حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جو شخص کسی مریض کی عیادت کرتا ہے تو اسے آسمان سے ایک آواز دینے والا (فرشتہ) آواز دیتا ہے: «طِبْتَ وَطَابَ مَمْشَاكَ وَتَبَوَّأْتَ مِنَ الْجَنَّةِ مَنْزِلًا» ”تو بھی پاک (اور اچھا) ہے اور تیرا چلنا بھی پاک ہے اور تو نے جنت میں گھر بنا لیا۔““ [سنن ابن ماجه/كتاب الجنائز/حدیث: 1443]

حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنے مرنے والوں کو «لَا إِلَهَ إِلَّا اللَّهُ» ”اللہ کے سوا کوئی معبودِ برحق نہیں“ کی تلقین کرو۔“ [سنن ابن ماجه/كتاب الجنائز/حدیث: 1444]

حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اپنے مرنے والوں کو «لَا إِلٰهَ إِلَّا اللّٰهُ» کی تلقین کرو۔“ [سنن ابن ماجه/كتاب الجنائز/حدیث: 1445]

حضرت عبداللہ بن جعفر رضی اللہ عنہ سے روایت ہے رسول اللہ صلی اللہ علیہ وسلم نے فرمایا: ”اپنے مرنے والوں کو ان الفاظ کی تلقین کرو: «لَا إِلٰهَ إِلَّا اللّٰهُ الْحَلِيمُ الْكَرِيمُ، سُبْحَانَ اللّٰهِ رَبِّ الْعَرْشِ الْعَظِيمِ، الْحَمْدُ لِلّٰهِ رَبِّ الْعَالَمِينَ» ”اللہ کے سوا کوئی معبود نہیں جو حلیم و کریم ہے، پاک ہے اللہ جو عرشِ عظیم کا مالک ہے۔ سب تعریفیں اللہ کے لیے ہیں، جو تمام جہانوں کا پالنے والا ہے۔““ صحابہ رضی اللہ عنہم نے عرض کیا: ”اے اللہ کے رسول! زندوں کے لیے یہ ذکر کیسا ہے؟“ فرمایا: ”زیادہ اچھا، زیادہ عمدہ۔“ [سنن ابن ماجه/كتاب الجنائز/حدیث: 1446]

حضرت ام المومنین ام سلمہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”جب تم بیمار کے پاس جاؤ“ یا فرمایا: ”مرنے والے کے پاس جاؤ تو اچھی بات کہو کیوں کہ تم جو کچھ (اس وقت) کہتے ہو، فرشتے اس پر آمین کہتے ہیں۔“ (ام المومنین رضی اللہ عنہا نے فرمایا) ”جب ابو سلمہ رضی اللہ عنہ کی وفات ہوئی تو میں نے نبی صلی اللہ علیہ وسلم کی خدمت میں حاضر ہو کر عرض کیا: اے اللہ کے رسول! ابو سلمہ رضی اللہ عنہ فوت ہو گئے ہیں۔ آپ صلی اللہ علیہ وسلم نے فرمایا: ”تم کہو: «اللَّهُمَّ اغْفِرْ لِي وَلَهُ، وَأَعْقِبْنِي مِنْهُ عُقْبًى حَسَنَةً» ”اے اللہ! مجھے اور اسے بخش دے اور مجھے اس کا اچھا بدل عطا فرما۔“”ام المومنین رضی اللہ عنہا نے فرمایا: ”میں نے یہی دعا کی تو اللہ تعالیٰ نے مجھے ان سے بہتر (خاوند) عطا فرمایا، یعنی رسول اللہ صلی اللہ علیہ وسلم ۔““ [سنن ابن ماجه/كتاب الجنائز/حدیث: 1447]

حضرت معقل بن یسار رضی اللہ عنہ سے روایت ہے کہ رسول اللہ صلی اللہ علیہ وسلم نے «سُورَة يٰسٓ» کے بارے میں فرمایا: ”اسے اپنے فوت ہونے والوں کے پاس پڑھا کرو۔“ [سنن ابن ماجه/كتاب الجنائز/حدیث: 1448]

حضرت عبدالرحمن بن کعب بن مالک رضی اللہ عنہ اپنے والد کے بارے میں بیان فرماتے ہیں کہ جب کعب رضی اللہ عنہ کی وفات کا وقت آیا (اور موت کے آثار ظاہر ہونے لگے) تو براء بن معرور رضی اللہ عنہ کی بیٹی ام بشر رضی اللہ عنہا ان کے پاس آئیں اور کہا: ”اے ابو عبدالرحمن (کعب بن مالک)! اگر (عالم ارواح میں) فلاں سے (حضرت بشر رضی اللہ عنہ سے) آپ کی ملاقات ہو تو اسے میرا سلام کہہ دیجیے گا“، انہوں نے کہا: ”ام بشر! اللہ آپ کی مغفرت کرے، ہمیں اتنی فرصت کہاں ہوگی؟“ ام بشر رضی اللہ عنہا نے کہا: ”ابو عبدالرحمن! کیا آپ نے رسول اللہ صلی اللہ علیہ وسلم سے یہ ارشاد مبارک نہیں سنا: ”مومنوں کی روحیں سبز پرندوں میں ہیں، جنت کے درختوں سے (پھل) کھاتی ہیں“۔“ انہوں نے کہا: ”ہاں (یہ تو سنا ہے)۔“ انہوں نے کہا: ”میرا بھی یہی مطلب ہے“۔ [سنن ابن ماجه/كتاب الجنائز/حدیث: 1449]

حضرت محمد بن منکدر رحمہ اللہ سے روایت ہے، انہوں نے فرمایا: ”جب جابر بن عبداللہ رضی اللہ عنہ کی وفات کا وقت تھا تو میں ان کے پاس گیا اور میں نے کہا: ”رسول اللہ صلی اللہ علیہ وسلم کو سلام کہہ دیجیے گا۔““ [سنن ابن ماجه/كتاب الجنائز/حدیث: 1450]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ان کے پاس تشریف لائے جبکہ ان کے پاس ان کا ایک رشتہ دار تھا، جس پر موت کی سختی طاری تھی، جب رسول اللہ صلی اللہ علیہ وسلم نے عائشہ رضی اللہ عنہا کا رنج دیکھا تو فرمایا: ”عائشہ! اپنے رشتہ دار پر غم نہ کرو، یہ بھی اس کی نیکیوں میں سے ہے۔“ [سنن ابن ماجه/كتاب الجنائز/حدیث: 1451]

حضرت بریدہ بن حصیب رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”مومن پیشانی کے پسینے کے ساتھ مرتا ہے۔“ [سنن ابن ماجه/كتاب الجنائز/حدیث: 1452]