سیدنا عمران بن حصین رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے پیچھے شاید ظہر یا عصر کی نماز میں تلاوت کی، یہ شک ابوعوانہ نامی راوی کو ہے، نبی اکرم صلی اللہ علیہ وسلم نے دریافت فرمایا: ”تم میں سے کس شخص نے ﴿سَبِّحِ اسْمَ رَبِّكَ الْأَعْلَى﴾ [سورة الأعلى: 1] کی تلاوت کی ہے؟“ حاضرین میں سے ایک شخص نے عرض کی: میں نے، تو نبی اکرم صلی اللہ علیہ وسلم نے فرمایا: ”مجھے اندازہ ہو گیا تھا کہ تم میں سے کوئی ایک شخص میرے لیے (تلاوت میں) رکاوٹ ڈال رہا ہے۔“ [صحیح ابن حبان/كتاب الصلاة/حدیث: 1846]

سیدنا عمران بن حصین رضی اللہ عنہ بیان کرتے ہیں: نبی اکرم صلی اللہ علیہ وسلم نے ظہر کی نماز ادا کی، ایک شخص نے آپ کے پیچھے سورہ اعلی کی تلاوت شروع کر دی، جب آپ نماز پڑھ کر فارغ ہوئے تو آپ نے دریافت کیا: ”تم میں سے وہ کون شخص ہے جس نے تلاوت کی ہے؟“ یا شاید یہ فرمایا: ”تم میں سے کون تلاوت کرنے والا ہے؟“ ایک شخص نے عرض کی: میں ہوں، یا رسول اللہ! آپ صلی اللہ علیہ وسلم نے فرمایا: ”مجھے اندازہ ہو گیا تھا تم میں سے کوئی ایک میرے لیے رکاوٹ پیدا کر رہا ہے۔“ [صحیح ابن حبان/كتاب الصلاة/حدیث: 1847]

