خالد بن معدان نے بیان کیا کہ جبیر بن نفیر نے کہا: ”آئیے ہم جناب ذی مخبر رضی اللہ عنہ کے پاس چلتے ہیں، وہ نبی کریم صلی اللہ علیہ وسلم کے صحابی تھے۔“ تو ہم ان کے پاس گئے، جبیر نے ان سے صلح کے متعلق پوچھا، تو انہوں نے کہا: ”میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”تم لوگ رومیوں سے ایک پُرامن صلح کرو گے اور پھر تم اور وہ اپنے پیچھے (کسی) ایک دشمن سے قتال کرو گے۔“” [سنن ابي داود/كتاب الجهاد /حدیث: 2767]

سیدنا جابر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”کون ہے جو کعب بن اشرف کی خبر لے؟ بلاشبہ اس نے اللہ اور اس کے رسول کو اذیت دی ہے۔“ پس محمد بن مسلمہ رضی اللہ عنہ کھڑے ہوئے اور کہا: ”اے اللہ کے رسول! میں حاضر ہوں۔ کیا آپ صلی اللہ علیہ وسلم چاہتے ہیں کہ میں اسے قتل کر ڈالوں؟“ آپ صلی اللہ علیہ وسلم نے فرمایا: ”ہاں!“ انہوں نے کہا: ”مجھے اجازت دیجیے کہ میں اس کے سامنے کوئی بات بنا سکوں۔“ آپ صلی اللہ علیہ وسلم نے فرمایا: ”ہاں! تم کہہ سکتے ہو۔“ چنانچہ محمد بن مسلمہ رضی اللہ عنہ اس کے پاس گئے اور کہا: ”اس آدمی نے ہم سے صدقات طلب کیے ہیں اور ہمیں بہت تنگ کر رکھا ہے۔“ اس نے کہا: ”ابھی تم اس شخص سے اور بھی اکتا جاؤ گے۔“ ابن مسلمہ رضی اللہ عنہ نے کہا: ”چونکہ ہم اس کی پیروی اختیار کر چکے ہیں اس لیے فوراً اسے چھوڑ دینا مناسب نہیں ہے، حتیٰ کہ دیکھ لیں کہ اس کا انجام کیا ہوتا ہے۔ ہم چاہتے ہیں کہ تم ہمیں ایک دو وسق (غلہ وغیرہ) دے دو۔“ کعب نے کہا: ”بطور رہن کیا چیز دو گے؟“ انہوں نے کہا: ”تم ہم سے کیا چاہتے ہو؟“ اس نے کہا: ”اپنی عورتیں دے دو۔“ انہوں نے کہا: «سُبْحَانَ اللّٰهِ» ”سبحان اللہ! تم عرب کے حسین ترین شخص ہو، ہم تمہیں اپنی عورتیں بطور رہن دے دیں، تو یہ ہمارے لیے بہت بڑی عار ہوگی۔“ وہ بولا: ”چلو اپنی اولادیں دے دو۔“ انہوں نے کہا: «سُبْحَانَ اللّٰهِ» ”سبحان اللہ! (ساری زندگی) ہمارے بچے کو یہ گالی دی جاتی رہے گی کہ تمہیں تو ایک یا دو وسق کے بدلے میں رہن رکھا گیا تھا۔“ انہوں نے کہا: ”ہاں ہم اپنا اسلحہ بطور رہن دے سکتے ہیں۔“ تو وہ بولا: ”ہاں ٹھیک ہے۔“ چنانچہ وہ لوگ جب اس کے پاس آئے تو ابن مسلمہ رضی اللہ عنہ نے اس کو آواز دی، وہ باہر آیا، اس نے خوشبو لگا رکھی تھی اور اس کا سر خوشبو سے مہک رہا تھا۔ پس جب وہ اس کے پاس بیٹھ گیا اور محمد بن مسلمہ رضی اللہ عنہ اپنے ساتھ تین یا چار ساتھیوں کو بھی لائے تھے، سب نے اس سے خوشبو کا تذکرہ کیا۔ وہ کہنے لگا: ”میرے ہاں فلاں عورت ہے جو بہترین خوشبو والی عورت ہے۔“ ابن مسلمہ رضی اللہ عنہ نے کہا: ”اگر اجازت دو تو میں سونگھ لوں؟“ اس نے کہا: ”ہاں ہاں۔“ پس انہوں نے اپنا ہاتھ اس کے سر میں کیا اور اسے سونگھا۔ انہوں نے کہا: ”ذرا ایک بار پھر۔“ اس نے کہا: ”ہاں ہاں۔“ تو انہوں نے اپنا ہاتھ اس کے سر میں ڈالا اور اس کے بالوں کو خوب جکڑ لیا اور اپنے ساتھیوں سے کہا: ”لو اپنا کام کرو۔“ تو انہوں نے اس کو مارا حتیٰ کہ قتل کر ڈالا۔ [سنن ابي داود/كتاب الجهاد /حدیث: 2768]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”ایمان نے دھوکے سے قتل کرنے کو بند کر دیا ہے، کوئی صاحب ایمان دھوکے سے قتل نہیں کر سکتا۔“ [سنن ابي داود/كتاب الجهاد /حدیث: 2769]

