سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ یہودیوں کو برباد کرے جنہوں نے اپنے انبیاء کی قبروں کو مساجد بنا لیا تھا۔“ [صحیح ابن حبان/كتاب الصلاة/حدیث: 2326]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ ان لوگوں پر لعنت کرے جنہوں نے اپنے انبیاء کی قبروں کو مساجد بنا لیا تھا۔“ [صحیح ابن حبان/كتاب الصلاة/حدیث: 2327]

سیدنا انس بن مالک رضی اللہ عنہ بیان کرتے ہیں: جب نبی اکرم صلی اللہ علیہ وسلم مدینہ منورہ تشریف لائے، تو آپ صلی اللہ علیہ وسلم نے مدینہ منورہ کے بالائی حصے میں بنو عمرو بن عوف نامی ایک قبیلے میں پڑاؤ کیا۔ نبی اکرم صلی اللہ علیہ وسلم وہاں چودہ دن تک مقیم رہے، پھر آپ صلی اللہ علیہ وسلم نے بنو نجار کے گروہ کو پیغام بھجوایا، وہ لوگ اپنی تلواریں (گردنوں میں) لٹکا کر آئے۔ سیدنا انس رضی اللہ عنہ بیان کرتے ہیں: یہ منظر آج بھی میری نگاہ میں ہے، نبی اکرم صلی اللہ علیہ وسلم اپنی سواری پر سوار تھے اور سیدنا ابوبکر رضی اللہ عنہ آپ صلی اللہ علیہ وسلم کے پیچھے بیٹھے ہوئے تھے، بنو نجار کا ایک گروہ آپ صلی اللہ علیہ وسلم کے اردگرد تھا، یہاں تک کہ آپ صلی اللہ علیہ وسلم سیدنا ابو ایوب انصاری رضی اللہ عنہ کے مکان کے پاس تشریف لے آئے۔ نبی اکرم صلی اللہ علیہ وسلم کو جہاں بھی نماز کا وقت ہو جاتا، آپ صلی اللہ علیہ وسلم نماز ادا کر لیتے تھے، آپ صلی اللہ علیہ وسلم بکریوں کے باڑے میں بھی نماز ادا کر لیتے تھے، پھر نبی اکرم صلی اللہ علیہ وسلم نے مسجد کی تعمیر کا حکم دیا۔ آپ صلی اللہ علیہ وسلم نے بنو نجار کے کچھ افراد کو پیغام بھجوایا، وہ لوگ آئے تو نبی اکرم صلی اللہ علیہ وسلم نے فرمایا: ”اے بنو نجار! اپنے اس باغ کی قیمت میرے ساتھ طے کر لو۔“ ان لوگوں نے عرض کی: جی نہیں اللہ کی قسم! ہم اس کی قیمت آپ سے نہیں لیں گے، یہ صرف اللہ تعالیٰ کی رضا کے لیے ہے۔ سیدنا انس رضی اللہ عنہ بیان کرتے ہیں: اس باغ میں کیا تھا، وہ میں تمہیں بتاتا ہوں، اس میں کچھ مشرکین کی قبریں تھیں، کھجوروں کے درخت تھے اور کھیت تھا۔ نبی اکرم صلی اللہ علیہ وسلم کے حکم کے تحت مشرکین کی قبریں برابر کر دی گئیں، کھیت کو برابر کر دیا گیا اور کھجور کے درخت کو مسجد میں قبلہ کی سمت میں رکھ دیا گیا، اور ان کے دونوں طرف پتھر لگا دیے گئے۔ راوی کہتے ہیں: لوگ پتھر نقل کرتے تھے اور ساتھ ہی یہ رجز پڑھتے تھے، نبی اکرم صلی اللہ علیہ وسلم بھی ان لوگوں کے ساتھ تھے، یہ حضرات یہ کہتے تھے: «اللَّهُمَّ إِنَّ الْخَيْرَ خَيْرُ الْآخِرَةِ، فَاغْفِرْ لِلْأَنْصَارِ وَالْمُهَاجِرَةِ» ”اے اللہ! بھلائی صرف آخرت کی بھلائی ہے، تو انصار اور مہاجرین کی مغفرت کر دے۔“ [صحیح ابن حبان/كتاب الصلاة/حدیث: 2328]

