سالم بن عبداللہ بیان کرتے ہیں، انہوں نے اپنے والد سیدنا عبداللہ بن عمر رضی اللہ عنہما کو یہ بیان کرتے ہوئے سنا: یہ بیداء وہ جگہ ہے، جس کے بارے میں تم لوگ نبی اکرم صلی اللہ علیہ وسلم کی طرف غلط بات منسوب کرتے ہو۔ نبی اکرم صلی اللہ علیہ وسلم نے مسجد کے پاس سے تلبیہ پڑھا تھا (ان کی مراد) مسجد ذوالحلیفہ تھی۔ [صحیح ابن حبان/كتاب الحج/حدیث: 3762]

سعید بن ابوسعید مقبری بیان کرتے ہیں: عبید بن جریج نے سیدنا عبداللہ بن عمر رضی اللہ عنہما سے دریافت کیا: اے ابوعبدالرحمن! میں نے آپ کو چار کام کرتے ہوئے دیکھا ہے جو میں نے آپ کے ساتھیوں میں سے کسی کو کرتے ہوئے نہیں دیکھا۔ انہوں نے دریافت کیا: اے ابن جریج! وہ کون سے کام ہیں؟ ابن جریج نے کہا: میں نے آپ کو دیکھا ہے کہ آپ دو یمانی ارکان کو چھوتے ہیں اور میں نے آپ کو دیکھا ہے کہ آپ سبتی جوتے پہنتے ہیں۔ میں نے آپ کو دیکھا کہ آپ زرد رنگ سے رنگتے ہیں اور میں نے آپ کو دیکھا ہے کہ جب آپ مکہ میں مقیم ہوں، تو لوگ پہلی کا چاند دیکھنے کے ساتھ ہی تلبیہ پڑھنا شروع کر دیتے ہیں، لیکن آپ تلبیہ کے دن تلبیہ پڑھنا شروع کرتے ہیں۔ تو سیدنا عبداللہ بن عمر رضی اللہ عنہما نے فرمایا: جہاں تک ارکان کا تعلق ہے، تو میں نے نبی اکرم صلی اللہ علیہ وسلم کو صرف دو یمانی ارکان کا استلام کرتے ہوئے دیکھا ہے؛ جہاں تک سبتی جوتے پہننے کا تعلق ہے میں نے نبی اکرم صلی اللہ علیہ وسلم کو سبتی جوتے پہنتے ہوئے دیکھا ہے جن پر بال نہیں ہوتے تھے، نبی اکرم صلی اللہ علیہ وسلم انہیں پہن کر ہی وضو کر لیتے تھے اس لیے میں بھی انہیں پہننا پسند کرتا ہوں؛ جہاں تک زرد رنگ کا تعلق ہے، تو میں نے نبی اکرم صلی اللہ علیہ وسلم کو یہ رنگ استعمال کرتے ہوئے دیکھا ہے؛ جہاں تک تلبیہ پڑھنے کا تعلق ہے تو میں نے نبی اکرم صلی اللہ علیہ وسلم کو اسی وقت تلبیہ پڑھتے ہوئے دیکھا تھا جب آپ کی سواری چلنے کے لیے تیار ہو گئی تھی۔ [صحیح ابن حبان/كتاب الحج/حدیث: 3763]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے چار عمرے کیے ہیں، وہ سب ذی القعدہ کے مہینے میں تھے؛ ایک عمرہ حدیبیہ سے کیا تھا جو ذی القعدہ کے مہینے میں ہوا، ایک اس سے اگلے سال ذی القعدہ کے مہینے میں کیا تھا، ایک عمرہ جعرانہ سے کیا تھا جب آپ صلی اللہ علیہ وسلم نے غزوہ حنین کے مال غنیمت کو تقسیم کیا تھا، یہ بھی ذی القعدہ میں ہوا تھا اور ایک عمرہ آپ صلی اللہ علیہ وسلم نے حج کے ہمراہ کیا تھا۔ [صحیح ابن حبان/كتاب الحج/حدیث: 3764]

