سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”وہ شخص ہم میں سے نہیں ہے جو کسی عورت کو اس کے شوہر کے خلاف ابھارے یا غلام کو اس کے مالک کے خلاف کر دے۔“ [سنن ابي داود/كتاب تفريع أبواب الطلاق /حدیث: 2175]

سیدنا ابوہریرہ رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”کوئی عورت اپنی (دینی) بہن کی طلاق کا مطالبہ نہ کرے کہ اس طرح اس کا پیالہ (اپنی خاطر) خالی کرا لے۔ اسے چاہیے کہ نکاح کر لے، اس کو وہی کچھ ملے گا جو اس کے لیے مقدر کیا گیا ہے۔“ [سنن ابي داود/كتاب تفريع أبواب الطلاق /حدیث: 2176]

محارب (محارب بن دثار) رحمہ اللہ کہتے ہیں کہ رسول اللہ صلی اللہ علیہ وسلم نے فرمایا: ”اللہ نے طلاق سے بڑھ کر ناپسندیدہ کسی چیز کو حلال نہیں فرمایا۔“ [سنن ابي داود/كتاب تفريع أبواب الطلاق /حدیث: 2177]

محارب بن دثار، سیدنا ابن عمر رضی اللہ عنہما سے روایت کرتے ہیں کہ نبی کریم صلی اللہ علیہ وسلم نے فرمایا: ”اللہ کے ہاں حلال کاموں میں سب سے ناپسندیدہ کام طلاق ہے۔“ [سنن ابي داود/كتاب تفريع أبواب الطلاق /حدیث: 2178]

سیدنا عبداللہ بن عمر رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کے زمانے میں اپنی بیوی کو طلاق دے دی جبکہ وہ ایامِ حیض میں تھی۔ سیدنا عمر رضی اللہ عنہ نے اس کے بارے میں رسول اللہ صلی اللہ علیہ وسلم سے دریافت کیا تو آپ صلی اللہ علیہ وسلم نے فرمایا: ”اس کو حکم دو کہ اس سے رجوع کرے، پھر اس کو اپنے ہاں رکھے حتیٰ کہ وہ پاک ہو، پھر اسے حیض آئے، پھر پاک ہو، پھر اگر چاہے تو اسے بیوی بنائے رکھے یا چاہے تو طلاق دے دے (مگر) مباشرت سے پہلے، اور یہی وہ عدت ہے جس کے موقع پر اللہ تعالیٰ نے عورتوں کو طلاق دینے کا حکم دیا ہے۔“ [سنن ابي داود/كتاب تفريع أبواب الطلاق /حدیث: 2179]

جناب نافع بیان کرتے ہیں کہ ”سیدنا ابن عمر رضی اللہ عنہ نے اپنی بیوی کو ایک طلاق دے دی جبکہ وہ ایام حیض میں تھی اور (مذکورہ بالا) حدیث مالک کی طرح روایت کی۔“ [سنن ابي داود/كتاب تفريع أبواب الطلاق /حدیث: 2180]

سالم، سیدنا ابن عمر رضی اللہ عنہ سے روایت کرتے ہیں کہ انہوں نے اپنی بیوی کو ایام حیض میں طلاق دے دی تو سیدنا عمر رضی اللہ عنہ نے نبی کریم صلی اللہ علیہ وسلم سے اس کا ذکر کیا۔ آپ صلی اللہ علیہ وسلم نے فرمایا: ”اس کو حکم دو کہ اس سے رجوع کرے، پھر جب پاک ہو تو طلاق دے یا جب وہ حمل سے ہو۔“ [سنن ابي داود/كتاب تفريع أبواب الطلاق /حدیث: 2181]

سالم بن عبداللہ اپنے والد (عبداللہ بن عمر رضی اللہ عنہ) سے روایت کرتے ہیں کہ انہوں نے اپنی بیوی کو طلاق دے دی جبکہ وہ حیض سے تھی۔ سیدنا عمر رضی اللہ عنہ نے اس کا ذکر رسول اللہ صلی اللہ علیہ وسلم سے کیا۔ رسول اللہ صلی اللہ علیہ وسلم ناراض ہوئے پھر فرمایا: ”اسے حکم دو کہ اس سے رجوع کرے، پھر اسے روکے رکھے حتیٰ کہ وہ پاک ہو جائے، پھر اسے حیض آئے اور پاک ہو۔ تب اگر چاہے تو اسے طلاق دے جبکہ وہ پاک ہو، مباشرت سے پہلے۔ یہی وہ عدت کے موقع پر طلاق ہے، جس کا اللہ تعالیٰ نے حکم دیا ہے۔“ [سنن ابي داود/كتاب تفريع أبواب الطلاق /حدیث: 2182]

یونس بن جبیر کہتے ہیں کہ ”میں نے سیدنا ابن عمر رضی اللہ عنہ سے پوچھا تھا کہ آپ نے اپنی بیوی کو کتنی طلاقیں دی تھیں؟“ انہوں نے کہا: ”ایک۔“ [سنن ابي داود/كتاب تفريع أبواب الطلاق /حدیث: 2183]

یونس بن جبیر کہتے ہیں کہ ”میں نے سیدنا ابن عمر رضی اللہ عنہما سے پوچھا کہ ایک آدمی نے اپنی بیوی کو طلاق دے دی جبکہ وہ ایامِ حیض میں تھی۔“ تو انہوں نے کہا: ”تم ابن عمر کو جانتے ہو؟“ میں نے کہا: ”ہاں۔“ انہوں نے کہا کہ ”عبداللہ بن عمر رضی اللہ عنہما نے اپنی بیوی کو اس کے حیض کے دنوں میں طلاق دے دی۔ تو سیدنا عمر رضی اللہ عنہ، نبی کریم صلی اللہ علیہ وسلم کے پاس آئے اور ان سے دریافت کیا، تو آپ صلی اللہ علیہ وسلم نے فرمایا: ”اسے حکم دو کہ اس سے رجوع کرے، پھر عدت کے شروع میں طلاق دے۔““ یونس کہتے ہیں: میں نے کہا: ”کیا یہ طلاق شمار ہو گی؟“ کہا: ”تو اور کیا؟ بھلا اگر وہ عاجز رہے (کہ صحیح حکم نہ معلوم کر سکے) یا احمق پن کا اظہار کرے (غلط طریقے سے طلاق دے دے؟ تو کیا اس کی یہ طلاق لغو جائے گی؟)۔“ [سنن ابي داود/كتاب تفريع أبواب الطلاق /حدیث: 2184]