ام المؤمنین سیدہ عائشہ رضی اللہ عنہا سے روایت ہے، وہ کہتی ہیں کہ ”قسم اللہ کی! رسول اللہ صلی اللہ علیہ وسلم نے بیضاء کے بیٹے سہیل کی نماز جنازہ مسجد ہی میں پڑھی تھی۔“ [سنن ابي داود/كتاب الجنائز /حدیث: 3189]

ام المؤمنین سیدہ عائشہ رضی اللہ عنہا فرماتی ہیں: ”اللہ کی قسم! رسول اللہ صلی اللہ علیہ وسلم نے بیضاء کے دو بیٹوں سہیل اور اس کے بھائی کی نماز جنازہ مسجد میں ادا فرمائی تھی۔“ [سنن ابي داود/كتاب الجنائز /حدیث: 3190]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”جس نے کسی میت کا جنازہ مسجد میں ادا کیا تو اس پر کوئی گناہ نہیں۔“ [سنن ابي داود/كتاب الجنائز /حدیث: 3191]

سیدنا عقبہ بن عامر رضی اللہ عنہ سے روایت ہے کہ تین اوقات کے متعلق رسول اللہ صلی اللہ علیہ وسلم ہمیں منع فرمایا کرتے تھے کہ ہم ان میں نماز پڑھیں یا اپنی میتوں کو دفن کریں: ”جب سورج نکل رہا ہو حتیٰ کہ بلند ہو جائے، عین دوپہر (زوال) کے وقت حتیٰ کہ ڈھل جائے اور جب غروب ہونے کے قریب ہو حتیٰ کہ غروب ہو جائے۔“ راوی کہتا ہے کہ نبی کریم صلی اللہ علیہ وسلم کے الفاظ اسی کے قریب تھے۔ [سنن ابي داود/كتاب الجنائز /حدیث: 3192]

سیدنا عمار مولیٰ حارث بن نوفل بیان کرتے ہیں کہ وہ ام کلثوم (دختر علی بن ابی طالب رضی اللہ عنہ، زوجہ محترمہ سیدنا عمر بن خطاب رضی اللہ عنہ) اور ان کے صاحبزادے (زید اکبر) کے جنازے میں حاضر تھے۔ پس (امیرِ مدینہ نے) بچے کو امام کی طرف رکھا تو میں نے اس کا انکار کیا، جماعت میں سیدنا ابن عباس، ابو سعید خدری، ابو قتادہ اور ابوہریرہ رضی اللہ عنہم موجود تھے، تو انہوں نے کہا: ”یہی سنت ہے۔“ [سنن ابي داود/كتاب الجنائز /حدیث: 3193]

