جناب قتادہ رحمہ اللہ کہتے ہیں کہ ہم نے سیدنا انس بن مالک رضی اللہ عنہ سے پوچھا کہ ”رسول اللہ صلی اللہ علیہ وسلم کو کون سا لباس سب سے زیادہ پسند تھا؟“ تو انہوں نے کہا: ”نقش دار (یا دھاری دار)۔“ [سنن ابي داود/كتاب اللباس /حدیث: 4060]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”سفید کپڑے پہنا کرو، بلاشبہ یہ تمہارے کپڑوں میں سب سے بہتر ہیں اور انہی میں اپنی میتوں کو کفن دیا کرو۔ اور تمہارے سرموں میں سب سے بہتر سرمہ «الْإِثْمِدُ» ”اثمد“ ہے جو نظر کو تیز کرتا اور (پلکوں کے) بال اگاتا ہے۔“ [سنن ابي داود/كتاب اللباس /حدیث: 4061]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم ہمارے ہاں تشریف لائے، آپ صلی اللہ علیہ وسلم نے ایک آدمی کو دیکھا کہ اس کے بال بکھرے بکھرے سے تھے، آپ صلی اللہ علیہ وسلم نے فرمایا: ”کیا اسے کوئی چیز نہیں ملتی کہ اس سے اپنے بالوں کو سنوار لے؟“ اور آپ صلی اللہ علیہ وسلم نے ایک دوسرے آدمی کو دیکھا جس کے کپڑے میلے ہو رہے تھے، آپ صلی اللہ علیہ وسلم نے فرمایا: ”کیا اسے کوئی چیز نہیں ملتی کہ اس سے اپنے کپڑے دھو لے؟“ [سنن ابي داود/كتاب اللباس /حدیث: 4062]

جناب ابوالاحوص (عوف) اپنے والد (سیدنا مالک بن نضلہ رضی اللہ عنہ) سے روایت کرتے ہیں، انہوں نے کہا کہ میں نبی کریم صلی اللہ علیہ وسلم کی خدمت میں حاضر ہوا اور میں نے گھٹیا کپڑے پہنے ہوئے تھے۔ آپ صلی اللہ علیہ وسلم نے دریافت فرمایا: ”کیا تمہارے پاس مال ہے؟“ میں نے کہا: ہاں۔ آپ صلی اللہ علیہ وسلم نے پوچھا: ”کس قسم کا؟“ میں نے عرض کیا کہ اللہ نے مجھے اونٹ، بکریاں، گھوڑے اور غلام، ہر طرح کا مال عنایت فرمایا ہوا ہے۔ آپ صلی اللہ علیہ وسلم نے فرمایا: ”جب اللہ نے تمہیں مال دیا ہے تو اس کی نعمت اور احسان کا اثر تجھ پر نظر آنا چاہیے۔“ [سنن ابي داود/كتاب اللباس /حدیث: 4063]

جناب زید بن اسلم بیان کرتے ہیں کہ سیدنا عبداللہ بن عمر رضی اللہ عنہ اپنی داڑھی زرد رنگ سے رنگا کرتے تھے یہاں تک کہ ان کے کپڑے بھی اس رنگ سے بھر جاتے تھے۔ ان سے کہا گیا: ”آپ زرد رنگ سے کیوں رنگتے ہیں؟“ انہوں نے کہا: ”تحقیق میں نے رسول اللہ صلی اللہ علیہ وسلم کو دیکھا ہے کہ وہ اسی سے (اپنے بال یا کپڑے) رنگتے تھے اور انہیں اس سے بڑھ کر اور کوئی رنگ زیادہ محبوب نہ تھا اور وہ اپنے سب کپڑے اسی سے رنگتے تھے حتیٰ کہ پگڑی بھی۔“ [سنن ابي داود/كتاب اللباس /حدیث: 4064]

