حضرت انس بن مالک رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جسے کسی جانب سے (کسی پیشے، علاقے، ملازمت وغیرہ سے) کچھ (رزق) ملے تو اسے چاہیے کہ اس (پیشےوغیرہ) کو اختیار کیے رکھے۔“ [سنن ابن ماجه/كتاب التجارات/حدیث: 2147]

حضرت نافع رضی اللہ عنہ سے روایت ہے، انہوں نے فرمایا: ”میں شام اور مصر کی طرف سامانِ تجارت بھیجا کرتا تھا، (ایک بار) میں نے عراق کی طرف سامان بھیج دیا، پھر میں ام المؤمنین حضرت عائشہ رضی اللہ عنہا کی خدمت میں حاضر ہوا اور کہا: ”ام المؤمنین! میں شام کی طرف سامان بھیجا کرتا تھا۔ اب میں نے عراق کی طرف سامان بھیجا ہے۔“ انہوں نے فرمایا: ”ایسا نہ کرو، تمہارے (سابقہ) مقامِ تجارت کو کیا ہو گیا؟ میں نے رسول اللہ صلی اللہ علیہ وسلم سے یہ ارشادِ مبارک سنا ہے: ”جب اللہ تعالیٰ تم میں سے کسی کے لیے ایک طرف سے رزق کا سبب پیدا کرے تو وہ اسے اس وقت تک ترک نہ کرے جب تک اس میں تغیر یا خرابی پیدا نہ ہو جائے۔“““ [سنن ابن ماجه/كتاب التجارات/حدیث: 2148]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ نے کوئی نبی ایسا مبعوث نہیں فرمایا جو بکریاں چرانے والا نہ ہو۔“ صحابہ کرام رضی اللہ عنہم نے کہا: ”اللہ کے رسول! آپ بھی (گلہ بانی کرتے رہے ہیں؟)“ آپ صلی اللہ علیہ وسلم نے فرمایا: ”میں بھی (بکریاں چراتا رہا ہوں۔) میں «قَرَارِيطَ» ”قیراطوں“ کے بدلے میں مکہ والوں کی بکریاں چرایا کرتا تھا۔“ (امام ابن ماجہ کے استاد) حضرت سوید بن سعید رحمہ اللہ نے فرمایا: ”یعنی ہر بکری (کی دیکھ بھال) کی اجرت ایک قیراط ہوتی تھی۔“ [سنن ابن ماجه/كتاب التجارات/حدیث: 2149]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”حضرت زکریا علیہ السلام بڑھئی تھے۔“ [سنن ابن ماجه/كتاب التجارات/حدیث: 2150]

ام المومنین حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”بلاشبہ تصویریں بنانے والوں کو قیامت کے دن عذاب ہو گا۔ انہیں کہا جائے گا جو کچھ تم نے (اپنے خیال کے مطابق) پیدا کیا تھا، اسے زندہ بھی کرو۔“ [سنن ابن ماجه/كتاب التجارات/حدیث: 2151]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”سب سے زیادہ جھوٹ بولنے والے رنگریز اور زرگر ہوتے ہیں۔“ [سنن ابن ماجه/كتاب التجارات/حدیث: 2152]

حضرت عمر بن خطاب رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”بازار میں مال لانے والے کو رزق ملتا ہے اور ذخیرہ اندوزی کرنے والا ملعون ہے۔“ [سنن ابن ماجه/كتاب التجارات/حدیث: 2153]

حضرت معمر بن عبداللہ بن نضلہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”گناہ گار ہی ذخیرہ اندوزی کرتا ہے۔“ [سنن ابن ماجه/كتاب التجارات/حدیث: 2154]

حضرت عمر بن خطاب رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کو یہ فرماتے سنا: ”جو مسلمانوں سے کھانے پینے کی چیزوں کی ذخیرہ اندوزی کرے گا، اللہ تعالیٰ اسے جذام اور افلاس میں مبتلا کرے گا“۔“ [سنن ابن ماجه/كتاب التجارات/حدیث: 2155]

حضرت ابوسعید خدری رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے ہم تیس سواروں کو ایک فوجی مہم پر بھیجا۔ (راستے میں) ہم کچھ لوگوں کے ہاں (ان کی بستی میں) ٹھہرے۔ ہم نے ان سے کھانا مانگا، انہوں نے (ہماری مہمانی کرنے سے) انکار کر دیا۔ (پھر ایسا ہوا کہ) ان کے سردار کو بچھو نے کاٹ لیا، چنانچہ وہ لوگ ہمارے پاس آئے اور کہا: ”کیا تم میں سے کوئی شخص بچھو کاٹے کا دم کر سکتا ہے؟“ میں نے کہا: ”ہاں، میں (کر سکتا ہوں) لیکن جب تک تم ہمیں بکریاں نہیں دو گے میں اسے دم نہیں کروں گا۔“ انہوں نے فرمایا: ”ہم تمہیں تیس بکریاں دیں گے (تم دم کر دو)۔“ ہم نے ان کی یہ پیش کش قبول کر لی۔ میں نے سات بار سورہ فاتحہ پڑھ کر اس (مریض) پر دم کیا تو وہ صحت یاب ہو گیا اور ہم نے بکریاں وصول کر لیں، ہمارے دل میں شک پیدا ہوا۔ (معلوم نہیں، یہ بکریاں لینا جائز تھا یا نہیں) ہم نے کہا: ”جلدی نہ کرو حتیٰ کہ ہم نبی صلی اللہ علیہ وسلم کی خدمت میں حاضر ہو جائیں۔“ جب ہم لوگ حاضر خدمت ہوئے تو میں نے آپ صلی اللہ علیہ وسلم کو بتایا کہ میں نے یہ کام کیا ہے۔ آپ صلی اللہ علیہ وسلم نے فرمایا: ”کیا تجھے معلوم نہ تھا کہ یہ (سورت) دم ہے؟ بکریاں تقسیم کر لو اور میرا بھی حصہ رکھو۔““ [سنن ابن ماجه/كتاب التجارات/حدیث: 2156]