سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے قسم کھائی اور «إِنْ شَاءَ اللّٰهُ» ”اگر اللہ نے چاہا“ کہا، تو چاہے وہ اپنی قسم کو پورا کرے یا نہ کرے، قسم نہیں ٹوٹے گی۔“ [سنن ابي داود/كتاب الأيمان والنذور /حدیث: 3262]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم کی اکثر قسمیں اس طرح کی ہوتی تھیں: «لَا، وَمُقَلِّبِ الْقُلُوبِ» ”نہیں، قسم ہے اس ذات کی جو دلوں کا پھیرنے والا ہے۔“ [سنن ابي داود/كتاب الأيمان والنذور /حدیث: 3263]

سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم جب بہت تاکیدی قسم کھاتے تو یوں کہا کرتے تھے: «وَالَّذِي نَفْسُ أَبِي الْقَاسِمِ بِيَدِهِ» ”قسم ہے اس ذات کی جس کے ہاتھ میں ابوالقاسم کی جان ہے!“ [سنن ابي داود/كتاب الأيمان والنذور /حدیث: 3264]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم جب قسم کھاتے تو یوں کہا کرتے: «لَا، وَأَسْتَغْفِرُ اللّٰهَ» ”نہیں! اور میں اللہ سے بخشش چاہتا ہوں۔“ [سنن ابي داود/كتاب الأيمان والنذور /حدیث: 3265]

عاصم بن لقیط کہتے ہیں کہ سیدنا لقیط بن عامر رضی اللہ عنہ ایک وفد لے کر نبی کریم صلی اللہ علیہ وسلم کے پاس آئے۔ لقیط کہتے ہیں کہ ہم رسول اللہ صلی اللہ علیہ وسلم کی خدمت میں حاضر ہوئے اور اس سلسلے میں حدیث ذکر کی تو نبی کریم صلی اللہ علیہ وسلم نے فرمایا: ” «لَعَمْرُ إِلٰهِكَ» ”تیرے الہ کی بقا کی قسم۔“” [سنن ابي داود/كتاب الأيمان والنذور /حدیث: 3266]

سیدنا ابن عباس رضی اللہ عنہ سے روایت ہے کہ سیدنا ابوبکر رضی اللہ عنہ نے نبی کریم صلی اللہ علیہ وسلم کو قسم دی تو نبی کریم صلی اللہ علیہ وسلم نے فرمایا: ”قسم مت دو۔“ [سنن ابي داود/كتاب الأيمان والنذور /حدیث: 3267]

جناب ابن عباس رضی اللہ عنہ سے مروی ہے کہ سیدنا ابوہریرہ رضی اللہ عنہ بیان کرتے تھے کہ ایک شخص رسول اللہ صلی اللہ علیہ وسلم کی خدمت میں آیا اور کہا: ”بے شک میں نے آج رات خواب دیکھا ہے،“ اور پھر اس نے اپنا خواب بیان کیا۔ اور پھر سیدنا ابوبکر رضی اللہ عنہ نے اس کی تعبیر کی تو نبی کریم صلی اللہ علیہ وسلم نے فرمایا: ”تم نے کچھ میں درست کہا ہے اور کچھ میں خطا کی ہے۔“ تو انہوں نے کہا: ”اے اللہ کے رسول! میں آپ کو قسم دیتا ہوں، میرا باپ آپ پر فدا ہو! آپ مجھے ضرور بتائیے کہ میں نے کیا غلطی کی ہے؟“ تو نبی کریم صلی اللہ علیہ وسلم نے ان سے فرمایا: ”قسم مت دو۔“ [سنن ابي داود/كتاب الأيمان والنذور /حدیث: 3268]

سیدنا ابن عباس رضی اللہ عنہ نے نبی کریم صلی اللہ علیہ وسلم سے یہ حدیث بیان کی، مگر اس میں قسم کا ذکر نہیں ہے اور اس میں مزید یہ ہے کہ نبی کریم صلی اللہ علیہ وسلم نے ”انہیں وضاحت نہیں کی“۔ [سنن ابي داود/كتاب الأيمان والنذور /حدیث: 3269]