سیدنا عبداللہ بن عمر رضی اللہ عنہما سے مروی ہے کہ رسول اللہ صلی اللہ علیہ وسلم جب کسی غزوے، حج یا عمرے (کے سفر) سے واپس آتے ہوئے زمین کی کسی بھی بلندی پر چڑھتے تو تین بار «اللّٰهُ أَكْبَرُ» کہتے اور یہ دعا پڑھتے: «لَا إِلَهَ إِلَّا اللّٰهُ، وَحْدَهُ لَا شَرِيكَ لَهُ، لَهُ الْمُلْكُ، وَلَهُ الْحَمْدُ، وَهُوَ عَلَىٰ كُلِّ شَيْءٍ قَدِيرٌ، آيِبُونَ، تَائِبُونَ، عَابِدُونَ، سَاجِدُونَ، لِرَبِّنَا حَامِدُونَ، صَدَقَ اللّٰهُ وَعْدَهُ، وَنَصَرَ عَبْدَهُ، وَهَزَمَ الْأَحْزَابَ وَحْدَهُ» ”اللہ کے سوا کوئی معبود نہیں وہ ایک ہے اس کا کوئی شریک نہیں، اسی کی حکومت ہے، تمام طرح کی تعریفیں اسی کی ہیں اور وہ ہر چیز پر کامل قدرت رکھتا ہے۔ ہم لوٹنے والے ہیں، توبہ کرنے والے ہیں، عبادت کرنے والے ہیں، سجدہ کرنے والے ہیں اور اپنے رب کی حمد کرنے والے ہیں، اللہ نے اپنا وعدہ سچ کر دکھایا، اپنے بندے کی نصرت فرمائی اور تمام گروہوں کو اس اکیلے ہی نے پسپا کر دیا۔“ [سنن ابي داود/كتاب الجهاد /حدیث: 2770]

سیدنا ابن عباس رضی اللہ عنہ سے مروی ہے کہ ”سورہ التوبہ کی آیت کریمہ: ﴿لَا يَسْتَأْذِنُكَ الَّذِينَ يُؤْمِنُونَ بِاللَّهِ وَالْيَوْمِ الْآخِرِ﴾ [سورة التوبة: 44] کو سورہ النور کی آیت کریمہ: ﴿إِنَّمَا الْمُؤْمِنُونَ الَّذِينَ آمَنُوا بِاللَّهِ وَرَسُولِهِ وَإِذَا كَانُوا مَعَهُ عَلَىٰ أَمْرٍ جَامِعٍ لَمْ يَذْهَبُوا حَتَّىٰ يَسْتَأْذِنُوهُ﴾ [سورة النور: 62] نے منسوخ کر دیا ہے۔“ [سنن ابي داود/كتاب الجهاد /حدیث: 2771]

سیدنا جریر (جریر بن عبداللہ البجلی رضی اللہ عنہ) سے روایت ہے، وہ کہتے ہیں کہ رسول اللہ صلی اللہ علیہ وسلم نے مجھ سے فرمایا: ”کیا تم مجھے ذی خلصہ سے راحت نہیں پہنچا سکتے؟“ چنانچہ وہ اس کے پاس آئے اور اس کو جلا ڈالا، پھر قبیلہ احمس کا ایک آدمی نبی کریم صلی اللہ علیہ وسلم کی طرف بھیجا، جو آپ کے پاس خوشخبری لے کر گیا۔ اس کی کنیت ابوارطاۃ تھی۔ [سنن ابي داود/كتاب الجهاد /حدیث: 2772]

