سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم لوگوں کو نماز پڑھا رہے تھے، اسی دوران اولادِ عبدالمطلب سے تعلق رکھنے والی دو بچیاں دوڑتی ہوئی آئیں، وہ ایک دوسرے سے جھگڑا کر رہی تھیں۔ نبی اکرم صلی اللہ علیہ وسلم نے ان دونوں کو پکڑا اور ان میں سے ایک کو دوسری سے الگ کر دیا اور آپ صلی اللہ علیہ وسلم نے اس بات کی کوئی پرواہ نہیں کی۔ [صحیح ابن حبان/كتاب الصلاة/حدیث: 2356]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جمائی شیطان کی طرف سے ہوتی ہے، جب کسی شخص کو جمائی آئے، تو وہ جہاں تک ہو سکے اسے روکنے کی کوشش کرے۔“ [صحیح ابن حبان/كتاب الصلاة/حدیث: 2357]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ چھینک کو پسند کرتا ہے اور جمائی کو ناپسند کرتا ہے، تو جب تم میں سے کسی شخص کو جمائی آئے، تو جہاں تک ہو سکے وہ اس کو روکنے کی کوشش کرے یا پھر اپنا ہاتھ اپنے منہ پر رکھ لے، کیونکہ جب وہ جمائی لیتے ہوئے آہ کہتا ہے، تو اس کے اندر شیطان ہنس رہا ہوتا ہے (جس کے نتیجہ میں یہ آواز آتی ہے)۔“ [صحیح ابن حبان/كتاب الصلاة/حدیث: 2358]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”نماز کے دوران جمائی کا آنا شیطان کی طرف سے ہوتا ہے، جب کسی شخص کو یہ صورت حال محسوس ہو، تو وہ اسے روکنے کی کوشش کرے۔“ [صحیح ابن حبان/كتاب الصلاة/حدیث: 2359]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جب کسی شخص کو جمائی آئے، تو وہ اپنا ہاتھ اپنے منہ پر رکھ لے کیونکہ شیطان اندر داخل ہو جاتا ہے۔“ [صحیح ابن حبان/كتاب الصلاة/حدیث: 2360]

سیدنا ابوہریرہ رضی اللہ عنہ بیان کرتے ہیں کہ سیدنا ابوالقاسم صلی اللہ علیہ وسلم نے ارشاد فرمایا ہے: ”جب کوئی شخص نماز ادا کرے تو اسے اپنے سامنے کوئی چیز رکھ لینی چاہیے، اگر اسے کوئی چیز نہیں ملتی تو اپنا عصا رکھ لے، اگر عصا بھی نہیں ملتا تو پھر ایک لکیر کھینچ لے، اس کے دوسری طرف سے گزرنے والا اسے کوئی نقصان نہیں پہنچائے گا۔“ (امام ابن حبان رحمہ اللہ فرماتے ہیں:) عمرو بن حریث نامی یہ راوی اہل مدینہ سے تعلق رکھنے والا بزرگ ہے، اس کے حوالے سے سعید مقبری نے اور اس کے بیٹے ابومحمود نے روایات نقل کی ہیں، اس نے اپنے دادا کے حوالے سے روایات نقل کی ہیں اور یہ عمرو بن حریث مخزومی نہیں ہے کیونکہ وہ صحابی ہیں، یہ عمرو بن حریث بن عمارہ ہے جس کا تعلق بنو عذرہ سے ہے۔ ابومحمد عمرو بن حریث نے اپنے دادا حریث بن عمارہ کے حوالے سے سیدنا ابوہریرہ رضی اللہ عنہما سے احادیث کا سماع کیا ہے۔ [صحیح ابن حبان/كتاب الصلاة/حدیث: 2361]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم صرف کسی سترہ کی طرف رخ کر کے نماز ادا کرو اور کسی شخص کو اپنے آگے سے نہ گزرنے دو، اگر وہ نہیں مانتا تو تم اس کے ساتھ جھگڑا کرو کیونکہ وہ شیطان ہو گا۔“ [صحیح ابن حبان/كتاب الصلاة/حدیث: 2362]

سیدنا مطلب بن ابو وداعہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، جب آپ طواف کر کے فارغ ہوئے، تو آپ مطاف کے ایک کنارے پر تشریف لائے، آپ نے وہاں دو رکعات نماز ادا کی، اس وقت آپ کے اور طواف کرنے والوں کے درمیان کوئی چیز نہیں تھی۔ [صحیح ابن حبان/كتاب الصلاة/حدیث: 2363]

سیدنا مطلب بن ابووداعہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، آپ حجرِ اسود کے مدمقابل کھڑے ہو کر نماز ادا کر رہے تھے، مرد اور خواتین آپ کے سامنے سے گزر رہے تھے، آپ کے اور ان لوگوں کے درمیان کوئی سترہ نہیں تھا۔ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ جب کوئی نمازی سترہ کو رکاوٹ بنائے بغیر نماز ادا کر رہا ہو، تو اس کے آگے سے گزرنا مباح ہے۔ کثیر بن کثیر نامی راوی کثیر بن کثیر بن مطلب بن ابووداعہ بن صبیرہ بن سعید بن سعد بن سہم بن عمرو بن ہصیص بن کعب بن لؤی سہمی ہے۔ [صحیح ابن حبان/كتاب الصلاة/حدیث: 2364]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اگر کسی شخص کو یہ بات پتا چل جائے کہ اس کے اپنے بھائی کے آگے سے گزرنے پر کتنا گناہ ہو گا، جبکہ اس کا بھائی اپنے پروردگار کی بارگاہ میں مناجات کر رہا ہو (یعنی نماز ادا کر رہا ہو) تو اس شخص کا اس جگہ پر ایک سو سال تک کھڑے رہنا اس کے نزدیک اس بات سے زیادہ پسندیدہ ہو گا کہ وہ ایک قدم اٹھائے (اور اپنے بھائی کے آگے سے گزرے)۔“ [صحیح ابن حبان/كتاب الصلاة/حدیث: 2365]