سیدنا بسر بن سعید بیان کرتے ہیں کہ سیدنا زید بن خالد رضی اللہ عنہ نے انہیں سیدنا ابوجہم رضی اللہ عنہ کی طرف بھیجا تھا تاکہ ان سے یہ دریافت کریں کہ انہوں نے نمازی کے آگے سے گزرنے والے شخص کے بارے میں نبی اکرم صلی اللہ علیہ وسلم کو کیا بات ارشاد فرماتے ہوئے سنا ہے، تو سیدنا ابوجہم رضی اللہ عنہ نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”نمازی کے آگے گزرنے والے شخص کو اگر یہ پتہ چل جائے کہ اسے کتنا گناہ ہوتا ہے، تو چالیس تک ٹھہرے رہنا اس کے لیے اس کے آگے سے گزرنے سے زیادہ بہتر ہو۔“ (راوی کہتے ہیں: مجھے نہیں معلوم اس سے مراد چالیس سال ہیں، یا چالیس مہینے ہیں، یا چالیس دن ہیں، یا چالیس گھڑیاں ہیں۔) [صحیح ابن حبان/كتاب الصلاة/حدیث: 2366]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کر رہا ہو تو کسی کو اپنے آگے سے نہ گزرنے دے جہاں تک ہو سکے اسے پرے کرنے کی کوشش کرے، اگر وہ دوسرا شخص نہیں مانتا تو یہ اس کے ساتھ جھگڑا کرے کیونکہ وہ (دوسرا شخص) شیطان ہوگا۔“ [صحیح ابن حبان/كتاب الصلاة/حدیث: 2367]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کر رہا ہو، تو کسی کو اپنے آگے سے نہ گزرنے دے، جہاں تک اس سے ہو سکے وہ اسے پرے کرنے کی کوشش کرے، اگر وہ (دوسرا شخص) نہیں مانتا تو یہ اس کے ساتھ جھگڑا کرے کیونکہ وہ (دوسرا شخص) شیطان ہو گا۔“ [صحیح ابن حبان/كتاب الصلاة/حدیث: 2368]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم لوگ صرف کسی سترہ کی طرف رخ کر کے نماز ادا کرو اور کسی کو اپنے آگے سے نہ گزرنے دو، اگر وہ نہیں مانتا تو آدمی کو اس سے جھگڑا کرنا چاہیے کیونکہ اس (دوسرے شخص) کے ساتھ شیطان ہوگا۔“ [صحیح ابن حبان/كتاب الصلاة/حدیث: 2369]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کر رہا ہو، تو وہ کسی کو اپنے آگے سے نہ گزرنے دے، اگر وہ دوسرا شخص نہیں مانتا تو یہ اس کے ساتھ جھگڑا کرے کیونکہ اس (دوسرے شخص) کے ساتھ شیطان ہوگا۔“ [صحیح ابن حبان/كتاب الصلاة/حدیث: 2370]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نماز ادا کر رہے تھے، آپ صلی اللہ علیہ وسلم کے سامنے سے بکری گزری تو نبی اکرم صلی اللہ علیہ وسلم نے اسے قبلہ (کی طرف والی دیوار) کی طرف جانے پر مجبور کیا، یہاں تک کہ آپ صلی اللہ علیہ وسلم نے اپنا پیٹ قبلہ (کی سمت والی دیوار) کے ساتھ لگا دیا۔ [صحیح ابن حبان/كتاب الصلاة/حدیث: 2371]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص سترہ کی طرف رخ کر کے نماز ادا کر رہا ہو، تو اسے سترہ کے قریب کھڑے ہونا چاہیے کیونکہ شیطان اس شخص کے اور سترہ کے درمیان میں سے گزرتا ہے اور پھر اسے کسی کو اپنے آگے سے گزرنے نہیں دینا چاہیے۔“ [صحیح ابن حبان/كتاب الصلاة/حدیث: 2372]

سیدنا سہل بن ابوحثمہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص سترہ کی طرف رخ کر کے نماز ادا کرے تو اسے سترہ کے قریب کھڑے ہونا چاہیے تاکہ شیطان اس کی نماز کو منقطع نہ کر دے۔“ [صحیح ابن حبان/كتاب الصلاة/حدیث: 2373]

سیدنا سہل بن سعد رضی اللہ عنہ بیان کرتے ہیں: نبی اکرم صلی اللہ علیہ وسلم کی جائے نماز اور (قبلہ کی سمت والی) دیوار کے درمیان بکری کے گزرنے جتنی جگہ ہوتی تھی۔ [صحیح ابن حبان/كتاب الصلاة/حدیث: 2374]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص سترہ کی طرف رخ کر کے نماز ادا کرے تو اسے سترہ کے قریب ہونا چاہیے کیونکہ شیطان اس کے اور سترہ کے درمیان میں سے گزرتا ہے، تو آدمی کو کسی کو اپنے آگے سے گزرنے نہیں دینا چاہیے۔“ [صحیح ابن حبان/كتاب الصلاة/حدیث: 2375]