جناب داود بن عامر بن سعد بن ابی وقاص رحمہ اللہ اپنے والد (عامر رحمہ اللہ) سے بیان کرتے ہیں کہ وہ سیدنا عبداللہ بن عمر بن خطاب رضی اللہ عنہ کے پاس تھے کہ جناب خباب صاحبِ مقصورہ تشریف لائے اور کہا: ”اے عبداللہ بن عمر! کیا آپ نے سنا کہ سیدنا ابوہریرہ رضی اللہ عنہ کیا کہتے ہیں؟ ان کا کہنا ہے کہ میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”جو شخص جنازے والے گھر سے اس کے ساتھ نکلا اور اس پر نماز پڑھی۔“”اور مذکورہ بالا حدیث کے ہم معنی بیان کیا۔ ابن عمر رضی اللہ عنہ نے یہ حدیث سیدہ عائشہ رضی اللہ عنہا سے پچھوائی تو انہوں نے فرمایا: ”ابوہریرہ نے سچ کہا ہے۔“ [سنن ابي داود/كتاب الجنائز /حدیث: 3169]

سیدنا ابن عباس رضی اللہ عنہ بیان کرتے ہیں کہ میں نے نبی کریم صلی اللہ علیہ وسلم کو فرماتے سنا: ”جو کوئی مسلمان فوت ہو جائے اور پھر اس پر چالیس آدمی کھڑے ہو کر جنازہ پڑھیں، جو اللہ کے ساتھ کسی کو شریک نہ ٹھہراتے ہوں، تو اس میت کے بارے میں ان کی سفارش قبول کر لی جاتی ہے۔“ [سنن ابي داود/كتاب الجنائز /حدیث: 3170]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”جنازے کے ساتھ کوئی آواز یا آگ نہ جائے۔“ امام ابوداؤد رحمہ اللہ نے فرمایا (راوی حدیث) ہارون نے یہ اضافہ بیان کیا ہے: ”آگ اس کے آگے آگے نہ لے جائی جائے۔“ [سنن ابي داود/كتاب الجنائز /حدیث: 3171]

سیدنا عامر بن ربیعہ رضی اللہ عنہ سے روایت ہے کہ انہیں نبی کریم صلی اللہ علیہ وسلم سے یہ حدیث پہنچی، ”جب تم جنازہ دیکھو تو اس کے لیے کھڑے ہو جاؤ حتیٰ کہ آگے گزر جائے یا اسے نیچے رکھ دیا جائے۔“ [سنن ابي داود/كتاب الجنائز /حدیث: 3172]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب تم جنازے کے ساتھ جاؤ تو جب تک اسے نیچے نہ رکھ دیا جائے، مت بیٹھو۔“ امام ابوداؤد رحمہ اللہ فرماتے ہیں: ”اس حدیث کو (سفیان) ثوری نے بواسطہ سہیل، اس کے والد سے اور اس نے سیدنا ابوہریرہ رضی اللہ عنہ سے روایت کیا ہے اور اس میں کہا: ”حتیٰ کہ اسے زمین پر رکھ دیا جائے۔“ جبکہ ابومعاویہ نے سہیل سے روایت کرتے ہوئے کہا: ”حتیٰ کہ اسے لحد میں رکھ دیا جائے۔“”امام ابوداؤد رحمہ اللہ فرماتے ہیں: ”سفیان (ثوری) ابومعاویہ کی نسبت زیادہ حافظ تھے۔“ [سنن ابي داود/كتاب الجنائز /حدیث: 3173]

سیدنا جابر رضی اللہ عنہ بیان کرتے ہیں کہ ”ہم نبی کریم صلی اللہ علیہ وسلم کے ساتھ تھے کہ ہمارے پاس سے ایک جنازہ گزرا، آپ صلی اللہ علیہ وسلم اس کے لیے کھڑے ہو گئے۔ جب ہم نے اس کو کندھا دینا چاہا تو معلوم ہوا کہ یہ یہودی کا جنازہ ہے۔ ہم نے عرض کیا: ”اے اللہ کے رسول! یہ یہودی کا جنازہ ہے۔“ آپ صلی اللہ علیہ وسلم نے فرمایا: ”بلاشبہ موت ایک المناک حادثہ ہے، جب تم کوئی جنازہ دیکھو تو اس کے لیے کھڑے ہو جایا کرو۔““ [سنن ابي داود/كتاب الجنائز /حدیث: 3174]

سیدنا علی بن ابی طالب رضی اللہ عنہ سے مروی ہے کہ ”نبی کریم صلی اللہ علیہ وسلم جنازوں کو دیکھ کر کھڑے ہو جایا کرتے تھے، مگر بعد میں بیٹھنے لگ گئے تھے۔“ [سنن ابي داود/كتاب الجنائز /حدیث: 3175]

سیدنا عبادہ بن صامت رضی اللہ عنہ سے روایت ہے کہ رسول اللہ صلی اللہ علیہ وسلم جنازے کے لیے کھڑے رہتے تھے حتیٰ کہ اسے لحد میں اتار دیا جاتا، ایک یہودی عالم کا آپ صلی اللہ علیہ وسلم کے پاس سے گزر ہوا تو اس نے کہا: ”ہم بھی ایسے ہی کرتے ہیں۔“ تو نبی کریم صلی اللہ علیہ وسلم بیٹھ گئے اور فرمایا: ”بیٹھ جاؤ، ان کی مخالفت کرو۔“ [سنن ابي داود/كتاب الجنائز /حدیث: 3176]

سیدنا ثوبان رضی اللہ عنہ سے مروی ہے کہ رسول اللہ صلی اللہ علیہ وسلم ایک جنازے کے ساتھ تھے، تو آپ صلی اللہ علیہ وسلم کو سواری پیش کی گئی مگر آپ صلی اللہ علیہ وسلم نے سوار ہونے سے انکار کر دیا، پھر جب واپس ہوئے اور سواری پیش کی گئی تو آپ صلی اللہ علیہ وسلم سوار ہو گئے۔ اس بارے میں آپ صلی اللہ علیہ وسلم سے پوچھا گیا تو فرمایا: ”تحقیق فرشتے چل رہے تھے تو مجھے لائق نہ تھا کہ وہ چل رہے ہوں اور میں سوار ہو جاؤں، جب وہ چلے گئے تو میں سوار ہو گیا۔“ [سنن ابي داود/كتاب الجنائز /حدیث: 3177]

سیدنا جابر بن سمرہ رضی اللہ عنہ بیان کرتے ہیں کہ ”نبی کریم صلی اللہ علیہ وسلم نے سیدنا ابن دحداح رضی اللہ عنہ کا جنازہ پڑھایا اور ہم اس میں موجود تھے، پھر ایک گھوڑا لا کر باندھ دیا گیا حتیٰ کہ آپ صلی اللہ علیہ وسلم اس پر سوار ہو گئے، پھر وہ آپ صلی اللہ علیہ وسلم کے ساتھ درمیانی رفتار سے تیز تیز چلنے لگا اور ہم بھی آپ صلی اللہ علیہ وسلم کے ساتھ اردگرد میں تیز تیز چلنے لگے۔“ [سنن ابي داود/كتاب الجنائز /حدیث: 3178]