حضرت عبداللہ بن عباس رضی اللہ عنہما سے روایت ہے، نبی صلی اللہ علیہ وسلم نے فرمایا: «اَلْحَمْدُ لِلّٰهِ نَحْمَدُهُ، وَنَسْتَعِينُهُ، وَنَعُوذُ بِاللّٰهِ مِنْ شُرُورِ أَنْفُسِنَا، وَمِنْ سَيِّئَاتِ أَعْمَالِنَا، مَنْ يَهْدِهِ اللّٰهُ فَلَا مُضِلَّ لَهُ، وَمَنْ يُضْلِلْ فَلَا هَادِيَ لَهُ، وَأَشْهَدُ أَنْ لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، وَأَنَّ مُحَمَّدًا عَبْدُهُ وَرَسُولُهُ، أَمَّا بَعْدُ» ”سب تعریفیں اللہ کے لیے ہیں، ہم اس کی حمد کرتے ہیں، اس سے مدد مانگتے ہیں۔ اور ہم اپنے نفسوں کی شرارتوں سے اور اپنے اعمال کی برائی سے اس کی پناہ میں آتے ہیں۔ جسے اللہ ہدایت دے اسے کوئی گمراہ کرنے والا نہیں اور جسے اللہ ہدایت سے محروم رکھے اسے کوئی ہدایت دینے والا نہیں۔ میں گواہی دیتا ہوں کہ اکیلے اللہ کے سوا کوئی معبود نہیں، اس کا کوئی شریک نہیں، اور یہ کہ حضرت محمد صلی اللہ علیہ وسلم اس کے بندے اور اس کے رسول ہیں۔ اما بعد۔“ [سنن ابن ماجه/كتاب النكاح/حدیث: 1893]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اہمیت والا ہر وہ کام بے برکت ہے جسے اللہ کی تعریف سے شروع نہ کیا جائے۔“ [سنن ابن ماجه/كتاب النكاح/حدیث: 1894]

حضرت عائشہ رضی اللہ عنہا سے روایت ہے، نبی صلی اللہ علیہ وسلم نے فرمایا: ”اس نکاح کا اعلان کیا کرو اور اس موقع پر دَف بجایا کرو۔“ [سنن ابن ماجه/كتاب النكاح/حدیث: 1895]

حضرت محمد بن حاطب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”حلال اور حرام میں فرق نکاح کے موقع پر دف اور بلند آواز کا ہے۔“ [سنن ابن ماجه/كتاب النكاح/حدیث: 1896]

حضرت ابوحسین خالد مدنی رحمہ اللہ سے روایت ہے، انہوں نے کہا: ”عاشورا کے دن ہم مدینہ میں تھے۔ لڑکیاں دف بجا رہی تھیں اور گیت گا رہی تھیں۔ ہم حضرت ربیع بنت معوذ رضی اللہ عنہا کی خدمت میں حاضر ہوئے اور انہیں یہ بات بتائی۔“ انہوں نے فرمایا: ”میری شادی کی صبح رسول اللہ صلی اللہ علیہ وسلم میرے پاس تشریف لائے اور میرے پاس دو لڑکیاں گیت گا رہی تھیں، اور (شعروں میں) میرے ان بزرگوں کا ذکر کر رہی تھیں جو جنگ بدر میں شہید ہوئے۔ وہ جو شعر پڑھ رہی تھیں ان میں یہ فقرہ بھی تھا: «وَفِيْنَا نَبِيٌّ يَعْلَمُ مَا فِي غَدٍ» ”ہمارے اندر ایک نبی ہے جو جانتا ہے کل کیا ہونے والا ہے“۔ نبی صلی اللہ علیہ وسلم نے فرمایا: ”یہ بات نہ کہو۔ کل کی باتیں اللہ کے سوا کوئی نہیں جانتا“۔“ [سنن ابن ماجه/كتاب النكاح/حدیث: 1897]

حضرت عائشہ رضی اللہ عنہا سے روایت ہے، انہوں نے فرمایا: ”حضرت ابوبکر رضی اللہ عنہ میرے پاس تشریف لائے تو میرے پاس انصار کی دو لڑکیاں تھیں، وہ شعر ترنم سے پڑھ رہی تھیں جو انصاریوں نے جنگِ بعاث کے موقع پر ایک دوسرے کے خلاف کہے تھے۔ وہ (پیشہ ور) گانے والیاں نہیں تھیں۔ حضرت ابوبکر رضی اللہ عنہ نے (یہ حال دیکھ کر) فرمایا: ”نبی صلی اللہ علیہ وسلم کے گھر میں شیطانی راگ کا کیا کام؟“ یہ عید الفطر کا دن تھا تو نبی صلی اللہ علیہ وسلم نے فرمایا: ”ابوبکر! ہر قوم کی ایک عید ہوتی ہے، اور آج ہماری عید ہے۔““ [سنن ابن ماجه/كتاب النكاح/حدیث: 1898]

