ام المؤمنین سیدہ عائشہ رضی اللہ عنہا نے انصار کی عورتوں کا ذکر کیا، ان کی تعریف کی اور ان کے اچھے اعمال بیان کیے اور کہا: ”جب سورۃ النور نازل ہوئی تو ان عورتوں نے پردوں کے کپڑے یا مردوں کی چادریں لیں۔“ ابوکامل کو لفظ «حُجُور» یا «حُجُوز» میں شک ہوا ہے۔ ”اور انہیں پھاڑ کر اپنے لیے پردے کی چادریں بنا لیا۔“ [سنن ابي داود/كتاب اللباس /حدیث: 4100]

ام المؤمنین سیدہ ام سلمہ رضی اللہ عنہا نے بیان کیا کہ جب عورتوں کے متعلق یہ حکم نازل ہوا: ﴿يُدْنِينَ عَلَيْهِنَّ مِنْ جَلَابِيبِهِنَّ﴾ [سورة الأحزاب: 59] ”وہ اپنے اوپر اپنی چادریں لٹکا لیا کریں۔“ تو ”انصاری عورتیں جب باہر نکلتیں تو ایسے لگتا کہ ان کے سروں پر کوئے بیٹھے ہوں، ان سیاہ چادروں کی وجہ سے جو وہ اپنے سروں پر لینے لگی تھیں۔“ [سنن ابي داود/كتاب اللباس /حدیث: 4101]

ام المؤمنین سیدہ عائشہ رضی اللہ عنہا نے بیان کیا کہ ”اللہ تعالیٰ سابق مہاجر خواتین پر رحم فرمائے، جب اللہ کا یہ حکم ﴿وَلْيَضْرِبْنَ بِخُمُرِهِنَّ عَلَى جُيُوبِهِنَّ﴾ [سورة النور: 31] نازل ہوا تو انہوں نے اون کی موٹی موٹی چادریں پھاڑ کر اپنی اوڑھنیاں بنا لیں۔“ ابن صالح نے ( «أَكْنَفَ» کے بجائے) «أَكْثَفَ» کہا ہے۔ [سنن ابي داود/كتاب اللباس /حدیث: 4102]

ابن شہاب نے یہ روایت اپنی سند سے مذکورہ بالا کے ہم معنی روایت کی ہے۔ [سنن ابي داود/كتاب اللباس /حدیث: 4103]

ام المؤمنین سیدہ عائشہ رضی اللہ عنہا سے روایت ہے کہ (ان کی بہن) اسماء بنت ابوبکر رضی اللہ عنہما رسول اللہ صلی اللہ علیہ وسلم کے ہاں آئیں اور انہوں نے باریک کپڑے پہنے ہوئے تھے، تو رسول اللہ صلی اللہ علیہ وسلم نے ان سے اپنا منہ موڑ لیا اور فرمایا: ”اے اسماء! بچی جب جوان ہو جائے تو جائز نہیں کہ اس سے کچھ نظر آئے سوائے اس کے اور اس کے۔“ اور آپ صلی اللہ علیہ وسلم نے اپنے چہرے اور ہاتھوں کی طرف اشارہ فرمایا۔ امام ابوداؤد رحمہ اللہ فرماتے ہیں کہ یہ روایت مرسل ہے، خالد بن دریک نے سیدہ عائشہ رضی اللہ عنہا کو نہیں پایا اور سعید بن بشیر قوی نہیں ہے۔ [سنن ابي داود/كتاب اللباس /حدیث: 4104]

سیدنا جابر رضی اللہ عنہ سے مروی ہے کہ ام المؤمنین سیدہ ام سلمہ رضی اللہ عنہا نے نبی کریم صلی اللہ علیہ وسلم سے سینگی لگوانے کی اجازت چاہی، تو آپ صلی اللہ علیہ وسلم نے ابوطیبہ کو فرمایا: ”اسے سینگی لگائے۔“ راوی نے کہا: ”میرا خیال ہے کہ سیدنا جابر رضی اللہ عنہ نے بتایا کہ وہ ان کا رضاعی بھائی تھا یا نابالغ لڑکا تھا۔“ [سنن ابي داود/كتاب اللباس /حدیث: 4105]

