ام المؤمنین عائشہ صدیقہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”انسان کا بہترین کھانا وہ ہے جو اس کی کمائی سے (حاصل) ہو، اور اس کی اولاد بھی اس کی کمائی ہے۔“ [سنن ابن ماجه/كتاب التجارات/حدیث: 2137]

حضرت مقدام بن معدیکرب زبیدی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کوئی آدمی اپنے ہاتھ کی کمائی سے زیادہ پاکیزہ (اور عمدہ) روزی حاصل نہیں کر سکتا اور آدمی اپنی ذات پر، اپنے بیوی بچوں پر اور اپنے خدام پر جو کچھ بھی خرچ کرتا ہے، وہ صدقہ ہوتا ہے۔“ [سنن ابن ماجه/كتاب التجارات/حدیث: 2138]

حضرت عبداللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”دیانت دار، سچا مسلمان تاجر قیامت کے دن شہیدوں کے ساتھ ہو گا۔“ [سنن ابن ماجه/كتاب التجارات/حدیث: 2139]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”بیوہ اور مسکین (کی ضروریات پوری کرنے) کے لیے دوڑ دھوپ کرنے والا، اللہ کی راہ میں جہاد کرنے والے کی طرح ہے، اور اس شخص کی طرح ہے جو رات کو قیام کرتا اور دن کو روزہ رکھتا ہے۔“ [سنن ابن ماجه/كتاب التجارات/حدیث: 2140]

حضرت معاذ بن عبداللہ رحمہ اللہ اپنے والد (حضرت عبداللہ بن خبیب رضی اللہ عنہ) سے اور وہ اپنے چچا (حضرت عبید رضی اللہ عنہ) سے روایت کرتے ہیں کہ انہوں نے فرمایا: ”ہم لوگ ایک مجلس میں موجود تھے کہ نبی صلی اللہ علیہ وسلم تشریف لے آئے۔ آپ کے سر مبارک پر پانی کا اثر تھا (غسل فرما کر تشریف لائے تھے۔) بعض لوگوں نے عرض کیا: ”آج ہم آپ کو خوش دیکھ رہے ہیں۔“ آپ صلی اللہ علیہ وسلم نے فرمایا: ”ہاں، اللہ کا شکر ہے۔“ پھر لوگوں نے خوشحالی (اور دولت مندی) کا ذکر چھیڑا تو آپ صلی اللہ علیہ وسلم نے فرمایا: ”متقی آدمی کے لیے دولت مند ہونے میں کوئی حرج نہیں۔ اور متقی کے لیے صحت دولت سے بہتر ہے۔ اور طبیعت خوش ہونا بھی (اللہ) کی نعمت ہے۔““ [سنن ابن ماجه/كتاب التجارات/حدیث: 2141]

حضرت ابوحمید (منذر بن سعد) ساعدی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”دنیا کے حصول کے لیے اچھا طریقہ اختیار کرو۔ ہر انسان کے لیے وہ کام آسان ہو جاتا ہے جس کے لیے وہ پیدا کیا گیا ہے۔“ [سنن ابن ماجه/كتاب التجارات/حدیث: 2142]

حضرت انس بن مالک رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”سب سے زیادہ پریشانی اس مومن کو ہوتی ہے جو اپنی دنیا کے معاملات کی بھی فکر کرتا ہے اور اپنی آخرت کے معاملات کی بھی۔“ امام ابن ماجہ رحمہ اللہ بیان کرتے ہیں کہ: ”یہ حدیث غریب ہے، اسے صرف اسماعیل (بن بہرام) نے روایت کیا ہے۔“ [سنن ابن ماجه/كتاب التجارات/حدیث: 2143]

حضرت جابر بن عبداللہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اے لوگو! اللہ سے ڈرو اور اچھے طریقے سے (اعتدال کے ساتھ) روزی طلب کرو کیونکہ کوئی انسان اپنا رزق پورا کیے بغیر نہیں مرے گا اگرچہ اس (رزق کے حصول) میں دیر ہو جائے۔ چنانچہ اللہ سے ڈرو اور اچھے طریقے سے روزی طلب کرو۔ جو حلال ہے، وہ لے لو اور جو حرام ہے، وہ چھوڑ دو۔“ [سنن ابن ماجه/كتاب التجارات/حدیث: 2144]

حضرت قیس بن ابو غزرہ رضی اللہ عنہ سے روایت ہے، انہوں نے فرمایا: ”ہم لوگ رسول اللہ صلی اللہ علیہ وسلم کے زمانہ مبارک میں دلال کہلاتے تھے۔ رسول اللہ صلی اللہ علیہ وسلم ہمارے پاس سے گزرے تو آپ نے ہمارا اس سے بہتر نام رکھ دیا۔“ آپ صلی اللہ علیہ وسلم نے فرمایا: ”اے تاجروں کی جماعت! خریدو فروخت میں قسمیں کھائی جاتی ہیں اور فضول باتیں ہو جاتی ہیں، (اس لیے) اس کے ساتھ ساتھ صدقہ بھی کرتے رہا کرو۔“ [سنن ابن ماجه/كتاب التجارات/حدیث: 2145]

حضرت اسماعیل بن عبید اپنے والد (حضرت عبید بن رفاعہ) رضی اللہ عنہ سے اور وہ ان کے دادا (اپنے والد) حضرت رفاعہ بن رافع بن مالک رضی اللہ عنہ سے روایت کرتے ہیں، انہوں نے فرمایا: ”ہم لوگ رسول اللہ صلی اللہ علیہ وسلم کے ساتھ باہر گئے۔ لوگ صبح کے وقت خرید و فروخت میں مشغول تھے۔ آپ صلی اللہ علیہ وسلم نے انہیں آواز دی: ”اے تاجروں کی جماعت!“ جب ان لوگوں نے نظریں اٹھائیں اور گردنیں لمبی کیں (اور نبی صلی اللہ علیہ وسلم کی طرف متوجہ ہو گئے) تو آپ صلی اللہ علیہ وسلم نے فرمایا: ”تاجر لوگ قیامت کے دن فاجر (اور گناہ گار) بن کر اٹھیں گے، سوائے اس کے جو اللہ سے ڈرتا رہا اور اس نے نیکی کی اور سچ بولا۔ (یعنی جھوٹ اور دھوکے سے پرہیز کیا)۔““ [سنن ابن ماجه/كتاب التجارات/حدیث: 2146]