جناب سعید بن مسیب رحمہ اللہ سے روایت ہے کہ انصاریوں میں دو بھائیوں میں وراثت کا معاملہ تھا۔ ایک نے دوسرے سے تقسیم کا مطالبہ کیا تو اس نے کہا: ”اگر تو نے مجھ سے دوبارہ تقسیم کی بات کی تو میرا سب مال کعبہ کے لیے وقف ہوا۔“ سیدنا عمر رضی اللہ عنہ نے اس سے فرمایا: ”کعبہ تیرے مال کا محتاج نہیں۔ اپنی قسم کا کفارہ ادا کر اور اپنے بھائی سے (تقسیم کے بارے میں) بات کر۔ میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: «لَا نَذْرَ فِي مَعْصِيَةِ الرَّبِّ، وَلَا فِي قَطِيعَةِ رَحِمٍ، وَلَا فِيمَا لَا تَمْلِكُ» ”رب تعالیٰ کی نافرمانی میں تیری کوئی قسم ہے، نہ نذر اور نہ قطع رحمی میں نذر ہے اور نہ اس چیز میں جس کا تو مالک نہیں۔““ [سنن ابي داود/كتاب الأيمان والنذور /حدیث: 3272]

جناب عمرو بن شعیب اپنے والد سے، وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: ”کوئی نذر نہیں سوائے اس کے جس میں اللہ کی رضا مقصود ہو اور نہ قطع رحمی میں قسم ہے۔“ [سنن ابي داود/كتاب الأيمان والنذور /حدیث: 3273]

جناب عمرو بن شعیب اپنے والد سے، وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: ”ابنِ آدم جس چیز کا مالک نہ ہو اس میں نذر نہیں اور نہ اس میں قسم ہے اور نہ اللہ کی نافرمانی میں اور نہ قطع تعلقی میں۔ اور جس نے قسم کھائی ہو اور پھر اس کے خلاف دوسرے پہلو میں زیادہ خیر دیکھے تو چاہیے کہ قسم چھوڑ دے اور جو خیر ہو اس پر عمل کرے۔ بلاشبہ اس کا چھوڑ دینا ہی اس کا کفارہ ہے۔“ امام ابوداؤد رحمہ اللہ فرماتے ہیں کہ نبی کریم صلی اللہ علیہ وسلم کی سب احادیث میں یہی ہے کہ قسم کا کفارہ ادا کرے، مگر ان روایات میں (اس کے برعکس بیان ہوا ہے) جن کا کوئی اعتبار نہیں۔ امام ابوداؤد رحمہ اللہ کہتے ہیں میں نے امام احمد رحمہ اللہ سے پوچھا: ”کیا یحییٰ بن سعید نے یحییٰ بن عبیداللہ سے روایت کیا ہے؟“ تو انہوں نے کہا: ”بعد میں چھوڑ دیا تھا اور وہ اسی لائق تھا۔“ اور امام احمد رحمہ اللہ نے کہا: ”اس کی احادیث منکر (ازحد ضعیف) ہیں اور اس کا باپ غیر معروف ہے۔“ [سنن ابي داود/كتاب الأيمان والنذور /حدیث: 3274]

سیدنا ابن عباس رضی اللہ عنہما سے روایت ہے کہ دو شخص اپنا جھگڑا نبی کریم صلی اللہ علیہ وسلم کے پاس لے کر آئے، تو نبی کریم صلی اللہ علیہ وسلم نے مدعی سے گواہ طلب کیے تو اس کے پاس گواہ نہیں تھے۔ تب آپ صلی اللہ علیہ وسلم نے مدعا علیہ سے قسم طلب کی تو اس نے کہا: ”قسم ہے اللہ کی جس کے سوا کوئی معبود نہیں! (میں نے یہ کام نہیں کیا ہے جو مدعی کہتا ہے۔)“ تو رسول اللہ صلی اللہ علیہ وسلم نے فرمایا: ”کیوں نہیں، تحقیق تو نے یہ کیا ہے، لیکن اللہ نے تجھے اخلاص کے ساتھ «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ کہنے کی وجہ سے بخش دیا ہے۔“ امام ابوداؤد رحمہ اللہ فرماتے ہیں: ”اس سے مراد یہ ہے کہ آپ صلی اللہ علیہ وسلم نے اسے (جھوٹی قسم کھانے پر) کفارہ ادا کرنے کا حکم نہیں دیا۔“ [سنن ابي داود/كتاب الأيمان والنذور /حدیث: 3275]

سیدنا ابوبردہ اپنے والد (سیدنا ابوموسیٰ اشعری رضی اللہ عنہ) سے روایت کرتے ہیں کہ نبی کریم صلی اللہ علیہ وسلم نے فرمایا: ”اللہ کی قسم! اگر میں کوئی قسم کھاؤں اور پھر اس کے خلاف کو بہتر پاؤں تو بالضرور «إِنْ شَاءَ اللّٰهُ» اپنی قسم کا کفارہ ادا کر دوں گا اور وہی کروں گا جو بہتر ہو گا۔“ یا یوں فرمایا: «إِلَّا أَتَيْتُ الَّذِي هُوَ خَيْرٌ وَكَفَّرْتُ يَمِينِي» ”مگر میں وہ کروں گا جو بہتر ہو گا اور اپنی قسم کا کفارہ دے دوں گا۔“ [سنن ابي داود/كتاب الأيمان والنذور /حدیث: 3276]