سیدنا عبادہ بن صامت رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں صبح کی نماز پڑھائی۔ آپ صلی اللہ علیہ وسلم کے لیے قرأت کرنا دشوار ہوا، جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے دریافت فرمایا: ”میرا خیال ہے تم لوگ اپنے امام کے پیچھے تلاوت کرتے ہو۔“ راوی بیان کرتا ہے ہم نے عرض کی: جی ہاں! اللہ کی قسم! یا رسول اللہ! ہم تیزی سے تلاوت کرتے ہیں۔ نبی اکرم صلی اللہ علیہ وسلم نے ارشاد فرمایا: ”تم لوگ ایسا نہ کرو، صرف سورۃ فاتحہ پڑھ لیا کرو کیونکہ ایسے شخص کی نماز نہیں ہوتی جو اس کی تلاوت نہیں کرتا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”تم ایسا نہ کرو“ یہ الفاظ ممانعت کے ہیں، اس سے مراد ابتدائی طور پر ازسرنو کوئی حکم دینا ہے، کیونکہ عرب اپنے محاورے میں جب تاکید کے طور پر کسی چیز کا حکم دینے کا ارادہ کرتے ہیں، تو پہلے ممانعت کے الفاظ ذکر کرتے ہیں اور پھر اس کے بعد وہ حکم ہوتا ہے جو وہ مراد لیتے ہیں۔ [صحیح ابن حبان/كتاب الصلاة/حدیث: 1848]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم اس نماز سے فارغ ہوئے جس میں آپ نے بلند آواز میں قرأت کی تھی، پھر آپ نے دریافت فرمایا: ”کیا تم میں سے کسی نے ابھی تلاوت کی ہے؟“ ایک شخص نے عرض کی: جی ہاں! یا رسول اللہ! میں نے کی ہے۔ نبی اکرم صلی اللہ علیہ وسلم نے فرمایا: ”میں بھی سوچ رہا تھا کیا وجہ ہے، قرآن (کی تلاوت) کے حوالے سے مجھ سے مقابلہ کیا جا رہا ہے؟“ پھر لوگ ان نمازوں میں قرأت کرنے سے رک گئے جن میں نبی اکرم صلی اللہ علیہ وسلم بلند آواز میں تلاوت کیا کرتے تھے، یہ اس وقت ہوا جب انہوں نے نبی اکرم صلی اللہ علیہ وسلم کی زبانی یہ بات سنی۔ (امام ابن حبان رحمہ اللہ فرماتے ہیں:) ابن اکیمہ کا نام عمرو بن مسلم بن عمار بن اکیمہ ہے، یہ دو بھائی ہیں: عمرو بن مسلم اور عمر بن مسلم؛ جہاں تک عمرو بن مسلم کا تعلق ہے تو وہ تابعی ہیں، انہوں نے سیدنا ابوہریرہ رضی اللہ عنہ سے سماع کیا ہے اور زہری نے ان سے سماع کیا ہے، جہاں تک عمر بن مسلم کا تعلق ہے تو وہ تبع تابعی ہیں، انہوں نے سعید بن مسیب سے سماع کیا ہے اور ان سے امام مالک اور محمد بن عمرو نے روایات نقل کی ہیں، یہ دونوں ”ثقہ“ ہیں۔ [صحیح ابن حبان/كتاب الصلاة/حدیث: 1849]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک نماز پڑھائی، اس میں بلند آواز میں قراءت فرمائی۔ کچھ لوگوں نے آپ صلی اللہ علیہ وسلم کی اقتدا میں تلاوت کی۔ جب نبی اکرم صلی اللہ علیہ وسلم نے سلام پھیرا تو آپ صلی اللہ علیہ وسلم نے دریافت فرمایا: ”کیا تم میں سے کسی ایک نے ابھی تلاوت کی ہے؟“ تو لوگوں نے عرض کی: ”جی ہاں، یا رسول اللہ!“ نبی اکرم صلی اللہ علیہ وسلم نے فرمایا: ”میں بھی سوچ رہا تھا کہ کیا وجہ ہے، (قرآن کی تلاوت) میں میرے ساتھ مقابلہ کیا جا رہا ہے۔“ راوی کہتے ہیں: انہوں نے اس سے نصیحت حاصل کی اور (اس کے بعد لوگ آپ صلی اللہ علیہ وسلم کی اقتدا میں) تلاوت نہیں کرتے تھے۔ [صحیح ابن حبان/كتاب الصلاة/حدیث: 1850]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں نماز پڑھائی، آپ صلی اللہ علیہ وسلم نے بلند آواز میں قرأت کی، جب آپ صلی اللہ علیہ وسلم نے سلام پھیرا تو دریافت فرمایا: ”کیا ابھی تم میں سے کسی نے میرے ساتھ تلاوت کی ہے؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”میں بھی سوچ رہا تھا کہ کیا وجہ ہے، قرآن (کی تلاوت) میں میرے ساتھ مقابلہ کیا جا رہا ہے۔“ زہری رحمہ اللہ بیان کرتے ہیں: مسلمان اس سے باز آ گئے اور وہ لوگ آپ صلی اللہ علیہ وسلم کی اقتدا میں تلاوت نہیں کیا کرتے تھے۔ امام ابو حاتم رحمہ اللہ بیان کرتے ہیں: یہ روایت زہری سے منقول ہونے کے حوالے سے مشہور ہے جو ان کے اصحاب نے ابن اکیمہ کے حوالے سے سیدنا ابوہریرہ رضی اللہ عنہ سے نقل کی ہے، اس میں امام اوزاعی رحمہ اللہ کو وہم ہوا ہے کیونکہ گھوڑا بھی ٹھوکر کھا جاتا ہے، انہوں نے یہ کہا: یہ زہری کے حوالے سے سعید بن مسیب سے منقول ہے، ولید بن مسلم یہ بات جانتے تھے کہ انہیں وہم ہوا ہے، اس لیے انہوں نے یہ کہا: یہ اس شخص کے حوالے سے منقول ہے جس نے سیدنا ابوہریرہ رضی اللہ عنہ سے اسے سنا ہے، انہوں نے سعید کا تذکرہ نہیں کیا، جہاں تک زہری کے اس قول کا تعلق ہے کہ ”لوگ قرأت کرنے سے باز آ گئے“ تو اس سے مراد یہ ہے کہ انہوں نے نبی اکرم صلی اللہ علیہ وسلم کی ممانعت کی پیروی کرتے ہوئے آپ صلی اللہ علیہ وسلم کے پیچھے بلند آواز میں تلاوت نہیں کی، جب امام بلند آواز میں قرأت کر رہا ہو، اس کا تذکرہ نبی اکرم صلی اللہ علیہ وسلم کے اس فرمان میں ہے: ”کیا وجہ ہے کہ قرآن میں میرے ساتھ تنازع کیا جا رہا ہے۔“ [صحیح ابن حبان/كتاب الصلاة/حدیث: 1851]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے اصحاب کو نماز پڑھائی، جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے لوگوں کی طرف رخ کیا اور دریافت فرمایا: ”کیا تم لوگ اپنی نماز میں امام کے پیچھے تلاوت کرتے ہو جبکہ امام قرأت کر رہا ہو؟“ تو لوگ خاموش رہے، نبی اکرم صلی اللہ علیہ وسلم نے یہ بات تین مرتبہ ارشاد فرمائی تو ایک صاحب نے (یا شاید لوگوں نے) عرض کی: جی ہاں، ہم ایسا کرتے ہیں۔ نبی اکرم صلی اللہ علیہ وسلم نے فرمایا: ”تم ایسا نہ کرو، تم میں سے ہر شخص دل میں سورۃ فاتحہ پڑھ لے۔“ (امام ابن حبان رحمہ اللہ فرماتے ہیں:) ابوقلابہ نے یہ روایت محمد بن ابوعائشہ سے سنی ہے، جو نبی اکرم صلی اللہ علیہ وسلم کے کسی صحابی سے منقول ہے، انہوں نے یہ روایت سیدنا انس بن مالک رضی اللہ عنہ سے بھی سنی ہے، تو یہ دونوں طرق محفوظ ہیں۔ [صحیح ابن حبان/كتاب الصلاة/حدیث: 1852]

