سیدنا معاویہ بن حکم سلمی رضی اللہ عنہ سے روایت ہے، وہ کہتے ہیں کہ میں نے کہا: ”اے اللہ کے رسول! میں نے اپنی لونڈی کو تھپڑ مارا ہے۔“ چنانچہ رسول اللہ صلی اللہ علیہ وسلم نے اسے میرے لیے بہت برا قرار دیا۔ میں نے عرض کیا: ”کیا میں اسے آزاد نہ کر دوں؟“ آپ صلی اللہ علیہ وسلم نے فرمایا: ”اسے میرے پاس لاؤ۔“ میں اسے آپ صلی اللہ علیہ وسلم کی خدمت میں لے آیا۔ آپ صلی اللہ علیہ وسلم نے اس سے دریافت فرمایا: ”اللہ کہاں ہے؟“ اس نے کہا: ”آسمان پر۔“ آپ صلی اللہ علیہ وسلم نے پوچھا: ”میں کون ہوں؟“ اس نے کہا: ”آپ اللہ کے رسول ہیں۔“ آپ صلی اللہ علیہ وسلم نے فرمایا: ”اسے آزاد کر دو بلاشبہ یہ مومن ہے۔“ [سنن ابي داود/كتاب الأيمان والنذور /حدیث: 3282]

سیدنا شرید بن سوید ثقفی رضی اللہ عنہ کہتے ہیں کہ ان کی والدہ نے ان کو وصیت کی کہ وہ ان کی طرف سے ایک ایماندار (لونڈی یا غلام) کی گردن آزاد کر دیں۔ چنانچہ وہ نبی کریم صلی اللہ علیہ وسلم کی خدمت میں حاضر ہوئے اور عرض کیا: ”اے اللہ کے رسول! میری والدہ نے وصیت کی ہے کہ میں ان کی طرف سے ایک مومن گردن آزاد کر دوں، تو میرے پاس نوبی قبیلے کی سیاہ رنگ لونڈی ہے“ اور مذکورہ بالا حدیث کی مانند روایت کیا۔ ”تو کیا میں اسے آزاد کر دوں؟“ تو رسول اللہ صلی اللہ علیہ وسلم نے فرمایا: ”اسے میرے پاس بلاؤ۔“ چنانچہ اسے بلایا تو وہ آئی۔ نبی کریم صلی اللہ علیہ وسلم نے اس سے پوچھا: ”تیرا رب کون ہے؟“ اس نے کہا: ”اللہ۔“ آپ صلی اللہ علیہ وسلم نے پوچھا: ”میں کون ہوں؟“ اس نے کہا: ”رسول اللہ۔“ آپ صلی اللہ علیہ وسلم نے فرمایا: ”اس کو آزاد کر دو، بلاشبہ یہ مومن ہے۔“ امام ابوداؤد رحمہ اللہ فرماتے ہیں (دوسری سند میں) خالد بن عبداللہ نے اسے مرسل بیان کیا ہے اور شرید کا ذکر نہیں کیا۔ [سنن ابي داود/كتاب الأيمان والنذور /حدیث: 3283]

سیدنا ابوہریرہ رضی اللہ عنہ سے روایت ہے کہ ایک شخص ایک سیاہ رنگ لونڈی نبی کریم صلی اللہ علیہ وسلم کی خدمت میں لایا اور کہا: ”اے اللہ کے رسول! میرے ذمے ایک مومن گردن آزاد کرنا ہے،“ تو آپ صلی اللہ علیہ وسلم نے اس (لونڈی) سے دریافت فرمایا: ”اللہ کہاں ہے؟“ اس نے انگلی کے اشارے سے کہا کہ آسمان پر ہے۔ پھر آپ صلی اللہ علیہ وسلم نے پوچھا: ”میں کون ہوں؟“ تو اس نے نبی کریم صلی اللہ علیہ وسلم اور آسمان کی طرف اشارے سے سمجھایا کہ آپ اللہ کے رسول ہیں، تو آپ صلی اللہ علیہ وسلم نے فرمایا: ”اسے آزاد کر دو، بے شک یہ مومن ہے۔“ [سنن ابي داود/كتاب الأيمان والنذور /حدیث: 3284]

جناب عکرمہ رحمہ اللہ سے روایت ہے کہ رسول اللہ صلی اللہ علیہ وسلم نے فرمایا: ”اللہ کی قسم! میں قریش پر ضرور چڑھائی کروں گا۔ اللہ کی قسم! میں قریش پر ضرور چڑھائی کروں گا۔ اللہ کی قسم! میں قریش پر ضرور چڑھائی کروں گا۔“ پھر فرمایا: «إِنْ شَاءَ اللّٰهُ» ”اگر اللہ نے چاہا۔“ امام ابوداؤد رحمہ اللہ فرماتے ہیں: اس حدیث کو کئی ایک نے شریک سے، انہوں نے سماک سے، اس نے عکرمہ سے، اس نے ابن عباس رضی اللہ عنہ سے، اس نے نبی کریم صلی اللہ علیہ وسلم سے مسند روایت کیا ہے۔ ولید بن مسلم نے شریک سے روایت میں کہا ہے: ”پھر آپ صلی اللہ علیہ وسلم نے ان پر چڑھائی نہیں کی۔“ [سنن ابي داود/كتاب الأيمان والنذور /حدیث: 3285]