سیدنا عبدالرحمن بن ابی بکر رضی اللہ عنہ بیان کرتے ہیں کہ ہمارے ہاں کچھ مہمان آ گئے، جبکہ سیدنا ابوبکر رضی اللہ عنہ رات کو رسول اللہ صلی اللہ علیہ وسلم کے ساتھ گفتگو میں مشغول ہو جایا کرتے تھے، تو انہوں نے کہا: ”میرے آنے تک تم ان کی ضیافت اور خدمت سے فارغ ہو جانا۔“ چنانچہ میں ان کے پاس ان کی ضیافت لے کر آیا تو انہوں نے کہا: ”ہم نہیں کھائیں گے حتیٰ کہ ابوبکر رضی اللہ عنہ آ جائیں۔“ چنانچہ وہ (دیر سے) آئے اور پوچھا: ”تمہارے مہمانوں کا کیا ہوا، کیا تم ان کی مہمانداری سے فارغ ہو چکے ہو؟“ گھر والوں نے کہا: ”نہیں۔“ میں نے عرض کیا کہ میں ان کے پاس ان کی ضیافت لے گیا تھا مگر انہوں نے انکار کر دیا اور کہا: ”اللہ کی قسم! ہم نہیں کھائیں گے حتیٰ کہ ابوبکر رضی اللہ عنہ آ جائیں۔“ ان مہمانوں نے بھی تصدیق کی کہ یہ ہمارے پاس ضیافت لایا تھا مگر ہم نے انکار کر دیا حتیٰ کہ آپ آ جائیں۔ ابوبکر رضی اللہ عنہ نے پوچھا: ”تمہیں (میرے بغیر) کھانے سے کیا مانع رہا؟“ انہوں نے کہا: ”آپ کے باعث (آپ کی عدم موجودگی)۔“ تو ابوبکر رضی اللہ عنہ نے کہا: ”قسم اللہ کی! میں آج رات یہ نہیں کھاؤں گا۔“ تو انہوں نے کہا: ”اور ہم بھی اللہ کی قسم! نہیں کھائیں گے حتیٰ کہ آپ کھائیں گے۔“ ابوبکر رضی اللہ عنہ نے کہا: ”آج جیسی بری رات میں نے نہیں دیکھی۔“ اور فرمایا: ”کھانا لاؤ۔“ چنانچہ ان کا کھانا پیش کیا گیا تو کہا: «بِسْمِ اللّٰهِ» ”اللہ کے نام سے۔“ اور کھانے لگے اور مہمانوں نے بھی کھایا۔ (عبدالرحمن کہتے ہیں) مجھے بتایا گیا کہ صبح کے وقت وہ (ابوبکر رضی اللہ عنہ) نبی کریم صلی اللہ علیہ وسلم کی خدمت میں حاضر ہوئے اور وہ سب آپ صلی اللہ علیہ وسلم کے گوش گزار کیا جو کچھ انہوں (ابوبکر رضی اللہ عنہ) نے کیا اور مہمانوں نے کیا۔ تو نبی کریم صلی اللہ علیہ وسلم نے فرمایا: ”تم ان سے بڑھ کر صالح ہو اور سچے بھی (کہ مہمانوں کے اکرام میں ان کی قسم کے مطابق کھانا کھا لیا)۔“ [سنن ابي داود/كتاب الأيمان والنذور /حدیث: 3270]

ابوعثمان نے سیدنا عبدالرحمن بن ابی بکر رضی اللہ عنہ سے یہ حدیث مذکورہ بالا حدیث کی مانند روایت کی اور ابن مثنی نے سالم کی اس حدیث میں مزید کہا: ”مجھے یہ بات نہیں پہنچی کہ (سیدنا ابوبکر رضی اللہ عنہ نے) کفارہ بھی دیا۔“ [سنن ابي داود/كتاب الأيمان والنذور /حدیث: 3271]