حارث بن رافع بیان کرتے ہیں کہ انہوں نے سیدنا جابر بن عبداللہ رضی اللہ عنہ سے سوال کیا، وہ بولے: ہماری بکریاں بھی ہیں اور بال بچے بھی ہیں، تو ان بال بچوں نے اپنی ان بکریوں کو پتے توڑ کر دینے ہوتے ہیں جو اس سمر کے درخت کے ہوتے ہیں، تو سیدنا جابر رضی اللہ عنہ نے فرمایا: جی نہیں۔ پھر انہوں نے فرمایا: ”یہاں کے پتوں کو توڑا نہیں جائے گا اور یہاں کے (درخت کو) کاٹا نہیں جائے گا،“ کیونکہ نبی اکرم صلی اللہ علیہ وسلم نے اسے حرم قرار دیا ہے، البتہ تم لوگ آرام سے جھاڑ سکتے ہو۔ [صحیح ابن حبان/كتاب الحج/حدیث: 3752]

سیدنا عمر رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اگر اللہ نے چاہا اور میں زندہ رہ گیا، تو میں یہودیوں اور عیسائیوں کو جزیرہ عرب سے نکال دوں گا، یہاں تک کہ اس میں صرف مسلمان باقی رہ جائیں گے۔“ [صحیح ابن حبان/كتاب الحج/حدیث: 3753]

ثمامہ بن عبداللہ بیان کرتے ہیں کہ سیدنا انس بن مالک رضی اللہ عنہ نے پالان پر بیٹھ کر (سفر کر کے) حج کیا، وہ کنجوس آدمی نہیں تھے، لیکن انہوں نے یہ بات بیان کی کہ نبی اکرم صلی اللہ علیہ وسلم بھی پالان پر سوار ہو کر حج کے لیے گئے تھے وہ آپ صلی اللہ علیہ وسلم کی سواری تھی ( «زَامِلَة» اس اونٹنی کو کہا جاتا ہے جس پر ساز و سامان لادا جاتا ہے)۔ [صحیح ابن حبان/كتاب الحج/حدیث: 3754]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”گویا کہ میں اس وقت بھی سیدنا موسیٰ بن عمران علیہ السلام کی طرف دیکھ رہا ہوں جو ہرشی کی گھاٹی سے پیدل نیچے کی طرف اتر رہے ہیں۔“ [صحیح ابن حبان/كتاب الحج/حدیث: 3755]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو منبر پر خطبہ دیتے ہوئے یہ ارشاد فرماتے ہوئے سنا ہے؛ ایک شخص آپ کے سامنے کھڑا ہوا اس نے عرض کی: یا رسول اللہ صلی اللہ علیہ وسلم ! میرا نام فلاں فلاں غزوے میں شرکت کے لیے نوٹ کر لیا گیا ہے جبکہ میری بیوی حج کے لیے روانہ ہونا چاہتی ہے، تو نبی اکرم صلی اللہ علیہ وسلم نے ارشاد فرمایا: ”تم جاؤ اور اپنی بیوی کو حج کرواؤ۔“ [صحیح ابن حبان/كتاب الحج/حدیث: 3756]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”کوئی بھی شخص کسی عورت کے ساتھ تنہا ہرگز نہ ہو، اس عورت کے ساتھ اس کا کوئی محرم بھی ہونا چاہیے۔“ ایک صاحب کھڑے ہوئے، انہوں نے عرض کی: یا رسول اللہ صلی اللہ علیہ وسلم ! میرا نام فلاں فلاں جنگ میں حصے کے لیے نوٹ کر لیا گیا ہے، حالانکہ میری بیوی حج کے لیے جانا چاہتی ہے، تو نبی اکرم صلی اللہ علیہ وسلم نے فرمایا: ”تم جاؤ اور اپنی بیوی کے ہمراہ حج کرو۔“ [صحیح ابن حبان/كتاب الحج/حدیث: 3757]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کسی بھی عورت کے لیے سفر کرنا جائز نہیں ہے، البتہ اس کا محرم ساتھ ہو، تو اس کا حکم مختلف ہے۔“ [صحیح ابن حبان/كتاب الحج/حدیث: 3758]

