حضرت عبداللہ بن عباس رضی اللہ عنہما سے روایت ہے، انہوں نے کہا: ”رسول اللہ صلی اللہ علیہ وسلم نے دھوکے کی بیع سے منع فرمایا۔“ [سنن ابن ماجه/كتاب التجارات/حدیث: 2195]

حضرت ابو سعید خدری رضی اللہ عنہ سے روایت ہے، انہوں نے کہا: ”رسول اللہ صلی اللہ علیہ وسلم نے جانوروں کے پیٹ کے بچے خریدنے سے منع فرمایا جب تک وہ پیدا نہ ہو جائیں، اور ان کے تھنوں میں موجود (دودھ) کو خریدنے سے منع فرمایا مگر ماپ کر، اور غلام کو خریدنے سے منع فرمایا جبکہ وہ مفرور ہو، اور غنیمت کی اشیاء خریدنے سے منع فرمایا حتیٰ کہ وہ تقسیم ہو جائیں، اور صدقات کی اشیاء خریدنے سے منع فرمایا حتیٰ کہ وہ (مستحقین کے) قبضے میں آ جائیں، اور غوطہ مارنے والے کے غوطے (سے حاصل ہونے والی چیز کی پیشگی خریداری) سے منع فرمایا۔“ [سنن ابن ماجه/كتاب التجارات/حدیث: 2196]

حضرت عبداللہ بن عمر رضی اللہ عنہ سے روایت ہے کہ نبی صلی اللہ علیہ وسلم نے ”حمل کا حمل بیچنے“ سے منع فرمایا۔ [سنن ابن ماجه/كتاب التجارات/حدیث: 2197]

حضرت انس بن مالک رضی اللہ عنہ سے روایت ہے کہ ایک انصاری آدمی نے نبی صلی اللہ علیہ وسلم کی خدمت میں حاضر ہو کر (مالی تعاون کا) سوال کیا۔ آپ صلی اللہ علیہ وسلم نے فرمایا: ”کیا تمہارے گھر میں تمہاری کوئی چیز موجود ہے؟“ اس نے کہا: ”جی ہاں! ایک کمبل ہے، ہم آدھا نیچے بچھاتے ہیں اور آدھا اوڑھ لیتے ہیں اور ایک پیالہ ہے جس میں پانی پیتے ہیں۔“ آپ صلی اللہ علیہ وسلم نے فرمایا: ”دونوں چیزیں میرے پاس لے آؤ۔“ وہ انہیں لے کر حاضر ہوا تو اللہ کے رسول صلی اللہ علیہ وسلم نے انہیں اپنے ہاتھ میں لیا اور فرمایا: ”یہ دونوں چیزیں کون خریدتا ہے؟“ ایک آدمی نے کہا: ”میں انہیں ایک درہم میں خریدتا ہوں۔“ آپ صلی اللہ علیہ وسلم نے دو تین بار فرمایا: ”ایک درہم سے زیادہ کون دیتا ہے؟“ ایک آدمی نے کہا: ”میں انہیں دو درہم میں خریدتا ہوں۔“ آپ صلی اللہ علیہ وسلم نے اسے دونوں چیزیں دے کر دو درہم لے لیے اور اس انصاری صحابی کو دے دیے، اور فرمایا: ”ایک درہم کا کھانے پینے کا سامان لے کر گھر والوں کو دے دو اور دوسرے درہم کا کلہاڑا خرید کر میرے پاس لاؤ۔“ اس نے ایسے ہی کیا۔ رسول اللہ صلی اللہ علیہ وسلم نے کلہاڑا لے کر اس میں اپنے ہاتھ سے دستہ لگایا اور فرمایا: ”جاؤ (جنگل سے) ایندھن کی لکڑیاں لایا کرو (اور بیچ کر ضروریات پوری کرو) اور پندرہ دن تک میں تمہیں نہ دیکھوں۔“ وہ ایندھن لا کر بیچنے لگا۔ (اس کے بعد) وہ حاضر ہوا تو اس کے پاس دس درہم (جمع ہو چکے) تھے۔ آپ صلی اللہ علیہ وسلم نے فرمایا: ”کچھ رقم کا کھانے کا سامان خرید لو اور کچھ رقم کا کپڑا خرید لو۔“ پھر فرمایا: ”یہ کام (محنت سے روزی کمانا) تیرے لیے اس بات سے بہت بہتر ہے کہ تو قیامت کے دن آئے تو مانگنے کی وجہ سے تیرا چہرہ داغ دار ہو۔ مانگنا صرف اس کے لیے جائز ہے جسے مفلسی خاک نشین کر دے، یا جو انتہائی مقروض ہو، یا جو خون کی وجہ سے پریشان ہو۔ (جس سے قتل سرزد ہو گیا ہو اور وہ دیت ادا کرنے کی طاقت نہ رکھتا ہو)۔“ [سنن ابن ماجه/كتاب التجارات/حدیث: 2198]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی مسلمان کی بیع واپس کر لے گا تو اللہ تعالیٰ قیامت کے دن اس کے گناہ معاف فرما دے گا۔“ [سنن ابن ماجه/كتاب التجارات/حدیث: 2199]

