جناب عمر بن عبیداللہ نے جناب ابان بن عثمان بن عفان سے کہلا بھیجا جبکہ ابان ان دنوں امیرِ حج تھے اور یہ دونوں احرام کی حالت میں تھے کہ ”میرا پروگرام ہے کہ طلحہ بن عمر کا نکاح شیبہ بن جبیر کی صاحبزادی سے کر دوں اور میں چاہتا ہوں کہ آپ بھی اس میں تشریف لائیں۔“ تو جناب ابان نے اس سے انکار کر دیا اور کہا: ”میں نے اپنے والد سیدنا عثمان بن عفان رضی اللہ عنہ سے سنا ہے، وہ کہتے تھے کہ رسول اللہ صلی اللہ علیہ وسلم نے فرمایا ہے: «لَا يَنْكِحُ الْمُحْرِمُ وَلَا يُنْكِحُ» ”محرم اپنا نکاح کرے نہ کسی دوسرے کا۔““ [سنن ابي داود/كتاب المناسك /حدیث: 1841]

جناب ابان بن عثمان، سیدنا عثمان رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا اور مذکورہ بالا حدیث کے مثل ذکر کیا اور مزید کہا: ”اور نہ شادی کا پیغام دے۔“ [سنن ابي داود/كتاب المناسك /حدیث: 1842]

ام المؤمنین سیدہ میمونہ رضی اللہ عنہا کے بھتیجے یزید بن اصم سیدہ میمونہ رضی اللہ عنہا سے روایت کرتے ہیں، وہ کہتی ہیں کہ ”رسول اللہ صلی اللہ علیہ وسلم نے مجھ سے مقام سرف میں نکاح کیا تھا اور ہم دونوں حلال تھے۔“ [سنن ابي داود/كتاب المناسك /حدیث: 1843]

سیدنا ابن عباس رضی اللہ عنہما بیان کرتے ہیں کہ ”نبی کریم صلی اللہ علیہ وسلم نے سیدہ میمونہ رضی اللہ عنہا سے نکاح کیا جبکہ آپ صلی اللہ علیہ وسلم حالتِ احرام میں تھے۔“ [سنن ابي داود/كتاب المناسك /حدیث: 1844]

جناب سعید بن مسیب رحمہ اللہ کہتے ہیں کہ: ”سیدنا ابن عباس رضی اللہ عنہ کو سیدہ میمونہ رضی اللہ عنہا کے نکاح کے معاملے میں وہم ہوا ہے کہ وہ احرام میں تھے۔“ [سنن ابي داود/كتاب المناسك /حدیث: 1845]

جناب سالم اپنے والد (سیدنا عبداللہ بن عمر رضی اللہ عنہ) سے روایت کرتے ہیں کہ نبی کریم صلی اللہ علیہ وسلم سے سوال کیا گیا کہ محرم کون سے جانور قتل کر سکتا ہے؟ آپ صلی اللہ علیہ وسلم نے فرمایا: ”پانچ جانوروں کے قتل میں کوئی گناہ نہیں ہے، حرم میں مارے یا اس سے باہر حل میں (اور حالت احرام میں مارے یا حلال ہوتے ہوئے) یعنی بچھو، کوا، چوہا، چیل اور کاٹنے والا کتا۔“ [سنن ابي داود/كتاب المناسك /حدیث: 1846]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”پانچ قسم کے جانوروں کو حرم میں قتل کرنا حلال ہے، یعنی سانپ، بچھو، چیل، چوہا اور کاٹنے والا کتا۔“ [سنن ابي داود/كتاب المناسك /حدیث: 1847]

سیدنا ابو سعید خدری رضی اللہ عنہ سے مروی ہے کہ نبی کریم صلی اللہ علیہ وسلم سے پوچھا گیا کہ محرم کون سے جانور قتل کر سکتا ہے؟ آپ صلی اللہ علیہ وسلم نے فرمایا: ”سانپ، بچھو، چوہا، کوے کو پتھر مارے قتل نہ کرے، کاٹنے والا کتا، چیل اور ہر حملہ آور درندہ۔“ [سنن ابي داود/كتاب المناسك /حدیث: 1848]

اسحاق بن عبداللہ بن حارث اپنے والد سے بیان کرتے ہیں کہ جناب حارث سیدنا عثمان رضی اللہ عنہ کی جانب سے طائف کے گورنر تھے۔ انہوں نے سیدنا عثمان رضی اللہ عنہ کے لیے کھانے کا اہتمام کیا اور اس میں چکوروں، جنگلی چڑیوں اور نیل گائے کا گوشت تیار کروایا اور سیدنا علی رضی اللہ عنہ کو بھی بلوا بھیجا۔ قاصد جب ان کے پاس پہنچا تو وہ اپنے اونٹوں کے لیے پتے جھاڑ رہے تھے۔ چنانچہ وہ اپنے ہاتھ (پتوں کے گرد غبار سے) جھاڑتے ہوئے تشریف لائے۔ صاحبِ ضیافت نے ان سے کہا: ”کھائیے!“ تو انہوں نے جواب دیا: ”یہ کھانا ایسے لوگوں کو دے دیں جو احرام میں نہ ہوں، ہم تو احرام میں ہیں۔“ تب انہوں (سیدنا علی رضی اللہ عنہ) نے کہا: ”میں قسم دے کر کہتا ہوں کہ قبیلہ اشجع میں سے کون یہاں ہے، کیا تم جانتے ہو کہ ایک شخص (حمار وحشی) نے رسول اللہ صلی اللہ علیہ وسلم کو حالتِ احرام میں نیل گائے کا گوشت ہدیہ کیا تھا، تو آپ نے اس کے کھانے سے انکار کر دیا تھا؟“ ان لوگوں نے کہا: ”ہاں (یہ بات حق اور سچ ہے)۔“ [سنن ابي داود/كتاب المناسك /حدیث: 1849]

سیدنا ابن عباس رضی اللہ عنہما سے مروی ہے، انہوں نے کہا: ”اے زید بن ارقم! کیا تمہیں معلوم ہے کہ رسول اللہ صلی اللہ علیہ وسلم کو ایک شکار کا عضو ہدیہ دیا گیا تھا تو آپ صلی اللہ علیہ وسلم نے اسے قبول نہیں کیا تھا اور فرمایا تھا: ”ہم احرام میں ہیں؟““ سیدنا زید رضی اللہ عنہ نے جواب دیا: ”ہاں!“۔ [سنن ابي داود/كتاب المناسك /حدیث: 1850]