سیدنا انس رضی اللہ عنہ بیان کرتے ہیں کہ نبی کریم صلی اللہ علیہ وسلم سیدہ فاطمہ رضی اللہ عنہا کے لیے ایک غلام لائے جو آپ صلی اللہ علیہ وسلم نے ان کو ہبہ کیا تھا۔ سیدنا انس رضی اللہ عنہ نے کہا: ”سیدہ فاطمہ رضی اللہ عنہا پر ایسا کپڑا تھا کہ وہ اگر اسے سر پر لپیٹتی تو ان کے پاؤں تک نہ پہنچتا تھا، اور اگر پاؤں کو چھپاتیں تو سر پر نہ رہتا تھا۔“ پس جب نبی کریم صلی اللہ علیہ وسلم نے ان کی اس الجھن کو دیکھا تو فرمایا: ”تمہارے لیے کوئی حرج کی بات نہیں، تمہارے سامنے صرف تمہارے والد ہیں اور تمہارا غلام۔“ [سنن ابي داود/كتاب اللباس /حدیث: 4106]

ام المؤمنین سیدہ عائشہ رضی اللہ عنہا بیان کرتی ہیں کہ ایک ہیجڑا نبی کریم صلی اللہ علیہ وسلم کی ازواج کے گھروں میں آتا جاتا تھا اور لوگ اس کے بارے میں سمجھتے تھے کہ اس میں عورتوں کی طرف کوئی میلان نہیں اور یہ ﴿غَيْرِ أُولِي الْإِرْبَةِ﴾ [سورة النور: 31] میں سے ہے۔ ایک دن نبی کریم صلی اللہ علیہ وسلم ہمارے ہاں تشریف لائے اور وہ آپ صلی اللہ علیہ وسلم کی کسی بیوی کے پاس بیٹھا ہوا تھا اور ایک عورت کی تعریف میں یوں کہہ رہا تھا: ”وہ جب سامنے سے آتی ہے تو اس کے پیٹ پر چار بل پڑتے ہیں اور جب کمر پھیر کر جاتی ہے تو آٹھ سے واپس ہوتی ہے۔“ (یعنی پہلوؤں کی طرف سے چار چار بل نظر آتے ہیں جو اس کے فربہ اندام اور خوبصورت ہونے کی علامت ہیں) تو نبی کریم صلی اللہ علیہ وسلم نے فرمایا: ”میں نہیں سمجھتا تھا کہ یہ بھی ان عورتوں کی مخفی باتیں جانتا ہے، آئندہ یہ تمہارے ہاں ہرگز نہ آیا کرے۔“ چنانچہ اسے روک دیا گیا۔ [سنن ابي داود/كتاب اللباس /حدیث: 4107]

زہری رحمہ اللہ نے عروہ رحمہ اللہ سے، انہوں نے سیدہ عائشہ رضی اللہ عنہا سے اس حدیث کے ہم معنی روایت کی ہے۔ [سنن ابي داود/كتاب اللباس /حدیث: 4108]

ابن شہاب (ابن شہاب زہری) عروہ سے، انہوں نے سیدہ عائشہ رضی اللہ عنہا سے یہ حدیث روایت کی، اس میں مزید یہ ہے کہ: ”اور اسے (مدینہ طیبہ سے) نکال دیا، چنانچہ وہ مقام بیداء میں رہتا تھا اور ہر جمعہ آتا اور کھانے پینے کی چیزیں مانگ کر لے جایا کرتا تھا۔“ [سنن ابي داود/كتاب اللباس /حدیث: 4109]