سیدنا عبداللہ بن عباس رضی اللہ عنہما بیان کرتے ہیں: اللہ کی قسم! اللہ کے رسول صلی اللہ علیہ وسلم نے ذوالحجہ کے مہینے میں عمرہ اس لیے کیا تاکہ اس کے ذریعے اہل شرک کی روایت کو ختم کریں۔ اس کی وجہ یہ ہے کہ قریش اور ان کے دین کے پیروکار لوگ کہا کرتے تھے: جب اونٹ کے بال بڑھ جائیں اور اس کی پشت پر موجود زخم ٹھیک ہو جائے (یعنی حاجی کے پالان رکھنے کی وجہ سے جو زخم بنتا ہے) اور صفر کا مہینہ شروع ہو جائے تو عمرہ کرنے والے کے لیے عمرہ کرنا جائز ہو جاتا ہے؛ وہ لوگ ذوالحجہ کے مہینے میں عمرہ کرنے کو حرام قرار دیتے تھے، تو نبی اکرم صلی اللہ علیہ وسلم نے سیدہ عائشہ رضی اللہ عنہا کو عمرہ اسی لیے کروایا تھا تاکہ ان لوگوں کے اس قول کے برخلاف کریں۔ [صحیح ابن حبان/كتاب الحج/حدیث: 3765]

سیدہ عائشہ رضی اللہ عنہا بیان کرتی ہیں: میں نے خود نبی اکرم صلی اللہ علیہ وسلم کے احرام باندھنے سے پہلے آپ صلی اللہ علیہ وسلم کے احرام پر اور نبی اکرم صلی اللہ علیہ وسلم کے بیت اللہ کا طواف کرنے سے پہلے آپ صلی اللہ علیہ وسلم کے احرام کھولنے کے وقت نبی اکرم صلی اللہ علیہ وسلم کو خوشبو لگائی تھی۔ [صحیح ابن حبان/كتاب الحج/حدیث: 3766]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی مانگ میں خوشبو کی چمک کا منظر گویا کہ آج بھی میری نگاہ میں ہے، جبکہ آپ صلی اللہ علیہ وسلم اس وقت (احرام باندھے) ہوئے تھے۔ [صحیح ابن حبان/كتاب الحج/حدیث: 3767]

سیدہ عائشہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کے احرام باندھنے کے وقت نبی اکرم صلی اللہ علیہ وسلم کو خوشبو لگائی تھی، تو میں نے تین دن گزرنے کے بعد آپ کی مانگ میں خوشبو کا نشان دیکھا تھا، آپ اس وقت (احرام باندھے) ہوئے تھے۔ [صحیح ابن حبان/كتاب الحج/حدیث: 3768]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی مانگ میں خوشبو کی چمک کا منظر گویا کہ آج بھی میری نگاہ میں ہے، آپ صلی اللہ علیہ وسلم اس وقت احرام باندھے ہوئے تھے۔ [صحیح ابن حبان/كتاب الحج/حدیث: 3769]

سیدہ عائشہ صدیقہ رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کے احرام باندھنے سے پہلے آپ کو خوشبو لگائی تھی اور قربانی کے دن آپ کے بیت اللہ کا طواف کرنے سے پہلے آپ کو خوشبو لگائی تھی جس میں مشک ملی ہوئی تھی۔ [صحیح ابن حبان/كتاب الحج/حدیث: 3770]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے جب احرام باندھا تھا اس وقت اور جب آپ صلی اللہ علیہ وسلم نے بیت اللہ کا طواف کرنے سے پہلے احرام کھولا تھا اس وقت میں نے نبی اکرم صلی اللہ علیہ وسلم کو خوشبو لگائی تھی۔ [صحیح ابن حبان/كتاب الحج/حدیث: 3771]