سیدنا ابوہریرہ رضی اللہ عنہ بیان کرتے ہیں، نبی اکرم صلی اللہ علیہ وسلم جب سورہ فاتحہ کی تلاوت سے فارغ ہوتے تو بلند آواز میں ” «آمِيْنَ» آمین“ کہتے تھے۔ [صحیح ابن حبان/كتاب الصلاة/حدیث: 1806]

سیدنا سمرہ بن جندب رضی اللہ عنہ بیان کرتے ہیں کہ مجھے نبی اکرم صلی اللہ علیہ وسلم کا دو موقعوں پر خاموش رہنا یاد ہے، (راوی کہتے ہیں) میں نے اس بات کا تذکرہ سیدنا عمران بن حصین رضی اللہ عنہ سے کیا تو انہوں نے کہا کہ مجھے تو صرف ایک مرتبہ خاموش رہنا یاد ہے، پھر ہم نے اس بارے میں سیدنا ابی بن کعب رضی اللہ عنہ کو مدینہ منورہ میں خط لکھا، تو انہوں نے جواب دیا کہ سیدنا سمرہ رضی اللہ عنہ کو یہ بات صحیح طور پر یاد ہے۔ سعید نامی راوی بیان کرتے ہیں کہ ہم نے قتادہ سے کہا: یہ دو موقعوں پر خاموشی کون سی تھی؟ انہوں نے کہا: جب آپ صلی اللہ علیہ وسلم نماز شروع کرتے تھے اور جب آپ صلی اللہ علیہ وسلم قراءت کر کے فارغ ہوتے تھے۔ (امام ابن حبان رحمہ اللہ فرماتے ہیں:) حسن نے سیدنا سمرہ رضی اللہ عنہ سے کسی چیز کا سماع نہیں کیا ہے، انہوں نے یہ روایت سیدنا عمران بن حصین رضی اللہ عنہ سے سنی ہے، اور اس بارے میں ہمارا اعتماد سیدنا عمران رضی اللہ عنہ (سے منقول روایت) پر ہے، سیدنا سمرہ رضی اللہ عنہ (سے منقول روایت) پر نہیں ہے۔ [صحیح ابن حبان/كتاب الصلاة/حدیث: 1807]

سیدنا ابن ابی اوفیٰ رضی اللہ عنہما بیان کرتے ہیں کہ ایک شخص نے عرض کی: ”یا رسول اللہ صلی اللہ علیہ وسلم ! آپ مجھے کسی ایسی چیز کی تعلیم دیجیے جو میرے لیے قرآن کی تلاوت کی جگہ کافی ہو۔“ نبی اکرم صلی اللہ علیہ وسلم نے فرمایا: ”تم یہ کہو: «سُبْحَانَ اللّٰهِ وَالْحَمْدُ لِلّٰهِ وَلَا إِلٰهَ إِلَّا اللّٰهُ وَاللّٰهُ أَكْبَرُ» ”اللہ پاک ہے، سب تعریف اللہ ہی کے لیے ہے، اللہ کے سوا کوئی معبود نہیں اور اللہ سب سے بڑا ہے“۔“ سفیان نامی راوی کہتے ہیں: میرا خیال ہے روایت میں یہ الفاظ بھی ہیں: «وَلَا حَوْلَ وَلَا قُوَّةَ إِلَّا بِاللّٰهِ» ”اور اللہ کی توفیق کے بغیر نہ گناہوں سے بچنے کی ہمت ہے اور نہ نیکی کرنے کی طاقت“۔ (امام ابن حبان رحمہ اللہ فرماتے ہیں:) یزید ابو خالد نامی راوی، یزید بن عبدالرحمن دالانی ابو خالد ہے۔ [صحیح ابن حبان/كتاب الصلاة/حدیث: 1808]

سیدنا ابن ابی اوفیٰ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میں قرآن کی ٹھیک طور پر تلاوت نہیں کر سکتا، آپ مجھے کسی ایسی چیز کی تعلیم دیجیے جو اس کی جگہ میرے لیے کافی ہو۔ تو نبی اکرم صلی اللہ علیہ وسلم نے فرمایا: ”تم یہ پڑھو: «سُبْحَانَ اللّٰهِ، وَالْحَمْدُ لِلّٰهِ، وَاللّٰهُ أَكْبَرُ» ۔“ اس شخص نے عرض کی: یہ تو میرے پروردگار کی (تعریف کے طور پر اس کے) لیے ہوا، میرے لیے کیا ہو گا؟ نبی اکرم صلی اللہ علیہ وسلم نے فرمایا: ”تم یہ پڑھو: اے اللہ! تو میری مغفرت کر، تو مجھ پر رحم کر، مجھے رزق عطا کر اور تو مجھے عافیت نصیب کر۔“ [صحیح ابن حبان/كتاب الصلاة/حدیث: 1809]

