سیدنا عبداللہ بن عباس رضی اللہ عنہما بیان کرتے ہیں کہ ایک شخص نے نبی اکرم صلی اللہ علیہ وسلم کی موجودگی میں ہوا پر لعنت کی تو نبی اکرم صلی اللہ علیہ وسلم نے ارشاد فرمایا: ”تم ہوا پر لعنت نہ کرو کیونکہ وہ حکم کی پابند ہے، جب بھی کوئی شخص کسی ایسی چیز پر لعنت کرے جو لعنت کی اہل نہ ہو تو وہ لعنت اس کرنے والے کی طرف واپس آ جاتی ہے۔“ [صحیح ابن حبان/كتاب الحظر والإباحة/حدیث: 5745]

زید بن اسلم بیان کرتے ہیں کہ عبدالملک نے سیدہ ام درداء رضی اللہ عنہا کی طرف پیغام بھیجا۔ راوی بیان کرتے ہیں کہ وہ خاتون بعض اوقات ان کے ہاں قیام بھی کر لیتی تھیں۔ راوی بیان کرتے ہیں کہ عبدالملک نے اپنے خادم کو بلوایا، اسے آنے میں دیر ہو گئی تو عبدالملک نے کہا: اے اللہ! اس پر لعنت کر دے۔ اس خاتون نے کہا: تم اس پر لعنت نہ کرو، کیونکہ میں نے سیدنا ابودرداء رضی اللہ عنہ کو نبی اکرم صلی اللہ علیہ وسلم کا یہ فرمان نقل کرتے ہوئے سنا ہے: ”بے شک لعنت کرنے والے لوگ قیامت کے دن نہ تو شہید ہوں گے اور نہ شفیع ہوں گے۔“ [صحیح ابن حبان/كتاب الحظر والإباحة/حدیث: 5746]