سیدنا نافع ابو غالب رضی اللہ عنہ کا بیان ہے کہ میں (بصرہ میں) مربد محلہ کی ایک گلی میں تھا کہ ایک جنازہ گزرا، اس کے ساتھ بہت سے لوگ تھے۔ لوگوں نے کہا: ”یہ عبداللہ بن عمیر کا جنازہ ہے“ تو میں بھی اس کے ساتھ ہو لیا۔ میں نے ایک آدمی دیکھا جو ایک باریک سی اونی چادر اوڑھے ہوئے اپنے چھوٹے سے گھوڑے پر سوار تھا، دھوپ سے بچاؤ کے لیے اس نے اپنے سر پر کپڑا رکھا ہوا تھا۔ میں نے پوچھا: ”یہ محترم بزرگ کون ہیں؟“ لوگوں نے کہا: ”یہ (صحابیِ رسول) سیدنا انس بن مالک رضی اللہ عنہ ہیں۔“ چنانچہ جب میت کو رکھا گیا تو سیدنا انس رضی اللہ عنہ کھڑے ہوئے اور اس کا جنازہ پڑھایا، میں ان کے پیچھے تھا میرے اور ان کے درمیان کوئی چیز حائل نہ تھی۔ آپ اس میت کے سر کے مقابل کھڑے ہوئے اور چار تکبیریں کہیں۔ آپ نے نماز میں طوالت کی، نہ جلدی۔ پھر بیٹھنے لگے تو لوگوں نے کہا: ”اے ابوحمزہ! (سیدنا انس رضی اللہ عنہ کی کنیت ہے) یہ ایک انصاری خاتون (کا جنازہ) ہے“ اور وہ اسے قریب لائے اور میت کے اوپر سبز رنگ کا پردہ تھا۔ (تابوت یعنی رکاوٹ جو عورت کی نعش پر رکھی جاتی ہے) تو آپ اس کی کمر کے مقابل کھڑے ہوئے اور جنازہ پڑھایا جیسے کہ مرد کا پڑھایا تھا پھر آپ بیٹھ گئے۔ تو علاء بن زیاد نے پوچھا: ”اے ابوحمزہ! کیا رسول اللہ صلی اللہ علیہ وسلم بھی ایسے ہی جنازہ پڑھایا کرتے تھے جیسے کہ آپ نے پڑھایا ہے کہ چار تکبیریں کہتے اور مرد کے لیے اس کے سر کے سامنے اور عورت کے لیے اس کی کمر کے مقابل کھڑے ہوا کرتے تھے؟“ انہوں نے کہا: ”ہاں۔“ پھر اس نے پوچھا: ”اے ابوحمزہ! کیا آپ رسول اللہ صلی اللہ علیہ وسلم کے ساتھ جہاد میں بھی شریک رہے ہیں؟“ انہوں نے کہا: ”ہاں۔ میں آپ صلی اللہ علیہ وسلم کے ساتھ غزوہ حنین میں شریک تھا کہ مشرکین نکلے اور ہم پر حملہ کر دیا حتیٰ کہ ہم نے اپنے گھوڑوں کو اپنی پیٹھوں کے پیچھے دیکھا (ہم پسپا ہو گئے) اور ان مشرکین میں ایک آدمی تھا جو ہمیں کچلے جا رہا تھا اور اس نے ہمیں توڑ کے رکھ دیا تھا۔ بالآخر اللہ تعالیٰ نے انہیں پسپا کر دیا اور پھر ان لوگوں کو لایا گیا اور وہ اسلام پر بیعت کرنے لگے۔ اور نبی کریم صلی اللہ علیہ وسلم کے صحابہ میں سے ایک آدمی نے کہا تھا: ”مجھ پر یہ نذر ہے کہ اگر اللہ اس آدمی کو لے آیا جو آج ہمیں کچلتا رہا ہے تو میں بالضرور اس کی گردن اڑاؤں گا۔“ رسول اللہ صلی اللہ علیہ وسلم (یہ سن کر) خاموش رہے اور اس آدمی کو لایا گیا۔ جب اس نے رسول اللہ صلی اللہ علیہ وسلم کو دیکھا تو کہنے لگا: ”اے اللہ کے رسول! میں اللہ کی طرف توبہ کرتا ہوں۔“ اور پھر آپ صلی اللہ علیہ وسلم رکے رہے اور اس سے بیعت نہیں لی تاکہ وہ صحابی اپنی نذر پوری کر لے۔ راوی کہتا ہے: اور وہ صحابی بھی رسول اللہ صلی اللہ علیہ وسلم کے سامنے آتا رہا تاکہ آپ صلی اللہ علیہ وسلم اسے اس شخص کو قتل کر دینے کا حکم ارشاد فرمائیں جبکہ وہ اپنے طور پر اس کو قتل کر دینے میں رسول اللہ صلی اللہ علیہ وسلم سے ہیبت محسوس کر رہا تھا۔ پس جب آپ صلی اللہ علیہ وسلم نے دیکھا کہ وہ صحابی کچھ نہیں کر رہا ہے تو آپ صلی اللہ علیہ وسلم نے اس سے بیعت لے لی۔ پھر اس صحابی نے کہا: ”اے اللہ کے رسول! میری نذر (کا کیا ہو گا؟)“ آپ صلی اللہ علیہ وسلم نے فرمایا: ”میں تو اسی لیے رکا رہا کہ تو اپنی نذر پوری کر لے۔“ اس نے کہا: ”اے اللہ کے رسول! آپ نے مجھے آنکھ سے اشارہ کیوں نہ کر دیا؟“ نبی کریم صلی اللہ علیہ وسلم نے فرمایا: ”کسی نبی کو لائق نہیں کہ آنکھ سے اشارہ کرے۔“ ابو غالب کہتے ہیں: میں نے سیدنا انس رضی اللہ عنہ کے اس عمل کے متعلق دریافت کیا جو وہ عورت کی کمر کے مقابل کھڑے ہوئے تھے۔ تو لوگوں نے کہا کہ (پہلے) یہ اس لیے ہوتا تھا کہ میت پر تابوت نہیں رکھا جاتا تھا تو امام عورت کی کمر کے مقابل کھڑا ہو جاتا تھا تاکہ اس کے لیے قوم سے پردہ بن جائے۔ امام ابوداؤد رحمہ اللہ فرماتے ہیں: نبی کریم صلی اللہ علیہ وسلم کا یہ فرمان کہ ”مجھے لوگوں کے ساتھ قتال کرنے کا حکم دیا گیا ہے حتیٰ کہ وہ «لَا إِلٰهَ إِلَّا اللّٰهُ» ”اللہ کے سوا کوئی معبودِ برحق نہیں“ کہہ دیں۔“ اس حدیث کی روشنی میں منسوخ ہے جس میں کہ قتل کی نذر پوری کر دینے کا بیان آیا ہے، حالانکہ اس شخص نے کہہ دیا تھا کہ ”میں توبہ کرتا ہوں۔“ [سنن ابي داود/كتاب الجنائز /حدیث: 3194]