سیدنا ابنِ ابی اوفیٰ رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا اور اس نے عرض کیا: یا رسول اللہ صلی اللہ علیہ وسلم ! میں قرآن کا علم حاصل کرنے کی استطاعت نہیں رکھتا، آپ مجھے ایسی چیز کی تعلیم دیں جو قرآن کی جگہ کافی ہو۔ نبی اکرم صلی اللہ علیہ وسلم نے فرمایا: ”تم یہ پڑھو: «سُبْحَانَ اللَّهِ، وَالْحَمْدُ لِلَّهِ، وَاللَّهُ أَكْبَرُ، وَلَا حَوْلَ وَلَا قُوَّةَ إِلَّا بِاللَّهِ» “ اس شخص نے کہا: یہ تو اللہ کے لیے ہے، میرے لیے کیا ہے؟ نبی اکرم صلی اللہ علیہ وسلم نے فرمایا: ”تم یہ پڑھو: «اللَّهُمَّ اغْفِرْ لِي وَارْحَمْنِي وَاهْدِنِي وَعَافِنِي وَارْزُقْنِي» ”اے میرے پروردگار! تو میری مغفرت کر دے، مجھ پر رحم کر، مجھے ہدایت نصیب کر، تو مجھے عافیت نصیب کر اور تو مجھے رزق عطا کر۔““ نبی اکرم صلی اللہ علیہ وسلم نے ارشاد فرمایا: ”اس شخص نے اپنے دونوں ہاتھ بھلائی سے بھر لیے ہیں۔“ [صحیح ابن حبان/كتاب الصلاة/حدیث: 1810]

سیدنا سمرہ بن جندب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ کے نزدیک پسندیدہ ترین چار کلمات ہیں: «سُبْحَانَ اللّٰهِ، وَالْحَمْدُ لِلّٰهِ، وَلَا إِلٰهَ إِلَّا اللّٰهُ، وَاللّٰهُ أَكْبَرُ» ”اللہ پاک ہے، سب تعریف اللہ کے لیے ہے، اللہ کے سوا کوئی معبودِ برحق نہیں اور اللہ سب سے بڑا ہے۔“” [صحیح ابن حبان/كتاب الصلاة/حدیث: 1811]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”کلام میں سب سے بہتر چار کلمات ہیں، تم ان میں سے جو بھی پہلے پڑھ لو گے تمہیں کوئی نقصان نہیں ہو گا۔ «سُبْحَانَ اللهِ، وَالْحَمْدُ لِلّٰهِ، وَلَا إِلٰهَ إِلَّا اللهُ، وَاللهُ أَكْبَرُ» ۔“ [صحیح ابن حبان/كتاب الصلاة/حدیث: 1812]

ابووائل بیان کرتے ہیں کہ ایک شخص سیدنا عبداللہ بن مسعود رضی اللہ عنہ کے پاس آیا اور بولا: میں نے گزشتہ رات ایک رکعت میں مفصل سورت کی تلاوت کی، تو سیدنا عبداللہ رضی اللہ عنہ نے کہا: ”یہ تو شعر کو تیزی سے پڑھنے کی مانند ہو گیا، ہمیں یاد ہے، نبی کریم صلی اللہ علیہ وسلم ایک جیسی سورتیں ملا کر پڑھتے تھے۔“ پھر انہوں نے مفصل سے تعلق رکھنے والی بیس سورتوں کا تذکرہ کیا کہ نبی کریم صلی اللہ علیہ وسلم وہ دو، دو سورتیں ایک رکعت میں پڑھا کرتے تھے۔ [صحیح ابن حبان/كتاب الصلاة/حدیث: 1813]

زیاد بن علاقہ بیان کرتے ہیں: میرے چچا رضی اللہ عنہ یہ بات بیان کرتے ہیں: انہوں نے نبی اکرم صلی اللہ علیہ وسلم کی اقتداء میں صبح کی نماز ادا کی تو انہوں نے نبی اکرم صلی اللہ علیہ وسلم کو صبح کی نماز کی دو رکعت میں سے ایک رکعت میں یہ آیت تلاوت کرتے سنا: ﴿وَالنَّخْلَ بَاسِقَاتٍ لَّهَا طَلْعٌ نَّضِيدٌ﴾ [سورة ق: 10] ”اور لمبی کھجوریں جن کے خوشے تہہ در تہہ ہوتے ہیں۔“ شعبہ کہتے ہیں: میں نے اپنے استاد سے دوسری مرتبہ اس حدیث کے بارے میں دریافت کیا، تو انہوں نے یہ الفاظ نقل کیے: نبی اکرم صلی اللہ علیہ وسلم کو سورہ ق کی تلاوت کرتے سنا۔ [صحیح ابن حبان/كتاب الصلاة/حدیث: 1814]

سیدنا عبداللہ بن سائب رضی اللہ عنہما بیان کرتے ہیں کہ نبی اکرم صلی اللہ علیہ وسلم نے مکہ مکرمہ میں صبح کی نماز پڑھائی، آپ صلی اللہ علیہ وسلم نے سورۃ مومنون کی تلاوت سے آغاز کیا، جب سیدنا موسیٰ علیہ السلام اور سیدنا ہارون علیہ السلام کا تذکرہ آیا یا شاید سیدنا عیسیٰ علیہ السلام کا تذکرہ آیا (یہاں شک محمد بن عباد نامی راوی کو ہے) تو نبی اکرم صلی اللہ علیہ وسلم کو کھانسی آ گئی تو آپ صلی اللہ علیہ وسلم رکوع میں چلے گئے۔ راوی بیان کرتے ہیں کہ ابن سائب رضی اللہ عنہما اس وقت وہاں موجود تھے۔ [صحیح ابن حبان/كتاب الصلاة/حدیث: 1815]