سیدنا کعب بن مالک رضی اللہ عنہ بیان کرتے ہیں کہ ”نبی کریم صلی اللہ علیہ وسلم جب بھی کسی سفر سے واپس لوٹتے تو سب سے پہلے مسجد میں تشریف لے جاتے، وہاں دو رکعتیں پڑھتے اور پھر لوگوں سے ملنے کے لیے بیٹھ جاتے۔“ (امام ابوداؤد کے شیخ) ابن السرح نے پوری حدیث بیان کی اور کہا: ”رسول اللہ صلی اللہ علیہ وسلم نے مسلمانوں کو منع فرما دیا تھا کہ ہم تینوں سے کوئی بات چیت کرے۔ حتیٰ کہ جب یہ کیفیت بہت طویل ہو گئی تو میں اپنے چچا زاد ابوقتادہ رضی اللہ عنہ کی دیوار پر چڑھا اور میں نے اس کو سلام کہا۔ اللہ کی قسم! اس نے مجھے جواب نہیں دیا۔ پھر جب پچاس راتیں پوری ہو گئیں اور اس صبح فجر کی نماز میں نے اپنے ایک مکان کی چھت پر پڑھی، تو میں نے ایک بلند آواز سے پکارنے والے کی آواز سنی جو کہہ رہا تھا: ”اے کعب بن مالک! خوشخبری ہو۔“ پھر جب وہ میرے پاس پہنچا، جس کی آواز میں نے سنی تھی، تو میں نے اس کے لیے اپنے کپڑے اتارے اور اس کو پہنا دیے۔ پھر میں چلا حتیٰ کہ جب مسجد میں داخل ہوا تو رسول اللہ صلی اللہ علیہ وسلم تشریف فرما تھے۔ طلحہ بن عبیداللہ رضی اللہ عنہ دوڑتے ہوئے میری طرف لپکے، حتیٰ کہ مجھ سے مصافحہ کیا اور مبارک باد پیش کی۔“ [سنن ابي داود/كتاب الجهاد /حدیث: 2773]

سیدنا ابوبکرہ رضی اللہ عنہ بیان کرتے ہیں کہ ”نبی کریم صلی اللہ علیہ وسلم کے پاس جب کوئی خوشی کی خبر آتی یا آپ صلی اللہ علیہ وسلم کو بشارت دی جاتی تو آپ صلی اللہ علیہ وسلم اللہ کا شکر کرتے ہوئے سجدے میں گر جاتے تھے۔“ [سنن ابي داود/كتاب الجهاد /حدیث: 2774]

سیدنا عامر بن سعد اپنے والد (سیدنا سعد بن ابی وقاص رضی اللہ عنہ) سے بیان کرتے ہیں کہ ”ہم رسول اللہ صلی اللہ علیہ وسلم کی معیت میں مکہ سے روانہ ہوئے، ہمارا ارادہ مدینہ جانے کا تھا۔ جب ہم مقامِ عزورا کے قریب پہنچے تو آپ صلی اللہ علیہ وسلم اپنی سواری سے اتر پڑے۔ پھر اپنے دونوں ہاتھ اٹھائے اور ایک گھڑی اللہ سے دعا کرتے رہے۔ پھر سجدے میں گر گئے اور دیر تک سجدے میں پڑے رہے۔ پھر اٹھے، اپنے دونوں ہاتھ اٹھائے اور ایک گھڑی اللہ سے دعا کرتے رہے، پھر سجدے میں گر گئے اور بڑی دیر تک سجدے میں پڑے رہے، پھر اٹھے اور اپنے دونوں ہاتھ بلند کیے اور ایک گھڑی تک بلند کیے رکھے، پھر سجدے میں گر گئے۔“ احمد بن صالح نے یہ عمل تین بار کا بیان کیا، فرمایا: ”میں نے اپنے رب سے سوال کیا ہے اور اپنی امت کے لیے شفاعت کی ہے۔ پس اللہ نے مجھے میری امت کا تہائی حصہ دے دیا (اسے بخش دوں گا)، تو میں اپنے رب کا شکر کرتے ہوئے سجدے میں گر گیا۔ پھر میں نے اپنا سر اٹھایا، اپنے رب سے اپنی امت کے لیے دعا کی تو اس نے مجھے میری امت کا (مزید) تہائی حصہ عنایت فرما دیا تو میں اپنے رب کا شکر کرتے ہوئے سجدے میں گر گیا۔ پھر میں نے سر اٹھایا، اپنے رب سے اپنی امت کے لیے سوال کیا تو اس نے مجھے میری امت کا مزید تہائی حصہ بھی دے دیا تو میں اپنے رب کے لیے سجدے میں گر گیا۔“ امام ابوداؤد رحمہ اللہ فرماتے ہیں: ”میرے شیخ احمد بن صالح نے جب یہ سند بیان کی تو اس میں سے اشعث بن اسحاق کا انہوں نے ذکر نہیں کیا۔ اس کا ذکر موسیٰ بن سہل رملی نے کیا ہے۔“ [سنن ابي داود/كتاب الجهاد /حدیث: 2775]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم اس بات کو ناپسند فرماتے تھے کہ ”انسان رات کے وقت اپنے گھر پہنچے۔“ [سنن ابي داود/كتاب الجهاد /حدیث: 2776]