سیدنا ابوہریرہ رضی اللہ عنہ بیان کرتے ہیں: ”ہر نماز میں قرأت ہوتی ہے، نبی اکرم صلی اللہ علیہ وسلم جس میں ہمیں سنا دیتے تھے ہم تمہیں سنا دیتے ہیں اور جس میں آپ ہم سے پوشیدہ رکھتے تھے ہم تم سے پوشیدہ رکھتے ہیں۔“ [صحیح ابن حبان/كتاب الصلاة/حدیث: 1853]

قزعہ بیان کرتے ہیں کہ میں نے سیدنا ابوسعید خدری رضی اللہ عنہ سے نبی اکرم صلی اللہ علیہ وسلم کی نماز کے بارے میں دریافت کیا، تو انہوں نے فرمایا: اس میں تمہارے لیے بھلائی نہیں ہے۔ نبی اکرم صلی اللہ علیہ وسلم کے لیے نماز کی اقامت کہہ دی جاتی تھی، پھر ہم میں سے کوئی ایک شخص قضائے حاجت کرنے کے لیے بقیع (کے میدان) کی طرف چلا جاتا تھا، پھر وہ واپس آتا، وضو کر لیتا اور نبی اکرم صلی اللہ علیہ وسلم کو ظہر کی نماز کی پہلی رکعت ہی میں پا لیتا تھا۔ [صحیح ابن حبان/كتاب الصلاة/حدیث: 1854]

سیدنا قتادہ رضی اللہ عنہ بیان کرتے ہیں کہ نبی اکرم صلی اللہ علیہ وسلم فجر اور ظہر کی پہلی دو رکعتیں طویل ادا کیا کرتے تھے۔ راوی بیان کرتے ہیں کہ ہم یہ سمجھتے ہیں کہ آپ صلی اللہ علیہ وسلم ایسا اس لیے کرتے تھے تاکہ لوگ (باجماعت نماز میں) شریک ہو جائیں۔ [صحیح ابن حبان/كتاب الصلاة/حدیث: 1855]