حضرت انس بن مالک رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کے زمانے میں (ایک بار اشیاء کے) بھاؤ چڑھ گئے۔ لوگوں نے عرض کیا: ”اے اللہ کے رسول صلی اللہ علیہ وسلم ! بھاؤ چڑھ گئے ہیں، آپ صلی اللہ علیہ وسلم (اشیاء کے) بھاؤ مقرر کر دیجئے۔“ آپ صلی اللہ علیہ وسلم نے فرمایا: «إِنَّ اللهَ هُوَ الْمُسَعِّرُ الْقَابِضُ الْبَاسِطُ الرَّزَّاقُ» ”اللہ تعالیٰ بھاؤ مقرر کرنے والا ہے، وہی تنگی کرنے والا، فراخی کرنے والا اور رازق ہے۔ مجھے امید ہے کہ میں جب اپنے رب سے ملوں گا تو کوئی شخص جان و مال کے بارے میں ظلم کی بنا پر مجھ سے کوئی مطالبہ کرنے والا نہیں ہو گا۔“ [سنن ابن ماجه/كتاب التجارات/حدیث: 2200]

حضرت ابوسعید رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کے زمانہ مبارک میں بھاؤ چڑھ گئے تو صحابہ کرام رضی اللہ عنہم نے عرض کیا: ”اللہ کے رسول صلی اللہ علیہ وسلم ! کاش آپ قیمتیں مقرر فرما دیتے۔“ آپ صلی اللہ علیہ وسلم نے فرمایا: ”مجھے امید ہے کہ میں تم سے جدا ہوں گا تو کوئی شخص مجھ سے کسی ظلم کی تلافی کا طلب گار نہیں ہو گا، جو ظلم میں نے اس پر کیا ہو۔“ [سنن ابن ماجه/كتاب التجارات/حدیث: 2201]

حضرت عثمان بن عفان رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ نے ایک آدمی کو جنت میں داخل کر دیا، وہ بیچتے وقت بھی نرمی کرتا تھا اور خریدتے وقت بھی۔“ [سنن ابن ماجه/كتاب التجارات/حدیث: 2202]

حضرت جابر بن عبداللہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اللہ تعالیٰ اس بندے پر رحم فرمائے جو بیچتے وقت نرمی کرتا ہے، خریدتے وقت نرمی کرتا ہے اور جب تقاضا کرتا ہے تو نرمی کرتا ہے۔“ [سنن ابن ماجه/كتاب التجارات/حدیث: 2203]

حضرت قیلہ اُمِّ بنی انمار رضی اللہ عنہا سے روایت ہے، انہوں نے فرمایا: ”میں رسول اللہ صلی اللہ علیہ وسلم کے کسی عمرے کے دوران مروہ کے قریب حاضرِ خدمت ہوئی۔ میں نے عرض کیا: اے اللہ کے رسول صلی اللہ علیہ وسلم ! میں خرید و فروخت کرنے والی عورت ہوں۔ میں جب کوئی چیز خریدنا چاہتی ہوں تو میں جو (قیمت ادا کرنا) چاہتی ہوں، اس سے کم پر بات کرتی ہوں، پھر بڑھتے بڑھتے اس قیمت پر پہنچ جاتی ہوں جو میرا (اصل) ارادہ ہوتا ہے۔ اور جب میں کوئی چیز بیچنا چاہتی ہوں تو میں جو (قیمت وصول کرنا) چاہتی ہوں، اس سے زیادہ کی بات کرتی ہوں، پھر کم کرتے کرتے اس قیمت تک پہنچ جاتی ہوں جو میرا ارادہ ہوتا ہے۔ (کیا یہ جائز ہے؟) رسول اللہ صلی اللہ علیہ وسلم نے فرمایا: قیلہ! ایسے نہ کیا کرو۔ جب کوئی چیز خریدنا چاہو تو وہی قیمت پیش کرو جو تمہارا ارادہ ہے، خواہ تمہیں وہ چیز (اس قیمت پر) ملے یا نہ ملے۔ اور فرمایا: جب تم کوئی چیز بیچنا چاہو تو وہی قیمت طلب کرو جو تمہارا ارادہ ہے، پھر خواہ (اس قیمت پر گاہک کے رضامند ہونے پر) فروخت کرو یا (اس کے رضامند نہ ہونے پر) فروخت نہ کرو۔“ [سنن ابن ماجه/كتاب التجارات/حدیث: 2204]