی۔ [صحیح ابن حبان/كتاب الصلاة/حدیث: 2879]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم کھڑے ہوئے، آپ صلی اللہ علیہ وسلم کے ہمراہ لوگ بھی کھڑے ہوئے، آپ صلی اللہ علیہ وسلم نے تکبیر کہی، آپ صلی اللہ علیہ وسلم کے ساتھ لوگوں نے بھی تکبیر کہی، پھر آپ صلی اللہ علیہ وسلم رکوع میں چلے گئے، آپ صلی اللہ علیہ وسلم کے ساتھ ان میں سے کچھ لوگ رکوع میں چلے گئے، پھر آپ صلی اللہ علیہ وسلم سجدے میں گئے، تو وہ لوگ بھی سجدے میں چلے گئے، پھر آپ صلی اللہ علیہ وسلم دوسری رکعت کے لیے کھڑے ہوئے، تو وہ لوگ پیچھے ہٹ گئے جنہوں نے آپ صلی اللہ علیہ وسلم کے ہمراہ سجدہ کیا تھا، وہ اپنے بھائیوں کی حفاظت کرنے لگے، دوسرا گروہ آ گیا، ان لوگوں نے نبی اکرم صلی اللہ علیہ وسلم کے ہمراہ رکوع کیا اور سجدہ کیا، تو ان سب لوگوں نے نماز ادا کی، وہ تکبیر بھی کہتے رہے اور ایک دوسرے کی حفاظت بھی کرتے رہے۔ [صحیح ابن حبان/كتاب الصلاة/حدیث: 2880]

سیدنا ابوبکرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے لوگوں کی دو صفیں بنا دیں، جو صف آپ صلی اللہ علیہ وسلم کے پاس موجود تھی آپ صلی اللہ علیہ وسلم نے انہیں دو رکعات پڑھائیں، پھر انہوں نے سلام پھیر دیا اور وہ پیچھے ہٹ گئے، اور دوسرے لوگ آگے آ گئے، نبی اکرم صلی اللہ علیہ وسلم نے انہیں بھی دو رکعات پڑھائیں، پھر انہوں نے بھی سلام پھیر دیا، تو یوں نبی اکرم صلی اللہ علیہ وسلم کی چار رکعات ہوئیں اور ان مسلمانوں نے دو دو رکعات ادا کیں۔ [صحیح ابن حبان/كتاب الصلاة/حدیث: 2881]