جناب عکرمہ رحمہ اللہ مرفوعاً بیان کرتے ہیں کہ رسول اللہ صلی اللہ علیہ وسلم نے فرمایا: ”اللہ کی قسم! میں قریش پر ضرور چڑھائی کروں گا۔“ پھر فرمایا: «إِنْ شَاءَ اللّٰهُ» ”اگر اللہ نے چاہا۔“ پھر آپ صلی اللہ علیہ وسلم نے کہا: ”اللہ کی قسم! میں قریش پر ضرور چڑھائی کروں گا، «إِنْ شَاءَ اللّٰهُ» ۔“ آپ صلی اللہ علیہ وسلم نے پھر کہا: ”اللہ کی قسم! میں قریش پر ضرور چڑھائی کروں گا۔“ پھر خاموش رہے بعد میں فرمایا: «إِنْ شَاءَ اللّٰهُ» ”اگر اللہ نے چاہا۔“ امام ابوداؤد رحمہ اللہ کہتے ہیں کہ اس روایت میں ولید بن مسلم نے شریک سے مزید یہ بھی بیان کیا: ”پھر آپ صلی اللہ علیہ وسلم نے ان پر چڑھائی نہیں کی۔“ [سنن ابي داود/كتاب الأيمان والنذور /حدیث: 3286]

سیدنا عبداللہ بن عمر رضی اللہ عنہ سے روایت ہے کہ (ایک موقع پر) رسول اللہ صلی اللہ علیہ وسلم نذر ماننے سے منع فرمانے لگے، آپ صلی اللہ علیہ وسلم فرماتے تھے: ”نذر کسی چیز کو رد نہیں کرتی بلکہ اس کے ذریعے سے بخیل آدمی سے مال نکالا جاتا ہے۔“ مسدد نے یوں بیان کیا، رسول اللہ صلی اللہ علیہ وسلم نے فرمایا ہے: ”بیشک نذر کسی چیز کو رد نہیں کرتی۔“ [سنن ابي داود/كتاب الأيمان والنذور /حدیث: 3287]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”(اللہ تعالیٰ کا ارشاد ہے کہ) نذر ابنِ آدم کی تقدیر میں، جسے میں نے پہلے سے مقدر نہ کیا ہو، کوئی تبدیلی نہیں لاتی، بلکہ یہ تقدیر ہی میں سے ہوتا ہے کہ انسان نذر مان لیتا ہے جس کے ذریعے سے بخیل سے کچھ نکالا جاتا ہے اور وہ کچھ کروایا جاتا ہے جو وہ اس سے پہلے نہیں کر رہا ہوتا۔“ [سنن ابي داود/كتاب الأيمان والنذور /حدیث: 3288]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”جس نے اللہ کی اطاعت کی نذر مانی ہو اسے چاہیے کہ (اسے پورا کرتے ہوئے) اللہ کی اطاعت کرے، اور جس نے اللہ کی معصیت اور نافرمانی کی نذر مانی ہو وہ اس کی نافرمانی نہ کرے۔ (اور نذر کو چھوڑ دے)۔“ [سنن ابي داود/كتاب الأيمان والنذور /حدیث: 3289]

ام المؤمنین سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے فرمایا: ”اللہ کی نافرمانی میں کوئی نذر نہیں اور اس کا کفارہ قسم والا کفارہ ہے۔“ [سنن ابي داود/كتاب الأيمان والنذور /حدیث: 3290]

ابن وہب نے بواسطہ یونس، ابن شہاب زہری سے مذکورہ بالا سند سے اسی کے ہم معنی روایت کیا ہے۔ امام ابوداؤد رحمہ اللہ کہتے ہیں کہ میں نے احمد بن شبویہ سے سنا، وہ کہتے تھے کہ ابن مبارک نے اس حدیث میں کہا ہے: «حَدَّثَ أَبُو سَلَمَةَ» ”یعنی ابوسلمہ نے حدیث بیان کی“ یہ اسلوب بیان دلیل ہے کہ زہری نے اسے ابوسلمہ سے براہ راست نہیں سنا ہے۔ اور احمد بن محمد (احمد بن محمد مروزی) نے کہا: ”اس کی دلیل وہ روایت ہے جو ہمیں ایوب بن سلیمان نے بیان کی ہے۔“ (درج ذیل روایت 3292 میں اس کی سند آ رہی ہے اور اس میں ابن شہاب زہری اور ابوسلمہ کے مابین دو واسطے ہیں جو اس سند میں نہیں ہیں۔) امام ابوداؤد رحمہ اللہ فرماتے ہیں کہ میں نے امام احمد بن حنبل رحمہ اللہ سے سنا، وہ کہتے تھے: ”لوگوں نے ہم پر یہ حدیث خلط کر دی ہے۔“ ان سے کہا گیا: ”کیا اس کا فساد آپ کے نزدیک ثابت ہے؟ اور کیا ابوبکر بن ابی اویس کے علاوہ کسی اور نے بھی اسے روایت کیا ہے؟“ انہوں نے کہا: ”ایوب بن سلیمان بن بلال اس (ابوبکر بن ابی اویس) سے بہتر تھا اور ایوب نے اسے روایت کیا ہے۔“ [سنن ابي داود/كتاب الأيمان والنذور /حدیث: 3291]