سیدنا عبداللہ بن عمر رضی اللہ عنہما بیان کرتے ہیں کہ اللہ کے رسول صلی اللہ علیہ وسلم نے اہل مدینہ کو یہ حکم دیا ہے کہ ”وہ ذوالحلیفہ سے اور اہل شام جحفہ سے اور اہل نجد قرن سے احرام باندھیں۔“ سیدنا عبداللہ بن عمر رضی اللہ عنہما بیان کرتے ہیں کہ یہ وہ مقامات ہیں جن کے بارے میں میں نے نبی اکرم صلی اللہ علیہ وسلم کی زبانی سنا ہے، مجھے یہ بات بتائی گئی ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”اہل یمن یلملم سے احرام باندھیں گے۔“ [صحیح ابن حبان/كتاب الحج/حدیث: 3759]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”اہل مدینہ کو ذوالحلیفہ سے، اہل شام کو جحفہ سے اور اہل نجد کو قرن سے احرام باندھنے کا حکم دیا ہے“۔ سیدنا عبداللہ بن عمر رضی اللہ عنہما بیان کرتے ہیں: مجھے یہ بات بتائی گئی ہے کہ نبی اکرم صلی اللہ علیہ وسلم نے ارشاد فرمایا ہے: ”اہل یمن، اہل یلملم سے احرام باندھیں گے“۔ [صحیح ابن حبان/كتاب الحج/حدیث: 3760]

سیدنا عبداللہ بن عمر رضی اللہ عنہما بیان کرتے ہیں کہ ایک شخص نے بلند آواز میں نبی اکرم صلی اللہ علیہ وسلم کو مخاطب کرتے ہوئے دریافت کیا کہ آپ ہمیں کیا حکم دیتے ہیں کہ ہم کہاں سے احرام باندھیں؟ تو نبی اکرم صلی اللہ علیہ وسلم نے فرمایا: ”اہلِ مدینہ ذوالحلیفہ سے، اہل شام جحفہ سے، اہل نجد قرن سے احرام باندھیں گے۔“ سیدنا عبداللہ بن عمر رضی اللہ عنہما بیان کرتے ہیں کہ لوگ یہ کہتے ہیں کہ نبی اکرم صلی اللہ علیہ وسلم نے یہ بات بھی ارشاد فرمائی ہے: ”اہل یمن، یلملم سے (راوی کو شک ہے شاید یہ الفاظ ہے) ایلملم سے احرام باندھیں گے۔“ یہ شک یحییٰ نامی راوی کو ہے۔ سیدنا عبداللہ بن عمر رضی اللہ عنہما بیان کرتے ہیں کہ ایک شخص نے نبی اکرم صلی اللہ علیہ وسلم سے دریافت کیا کہ ہم احرام باندھیں، تو ہم کون سے کپڑے پہنیں گے؟ نبی اکرم صلی اللہ علیہ وسلم نے ارشاد فرمایا: ”تم قمیص، شلوار، عمامہ، ٹوپی، موزے نہ پہنو، البتہ اگر کسی کے پاس جوتے نہ ہوں، تو وہ ٹخنوں سے نیچے اپنے موزے کاٹ لے اور (احرام والا شخص) ایسا کوئی کپڑا نہیں پہنے گا، جس پر زعفران یا ورس لگا ہوا ہو۔“
سیدنا عبدالله بن عمر رضی اللہ عنہما بیان کرتے ہیں: ایک شخص نے نبی اکرم صلی اللہ علیہ وسلم سے دریافت کیا: ہم احرام باندھیں، تو ہم کون سے کپڑے پہنیں گے؟ نبی اکرم صلی اللہ علیہ وسلم نے ارشاد فرمایا: ”تم قمیض شلوار، عمامہ، ٹوپی موزے نہ پہنو، البتہ اگر کسی کے پاس جوتے نہ ہوں، تو وہ ٹخنوں سے نیچے اپنے موزے کاٹ لے اور (احرام والا شخص) ایسا کوئی کپڑا نہیں پہنے گا، جس پر زعفران یا ورس لگا ہوا ہو۔“ [صحیح ابن حبان/كتاب الحج/حدیث: 3761]