سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نماز ادا کر رہے ہوتے تھے، میں آپ کے سامنے قبلہ کی سمت میں چوڑائی کی سمت میں لیٹی ہوئی ہوتی تھی، جب آپ صلی اللہ علیہ وسلم وتر ادا کرنے کا ارادہ کرتے تھے، تو آپ اپنے پاؤں کے ذریعے مجھے ہلا دیتے تھے۔ [صحیح ابن حبان/كتاب الصلاة/حدیث: 2346]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم رات کے وقت نماز ادا کر رہے ہوتے تھے، میں آپ صلی اللہ علیہ وسلم اور قبلہ کے درمیان لیٹی ہوئی ہوتی تھی، جب آپ صلی اللہ علیہ وسلم وتر ادا کرنے کا ارادہ کرتے تھے، تو آپ صلی اللہ علیہ وسلم مجھے بیدار کر دیتے تھے، تو میں بھی وتر ادا کر لیتی تھی۔ [صحیح ابن حبان/كتاب الصلاة/حدیث: 2347]

سیدہ عائشہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کے قبلہ کی سمت والے حصے میں اپنے پاؤں پھیلا لیتی تھی، آپ صلی اللہ علیہ وسلم اس وقت نماز ادا کر رہے ہوتے تھے، جب آپ صلی اللہ علیہ وسلم سجدے میں جانے لگتے تو مجھے ہلا دیتے تھے، میں اپنے پاؤں سمیٹ لیتی تھی، پھر جب آپ صلی اللہ علیہ وسلم کھڑے ہو جاتے تو میں انہیں دوبارہ پھیلا دیتی تھی۔ [صحیح ابن حبان/كتاب الصلاة/حدیث: 2348]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”شیطان میری جائے نماز کے سامنے آیا، میں نے اس کے حلق کو پکڑ کر اس کا گلا دبایا یہاں تک کہ اس کی زبان کی ٹھنڈک مجھے اپنی ہتھیلی پر محسوس ہوئی، اگر میرے بھائی سلیمان علیہ السلام کی دعا کا خیال نہ ہوتا تو صبح وہ (شیطان) باندھا ہوا ہوتا اور تم لوگ اسے دیکھ لیتے۔“ [صحیح ابن حبان/كتاب الصلاة/حدیث: 2349]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے نماز کے دوران شیطان کو دیکھا، آپ نے اسے پکڑا اور اس کا گلا دبایا، یہاں تک کہ آپ نے اس کی زبان کی ٹھنڈک کو اپنے دستِ اقدس پر محسوس کیا، پھر نبی اکرم صلی اللہ علیہ وسلم نے ارشاد فرمایا: ”اگر میرے بھائی سیدنا سلیمان علیہ السلام کی دعا نہ ہوتی، تو وہ (شیطان) بندھا ہوا ہوتا، یہاں تک کہ لوگ اسے دیکھ لیتے۔“ [صحیح ابن حبان/كتاب الصلاة/حدیث: 2350]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے نماز کے دوران ہی دو سیاہ چیزوں ”سانپ اور بچھو“ کو مار دینے کا حکم دیا ہے۔ [صحیح ابن حبان/كتاب الصلاة/حدیث: 2351]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”نماز کے دوران دو سیاہ چیزوں کو مار دو: سانپ اور بچھو۔“ [صحیح ابن حبان/كتاب الصلاة/حدیث: 2352]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”نماز کے دوران «السَّدْل» کے طور پر کپڑے کو لٹکانے اور آدمی کے اپنے چہرے کو ڈھانپنے سے منع کیا ہے۔“ [صحیح ابن حبان/كتاب الصلاة/حدیث: 2353]

سیدنا انس بن مالک رضی اللہ عنہ بیان کرتے ہیں: جب ہم نبی اکرم صلی اللہ علیہ وسلم کی اقتدا میں نماز ادا کرتے تھے اور ہم میں سے کوئی شخص پیشانی کو زمین پر (گرمی کی شدت کی وجہ سے) نہیں رکھ پاتا تھا تو وہ اپنا کپڑا بچھا کر اس پر سجدہ کیا کرتا تھا۔ [صحیح ابن حبان/كتاب الصلاة/حدیث: 2354]

سیدہ عائشہ صدیقہ رضی اللہ عنہا بیان کرتی ہیں کہ میں نے دروازہ کھٹکھٹایا، نبی اکرم صلی اللہ علیہ وسلم اس وقت نفل نماز ادا کر رہے تھے، دروازہ قبلہ کی سمت میں ہی تھا، تو نبی اکرم صلی اللہ علیہ وسلم اپنے دائیں طرف سے یا شاید بائیں طرف سے چلتے ہوئے آئے اور دروازہ کھول دیا، پھر آپ اپنی نماز کی طرف واپس چلے گئے۔ [صحیح ابن حبان/كتاب الصلاة/حدیث: 2355]