عروہ بن زبیر سیدنا زید بن ثابت رضی اللہ عنہ کے بارے میں یہ بات نقل کرتے ہیں کہ جب انہوں نے مروان کو سورۃ الاخلاص اور سورۃ الکوثر کی تلاوت کرتے سنا تو سیدنا زید رضی اللہ عنہ نے فرمایا: میں اللہ کے نام کی قسم اٹھا کر یہ بات کہتا ہوں کہ ”نبی اکرم صلی اللہ علیہ وسلم اس نماز میں دو طویل سورتوں میں سے زیادہ طویل سورت کی تلاوت کرتے تھے یعنی ﴿المص﴾ [سورة الأعراف: 1] کی (تلاوت کرتے تھے)۔“ [صحیح ابن حبان/كتاب الصلاة/حدیث: 1836]

سلیمان بن یسار یہ بات بیان کرتے ہیں کہ انہوں نے سیدنا ابوہریرہ رضی اللہ عنہ کو یہ بات بیان کرتے ہوئے سنا کہ میں نے فلاں شخص کے مقابلے میں کسی شخص کو نبی اکرم صلی اللہ علیہ وسلم کی نماز سے مشابہ نماز ادا کرتے ہوئے نہیں دیکھا، انہوں نے یہ بات مدینہ منورہ کے گورنر کے بارے میں کہی تھی۔ سلیمان نامی راوی کہتے ہیں: میں نے بھی اس شخص کے پیچھے نماز ادا کی تھی، تو وہ ظہر کی ابتدائی دو رکعات میں طویل قرأت کرتے تھے اور آخری دو رکعات نسبتاً مختصر ادا کرتے تھے، وہ عصر کی نماز کو مختصر ادا کرتے تھے اور مغرب کی نماز کی ابتدائی دو رکعات میں قصارِ مفصل تلاوت کرتے تھے اور عشاء کی نماز میں اوساطِ مفصل کی تلاوت کرتے تھے جبکہ فجر کی نماز میں طوالِ مفصل کی تلاوت کرتے تھے۔ [صحیح ابن حبان/كتاب الصلاة/حدیث: 1837]

سیدنا براء بن عازب رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں: آپ صلی اللہ علیہ وسلم سفر کر رہے تھے، آپ صلی اللہ علیہ وسلم نے عشاء کی نماز میں دو رکعت میں سے ایک رکعت میں سورہ ﴿وَالتِّينِ وَالزَّيْتُونِ﴾ [سورة التين: 1] کی تلاوت کی تھی۔ [صحیح ابن حبان/كتاب الصلاة/حدیث: 1838]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے سیدنا معاذ رضی اللہ عنہ کو یہ ہدایت کی: ”عشاء کی نماز میں سورہ شمس، سورہ لیل، سورہ اعلیٰ اور سورہ ضحی جیسی سورتوں کی تلاوت کریں۔“ [صحیح ابن حبان/كتاب الصلاة/حدیث: 1839]

عمرو بن دینار اور ابوزبیر سیدنا جابر بن عبداللہ رضی اللہ عنہما کے حوالے سے یہ حدیث نقل کرتے ہیں، ان میں سے ایک نے اپنے ساتھی کے مقابلے میں زیادہ الفاظ نقل کیے ہیں، وہ بیان کرتے ہیں کہ سیدنا معاذ رضی اللہ عنہ نبی اکرم صلی اللہ علیہ وسلم کی اقتدا میں نماز ادا کرتے تھے، پھر وہ اپنے محلے میں جا کر لوگوں کو نماز پڑھایا کرتے تھے، ایک مرتبہ نبی اکرم صلی اللہ علیہ وسلم نے عشاء کی نماز ذرا تاخیر سے ادا کی (سیدنا معاذ رضی اللہ عنہ نے نبی اکرم صلی اللہ علیہ وسلم کی اقتدا میں نماز ادا کی)، سیدنا معاذ رضی اللہ عنہ واپس گئے اور ان لوگوں کو نماز پڑھانے لگے، انہوں نے سورۃ البقرہ کی تلاوت شروع کر دی، وہاں موجود لوگوں میں سے ایک شخص نے جب یہ بات دیکھی تو وہ مسجد کے کونے میں گیا اور وہاں تنہا نماز ادا کی (اور چلا گیا)، ان لوگوں نے اس سے کہا: ”تم منافق ہو گئے ہو“، تو اس نے کہا: ”جی نہیں! میں نبی اکرم صلی اللہ علیہ وسلم کی خدمت میں حاضر ہو کر آپ کو اس بارے میں بتاؤں گا“، پھر وہ نبی اکرم صلی اللہ علیہ وسلم کی خدمت میں حاضر ہوا اور بولا: ”یا رسول اللہ! سیدنا معاذ رضی اللہ عنہ آپ کی اقتدا میں نماز ادا کرتے ہیں پھر وہ واپس آ کر ہماری امامت کرتے ہیں، گزشتہ رات آپ نے نماز تاخیر سے ادا کی تھی، سیدنا معاذ رضی اللہ عنہ آئے اور انہوں نے ہمیں نماز پڑھانا شروع کی تو انہوں نے سورۃ البقرہ کی تلاوت شروع کر دی، میں پیچھے ہٹا اور تنہا نماز ادا کر لی، یا رسول اللہ! ہم اونٹوں کے ذریعے پانی بھر کر لانے والے اور اپنے ہاتھوں کے ذریعے خود کام کرنے والے لوگ ہیں“، تو نبی اکرم صلی اللہ علیہ وسلم نے فرمایا: ”اے معاذ! کیا تم آزمائش کا شکار کرنا چاہتے ہو؟ تم ان لوگوں کو (نماز پڑھاتے ہوئے) سورۃ الیل، سورۃ الاعلیٰ اور سورۃ البروج کی تلاوت کیا کرو“۔ [صحیح ابن حبان/كتاب الصلاة/حدیث: 1840]

سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم شبِ جمعہ میں مغرب کی نماز میں سورہ کافرون اور سورہ اخلاص کی، جبکہ عشاء کی نماز میں سورۃ جمعہ اور سورۃ منافقین کی تلاوت کیا کرتے تھے۔ [صحیح ابن حبان/كتاب الصلاة/حدیث: 1841]

سیدنا عقبہ بن عامر رضی اللہ عنہ بیان کرتے ہیں، میں نبی اکرم صلی اللہ علیہ وسلم کے پیچھے آیا، آپ صلی اللہ علیہ وسلم اس وقت سوار تھے، میں نے اپنا ہاتھ آپ صلی اللہ علیہ وسلم کے قدم شریف پر رکھا، میں نے عرض کی: یا رسول اللہ! آپ مجھے تلاوت سکھا دیجیے یا سورہ ہود کی یا سورۃ یوسف کی، تو نبی اکرم صلی اللہ علیہ وسلم نے ارشاد فرمایا: ”اے عقبہ بن عامر! تم ایسی کسی سورت کی تلاوت نہیں کرو گے جو اللہ تعالیٰ کے نزدیک سورۃ الفلق سے زیادہ محبوب اور اس کی بارگاہ میں زیادہ پہنچنے والی ہو۔ اگر تم سے ہو سکے تو تم ہر نماز میں اسے پڑھا کرو۔“ (امام ابن حبان رحمہ اللہ فرماتے ہیں:) اسلم بن عمران کی کنیت ابوعمران ہے، یہ اہل مصر میں سے ہیں اور وہاں کے تابعین میں سے ہیں۔ [صحیح ابن حبان/كتاب الصلاة/حدیث: 1842]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں نماز پڑھائی، آپ صلی اللہ علیہ وسلم نے اس میں بلند آواز میں قرأت کی، جب آپ صلی اللہ علیہ وسلم نے نماز مکمل کی تو لوگوں کی طرف رخ کیا اور ارشاد فرمایا: ”کیا ابھی تم میں سے کسی نے تلاوت کی؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”میں بھی سوچ رہا تھا کہ کیا وجہ ہے، قرآن (کی تلاوت میں) میرے لیے رکاوٹ آ رہی ہے۔“ [صحیح ابن حبان/كتاب الصلاة/حدیث: 1843]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنے اصحاب کو نماز پڑھائی، جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے لوگوں کی طرف رخ کیا اور ارشاد فرمایا: ”کیا تم لوگ اپنے امام کے پیچھے قرأت کرتے ہو جب امام تلاوت کر رہا ہو؟“ لوگ خاموش رہے، نبی اکرم صلی اللہ علیہ وسلم نے تین مرتبہ یہ بات ارشاد فرمائی تو ایک صاحب نے عرض کی، یا شاید لوگوں نے عرض کی: ہم ایسا کرتے ہیں، نبی اکرم صلی اللہ علیہ وسلم نے فرمایا: ”تم لوگ ایسا نہ کرو، تم میں سے کوئی ایک (یعنی ہر ایک) اپنے دل میں سورہ فاتحہ کی تلاوت کر لیا کرے۔“ روایت کے یہ الفاظ: ”تم ایسا نہ کرو“ یہ الفاظ ممانعت کے ہیں، لیکن اس سے مراد ابتدائی طور پر نئے سرے سے کوئی حکم دینا ہے، کیونکہ عرب اپنے محاورے میں اکثر ایسا کرتے ہیں۔ [صحیح ابن حبان/كتاب الصلاة/حدیث: 1844]

سیدنا عمران بن حصین رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے پیچھے شاید ظہر یا عصر کی نماز میں تلاوت کی۔ نبی اکرم صلی اللہ علیہ وسلم نے فرمایا: ”تم میں سے کس نے سورۂ اعلیٰ کی تلاوت کی ہے؟“ حاضرین میں سے ایک شخص نے کہا: میں نے۔ نبی اکرم صلی اللہ علیہ وسلم نے فرمایا: ”میں جان گیا تھا کہ تم میں سے کوئی ایک شخص میرے لیے رکاوٹ ڈال رہا ہے۔“ [صحیح ابن حبان/كتاب الصلاة/حدیث: 1845]