حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ، حضرت ابوبکر، حضرت عمر اور حضرت عثمان رضی اللہ عنہم جنازے کے آگے چلتے تھے۔“ [سنن ابن ماجه/كتاب الجنائز/حدیث: 1483]

حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جنازے کے پیچھے چلا جاتا ہے، جنازہ کسی کے پیچھے نہیں چلتا، جو اس سے آگے چلے وہ اس کے ساتھ نہیں۔“ [سنن ابن ماجه/كتاب الجنائز/حدیث: 1484]

حضرت عمران بن حصین اور حضرت ابو برزہ اسلمی رضی اللہ عنہما سے روایت ہے، ان دونوں نے کہا: ”ایک جنازے میں ہم رسول اللہ صلی اللہ علیہ وسلم کے ساتھ روانہ ہوئے۔ آپ صلی اللہ علیہ وسلم نے دیکھا کہ کچھ افراد نے (اوڑھنے والی) چادریں اتار پھینکی ہیں اور صرف قمیصیں پہن کر چل رہے ہیں۔ رسول اللہ صلی اللہ علیہ وسلم نے فرمایا: ”کیا تم جاہلیت کا عمل اختیار کر رہے ہو؟ کیا تم جاہلیت کے کام سے مشابہت اختیار کرتے ہو؟ میرا جی چاہا تھا کہ تمہیں ایسی بددعا دوں کہ تمہاری صورتیں تبدیل ہو جائیں۔“ چنانچہ انہوں نے اپنی چادریں اوڑھ لیں اور دوبارہ یہ غلطی نہیں کی۔“ [سنن ابن ماجه/كتاب الجنائز/حدیث: 1485]

حضرت علی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جب جنازہ تیار ہو جائے تو تاخیر نہ کرو۔“ [سنن ابن ماجه/كتاب الجنائز/حدیث: 1486]

حضرت ابو بردہ رضی اللہ عنہ سے روایت ہے، انہوں نے کہا: جب ابو موسیٰ اشعری رضی اللہ عنہ کی وفات کا وقت آیا تو انہوں نے وصیت کرتے ہوئے فرمایا: ”میرے ساتھ (خوشبو سلگانے والی) انگیٹھی نہ لے جانا۔“ حاضرین نے کہا: ”کیا آپ نے اس مسئلہ میں کوئی حدیث سنی ہے؟“ فرمایا: ”ہاں، اللہ کے رسول صلی اللہ علیہ وسلم سے سنی ہے۔“ [سنن ابن ماجه/كتاب الجنائز/حدیث: 1487]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس کا جنازہ سو مسلمان پڑھیں اسے بخش دیا جائے گا۔“ [سنن ابن ماجه/كتاب الجنائز/حدیث: 1488]

حضرت عبداللہ بن عباس رضی اللہ عنہما کے آزاد کردہ غلام کریب رحمہ اللہ سے روایت ہے، انہوں نے کہا کہ حضرت عبداللہ بن عباس رضی اللہ عنہما کا ایک بیٹا فوت ہو گیا۔ انہوں نے مجھے فرمایا: ”کریب! اٹھ کر دیکھو! کیا میرے بیٹے (کا جنازہ پڑھنے) کے لیے کوئی آیا ہے؟“ میں نے کہا: جی ہاں۔ انہوں نے فرمایا: ”تیرا بھلا ہو، تیرے خیال میں کتنے افراد ہیں؟ چالیس تو ہوں گے؟“ میں نے کہا: نہیں، بلکہ اس سے بھی زیادہ ہیں۔ انہوں نے فرمایا: ”تو میرے بیٹے کو (نماز جنازہ کے لیے) لے چلو۔ میں گواہی دیتا ہوں کہ میں نے رسول اللہ صلی اللہ علیہ وسلم سے سنا، آپ فرما رہے تھے: ”جو چالیس مومن کسی مومن کے حق میں دعا کریں اللہ ان کی سفارش قبول فرما لیتا ہے۔“” [سنن ابن ماجه/كتاب الجنائز/حدیث: 1489]

حضرت مالک بن ہبیرہ رضی اللہ عنہ سے روایت ہے کہ (ان کی موجودگی میں) جب کوئی جنازہ لایا جاتا اور وہ محسوس کرتے کہ اس کے ساتھ آنے والوں کی تعداد کم ہے تو انہیں تین صفوں میں تقسیم کر دیتے، پھر جنازہ پڑھاتے اور فرماتے کہ رسول اللہ صلی اللہ علیہ وسلم نے فرمایا: ”جس میت کا جنازہ مسلمانوں کی تین صفیں ادا کریں، اس کے لیے (مغفرت یا جنت) واجب ہو جاتی ہے۔“ [سنن ابن ماجه/كتاب الجنائز/حدیث: 1490]

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم کے پاس سے ایک جنازہ گزرا، لوگوں نے اس کی تعریف کی تو آپ صلی اللہ علیہ وسلم نے فرمایا: ”واجب ہوگئی۔“ پھر ایک اور جنازہ گزرا، اس کے بارے میں بری رائے ظاہر کی گئی تو رسول اللہ صلی اللہ علیہ وسلم نے فرمایا: ”واجب ہوگئی۔“ عرض کیا گیا: ”اے اللہ کے رسول! آپ نے اس کے حق میں بھی فرمایا: واجب ہوگئی اور اس کے حق میں بھی فرمایا: واجب ہوگئی (اس کا کیا مطلب ہے؟)“ آپ صلی اللہ علیہ وسلم نے فرمایا: ”لوگوں کی گواہی (اور اس کے نتیجے میں جنت ہے یا جہنم) مومن زمین میں اللہ کے گواہ ہیں۔“ [سنن ابن ماجه/كتاب الجنائز/حدیث: 1491]

حضرت ابوہریرہ رضی اللہ عنہ سے روایت ہے، انہوں نے فرمایا: نبی صلی اللہ علیہ وسلم کے پاس سے ایک جنازہ گزرا، اس کی اچھی عادتوں کی وجہ سے اس کی تعریف کی گئی تو آپ صلی اللہ علیہ وسلم نے فرمایا: ”واجب ہو گئی۔“ پھر لوگ ایک اور جنازہ لے کر گزرے تو اس کی بری عادتوں کی وجہ سے اس کے بارے میں بری رائے ظاہر کی گئی تو آپ صلی اللہ علیہ وسلم نے فرمایا: ”واجب ہو گئی، تم لوگ زمین میں اللہ کے گواہ ہو۔“ [سنن ابن ماجه/كتاب الجنائز/حدیث: 1492]