حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بیع باہمی رضا مندی سے ہوتی ہے۔“ [سنن ابن ماجه/كتاب التجارات/حدیث: 2185]

حضرت قاسم بن عبدالرحمٰن رضی اللہ عنہ اپنے والد (حضرت عبدالرحمٰن بن عبداللہ بن مسعود) سے روایت کرتے ہوئے فرماتے ہیں کہ حضرت عبداللہ بن مسعود رضی اللہ عنہ نے سرکاری غلاموں میں سے ایک غلام حضرت اشعث بن قیس رضی اللہ عنہ کے ہاتھ فروخت کیا۔ بعد میں ان کا آپس میں اختلاف ہو گیا۔ حضرت عبداللہ بن مسعود رضی اللہ عنہ نے کہا: ”میں نے آپ کو (وہ غلام) بیس ہزار کا فروخت کیا تھا۔“ حضرت اشعث بن قیس رضی اللہ عنہ نے کہا: ”میں نے آپ سے دس ہزار کا خریدا تھا۔“ حضرت عبداللہ رضی اللہ عنہ نے فرمایا: ”اگر آپ چاہیں تو میں آپ کو ایک حدیث سناؤں جو میں نے رسول اللہ صلی اللہ علیہ وسلم سے سنی تھی۔“ انہوں نے کہا: ”سنا دیجئے۔“ حضرت عبداللہ بن مسعود رضی اللہ عنہ نے فرمایا: ”میں نے رسول اللہ صلی اللہ علیہ وسلم سے سنا آپ فرما رہے تھے: ”جب بیچنے والے اور خریدنے والے میں اختلاف ہو جائے اور ان میں سے کسی کے پاس گواہ نہ ہو، اور بیع شدہ چیز بعینہ موجود ہو تو بیچنے والے کا قول تسلیم کیا جائے گا (اور بیع قائم رہے گی) یا وہ دونوں بیع کو فسخ کر دیں گے۔““ حضرت اشعث رضی اللہ عنہ نے کہا: ”میرا خیال ہے کہ میں یہ سودا فسخ کر دوں“، چنانچہ حضرت عبداللہ بن مسعود رضی اللہ عنہ نے بیع فسخ کر کے غلام واپس لے لیا۔ [سنن ابن ماجه/كتاب التجارات/حدیث: 2186]

حضرت حکیم بن حزام رضی اللہ عنہ سے روایت ہے، انہوں نے فرمایا: ”میں نے عرض کیا: اے اللہ کے رسول صلی اللہ علیہ وسلم ! ایک شخص مجھ سے کوئی چیز خریدنا چاہتا ہے جبکہ وہ چیز میرے پاس موجود نہیں، کیا میں اسے وہ چیز بیچ دوں؟“ آپ صلی اللہ علیہ وسلم نے فرمایا: ”جو چیز تیرے پاس نہیں، وہ فروخت نہ کر۔“ [سنن ابن ماجه/كتاب التجارات/حدیث: 2187]

حضرت عمرو بن شعیب رضی اللہ عنہ اپنے والد (شعیب بن محمد) سے، اور وہ اپنے دادا حضرت عبداللہ بن عمرو بن عاص رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جو چیز تیرے پاس نہیں، اسے بیچنا جائز نہیں، اور جس کی ذمہ داری قبول نہیں کی گئی، اس پر نفع لینا بھی جائز نہیں۔“ [سنن ابن ماجه/كتاب التجارات/حدیث: 2188]

حضرت عتاب بن اسید رضی اللہ عنہ سے روایت ہے کہ جب رسول اللہ صلی اللہ علیہ وسلم نے انہیں مکہ (گورنر بنا کر) بھیجا تو انہیں ”اس چیز کا نفع لینے سے منع فرمایا جس کی ذمے داری قبول نہ کی گئی ہو“۔ [سنن ابن ماجه/كتاب التجارات/حدیث: 2189]

حضرت عقبہ بن عامر رضی اللہ عنہ یا حضرت سمرہ بن جندب رضی اللہ عنہ سے روایت ہے، نبی صلی اللہ علیہ وسلم نے فرمایا: ”جو شخص دو آدمیوں سے بیع کرے تو وہ ان دونوں میں سے پہلے آدمی کی ہو گی۔“ [سنن ابن ماجه/كتاب التجارات/حدیث: 2190]

حضرت سمرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب دو صاحبِ اختیار بیع کریں تو وہ پہلے کی ہے۔“ [سنن ابن ماجه/كتاب التجارات/حدیث: 2191]

حضرت عبداللہ بن عمرو بن عاص رضی اللہ عنہما سے روایت ہے کہ نبی صلی اللہ علیہ وسلم نے «بَیْعُ الْعُرْبَانِ» (بیعانہ کے ساتھ لین دین کرنے) سے منع فرمایا ہے۔ [سنن ابن ماجه/كتاب التجارات/حدیث: 2192]

حضرت عبداللہ بن عمرو بن عاص رضی اللہ عنہما سے روایت ہے کہ نبی صلی اللہ علیہ وسلم نے «بَيْعِ الْعُرْبَانِ» ”بیع عربان سے منع فرمایا ہے۔“ ابوعبداللہ (امام ابن ماجہ رحمہ اللہ) نے فرمایا: ”بیع عربان اسے کہتے ہیں کہ ایک آدمی کوئی جانور سو دینار کا خریدے اور اسے (بیچنے والے کو) دو دینار بیعانہ دے دے اور کہے: اگر میں نے یہ جانور نہ خریدا تو یہ دو دینار تیرے ہوں گے۔ ایک قول کے مطابق اس کا مطلب، «وَاللّٰهُ أَعْلَمُ»، یہ ہے کہ آدمی کوئی بھی چیز خریدے اور بیچنے والے کو ایک درہم یا کم و بیش (پیشگی) ادا کر دے اور کہے: اگر میں نے یہ سودا لے لیا (اور بیع فسخ نہ کی) تو ٹھیک ہے ورنہ یہ درہم تیرا ہو گا۔“ [سنن ابن ماجه/كتاب التجارات/حدیث: 2193]

حضرت ابوہریرہ رضی اللہ عنہ سے روایت ہے، انہوں نے بیان کیا: ”رسول اللہ صلی اللہ علیہ وسلم نے دھوکے کی بیع اور کنکری کی بیع سے منع فرمایا۔“ [سنن ابن ماجه/كتاب التجارات/حدیث: 2194]