حصین بن وحوح رضی اللہ عنہ سے روایت ہے کہ سیدنا طلحہ بن براء رضی اللہ عنہ بیمار ہو گئے تو نبی کریم صلی اللہ علیہ وسلم ان کی عیادت کے لیے تشریف لائے اور فرمایا: ”میرا خیال ہے کہ طلحہ کی موت آ گئی ہے۔ (جب ان کی وفات ہو جائے) تو مجھے اطلاع دینا اور جلدی کرنا، مناسب نہیں کہ مسلمان کی میت اس کے گھر والوں کے پاس پڑی رہے۔“ [سنن ابي داود/كتاب الجنائز /حدیث: 3159]

ام المؤمنین سیدہ عائشہ رضی اللہ عنہا نے بیان کیا کہ ”نبی کریم صلی اللہ علیہ وسلم چار باتوں سے غسل کیا کرتے تھے: جنابت سے، جمعہ کے روز، سینگی لگوا کر اور میت کو غسل دے کر۔“ [سنن ابي داود/كتاب الجنائز /حدیث: 3160]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی میت کو نہلائے وہ غسل کرے اور جو اسے اٹھائے وہ وضو کرے۔“ [سنن ابي داود/كتاب الجنائز /حدیث: 3161]

اسحاق مولیٰ زائدہ نے سیدنا ابوہریرہ رضی اللہ عنہ سے، انہوں نے نبی کریم صلی اللہ علیہ وسلم سے اس کے ہم معنی روایت کیا۔ امام ابوداؤد رحمہ اللہ فرماتے ہیں: ”یہ حکم منسوخ ہے، میں نے امام احمد بن حنبل رحمہ اللہ سے سنا، ان سے سوال کیا گیا کہ میت کو نہلانے سے غسل کرنا کیسے ہے؟ انہوں نے کہا: ”اس کے لیے وضو کافی ہے۔““ امام ابوداؤد رحمہ اللہ فرماتے ہیں: ”ابوصالح نے اس حدیث کی سند میں اپنے اور سیدنا ابوہریرہ رضی اللہ عنہ کے درمیان ”اسحاق مولیٰ زائدہ“ کو بڑھا دیا ہے۔“ اور مذکورہ بالا حدیث مصعب بن شیبہ (حدیث 3160) ضعیف ہے، اس میں کئی باتیں ہیں جن پر عمل نہیں۔ [سنن ابي داود/كتاب الجنائز /حدیث: 3162]

ام المؤمنین سیدہ عائشہ رضی اللہ عنہا بیان کرتی ہیں کہ ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم نے سیدنا عثمان بن مظعون رضی اللہ عنہ کو بوسہ دیا جبکہ وہ فوت ہو گئے تھے، میں نے دیکھا کہ آپ صلی اللہ علیہ وسلم کے آنسو بہہ رہے تھے۔“ [سنن ابي داود/كتاب الجنائز /حدیث: 3163]

سیدنا جابر بن عبداللہ رضی اللہ عنہ بیان کرتے ہیں کہ (ایک بار) لوگوں نے قبرستان میں روشنی دیکھی، وہاں گئے تو دیکھا کہ رسول اللہ صلی اللہ علیہ وسلم قبر میں اترے ہوئے ہیں اور فرما رہے ہیں: ”اپنا صاحب مجھے پکڑاؤ۔“ پھر معلوم ہوا کہ یہ وہ آدمی تھا جو اللہ کے ذکر (تلاوت قرآن) کے ساتھ اپنی آواز بلند کیا کرتا تھا۔ [سنن ابي داود/كتاب الجنائز /حدیث: 3164]

سیدنا جابر بن عبداللہ رضی اللہ عنہ سے روایت ہے کہ ہم شہدائے احد کو دفن کرنے کے لیے اٹھا لائے تو رسول اللہ صلی اللہ علیہ وسلم کا منادی آیا اور کہا: ”بے شک رسول اللہ صلی اللہ علیہ وسلم تمہیں حکم دیتے ہیں کہ ان مقتولوں کو ان کے مقامات شہادت ہی پر دفن کرو۔“ چنانچہ ہم نے انہیں وہیں لوٹا دیا۔ [سنن ابي داود/كتاب الجنائز /حدیث: 3165]

سیدنا مالک بن ہبیرہ رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”جو کوئی مسلمان فوت ہو جائے اور پھر اس پر مسلمانوں کی تین صفیں جنازہ پڑھیں تو اللہ اس کے لیے (جنت) لازم کر دیتا ہے۔“ بیان کیا کہ سیدنا مالک رضی اللہ عنہ جب کسی جنازہ میں لوگوں کی تعداد کم پاتے تو انہیں تین صفوں میں تقسیم کر دیا کرتے تھے۔ [سنن ابي داود/كتاب الجنائز /حدیث: 3166]

سیدہ ام عطیہ رضی اللہ عنہا بیان کرتی ہیں کہ ”ہم عورتوں کو جنازے کے ساتھ جانے سے منع کیا گیا ہے، مگر ہم پر سختی نہیں کی گئی۔“ [سنن ابي داود/كتاب الجنائز /حدیث: 3167]

سیدنا ابوہریرہ رضی اللہ عنہ روایت کرتے ہیں کہ ”جو شخص جنازے کے ساتھ گیا اور پھر اس پر نماز پڑھی تو اس کے لیے ایک قیراط اجر ہے، اور جو اس کے ساتھ گیا حتیٰ کہ (دفن سے) فراغت ہو گئی تو اس کے لیے دو قیراط ہیں۔ ان دونوں قیراطوں میں سے چھوٹا احد پہاڑ کے برابر ہو گا یا فرمایا کہ ان میں ایک قیراط احد پہاڑ جتنا ہو گا۔“ [سنن ابي داود/كتاب الجنائز /حدیث: 3168]