سیدنا ابورمثہ (رفاعہ بن یثربی رضی اللہ عنہ) بیان کرتے ہیں کہ ”میں اپنے والد کے ساتھ نبی کریم صلی اللہ علیہ وسلم کے ہاں گیا تو میں نے آپ صلی اللہ علیہ وسلم پر سبز رنگ کی دھاری دار دو چادریں دیکھیں۔“ [سنن ابي داود/كتاب اللباس /حدیث: 4065]

جناب عمرو بن شعیب اپنے والد سے، وہ اپنے دادا (عبداللہ بن عمرو بن العاص رضی اللہ عنہ) سے روایت کرتے ہیں کہ ہم رسول اللہ صلی اللہ علیہ وسلم کے ساتھ ایک گھاٹی سے نیچے اترے۔ آپ صلی اللہ علیہ وسلم میری طرف متوجہ ہوئے تو دیکھا کہ میں نے ایک اکہری چادر لی ہوئی تھی جو ہلکے عصفری رنگ سے رنگی ہوئی تھی۔ آپ صلی اللہ علیہ وسلم نے پوچھا: ”تم نے یہ کیسی چادر اپنے اوپر لی ہوئی ہے؟“ میں آپ صلی اللہ علیہ وسلم کی ناپسندیدگی کی وجہ سمجھ گیا۔ پھر میں اپنے گھر والوں کے پاس آیا اور وہ اپنا تنور دہکا رہے تھے، تو میں نے اس چادر کو اس میں دے مارا۔ پھر میں اگلے دن آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے دریافت فرمایا: ”عبداللہ! اس چادر کا کیا ہوا؟“ میں نے آپ صلی اللہ علیہ وسلم کو بتلایا تو آپ صلی اللہ علیہ وسلم نے فرمایا: ”تو نے اسے اپنے گھر والوں میں سے کسی کو کیوں نہ دے دیا؟ عورتوں کو تو اس میں کوئی حرج نہیں۔“ [سنن ابي داود/كتاب اللباس /حدیث: 4066]

ہشام بن الغاز نے وضاحت کی کہ «الْمُضَرَّجَةُ» سے مراد یہ ہے کہ ”وہ چادر نہ بہت سرخ رنگ کی تھی اور نہ گلابی۔“ [سنن ابي داود/كتاب اللباس /حدیث: 4067]

سیدنا عبداللہ بن عمرو بن العاص رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھے دیکھا، بالفاظ ابوعلی اللؤلؤی میرا خیال ہے کہ مجھ پر کسم کے رنگ کا گلابی کپڑا تھا۔ آپ صلی اللہ علیہ وسلم نے فرمایا: ”یہ کیا ہے؟“ تو میں چلا گیا اور اسے جلا ڈالا، تو نبی کریم صلی اللہ علیہ وسلم نے پوچھا: ”تم نے اپنے کپڑے کا کیا کیا؟“ میں نے کہا: ”میں نے اسے جلا ڈالا ہے۔“ آپ صلی اللہ علیہ وسلم نے فرمایا: ”وہ تم نے اپنے گھر والوں میں سے کسی کو کیوں نہ پہنا دیا؟“ امام ابوداؤد رحمہ اللہ نے کہا: اس روایت کو ثور نے خالد سے روایت کیا تو «مُوَرَّدٌ» کہا (گلابی سے رنگ کی چادر تھی) اور طاؤس نے «مُعَصْفَرٌ» کہا ہے (کسم کے رنگ سے رنگی ہوئی تھی)۔ [سنن ابي داود/كتاب اللباس /حدیث: 4068]

سیدنا عبداللہ بن عمرو رضی اللہ عنہما بیان کرتے ہیں کہ ”ایک آدمی نبی کریم صلی اللہ علیہ وسلم کے پاس سے گزرا جس پر سرخ رنگ کے دو کپڑے تھے، اس نے آپ صلی اللہ علیہ وسلم کو سلام کیا مگر آپ صلی اللہ علیہ وسلم نے اس کے سلام کا جواب نہیں دیا۔“ [سنن ابي داود/كتاب اللباس /حدیث: 4069]