سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ہماری چھوٹی یا بڑی چادروں میں نماز ادا نہیں کرتے تھے۔ [صحیح ابن حبان/كتاب الصلاة/حدیث: 2336]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نماز ادا کرنے کے لیے کھڑے ہوئے، آپ نے ایک ایسی چادر اوڑھی ہوئی تھی جس پر نقش و نگار بنے ہوئے تھے، اس کے ان نقش و نگار کا منظر گویا آج بھی میری نگاہ میں ہے، جب نبی اکرم صلی اللہ علیہ وسلم نے نماز مکمل کی تو آپ نے فرمایا: ”یہ چادر ابوجہم بن حذیفہ کے پاس لے جاؤ اور اس کی انبجانی چادر میرے پاس لے آؤ، چونکہ اس چادر نے میری نماز میں (خلل ڈالنے کی) کوشش کی تھی۔“ [صحیح ابن حبان/كتاب الصلاة/حدیث: 2337]

سیدہ عائشہ صدیقہ رضی اللہ عنہا بیان کرتی ہیں کہ سیدنا ابوجہم بن حذیفہ رضی اللہ عنہ نے ایک شامی چادر نبی اکرم صلی اللہ علیہ وسلم کی خدمت میں تحفے کے طور پر پیش کی جس پر نقش و نگار بنے ہوئے تھے۔ نبی اکرم صلی اللہ علیہ وسلم نے وہ چادر پہن کر نماز ادا کی، جب آپ صلی اللہ علیہ وسلم نماز پڑھ کر فارغ ہوئے تو آپ صلی اللہ علیہ وسلم نے ارشاد فرمایا: ”یہ چادر ابوجہم کے پاس واپس لے جاؤ، جب نماز کے دوران میری نظر اس کے نقش و نگار پر پڑی تو مجھے اپنی توجہ منتشر ہونے کا اندیشہ ہوا۔“ [صحیح ابن حبان/كتاب الصلاة/حدیث: 2338]

سیدنا ابوقتادہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نماز کے دوران سیدہ امامہ رضی اللہ عنہا کو اٹھائے ہوئے تھے، جب آپ رکوع میں جانے لگے تو آپ نے انہیں کھڑا کر دیا، پھر آپ سجدے میں چلے گئے، جب آپ پھر کھڑے ہوئے تو آپ نے انہیں پھر اٹھا لیا، پھر جب رکوع میں جانے لگے تو آپ نے پھر انہیں کھڑا کر دیا۔ [صحیح ابن حبان/كتاب الصلاة/حدیث: 2339]

سیدنا ابوقتادہ رضی اللہ عنہ بیان کرتے ہیں: نبی اکرم صلی اللہ علیہ وسلم نماز کے لیے تشریف لائے، آپ صلی اللہ علیہ وسلم نے اپنے کندھے پر سیدہ امامہ بنت ابوالعاص رضی اللہ عنہا کو اٹھایا ہوا تھا، جب آپ صلی اللہ علیہ وسلم رکوع میں گئے، تو آپ صلی اللہ علیہ وسلم نے انہیں اپنے کندھے سے اتار دیا، جب آپ صلی اللہ علیہ وسلم سجدہ کر کے فارغ ہوئے، تو آپ صلی اللہ علیہ وسلم نے پھر انہیں اپنے کندھے پر اٹھا لیا، آپ صلی اللہ علیہ وسلم اسی طرح کرتے رہے، یہاں تک کہ آپ صلی اللہ علیہ وسلم نماز سے فارغ ہو گئے۔ [صحیح ابن حبان/كتاب الصلاة/حدیث: 2340]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم رات کے وقت نماز ادا کر رہے ہوتے تھے اور میں بچھونے پر آپ صلی اللہ علیہ وسلم اور قبلہ کے درمیان چوڑائی کی سمت میں لیٹی ہوئی تھی، یہ وہ بچھونا تھا جس پر نبی اکرم صلی اللہ علیہ وسلم اور آپ صلی اللہ علیہ وسلم کی اہلیہ آرام کیا کرتے تھے۔ [صحیح ابن حبان/كتاب الصلاة/حدیث: 2341]

سیدہ عائشہ صدیقہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کے سامنے سوئی ہوئی ہوتی تھی، میری دونوں ٹانگیں آپ کے قبلہ کی سمت میں ہوتی تھیں، جب آپ سجدے میں جاتے تھے، تو آپ مجھے ہلا دیتے تھے، تو میں اپنے پاؤں سمیٹ لیتی تھی جب آپ کھڑے ہوتے تھے، تو میں انہیں پھر پھیلا لیتی تھی۔ سیدہ عائشہ صدیقہ رضی اللہ عنہا بیان کرتی ہیں: ان دنوں گھروں میں چراغ نہیں ہوا کرتے تھے۔ [صحیح ابن حبان/كتاب الصلاة/حدیث: 2342]

سیدہ عائشہ صدیقہ رضی اللہ عنہا بیان کرتی ہیں: تم نے یہ بہت برا کیا ہے، ہم (خواتین کو) کتوں اور گدھوں کے ساتھ ملا دیا ہے، حالانکہ نبی اکرم صلی اللہ علیہ وسلم نماز ادا کر رہے ہوتے تھے اور میں آپ کے سامنے چوڑائی کی سمت میں لیٹی ہوئی ہوتی تھی، جب آپ وتر ادا کرنے کا ارادہ کرتے تھے، تو آپ مجھے ہلا دیتے تھے۔ [صحیح ابن حبان/كتاب الصلاة/حدیث: 2343]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کے وقت نماز ادا کر رہے ہوتے تھے اور میں آپ صلی اللہ علیہ وسلم کے اور قبلہ کے درمیان سوئی ہوئی ہوتی تھی، جب آپ صلی اللہ علیہ وسلم وتر ادا کرنے لگتے تھے، تو آپ صلی اللہ علیہ وسلم مجھے بیدار کر دیتے تھے۔ [صحیح ابن حبان/كتاب الصلاة/حدیث: 2344]

ہشام بن عروہ نے یہ الفاظ نقل کیے ہیں۔ (سیدہ عائشہ رضی اللہ عنہا فرماتی ہیں) ”میں چوڑائی کی سمت میں یوں لیٹی ہوتی تھی، جس طرح جنازہ (امام کے سامنے) پڑا ہوتا ہے۔“ [صحیح ابن حبان/كتاب الصلاة/حدیث: 2345]