سیدنا سمرہ بن جندب رضی اللہ عنہ سے روایت ہے، وہ کہتے ہیں کہ ”میں نے نبی کریم صلی اللہ علیہ وسلم کی اقتدا میں ایک عورت کا جنازہ پڑھا جو کہ ایامِ نفاس میں فوت ہوئی تھی، تو آپ صلی اللہ علیہ وسلم اس کے درمیان کے مقابل کھڑے ہوئے تھے۔“ [سنن ابي داود/كتاب الجنائز /حدیث: 3195]

جناب شعبی رحمہ اللہ سے مروی ہے کہ ”رسول اللہ صلی اللہ علیہ وسلم ایک تازہ بنی ہوئی قبر کے پاس سے گزرے، تو صحابہ نے اس پر صف بنائی (جنازہ پڑھا گیا) اور آپ صلی اللہ علیہ وسلم نے اس پر چار تکبیریں کہیں۔“ ابواسحاق رحمہ اللہ کہتے ہیں: ”میں نے شعبی رحمہ اللہ سے پوچھا کہ آپ کو یہ کس نے بیان کیا ہے؟“ تو انہوں نے کہا: ”ایک ثقہ (قابل اعتماد) شخصیت نے جو اس جنازے میں حاضر تھی یعنی سیدنا عبداللہ بن عباس رضی اللہ عنہ۔“ [سنن ابي داود/كتاب الجنائز /حدیث: 3196]

عبدالرحمٰن بن ابی لیلیٰ کہتے ہیں کہ ”سیدنا زید بن ارقم رضی اللہ عنہ ہمارے جنازوں پر چار تکبیریں کہا کرتے تھے، ایک جنازے پر آپ نے پانچ تکبیریں کہیں تو میں نے ان سے پوچھا تو انہوں نے بتایا کہ رسول اللہ صلی اللہ علیہ وسلم یہ (پانچ تکبیریں بھی) کہا کرتے تھے“۔ امام ابوداؤد رحمہ اللہ فرماتے ہیں کہ ”مجھے محمد بن مثنی کی حدیث خوب یاد ہے“۔ [سنن ابي داود/كتاب الجنائز /حدیث: 3197]

سیدنا طلحہ بن عبداللہ بن عوف رحمہ اللہ بیان کرتے ہیں کہ میں نے سیدنا ابن عباس رضی اللہ عنہ کے ساتھ ایک جنازہ پڑھا تو انہوں نے سورۃ فاتحہ کی قرأت کی اور کہا: ”یہ سنت ہے۔“ [سنن ابي داود/كتاب الجنائز /حدیث: 3198]