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم مدینہ کے ایک حصے (ایک محلے یا گلی) سے گزرے تو دیکھا کہ کچھ بچیاں دف بجا بجا کر گا رہی تھیں اور کہہ رہی تھیں: «نَحْنُ جَوَارٍ مِّنْ بَنِي النَّجَّارِ ... يَا حَبَّذَا مُحَمَّدٌ مِّنْ جَارِ» ”ہم قبیلہ بنو نجار کی لڑکیاں ہیں (اور ہمیں خوشی ہے کہ) حضرت محمد صلی اللہ علیہ وسلم (ہمارے) کتنے اچھے ہمسائے ہیں۔“ نبی صلی اللہ علیہ وسلم نے فرمایا: ”اللہ جانتا ہے کہ میں تم سے محبت رکھتا ہوں۔“ [سنن ابن ماجه/كتاب النكاح/حدیث: 1899]

حضرت عبداللہ بن عباس رضی اللہ عنہ سے روایت ہے کہ ام المومنین حضرت عائشہ رضی اللہ عنہا نے اپنی ایک رشتہ دار انصاری لڑکی کی شادی کی۔ رسول اللہ صلی اللہ علیہ وسلم تشریف لائے اور فرمایا: ”تم لوگوں نے لڑکی کو رخصت کر دیا؟“ انہوں نے کہا: ”جی ہاں۔“ فرمایا: ”کیا تم نے اس کے ساتھ کسی کو بھیجا ہے جو گیت گائے؟“ ام المومنین رضی اللہ عنہا نے کہا: ”جی نہیں۔“ رسول اللہ صلی اللہ علیہ وسلم نے فرمایا: ”انصار لوگ گیت وغیرہ پسند کرتے ہیں۔ (بہتر ہوتا) اگر تم اس کے ساتھ (کسی کو) بھیجتے جو کہتا: «أَتَيْنَاكُمْ أَتَيْنَاكُمْ، فَحَيَّانَا وَحَيَّاكُمْ» ”ہم تمہارے پاس آئے ہیں، ہم تمہارے پاس آئے ہیں، ہمیں بھی مبارک، تمہیں بھی مبارک۔“” [سنن ابن ماجه/كتاب النكاح/حدیث: 1900]

حضرت مجاہد رحمہ اللہ سے روایت ہے، انہوں نے فرمایا: ”میں حضرت عبداللہ بن عمر رضی اللہ عنہ کے ساتھ تھا کہ انہیں ڈھول کی آواز سنائی دی۔ انہوں نے کانوں میں انگلیاں دے لیں اور (راستے سے) ایک طرف ہٹ گئے۔ (تاکہ آواز سے زیادہ دور ہو جائیں۔) انہوں نے تین بار ایسا ہی کیا۔ پھر فرمایا: ”رسول اللہ صلی اللہ علیہ وسلم نے بھی اسی طرح کیا تھا۔““ [سنن ابن ماجه/كتاب النكاح/حدیث: 1901]

حضرت زینب بنت ام سلمہ رضی اللہ عنہا (اپنی والدہ) ام المومنین ام سلمہ رضی اللہ عنہا سے روایت کرتے ہوئے فرماتی ہیں کہ رسول اللہ صلی اللہ علیہ وسلم ان کے پاس تشریف لائے تو (گھر میں) ایک مخنث کو حضرت عبداللہ بن ابوامیہ رضی اللہ عنہ سے یہ کہتے سنا: ”اگر اللہ نے کل طائف کی فتح نصیب فرمائی تو میں تجھے ایک عورت دکھاؤں گا جو (اتنی موٹی ہے کہ) آتی ہے تو چار بل پڑتے (نظر آتے) ہیں، جاتی ہے تو آٹھ بل پڑتے (نظر آتے) ہیں۔ (بہت موٹی اور خوب صورت ہے۔)“ تو رسول اللہ صلی اللہ علیہ وسلم نے فرمایا: ”اسے گھروں سے نکال دو۔“ [سنن ابن ماجه/كتاب النكاح/حدیث: 1902]