سیدنا عبداللہ بن عمر رضی اللہ عنہما بیان کرتے ہیں کہ انہوں نے نبی اکرم صلی اللہ علیہ وسلم کو فجر کی نماز میں رکوع سے سر اٹھانے کے بعد یہ کہتے ہوئے سنا: «رَبَّنَا وَلَكَ الْحَمْدُ» ”اے ہمارے پروردگار! حمد تیرے لیے مخصوص ہے“، یہ دوسری رکعت کی بات ہے، پھر آپ صلی اللہ علیہ وسلم نے یہ کہا: «اللَّهُمَّ الْعَنْ فُلَانًا وَفُلَانًا» ”اے اللہ! فلاں پر لعنت کر اور فلاں پر لعنت کر“۔ نبی اکرم صلی اللہ علیہ وسلم نے منافقین سے تعلق رکھنے والے کچھ لوگوں کے خلاف دعائے ضرر کی تو اللہ تعالیٰ نے یہ آیت نازل کی: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ﴾ [سورة آل عمران: 128] ”تمہارا اس معاملے سے کوئی واسطہ نہیں ہے خواہ اللہ تعالیٰ انہیں توبہ کی توفیق دے یا انہیں عذاب دے بے شک وہ ظالم ہیں“۔ [صحیح ابن حبان/كتاب الحظر والإباحة/حدیث: 5747]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ چور پر لعنت کرے جو ایک انڈہ (یا ڈھال) چوری کرتا ہے تو اس کے نتیجے میں اس کا ہاتھ کاٹ دیا جاتا ہے، وہ ایک رسی چوری کرتا ہے تو اس کا ہاتھ کاٹ دیا جاتا ہے۔“ (امام ابن حبان رحمہ اللہ فرماتے ہیں:) اس بات کا احتمال موجود ہے کہ نبی اکرم صلی اللہ علیہ وسلم نے اس فرمان میں لفظ ”انڈہ“ کے ذریعے لوہے کا ٹکڑا مراد لیا ہو یا شتر مرغ کا انڈا مراد لیا ہو جس کی قیمت ایک چوتھائی دینار یا اس سے زیادہ کے برابر ہوتی ہے، اسی طرح رسی کے ذریعے وہ رسی لی ہو جو بڑی ہوتی ہے اور جو گہرے کنوؤں میں استعمال ہوتی ہے یا سمندر میں کشتیوں وغیرہ کے لیے استعمال ہوتی ہے، اس کی وجہ یہ ہے کہ اہل حجاز کے ہاں زیادہ تر کنویں گہرے ہوتے ہیں، وہاں ڈولوں کے ساتھ جو رسیاں ہوتی ہیں وہ لٹکتی رہتی ہیں اور انہیں رات کے وقت اسی حالت میں چھوڑ دیا جاتا ہے، اسی طرح سواریوں (یا کشتیوں) کی رسیوں کا عالم ہے، کیونکہ جب سواری کو چھوڑ دیا جاتا ہے تو بعض اوقات اس کی رسیاں خشکی پر اس عالم میں رہ جاتی ہیں جس پر نمی والی ہوا گزرتی ہے، تو نبی اکرم صلی اللہ علیہ وسلم نے ان الفاظ کے ذریعے ایسی کسی بھی چیز کو چھونے سے منع کیا ہے جب کہ آدمی اسے ذاتی ملکیت میں لے، اس سے یہ مراد نہیں ہے کہ اس سے نفع حاصل کرنے سے منع کیا ہے۔ [صحیح ابن حبان/كتاب الحظر والإباحة/حدیث: 5748]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”چھ لوگوں پر میں نے لعنت کی ہے اور ان پر اللہ تعالیٰ نے بھی لعنت کی ہے اور ہر اس نبی نے لعنت کی ہے جس کی دعا مستجاب ہوتی ہے: ایک اللہ کی کتاب میں اضافہ کرنے والا شخص، اللہ کی تقدیر کو جھٹلانے والا شخص، ظلم کے طور پر مسلط کیے جانے والا حکمران تاکہ وہ حکومت کے ذریعے اس شخص کو ذلیل کرے جسے اللہ تعالیٰ نے عزت عطا کی ہے اور اس شخص کو عزت دے جسے اللہ تعالیٰ نے رسوا کیا ہے، اللہ تعالیٰ کی حرام کردہ چیز کو حلال قرار دینے والا شخص، اور میری عترت کے بارے میں اس چیز کو حلال قرار دینے والا شخص جسے اللہ تعالیٰ نے حرام قرار دیا ہے، اور میری سنت کو چھوڑنے والا شخص۔“ [صحیح ابن حبان/كتاب الحظر والإباحة/حدیث: 5749]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”مردوں کے ساتھ مشابہت رکھنے والی خواتین اور خواتین کے ساتھ مشابہت رکھنے والے مردوں پر لعنت کی ہے۔“ [صحیح ابن حبان/كتاب الحظر والإباحة/حدیث: 5750]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”اس شخص پر لعنت کی ہے جو عورتوں کا سا لباس پہنتا ہے اور اس عورت پر لعنت کی ہے جو مردوں کا سا لباس پہنتی ہے“۔ [صحیح ابن حبان/كتاب الحظر والإباحة/حدیث: 5751]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”اس شخص پر لعنت فرمائی ہے جو عورتوں کا سا لباس پہنتا ہے اور اس عورت پر لعنت فرمائی ہے جو مردوں کا لباس پہنتی ہے۔“ [صحیح ابن حبان/كتاب الحظر والإباحة/حدیث: 5752]

سیدنا عبداللہ بن عمرو رضی اللہ عنہما بیان کرتے ہیں کہ میں نے نبی اکرم صلی اللہ علیہ وسلم کو سنا، آپ صلی اللہ علیہ وسلم نے ارشاد فرمایا: ”آخری زمانے میں کچھ لوگ ہوں گے جو مردوں کی طرح زین پر سوار ہوں گے، وہ مردوں کے ساتھ مشابہت رکھتے ہوں گے، وہ مسجدوں کے دروازوں پر پڑاؤ کریں گے، ان کی عورتیں لباس پہننے کے باوجود برہنہ ہوں گی، ان کے سروں پر بختی اونٹوں کی طرح کی کوہان (نما بالوں کے جوڑے) ہوں گے، تم لوگ ان پر لعنت کرو کیونکہ وہ لعنت یافتہ ہوں گی، اگر تمہارے بعد کوئی اور امت ہوتی، تو ان کی خواتین ان کی خدمت کرتیں، جس طرح تم سے پہلے کی امتوں کی خواتین تمہاری خدمت کرتی رہی ہیں۔“ [صحیح ابن حبان/كتاب الحظر والإباحة/حدیث: 5753]

سیدنا ابوہریرہ رضی اللہ عنہ بیان کرتے ہیں، انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”سب سے برا شخص وہ ہے جو دوغلا ہو، جو اس کے پاس یہ رخ لے کر آئے اور اس کے پاس وہ رخ لے کر جائے۔“ [صحیح ابن حبان/كتاب الحظر والإباحة/حدیث: 5754]