سیدنا عبدالرحمن بن سمرہ رضی اللہ عنہ سے روایت ہے، وہ کہتے ہیں کہ نبی کریم صلی اللہ علیہ وسلم نے مجھ سے فرمایا: ”اے عبدالرحمن بن سمرہ! جب تم کوئی قسم کھاؤ، پھر اس کے خلاف کو اس سے بہتر پاؤ تو وہی کرو جو بہتر ہو اور اپنی قسم کا کفارہ دے دو۔“ امام ابوداؤد رحمہ اللہ فرماتے ہیں: ”میں نے امام احمد رحمہ اللہ سے سنا کہ وہ قسم توڑنے سے پہلے کفارہ ادا کرنے کی رخصت دیتے تھے۔“ [سنن ابي داود/كتاب الأيمان والنذور /حدیث: 3277]

سیدنا عبدالرحمن بن سمرہ رضی اللہ عنہ سے مذکورہ بالا حدیث کی مانند مروی ہے مگر اس روایت میں (یہ اضافہ) ہے کہ ”اپنی قسم کا کفارہ ادا کر اور پھر اس پر عمل کر جو بہتر ہو۔“ امام ابوداؤد رحمہ اللہ فرماتے ہیں کہ ”اس بارے میں سیدنا ابوموسیٰ اشعری رضی اللہ عنہ، سیدنا عدی بن حاتم رضی اللہ عنہ اور سیدنا ابوہریرہ رضی اللہ عنہ سے احادیث آئی ہیں۔ کچھ میں ہے کہ پہلے خلاف قسم عمل کرے پھر کفارہ دے اور کچھ میں ہے کہ پہلے کفارہ دے اور پھر خلاف قسم عمل کرے۔“ [سنن ابي داود/كتاب الأيمان والنذور /حدیث: 3278]

جناب عبدالرحمن بن حرملہ، ام حبیب بنت ذؤیب بن قیس مزنیہ سے روایت کرتے ہیں اور یہ ام حبیب پہلے بنو اسلم کے ایک شخص کی زوجیت میں تھیں، بعد ازاں ام المؤمنین سیدہ صفیہ رضی اللہ عنہا کے بھتیجے کے نکاح میں آئیں۔ ابن حرملہ نے کہا: ”ام حبیب نے ہمیں ایک پیمانہ «صَاع» ہدیہ دیا اور بتایا کہ اس کے شوہر (ام المؤمنین صفیہ رضی اللہ عنہا کے بھتیجے) نے سیدہ صفیہ رضی اللہ عنہا سے نقل کیا کہ یہ «صَاع» نبی کریم صلی اللہ علیہ وسلم کا تھا“۔ (راویِ حدیث) جناب انس بن عیاض کہتے ہیں: ”پھر میں نے اس «صَاع» کو ماپا تو (اس دور کے اموی پیمانے) ہشام بن عبدالملک بن مروان کے پیمانے کے مطابق اڑھائی «مُدّ» کے برابر پایا“۔ [سنن ابي داود/كتاب الأيمان والنذور /حدیث: 3279]

محمد بن محمد بن خلاد ابوعمر کا بیان ہے کہ ”ہمارے پاس ایک «مُدٌّ» تھا جو خالد (قسری) کی طرف منسوب تھا جو ہارون کے «كَيْلَجَةُ» (ایک پیمانہ) سے دوگنا تھا“۔ محمد بن محمد نے کہا: ”خالد کے «صَاعٌ» (مد) سے ہشام بن عبدالملک کا «صَاعٌ» مراد ہے“۔ [سنن ابي داود/كتاب الأيمان والنذور /حدیث: 3280]

محمد بن محمد بن خلاد ابوعمر نے کہا: ”ہمیں مسدد نے امیہ بن خالد سے بیان کیا کہ جب خالد القسری گورنر بنا تو اس نے صاع کو دوگنا کر دیا اور پھر ایک صاع سولہ رطل کا ہو گیا۔“ امام ابوداؤد رحمہ اللہ بیان فرماتے ہیں کہ ”محمد بن محمد بن خلاد کو زنگی (سیاہ فام) لوگوں نے باندھ کر قتل کیا تھا“ اور اپنے ہاتھوں سے یوں اشارہ کیا، امام ابوداؤد رحمہ اللہ نے اپنے ہاتھوں کو پھیلایا اور اپنی ہتھیلیوں کو زمین کی طرف کیا اور کہا کہ ”میں نے اسے خواب میں دیکھا اور اس سے پوچھا کہ اللہ نے تم سے کیا معاملہ کیا؟ تو انہوں نے کہا: ”مجھے جنت میں داخل کر دیا ہے“، میں نے کہا: ”تو تمہیں وقف نے کوئی ضرر نہیں دیا!“ (زنگیوں کے سامنے بے دست و پا ہو جانے سے تمہیں کوئی نقصان نہیں پہنچا بلکہ اللہ کے ہاں تمہارا معاملہ صاف ہی رہا)۔“ [سنن ابي داود/كتاب الأيمان والنذور /حدیث: 3281]