سیدنا ابوہریرہ رضی اللہ عنہ بیان کرتے ہیں کہ ایک شخص نے عرض کی: یا رسول اللہ صلی اللہ علیہ وسلم ! کیا ہم میں سے کوئی شخص ایک کپڑے میں نماز ادا کر سکتا ہے؟ نبی اکرم صلی اللہ علیہ وسلم نے فرمایا: ”کیا تم سب کے پاس دو کپڑے ہیں؟“ سیدنا ابوہریرہ رضی اللہ عنہ نے اس شخص سے یہ فرمایا جس نے ان سے یہ سوال کیا تھا: کیا تم ابوہریرہ کو جانتے ہو؟ بعض اوقات وہ ایک کپڑے میں نماز ادا کر رہا ہوتا ہے حالانکہ اس کے کپڑے کھونٹی پر لٹکے ہوئے ہوتے ہیں۔ [صحیح ابن حبان/كتاب الصلاة/حدیث: 2296]

قیس بن طلق اپنے والد (سیدنا طلق بن علی رضی اللہ عنہ) کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: ایک کپڑے میں نماز ادا کرنے کے بارے میں آپ کی کیا رائے ہے؟ تو نبی اکرم صلی اللہ علیہ وسلم نے دریافت کیا: ”کیا تم میں سے ہر ایک کے پاس دو ہوتے ہیں؟“ [صحیح ابن حبان/كتاب الصلاة/حدیث: 2297]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم سے ایک کپڑے میں نماز ادا کرنے کے بارے میں دریافت کیا گیا تو آپ صلی اللہ علیہ وسلم نے دریافت فرمایا: ”کیا تم میں سے ہر ایک کے پاس دو کپڑے ہوتے ہیں؟“ جب سیدنا عمر بن خطاب رضی اللہ عنہ (کی خلافت) کا زمانہ آیا، تو انہوں نے ارشاد فرمایا: جب اللہ تعالیٰ کشادگی عطا کرے تو تم لوگ کشادگی کو اختیار کرو۔ آدمی اپنے کپڑے کو جمع کرے (یعنی دو مختلف چیزوں کو پہن کر نماز ادا کرے) وہ تہبند اور چادر میں، یا تہبند اور قمیض میں، یا تہبند اور قباء میں، یا شلوار اور چادر میں، یا شلوار اور قمیض میں، یا شلوار اور قباء میں نماز ادا کرے۔ ہشام نامی راوی کہتے ہیں: میرا خیال ہے انہوں نے پاجامے کا ذکر بھی کیا تھا۔ [صحیح ابن حبان/كتاب الصلاة/حدیث: 2298]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص ایک کپڑے میں نماز ادا کرتا ہے اسے اس کو اپنے اوپر اوڑھ لینا چاہیے۔“ [صحیح ابن حبان/كتاب الصلاة/حدیث: 2299]

سیدنا ابوہریرہ رضی اللہ عنہ بیان کرتے ہیں: سیدنا جابر بن عبداللہ رضی اللہ عنہما نے ایک کپڑے میں ہمیں نماز پڑھائی جس کے کنارے انہوں نے مخالف سمت میں (کندھوں پر) ڈالے ہوئے تھے، انہوں نے یہ بات ارشاد فرمائی: ”نبی اکرم صلی اللہ علیہ وسلم نے بھی اسی طرح نماز پڑھائی ہے۔“ [صحیح ابن حبان/كتاب الصلاة/حدیث: 2300]

سیدنا سہل بن سعد رضی اللہ عنہ بیان کرتے ہیں کہ لوگ نبی اکرم صلی اللہ علیہ وسلم کی اقتداء میں نماز ادا کرتے تھے، انہوں نے بچوں کی طرح اپنے تہبند اپنی گردنوں میں باندھے ہوئے ہوتے تھے، تو خواتین کو یہ حکم دیا گیا: ”تم اس وقت تک (سجدے سے) سر کو نہ اٹھانا جب تک مرد سیدھے (ہو کر بیٹھ نہیں جاتے)۔“ [صحیح ابن حبان/كتاب الصلاة/حدیث: 2301]

سیدنا عمر بن ابوسلمہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو ایک کپڑے میں نماز ادا کرتے ہوئے دیکھا ہے، جسے آپ صلی اللہ علیہ وسلم نے «اِشْتِمَال» کے طور پر لپیٹا ہوا تھا۔ [صحیح ابن حبان/كتاب الصلاة/حدیث: 2302]

سیدنا ابوہریرہ رضی اللہ عنہ بیان کرتے ہیں: ایک شخص نے عرض کی: یا رسول اللہ صلی اللہ علیہ وسلم ! کیا کوئی شخص ایک کپڑے میں نماز ادا کر سکتا ہے؟ نبی اکرم صلی اللہ علیہ وسلم نے ارشاد فرمایا: ”اسے چاہیے، توشیح کے طور پر اسے لپیٹ لے اور پھر اس میں نماز ادا کر لے۔“ [صحیح ابن حبان/كتاب الصلاة/حدیث: 2303]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص ایک کپڑے میں نماز ادا کرتا ہے، تو اسے اس کے کنارے مخالف سمت میں کندھے پر رکھ لینے چاہئیں۔“ [صحیح ابن حبان/كتاب الصلاة/حدیث: 2304]

سعید بن حارث بیان کرتے ہیں کہ وہ سیدنا جابر بن عبداللہ رضی اللہ عنہما کی خدمت میں حاضر ہوئے، تو سیدنا جابر رضی اللہ عنہما نے بتایا: میں نبی اکرم صلی اللہ علیہ وسلم کے ہمراہ سفر کر رہا تھا۔ ایک رات میں کسی معاملے کے بارے میں آپ کی خدمت میں حاضر ہوا، تو میں نے آپ کو نماز پڑھتے ہوئے پایا، میرے جسم پر ایک کپڑا تھا جسے میں نے اشتمال کے طور پر لپیٹا ہوا تھا۔ میں آپ کے پہلو میں کھڑا ہو کر نماز ادا کرنے لگا، جب نبی اکرم صلی اللہ علیہ وسلم نے نماز مکمل کی تو آپ نے ارشاد فرمایا: ”تمہیں کیا کام ہے؟“ میں نے آپ کو بتایا تو نبی اکرم صلی اللہ علیہ وسلم نے فرمایا: ”اے جابر! یہ تم نے اشتمال کے طور پر کس طرح کپڑا پہنا ہوا ہے، جو میں دیکھ رہا ہوں؟“ میں نے عرض کی: یہ ایک تنگ کپڑا ہے۔ نبی اکرم صلی اللہ علیہ وسلم نے ارشاد فرمایا: ”جب تم نماز ادا کرنے لگو اور تمہارے جسم پر ایک کپڑا ہو، تو اگر تو وہ کشادہ ہو، تو تم اسے التحاف کے طور پر پہن لو اگر وہ تنگ ہو، تو تم اس کا تہبند باندھ لو۔“ [صحیح ابن حبان/كتاب الصلاة/حدیث: 2305]