سیدنا طلحہ بن عبیداللہ رضی اللہ عنہ نے بدوی کے واقعہ والی حدیث میں بیان کیا کہ نبی کریم صلی اللہ علیہ وسلم نے فرمایا ”کامیاب ہوا، قسم اس کے باپ کی! اگر سچا (ثابت قدم) رہا۔ جنت میں داخل ہوا، قسم اس کے باپ کی! اگر یہ سچا (ثابت قدم) رہا۔“ [سنن ابي داود/كتاب الأيمان والنذور /حدیث: 3252]

جناب (سلیمان بن بریدہ) ابن بریدہ اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جس نے امانت کی قسم کھائی، وہ ہم میں سے نہیں ہے۔“ [سنن ابي داود/كتاب الأيمان والنذور /حدیث: 3253]

جناب عطاء رضی اللہ عنہ سے لغو قسم کے بارے میں مروی ہے، انہوں نے کہا، سیدہ عائشہ رضی اللہ عنہا نے بیان کیا کہ رسول اللہ صلی اللہ علیہ وسلم نے فرمایا: ”اس سے مراد وہ قسم ہے جو آدمی اپنے گھر میں «كَلَّا وَاللَّهِ وَبَلَى وَاللَّهِ» ”نہیں، اللہ کی قسم! اور ہاں، اللہ کی قسم!“ وغیرہ بولتا رہتا ہے۔“ (اس کا تکیہ کلام ہوتا ہے اور قسم کا قصد نہیں ہوتا۔) امام ابوداؤد رحمہ اللہ فرماتے ہیں کہ ”ابراہیم صائغ ایک صالح آدمی تھے۔ ان کو ابومسلم نے مقام عرندس میں قتل کر دیا تھا۔ اور ان کا یہ معمول تھا کہ اگر ہتھوڑا اٹھایا ہوا ہوتا اور اذان سن لیتے تو وہیں چھوڑ دیتے تھے۔“ امام ابوداؤد رحمہ اللہ نے کہا: ”اس حدیث کو داود بن ابی فرات نے بواسطہ ابراہیم صائغ، سیدہ عائشہ رضی اللہ عنہا پر موقوف روایت کیا ہے اور ایسے ہی زہری، عبدالملک بن ابی سلیمان اور مالک بن مغول نے بواسطہ عطاء، سیدہ عائشہ رضی اللہ عنہا سے موقوف روایت کیا ہے۔“ [سنن ابي داود/كتاب الأيمان والنذور /حدیث: 3254]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تیری قسم اسی بات پر ہے جس پر تیرا ساتھی تجھ سے تصدیق کرا رہا ہے۔“ جناب مسدد رحمہ اللہ نے اس سند میں ( «عَنْ عَبَّادِ بْنِ أَبِي صَالِحٍ» کے بجائے) «أَخْبَرَنِي عَبْدُ اللَّهِ بْنُ أَبِي صَالِحٍ» کہا ہے۔ امام ابوداؤد رحمہ اللہ فرماتے ہیں: یہ دونوں عبداللہ بن ابی صالح اور عباد بن ابی صالح ایک ہی شخصیت ہیں۔ [سنن ابي داود/كتاب الأيمان والنذور /حدیث: 3255]

سیدنا سوید بن حنظلہ رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کے پاس آنے کی نیت سے روانہ ہوئے اور ہمارے ساتھ وائل بن حجر رضی اللہ عنہ بھی تھے۔ ان کے ایک دشمن نے ان کو پکڑ لیا، تو قوم کے لوگ قسم کھانے سے ہچکچاتے رہے، مگر میں نے قسم کھا لی کہ ”یہ میرا بھائی ہے۔“ تو اس نے اسے چھوڑ دیا۔ پھر ہم رسول اللہ صلی اللہ علیہ وسلم کی خدمت میں حاضر ہوئے اور میں نے آپ صلی اللہ علیہ وسلم کو بتایا کہ قوم کے لوگوں نے قسم کھانے میں حرج سمجھا تھا، مگر میں نے قسم کھائی کہ ”یہ میرا بھائی ہے“ تو آپ صلی اللہ علیہ وسلم نے فرمایا: ”تو نے سچ کہا، مسلمان مسلمان کا بھائی ہوتا ہے۔“ [سنن ابي داود/كتاب الأيمان والنذور /حدیث: 3256]

سیدنا ثابت بن ضحاک رضی اللہ عنہ کہتے ہیں کہ انہوں نے رسول اللہ صلی اللہ علیہ وسلم کے ساتھ (حدیبیہ میں) درخت کے نیچے بیعت کی تھی، بیشک رسول اللہ صلی اللہ علیہ وسلم نے فرمایا: ”جس نے ملتِ اسلام کے سوا کسی اور ملت میں ہو جانے کی قسم کھائی خواہ وہ جھوٹا ہی کیوں نہ ہو، تو وہ اسی طرح ہے جیسا کہ اس نے کہا، اور جس نے جس چیز سے اپنے آپ کو قتل کیا اسے قیامت کے دن اسی سے عذاب دیا جائے گا، اور جو چیز انسان کی اپنی ملکیت میں نہ ہو، اس کی نذر بھی نہیں ہے۔“ [سنن ابي داود/كتاب الأيمان والنذور /حدیث: 3257]

سیدنا عبداللہ بن بریدہ اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جس نے قسم کھائی کہ میں اسلام سے بری ہوں، تو اگر وہ جھوٹا ہوا تو وہ وہی ہوا جو اس نے کہا اور اگر سچا بھی ہوا تو اسلام کی طرف صحیح سالم نہیں لوٹے گا۔“ [سنن ابي داود/كتاب الأيمان والنذور /حدیث: 3258]

سیدنا یوسف بن عبداللہ بن سلام رضی اللہ عنہ بیان کرتے ہیں کہ ”میں نے نبی کریم صلی اللہ علیہ وسلم کو دیکھا کہ آپ صلی اللہ علیہ وسلم نے ایک کھجور روٹی کے ٹکڑے پر رکھی اور فرمایا ”یہ اس کا سالن ہے۔“” [سنن ابي داود/كتاب الأيمان والنذور /حدیث: 3259]

یزید اعور نے سیدنا یوسف بن عبداللہ بن سلام رضی اللہ عنہ سے اس کے مثل روایت کیا۔ [سنن ابي داود/كتاب الأيمان والنذور /حدیث: 3260]

سیدنا عبداللہ بن عمر رضی اللہ عنہما نبی کریم صلی اللہ علیہ وسلم کی طرف نسبت کرتے ہوئے بیان کرتے ہیں کہ ”جس نے قسم کھائی اور پھر «إِنْ شَاءَ اللَّهُ» ”اگر اللہ نے چاہا“ کہہ دیا تو اس نے استثناء کر لیا۔“ [سنن ابي داود/كتاب الأيمان والنذور /حدیث: 3261]