سیدہ میمونہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نماز ادا کر رہے ہوتے تھے اور آپ صلی اللہ علیہ وسلم پر آپ کی ازواج میں سے کسی کی چادر (کا کچھ حصہ) ہوتا تھا اور اس چادر کا بعض حصہ اس خاتون پر ہوتا تھا۔ سفیان نامی راوی کہتے ہیں: میرا خیال ہے روایت میں یہ الفاظ ہیں: اور وہ خاتون اس وقت حیض کی حالت میں ہوتی تھی۔ [صحیح ابن حبان/كتاب الصلاة/حدیث: 2329]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم ہمارے لحاف میں نماز ادا کر دیتے تھے۔ [صحیح ابن حبان/كتاب الصلاة/حدیث: 2330]

سیدنا معاویہ بن ابوسفیان رضی اللہ عنہما اپنی بہن سیدہ ام حبیبہ رضی اللہ عنہا جو نبی اکرم صلی اللہ علیہ وسلم کی زوجہ محترمہ ہیں، کے بارے میں یہ بات نقل کرتے ہیں: انہوں نے ان سے دریافت کیا: کیا نبی اکرم صلی اللہ علیہ وسلم اسی کپڑے میں نماز ادا کر لیتے تھے جس میں آپ صلی اللہ علیہ وسلم نے اس خاتون کے ساتھ صحبت کی ہوتی تھی؟ تو سیدہ ام حبیبہ رضی اللہ عنہا نے جواب دیا: جی ہاں (اس وقت) جب آپ کو اس میں کوئی نجاست نظر نہیں آتی تھی۔ [صحیح ابن حبان/كتاب الصلاة/حدیث: 2331]

اسود بن یزید بیان کرتے ہیں کہ سیدہ عائشہ رضی اللہ عنہا نے مجھے دیکھا، میں اپنے کپڑے پر سے جنابت کے نشان کو دھو رہا تھا، تو انہوں نے فرمایا: یہ کیا ہے؟ میں نے جواب دیا: یہ جنابت کا نشان ہے جو میرے کپڑے پر لگ گیا تھا، تو سیدہ عائشہ رضی اللہ عنہا نے فرمایا: مجھے اپنے بارے میں یہ بات یاد ہے، یہ نبی اکرم صلی اللہ علیہ وسلم کے کپڑے پر بھی لگتا تھا تو آپ صلی اللہ علیہ وسلم یہ فرماتے تھے: ”ہم اس طرح اسے کھرچ دیں۔“ [صحیح ابن حبان/كتاب الصلاة/حدیث: 2332]

سیدنا جابر بن سمرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا: کیا میں اس کپڑے میں نماز ادا کر سکتا ہوں جس کو پہن کر میں نے اپنی بیوی کے ساتھ صحبت کی تھی؟ تو نبی اکرم صلی اللہ علیہ وسلم نے ارشاد فرمایا: ”جی ہاں، البتہ اگر تم اس میں کوئی چیز دیکھو تو اسے دھو لو۔“ [صحیح ابن حبان/كتاب الصلاة/حدیث: 2333]

عون بن ابوجحیفہ اپنے والد (سیدنا ابوجحیفہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم سرخ حلہ پہن کر تشریف لائے اور (آپ صلی اللہ علیہ وسلم کے سامنے) نیزہ گاڑ دیا گیا، پھر نبی اکرم صلی اللہ علیہ وسلم نے اس کی طرف رخ کر کے نماز ادا کی جبکہ اس کے دوسری طرف سے کتے، خواتین اور گدھے گزر رہے تھے۔ [صحیح ابن حبان/كتاب الصلاة/حدیث: 2334]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم تشریف لائے، آپ نے سیدنا اسامہ بن زید رضی اللہ عنہما پر ٹیک لگائی ہوئی تھی اور آپ نے ایک قطری چادر اوڑھی ہوئی تھی، جسے آپ نے توشیح کے طور پر لپیٹا ہوا تھا، آپ نے لوگوں کو نماز پڑھائی۔ [صحیح ابن حبان/كتاب الصلاة/حدیث: 2335]