سلیمان یشکری سے مروی ہے، انہوں نے سیدنا جابر بن عبداللہ رضی اللہ عنہما سے خوف کے عالم میں نماز مختصر ادا کرنے کے بارے میں دریافت کیا کہ اس کا حکم کہاں نازل ہوا تھا اور یہ صورتِ حال کہاں درپیش آئی تھی؟ انہوں نے بتایا: ہم لوگ قریش کے ایک قافلے کا پیچھا کرتے ہوئے نکلے جو شام جا رہا تھا، جب ہم نخل کے مقام پر پہنچے تو ایک شخص نبی اکرم صلی اللہ علیہ وسلم کی خدمت میں حاضر ہوا، اس نے تلوار لٹکائی ہوئی تھی، اس نے کہا: کیا آپ محمد ( صلی اللہ علیہ وسلم ) ہیں؟ نبی اکرم صلی اللہ علیہ وسلم نے فرمایا: ”جی ہاں۔“ اس نے دریافت کیا: کیا آپ مجھ سے ڈرتے نہیں ہیں؟ نبی اکرم صلی اللہ علیہ وسلم نے فرمایا: ”جی نہیں۔“ اس نے دریافت کیا: آپ کو مجھ سے کون بچائے گا؟ نبی اکرم صلی اللہ علیہ وسلم نے فرمایا: ”اللہ تعالیٰ مجھے تم سے بچائے گا۔“ راوی کہتے ہیں: اس شخص نے اپنی تلوار کھینچ لی، لوگوں نے اسے ڈانٹا اور اسے جھڑکا، نبی اکرم صلی اللہ علیہ وسلم نے لوگوں کو وہاں سے روانگی کا اور اسلحہ اختیار کرنے کا حکم دیا، پھر نماز کے لیے اذان دی گئی۔ نبی اکرم صلی اللہ علیہ وسلم نے اپنے پیچھے موجود گروہ کو نماز پڑھائی اور ایک گروہ دشمن کی طرف رخ کر کے حفاظت کرتا رہا، نبی اکرم صلی اللہ علیہ وسلم نے اپنے ساتھ والے گروہ کو دو رکعات پڑھائیں، پھر دوسرا گروہ آ کر اس جگہ کھڑا ہو گیا جہاں وہ لوگ کھڑے تھے جنہوں نے نبی اکرم صلی اللہ علیہ وسلم کے ہمراہ نماز ادا کی تھی اور وہ دشمن کی طرف رخ کر کے حفاظت کے فرائض سر انجام دینے لگے۔ نبی اکرم صلی اللہ علیہ وسلم نے ان لوگوں کو بھی دو رکعات پڑھائیں، تو یوں نبی اکرم صلی اللہ علیہ وسلم کی چار رکعات ہو گئیں اور آپ صلی اللہ علیہ وسلم کے ساتھیوں نے دو رکعات ادا کیں۔ [صحیح ابن حبان/كتاب الصلاة/حدیث: 2882]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے نخل کے مقام پر موجود ”محارب خصفہ“ میں لڑائی کی، ان لوگوں نے مسلمانوں کو غافل دیکھا تو ان کا ایک شخص آیا جس کا نام عوف بن حارث یا شاید غورث بن حارث تھا، وہ تلوار لے کر نبی اکرم صلی اللہ علیہ وسلم کے سرہانے آ کر کھڑا ہو گیا اور دریافت کیا: آپ صلی اللہ علیہ وسلم کو مجھ سے کون بچائے گا؟ نبی اکرم صلی اللہ علیہ وسلم نے فرمایا: «اللهُ» ”اللہ تعالیٰ۔“ راوی کہتے ہیں: اس کے ہاتھ سے تلوار گر گئی۔ نبی اکرم صلی اللہ علیہ وسلم نے تلوار کو پکڑا اور دریافت کیا: ”تمہیں مجھ سے کون بچائے گا؟“ اس نے کہا: آپ صلی اللہ علیہ وسلم مجھ سے بہتر ہو جائیں۔ نبی اکرم صلی اللہ علیہ وسلم نے فرمایا: ”کیا تم اس بات کی گواہی دیتے ہو کہ اللہ تعالیٰ کے علاوہ اور کوئی معبود نہیں ہے؟“ اس نے کہا: جی نہیں، میں آپ صلی اللہ علیہ وسلم کے ساتھ یہ عہد کرتا ہوں کہ میں آپ صلی اللہ علیہ وسلم کے ساتھ جنگ نہیں کروں گا اور نہ ہی اس قوم کے ساتھ رہوں گا جو آپ صلی اللہ علیہ وسلم کے ساتھ جنگ کرے گی۔ راوی کہتے ہیں: نبی اکرم صلی اللہ علیہ وسلم نے اسے چھوڑ دیا، وہ اپنے ساتھیوں کے پاس آیا اور بولا: میں سب سے بہتر شخص کے پاس سے تمہارے پاس آیا ہوں۔ جب ظہر یا شاید عصر کا وقت ہوا، یہ شک ابوعوانہ نامی راوی کو ہے، تو نبی اکرم صلی اللہ علیہ وسلم نے نمازِ خوف کا حکم دیا، راوی بیان کرتے ہیں: لوگوں کے دو گروہ بن گئے، ایک گروہ دشمن کے مدمقابل ہو گیا اور ایک گروہ نبی اکرم صلی اللہ علیہ وسلم کے ساتھ نماز ادا کرنے لگا۔ نبی اکرم صلی اللہ علیہ وسلم نے اپنے ساتھ والے گروہ کو دو رکعات پڑھائیں، پھر ان لوگوں نے نماز ختم کر دی اور وہ ان لوگوں کی جگہ پر آ گئے اور وہ لوگ آ کر نبی اکرم صلی اللہ علیہ وسلم کی اقتدا میں نماز ادا کرنے لگے، انہوں نے دو رکعات ادا کیں، یوں نبی اکرم صلی اللہ علیہ وسلم کی چار رکعات ہوئیں اور ان لوگوں کی دو رکعات ہوئیں۔ [صحیح ابن حبان/كتاب الصلاة/حدیث: 2883]

سیدنا جابر بن عبداللہ رضی اللہ عنہما بیان کرتے ہیں: ہم نبی اکرم صلی اللہ علیہ وسلم کے ہمراہ آئے یہاں تک کہ جب ہم ذات الرقاع کے مقام پر پہنچے، تو اعلان کیا گیا: ”باجماعت نماز ہونے لگی ہے“، پھر نبی اکرم صلی اللہ علیہ وسلم نے ایک گروہ کو دو رکعات پڑھائیں، پھر وہ پیچھے ہٹ گئے اور آپ صلی اللہ علیہ وسلم نے دوسرے گروہ کو دو رکعات پڑھائیں، تو نبی اکرم صلی اللہ علیہ وسلم کی چار رکعات ہوئیں اور ان لوگوں کی دو رکعات ہوئیں۔ [صحیح ابن حبان/كتاب الصلاة/حدیث: 2884]

سیدنا سہل بن ابوحثمہ رضی اللہ عنہ نمازِ خوف کے بارے میں بیان کرتے ہیں: ”ایک گروہ امام کے سامنے کھڑا ہوگا، دوسرا گروہ امام کے پیچھے کھڑا ہوگا، امام اس گروہ کو ایک رکعت اور دو سجدے پڑھائے گا جو اس کے پیچھے کھڑا ہے، پھر وہ اپنی جگہ پر بیٹھا رہے گا، یہاں تک کہ وہ لوگ (دوسری رکعت کا) ایک رکوع اور دو سجدے ادا کر لیں گے، پھر وہ لوگ اپنے ساتھیوں کی جگہ پر چلے جائیں گے اور ان کے ساتھی اس جگہ پر آ جائیں گے، امام انہیں ایک رکوع اور دو سجدے پڑھائے گا، امام اپنی جگہ بیٹھا رہے گا، یہاں تک کہ وہ لوگ بھی ایک رکوع اور دو سجدے ادا کر لیں گے، تو امام سلام پھیر دے گا۔“ [صحیح ابن حبان/كتاب الصلاة/حدیث: 2885]